22 октября.

Канон преподобному Андронику и жене его Афанасии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Андрони́че, дух твой.

Канон, глас 1.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Андрони́че, моли́ Бо́га о нас.

Предочи́стив твою́ ду́шу, Андрони́че, до́блими доброде́тельми и Боже́ственныя любве́ разже́гся у́гльми, плотски́х уклони́лся еси́ распале́ний, ро́су бо Боже́ственную свы́ше име́л еси́, тя́ ороша́ющую всегда́.

Припев: Преподобне отче Андрони́че, моли́ Бо́га о нас.

Влады́чним повеле́нием повину́яся, я́ко патриа́рх иногда́ Авраа́м, о́тче, твою́ зе́млю оста́вил еси́ и сро́дники небре́г; жены́ же и бога́тства дале́че бы́в, и в пусты́ню, блаже́нне, всели́лся еси́, уединя́емь.

Сла́ва Отцу́ и Сы́ну и Свято́му Ду́ху:

Госпо́дню за́поведь испо́лнил еси́, вся́ прода́в твоя́ и ни́щим разда́в, и́миже ку́плю би́сера обре́л еси́ честна́го, и се́й прие́м, обогати́лся еси́ оби́льно бога́тным мѵ́ров источе́нием.

И ны́не и при́сно и во ве́ки веко́в. Ами́нь.

Богородичен: Созида́ется во́лею во утро́бе Твое́й Ада́мов Соде́тель и дла́нию нося́й, Богоро́дице, вся́ческая Твои́ми рука́ми но́сится, — о, стра́шнаго та́инства! — и Младе́нец явля́ется, все́х святы́х Госпо́дь.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Андрони́че, моли́ Бо́га о нас.

Изгна́н от Еде́ма сове́том Евиным Ада́м, ты́ же, ве́ровав сове́ту сопру́жницы твоея́, му́дре, рая́ бы́л еси́ вну́трь и с не́ю ра́дуешися всегда́, блаже́нне Андрони́че.

Припев: Преподобне отче Андрони́че, моли́ Бо́га о нас.

Иже та́йно и му́дре устроя́я вся́ до́бре Сло́во и земны́я ко спасе́нию направля́я, от земли́ на небеса́ люби́мыя преставля́ет де́ти ва́ша два́, стезю́ пра́ву явля́я ва́м.

Сла́ва Отцу́ и Сы́ну и Свято́му Ду́ху:

О маловре́менней и тле́ющей небре́гше любви́, на земли́ су́щим оста́вльше сию́, связа́стеся любо́вию духо́вною, блаже́ннии, те́мже ны́не водворя́етеся, иде́же пра́ведных селе́ния.

И ны́не и при́сно и во ве́ки веко́в. Ами́нь.

Богородичен: Безсосужде́нно херуви́м и серафи́м пребо́льши, Яже Бо́га несказа́нно Ро́ждшая, и земны́м кля́тву на благослове́ние преложи́вшая, пе́сньми всегда́ да почита́ется: Та́ бо на́ше упова́ние.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Андрони́че, моли́ Бо́га о нас.

По́ты трудо́в твои́х, от пло́ти твоея́ ка́плющии, свяще́ннейше Андрони́че, в воню́ мѵ́ра преложи́шася.

Припев: Преподобне отче Андрони́че, моли́ Бо́га о нас.

Якоже фи́никс высокора́сленный, ты́ в пусты́нях, о́тче, процве́л еси́ и Бо́гу плодоноси́л еси́ сладча́йшия боле́зни трудо́в твои́х.

Сла́ва Отцу́ и Сы́ну и Свято́му Ду́ху:

Сле́зными одожде́нии пусты́нную зе́млю ороси́л еси́, плодоно́сну же яви́л еси́ ду́шу твою́ боле́зньми по́стническими.

И ны́не и при́сно и во ве́ки веко́в. Ами́нь.

Богородичен: Не истощи́в Госпо́дь Оте́ческих не́др, в Твою́ всели́ся утро́бу, Отрокови́це, пречи́стую, и ми́р ве́сь обнови́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве бо Тебе́, ино́го не ве́мы.

