23 октября.

Канон святым 26-ти преподобномучеником Зографским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподобному́чеников, гла́с 1:

Преподобнострада́льный богоизбра́нный по́лк два́десять и шести́ боже́ственных, оби́тели Зогра́фския отце́в, изобличи́вших лати́нское заблужде́ние, и ну́жную сме́рть огне́м на столпе́ претерпе́вших: Фому́ пастыренача́льника, и свяще́ннаго Варсану́фия, со сла́вным Парфе́нием и про́чиих сострада́льцев, вси́ в то́йже оби́тели живу́щии, собра́вшеся пе́сньми почти́м; си́и бо Тро́ице о на́с мо́лятся.

Ин тропа́рь отце́в, гла́с то́йже:

До́блих страстоте́рпцев и тве́рдых адама́нтов, сквозе́ о́гнь проше́дших и пре́лесть испепели́вших, два́десять и ше́сть отце́в с преподо́бным Космо́ю, оби́тели защи́тников и блюсти́телей, благохва́ляще согла́сно от души́ воззове́м: сла́ва Укре́пльшему ва́с, сла́ва Уди́вльшему вы́, сла́ва Да́рующему ва́ми все́м исцеле́ния.

Велича́ние святы́м:

Ублажа́ем ва́с, святи́и преподобному́ченицы, и чте́м святу́ю па́мять ва́шу, наста́вницы мона́хов, и собесе́дницы Ангелом.

Кано́н святы́м пе́рвый. Гла́с 1.

Пе́снь 1.

Ирмос: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Припев: Святии преподобномученицы, моли́те Бо́га о нас.

Честны́х преподобному́чеников торжество́, ра́дующеся дне́сь, Зогра́фския оби́тели мона́шествующии, соверши́м и Го́споду приле́жно помо́лимся, я́ко да моли́твами си́х, небе́сныя ра́дости сподо́бимся.

Припев: Святии преподобномученицы, моли́те Бо́га о нас.

Сы́нове Бо́жии по прича́стию бы́сте, тве́рдии преподобнострада́льцы, лати́н же гнилу́ю пре́лесть злосла́вия изобличи́вше, и огне́м испепели́вшеся, сугу́бым венце́м от Христа́ венча́стеся.

Сла́ва Отцу́ и Сы́ну и Свято́му Ду́ху:

Ума́ тве́рдостию, сла́внии, Ду́ха от Отца́ исходя́ща, я́коже Спа́с рече́, та́ко испове́давше, папи́сты я́ко нововводя́щия, изобличи́сте, му́дрии, и посрами́сте.

И ны́не и при́сно и во ве́ки веко́в. Ами́нь.

Богородичен: Бо́жию го́ру, от нея́же отсече́ся ка́мень краеуго́льный, в соедине́нии приводя́й неизрече́нное, пре́жде разстоя́щая, и́стинную Бо́жию Ма́терь, я́ко вино́вную на́шего исправле́ния, почти́м.

Пе́снь 3.

Ирмос: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

Припев: Святии преподобномученицы, моли́те Бо́га о нас.

Пе́сньми боже́ственными да похва́лится боже́ственное сосло́вие, свяще́нных преподобному́чеников оби́тели Зогра́фския, сугу́бым бо венце́м венча́шася, я́ко по́стницы и тве́рдии страда́льцы су́ще, треблаже́ннии.

Припев: Святии преподобномученицы, моли́те Бо́га о нас.

Ра́зумом тверде́йшим Михе́й и Си́мон до́блествоваша, со Иларио́ном и Кири́ллом, Евфи́мием и все́ми два́десять и шестьми́, и́хже дне́сь восхваля́юще в ра́достных пе́снех, Го́спода сла́вим.

Сла́ва Отцу́ и Сы́ну и Свято́му Ду́ху:

Единотерпе́ние во мно́зех телесе́х показа́вше преподобнострада́льнии отцы́ оби́тели Зогра́фския, лати́ны лю́тыя посрами́ша, и венцы́ побе́дными главы́ и́х венча́шася.

И ны́не и при́сно и во ве́ки веко́в. Ами́нь.

Богородичен: Неизрече́нный о́браз зача́тия и рожде́ния Твоего́, Де́во Богоро́дице, необыме́ннаго бо все́ми Сы́на Бо́жия зачала́ еси́, и без се́мене ро́ждши, Чи́стая, пребыва́еши Присноде́ва.

Седа́лен святы́х, гла́с 8.

Кре́ст Христо́в на ра́мо взе́мше, блаже́ннии отцы́ два́десять и ше́сть, по́стничеством к нему́ прилепи́стеся, но вра́г, зави́дяй доброде́тельному житию́ ва́шему, воздви́же на вы́ суро́выя лати́ны, мня́ осла́бити по́стничества ва́шего тве́рдость, но обличи́ся того́ ухищре́ние, я́ко изря́днейше пострада́вше. Моли́теся Христу́ Бо́гу прегреше́ний оставле́нию дарова́тися, пра́зднующим любо́вию святу́ю па́мять ва́шу.

Сла́ва, И ны́не, Богородичен:

Солнцезра́чная колесни́це Дави́дова, порфиропо́сланный о́др Соломо́нов, сви́ток богоначерта́нный Иса́иин, и одушевле́нная ски́ния Моисе́ева, и стена́ адама́нтская Аммо́сова, Ты́ была́ еси́, свети́льник златокова́нный Заха́риев, Дании́лова же гора́, дщи́ца желтобе́лая Авваку́мова, и превосхо́дное проро́ков оглаше́ние. Моли́ся Сы́ну Твоему́ и Бо́гу прегреше́ний оставле́ние дарова́ти, благогове́йно покланя́ющимся боже́ственному о́бразу Твоему́.

Пе́снь 4.

Ирмос: Же́зл из ко́рене Иессе́ева и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Припев: Святии преподобномученицы, моли́те Бо́га о нас.

Веду́щею стезе́ю к жи́зни по́стнически ше́ствовавше, страда́льческое благосла́вие улучи́ша, два́десять и ше́сть Зогра́фския оби́тели отцы́, обличи́вше му́жественно пре́лесть Михаи́ла безбо́жнаго.

Припев: Святии преподобномученицы, моли́те Бо́га о нас.

Тле́нную сла́ву и пи́щу, отцы́, оста́вльше, во оби́тели Зогра́фстей подвиза́стеся и лати́ном тве́рдо сопротивля́ющеся, чти́ти принужда́ющим ри́мскаго бо́га, и же́ртвы огне́м соверше́нныя Бо́гу принесо́стеся.

Сла́ва Отцу́ и Сы́ну и Свято́му Ду́ху:

Глаго́лы свяще́нными, пе́т бу́ди Фома́ свяще́ннейший, оби́тели Зогра́фския игу́мен, и вси́ и́же с ни́м, на высоте́ столпа́ посрами́вшии латиному́дренныя враги́, и Ве́кка злочести́ваго, я́ко нововводя́щия злоупотребле́ния.

И ны́не и при́сно и во ве́ки веко́в. Ами́нь.

Богородичен: Врата́, ши́ршая небе́с и престо́л ве́мы Тя́, серафи́м превы́сшую, Всечи́стая, Его́же бо вся́ческая не вмеща́ют я́ко Бо́га, вмести́ла еси́ и но́сиши на объя́тиих я́ко Младе́нца, на престо́ле Отчем естество́ на́ше Посади́вшаго.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Святии преподобномученицы, моли́те Бо́га о нас.

Си́лою догма́тов, му́дрии, лати́н злосла́вие, пе́рвее отрази́сте, та́же огне́м от ни́х сожже́ни бы́сте, и же́ртвы Го́сподеви, принесо́стеся усе́рдно, со Ангельскими ли́ки ны́не лику́юще, приснопа́мятнии.

Припев: Святии преподобномученицы, моли́те Бо́га о нас.

Преподо́бно ста́до твое́ упа́сл еси́, Фомо́, Зогра́фския оби́тели па́стырю изря́днейший, и пострада́л еси́ с боже́ственными, блаже́нне, ученики́ твои́ми от латиному́дренных, огне́м искуше́ни бы́вше, я́ко зла́то в пещи́, и со Ангелы ны́не ликовству́ете.

Сла́ва Отцу́ и Сы́ну и Свято́му Ду́ху:

Ревни́телие Госпо́дни я́вльшеся, прему́дрии, глаго́лющия на высоту́ непра́ведная обличи́сте, всепреподо́бнии, загради́вше те́х уста́ прему́дро изъясне́нием Писа́ний, те́мже вси́ дне́сь па́мять ва́шу пра́зднуем.

И ны́не и при́сно и во ве́ки веко́в. Ами́нь.

Богородичен: Сло́во Бо́жие, Де́во, су́щее со Отце́м, па́че ума́, от чи́стых крове́й Твои́х воплоти́ся неизме́нно, я́коже благоволи́, Его́же во еди́ну Ипоста́сь, в дву́х естества́х, и де́йствах, и хоте́ниях, правосла́вно му́дрствуем.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Святии преподобномученицы, моли́те Бо́га о нас.

Дне́сь на́м ра́достный де́нь наста́, све́тло освеща́ющь — благознамени́тый пра́здник два́десяти и шести́ преподо́бных, и весели́т мы́сленно ду́ши же и сердца́ все́х благода́тию Ду́ха, Его́же в пе́снех достодо́лжных почита́ем.