Припев: Преподобне отче Андрони́че, моли́ Бо́га о нас.

Воспои́м Андрони́ка пе́сньми, вси́ ве́рнии, и того́ сопру́жницу Афана́сию просла́вим.

Припев: Преподобне отче Андрони́че, моли́ Бо́га о нас.

Отню́д, я́коже е́сть пи́сано, не да́л еси́ сна́ твои́ма очи́ма, ни дрема́ния твои́ма ве́ждома, Андрони́че.

Сла́ва Отцу́ и Сы́ну и Свято́му Ду́ху:

Просла́ви мѵ́ры тя́ Госпо́дь, блаже́нне, твоя́ труды́ восприе́мый, я́ко же́ртву су́щне благоприя́тну.

И ны́не и при́сно и во ве́ки веко́в. Ами́нь.

Богородичен: Еди́наго от Тро́ицы родила́ еси́, Отрокови́це, стра́шно и млеко́м пита́ла еси́ земны́х естество́ Пита́ющаго.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Припев: Преподобне отче Андрони́че, моли́ Бо́га о нас.

Есте́ственная сла́бость ника́коже предложе́ния притупи́, е́же стяжа́ла еси́ к боле́знем, о преподо́бная, страда́ния.

Припев: Преподобне отче Андрони́че, моли́ Бо́га о нас.

Премени́вши одея́ние я́ве, естество́ утаи́ла еси́, те́м несумне́нно пу́ть спасе́ния соверши́ла еси́.

Сла́ва Отцу́ и Сы́ну и Свято́му Ду́ху:

Уве́девши супру́га твоего́ путьше́ствующа, ему́же и после́дствовала еси́, ника́коже что́ к нему́ бесе́довавши.

И ны́не и при́сно и во ве́ки веко́в. Ами́нь.

Богородичен: Гла́с Гаврии́лов Тебе́, Отрокови́це, ны́не прино́сим, — ра́дуйся, Госпо́дь с Тобо́ю, Благослове́нная, — вопию́ще Ти́.

Седа́лен, гла́с 8.

Иго Госпо́дне ле́гкое вседу́шно на ра́мена восприе́м, Тому́ после́довал еси́, богоно́се Андрони́че, и мирски́х мяте́жей до́бре возненави́дел еси́, в пусты́ню, блаже́нне, усе́рдно все́лься, иде́же тече́ние по́стническое, о́тче, без поро́ка соверши́л еси́, Бо́гу совокупля́лся. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Андрони́че, моли́ Бо́га о нас.

Дре́вле хва́лящагося безме́рно злонача́льнаго одержа́ти всю́ тва́рь, я́ко пти́чицу ху́ду, низложи́л еси́, си́лою защити́вся Ду́ха и Креста́ всеору́жием.

Припев: Преподобне отче Андрони́че, моли́ Бо́га о нас.

Нося́ на ра́мех кре́ст тво́й, после́довал еси́ Го́споду вседу́шно и сла́вы Его́ получи́л еси́ Боже́ственныя, я́ко испо́лнитель, Андрони́че, Того́ за́поведей.

Сла́ва Отцу́ и Сы́ну и Свято́му Ду́ху:

Явля́ет благода́ть мѵ́ров е́же ко Го́споду твое́ дерзнове́ние, вода́м бо лия́нию подо́бится, на спасе́ние всегда́ ве́рных пролива́ема.

И ны́не и при́сно и во ве́ки веко́в. Ами́нь.

Богородичен: Да обожи́т мое́ естество́, Всесоверше́нный неизрече́нно младе́нствует, из Тебе́, Чи́стыя, происхо́дит, Иже сло́вом приведы́й вся́ческая, и содержа́, и укрепля́я.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподобне отче Андрони́че, моли́ Бо́га о нас.

Сле́зными струя́ми напои́в твою́ душе́вную ни́ву, пожа́л еси́ е́же от чудодея́ний воздая́ние бога́тное.