Припев: Святии преподобномученицы, моли́те Бо́га о нас.

Да живо́т ве́чный, прему́дрии, на небесе́х получите́, преда́сте огню́ вре́менному телеса́, изобличи́вше злосла́вие лати́н. Те́мже дне́сь ра́дующеся, торжество́ ва́ше соверша́ем.

Сла́ва Отцу́ и Сы́ну и Свято́му Ду́ху:

О, ли́че честны́х преподо́бных приснопа́мятный! Ве́рно почита́ем ва́с и воспева́ем ве́рою, зову́ще: почита́ющия ва́с изба́вите ны́не от вся́кия ско́рби, бе́д и озлобле́ний, да благогове́йно в пе́снех торжество́ ва́ше соверша́ем.

И ны́не и при́сно и во ве́ки веко́в. Ами́нь.

Богородичен: Умо́в ли́цы и все́х святы́х собо́р чту́т Тя́, Влады́чице: безпло́тнаго бо Бо́га Сло́ва, Его́же ужаса́ются Ангелы, воплоти́ла еси́ и была́ еси́ Ма́терь Бо́жия, пре́ждния вражды́ средосте́ние Рождество́м Твои́м еди́на разто́ргшая.

Конда́к святы́х, гла́с 8.

Оби́тели на́шея предста́тели и храни́тели, свяще́нныя преподобнострада́льцы два́десять и ше́сть, лати́нскую горды́ню низложи́вшия, и о́гненное сожже́ние претерпе́вшия, и венча́нныя досто́йно, восхва́лим, вопию́ще: ра́дуйтеся, преподобнострада́льнии.

Икос:

Ангелы удиви́шася, с небесе́ зря́ще безбо́жное стремле́ние лати́н, ка́ко преподо́бныя во огни́ испепеля́ху благоче́стия ра́ди; и́же и умре́ти благоче́стно изво́лиша, и мучи́телеву бро́вь низложи́вше, слы́шат от на́с такова́я: ра́дуйся, ли́че преподобнострада́льных; ра́дуйся, тве́рдое ополче́ние многострада́льных; ра́дуйся, двадеся́тице с шестери́цею преподо́бных; ра́дуйся, Фомо́, с про́чими му́ченики; ра́дуйся, боже́ственный Варсану́фие с Михе́ем тве́рдым; ра́дуйся, Дометиа́не, Ми́но с Па́влом све́тлым; ра́дуйся, со Анто́нием Евфи́мие и Иларио́не; ра́дуйся, с Парфе́нием, Си́моне и Ио́сифе; ра́дуйся, дво́ице Иа́ковов ку́пно с Иоанни́кием; ра́дуйся, Мартиниа́не, ку́пно с Космо́ю и Се́ргием; ра́дуйся, Киприа́не, Кири́лле, Иове и Са́вво сла́внии; ра́дуйся, четвери́це сла́вная све́тлых страстоте́рпцев; ра́дуйтеся, преподобнострада́льнии.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Святии преподобномученицы, моли́те Бо́га о нас.

Наста́ ны́не боже́ственная и ра́достная па́мять ва́ша, преподобнострада́льнии, веселя́щая и освяща́ющая все́х, чту́щих по́двиги и страда́ния ва́ша, и пою́щих: оте́ц на́ших Бо́же, благослове́н еси́.

Припев: Святии преподобномученицы, моли́те Бо́га о нас.

Огню́ приобща́ющеся, попали́сте пре́лесть противобо́жную, преподобному́ченицы Христо́вы, изоблича́юще лю́тое лати́н о Ду́се приложе́ние, и пою́ще: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Вся́, я́же в ми́ре, и телеса́ и бога́тство презре́ша, бу́дущия ра́ди жи́зни, до́блии преподобнострада́льцы, и уме́рше со Христо́м, ны́не ца́рствуют в непристу́пном све́те и невече́рнем.

И ны́не и при́сно и во ве́ки веко́в. Ами́нь.

Богородичен: Моле́бную на́шу пе́снь ны́не, Богоро́дице, все́х, воспева́ющих, Присноде́во, лю́тых изменя́ющи, с любо́вию ко Го́споду вопию́щих: оте́ц на́ших Бо́же, благослове́н еси́.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Святии преподобномученицы, моли́те Бо́га о нас.

Ны́не свяще́нная оби́тель Зогра́фская хва́лится, богоно́снии, и, крася́щися, чуде́с ва́ших наслажда́ется, и велича́ется страда́ньми и по́двигами ва́шими: папослужи́телей бо посрами́сте, правосла́вными сопротивля́ющеся и́м догма́тами, и песносло́вяще Христа́ во ве́ки.

Припев: Святии преподобномученицы, моли́те Бо́га о нас.

Пе́сньми да воспое́тся свяще́нный Фома́, игу́мен оби́тели Зогра́фския, Варсану́фий, и Иларио́н, и Косма́, и Се́ргий, и Евфи́мий, и Мина́, и Иа́ков, Иов, Иоанни́кий, с ни́ми же и про́чее честно́е собра́ние, два́десять и шести́, пою́ще Го́спода и превознося́ще Его́ во ве́ки.

Сла́ва Отцу́ и Сы́ну и Свято́му Ду́ху:

Спаса́й рабы́ Твоя́, Великодержа́вный Царю́ Бо́же, еди́не Ще́дре, мно́гими моле́ньми преподо́бных Твои́х срада́льцев, два́десять и шести́, преклоня́ем ны́не. С ни́ми же и на́с приими́, вопию́щих: да благослови́т вся́ тва́рь Го́спода и превозно́сит во вся́ ве́ки.

И ны́не и при́сно и во ве́ки веко́в. Ами́нь.

Богородичен: Яко трапе́за Хле́б жи́зни вмести́ла еси́, все́х пита́ющий, Отрокови́це, вседе́тельным осене́нием, и Сего́ дои́ши сосцы́, я́ко Младе́нца, Его́же пою́ще, я́ко Бо́га, Тебе́ госпо́дственно, Богоро́дицу, возвеща́ем: да благослови́т вся́ тва́рь Го́спода и превозно́сит во вся́ ве́ки.

Песнь 9

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Святии преподобномученицы, моли́те Бо́га о нас.

После́дующе, отцы́, благогове́йно и преподо́бно пожи́вшим на земли́, во оби́тели Зогра́фстей по́стнически, лука́ваго тве́рдо победи́сте, и пострада́сте за благоче́стие, сего́ ра́ди ны́не ва́с восхваля́ем.

Припев: Святии преподобномученицы, моли́те Бо́га о нас.

От усте́н нечи́стых, ны́не убо́гое прие́мше пе́ние, о на́с ко еди́ному Влады́це па́мять твори́те приле́жно, тве́рдии преподобнострада́льцы, я́ко да обря́щем прегреше́ний разреше́ние, и почита́ем па́мять ва́шу све́тло.

Припев: Святии преподобномученицы, моли́те Бо́га о нас.

Якоже со́лнце вели́кое свяще́нная ва́ша па́мять, просия́вши я́сно, озаря́ет ми́р, ю́же соверша́юще благогове́йно, почита́ем ва́с, отцы́ преподобнострада́льнии, я́ко предста́телей, храни́телей же и блюсти́телей оби́тели на́шея.

Сла́ва Отцу́ и Сы́ну и Свято́му Ду́ху:

Яко благоуха́ннии шипцы́, я́ко чисте́йшия кри́ны, я́ко древеса́ присноцвету́щая и ды́шущая мѵ́ра, от честны́я ва́шея ра́ки источа́ете безчи́сленная исцеле́ния, всепреподо́бнии, прогоня́юще злосмра́дное неду́гов, с ве́рою и благогове́нием приступа́ющим к ва́м.

И ны́не и при́сно и во ве́ки веко́в. Ами́нь.

Богородичен: Купина́ прообразова́ше, Де́во, Твое́ пресла́вное чу́до: Ты́ бо прия́ла еси́ во утро́бе Огнь нестерпи́мый вои́стинну, чревоноси́вшая Христа́, пра́вды Со́лнца су́щаго, неопали́ма пребы́вши, те́мже Тя́ при́сно блажи́м.

Свети́лен.

Оби́тели на́шея предста́тели, дне́сь све́тло восхва́лим преподобнострада́льныя отцы́, низложи́тели пре́лести лати́н и пропове́дники ве́ры правосла́вныя, и́же огне́м испепели́вшеся, всесожже́ния боже́ственная принесо́стеся Тро́ице.

Сла́ва: Предста́телей ва́с, прему́дрии, стяжа́хом и храни́телей свяще́нныя оби́тели на́шея, те́мже све́тло соверша́ем па́мять ва́шу благознамени́тую, пе́сньми ва́с почита́юще: вы́ бо, Го́спода просла́вльше, ны́не досто́йно со Ангелы почита́еми есте́.

И ны́не: Горды́ню низложи́, Влады́чице, латиному́дрствующих, да посра́мятся и уразуме́ют, я́ко не́сть во уче́нии и́х и́стины, но пре́лесть го́рдаго сатаны́, и́же хотя́ на небеси́ поста́вити престо́л сво́й, и бы́ти подо́бен Вы́шнему, до а́да низве́ржеся и в преиспо́днюю всели́ся.

Молитва

Святи́и му́ченицы Зографскии! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.