Припев: Преподобне отче Андрони́че, моли́ Бо́га о нас.

Остру́пльшуюся ду́шу мою́ согреше́ньми моли́тв твои́х Боже́ственным врачева́нием сию́ исцели́, уго́дниче Госпо́день.

Сла́ва Отцу́ и Сы́ну и Свято́му Ду́ху:

Тро́ичен: Пребезнача́льную, ве́рнии, воспои́м благоче́стно Тро́ицу Всесвяту́ю, из не су́щаго приве́дшую вся́ческая.

И ны́не и при́сно и во ве́ки веко́в. Ами́нь.

Богородичен: Дании́л Тя́ прови́де, го́ру, Отрокови́це, несеко́мую, от нея́же отсече́ся Ка́мень, сокруши́вый хра́мы и́дольския.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Преподобне отче Андрони́че, моли́ Бо́га о нас.

Источа́еши мѵ́ров благода́ть неистощи́мую и притека́ющим все́м подае́ши ве́рно неду́гов разреше́ние, о́тче Андрони́че.

Припев: Преподобне отче Андрони́че, моли́ Бо́га о нас.

Преложи́лся еси́ от привре́менных, ра́дуяся, к вы́шним и со отцы́ святы́ми всели́вся, на́с, па́мять твою́ творя́щих, о́тче, помина́й всегда́.

Сла́ва Отцу́ и Сы́ну и Свято́му Ду́ху:

Приими́ мое́ пе́ние, о дво́ице преподо́бных, и отда́ние ми́ пода́ждь твои́м к Бо́гу моле́нием, прегреше́ний изба́вити мя́.

И ны́не и при́сно и во ве́ки веко́в. Ами́нь.

Богородичен: Прописа́ Твою́ утро́бу дре́вле три́ о́троки не опали́вшая пе́щь, Отрокови́це Чи́стая, и́бо неопа́льно прия́ла еси́ Огнь Божества́.

Стихи́ры, гла́с 6.

Все́ отложи́вше / жите́йское томле́ние / и бога́тство возненави́девше, / и сла́дость теку́щую презре́вше, / кре́ст взя́сте, / я́ко и́го Боже́ственное, / и Христу́ после́довасте / и к небе́сному поко́ю чу́дно всели́стеся, / в не́мже свеселя́щеся, / помина́йте на́с, ве́рою помина́ющих вы́ / и любо́вию соверша́ющих благогове́йно / свяще́нную и честну́ю па́мять ва́шу, святи́и.

Весьма́ возлю́бльшая / Тебе́, Влады́ку, от души́, / во сле́д Тебе́ потече́ / дво́ица приснопа́мятная, / и единосопру́жная, / и вся́ кра́сная, и ю́зу нереши́мую, / я́ко паучи́ну, прето́рже, / те́м и получи́ Ца́рствие Твое́, Безсме́ртне. / Те́х у́бо моли́твами / очище́ние, Ще́дрый, пода́ждь на́м согреше́ний / и яви́ ны́ вы́шшия страсте́й, / смуща́ющих на́шу ду́шу, Влады́ко, всегда́.

Дете́й лише́ни бы́сте / любе́зныя дру́жбы, / по́двигом бо́льшим / в житии́ пребыва́юще неуте́шни, / гла́с испуща́сте / до́блественнейший Иовль, взыва́юще: / Госпо́дь даде́, Госпо́дь и па́ки взя́. / Те́м и жела́емое ва́ми де́ло / удо́бно соверши́сте / и к любе́знейшим ме́стом святы́м, / ра́достно преходя́ще, яви́стеся, / сопру́же свяще́ннейший.

Сла́ва, и ны́не, Богородичен:

Ра́дуйся, ко́реню летора́сленный, / ра́дуйся, же́зле боже́ственный Ааро́нов, / прозябы́й цве́т неувяда́ющий, / благопло́дный раю́, / дре́во жи́зненное, / от ко́рене Иессе́ева, Чи́стая, процве́тши, Отрокови́це, / и земны́я кормя́щи хле́бом разу́мным. / Ра́дуйся, багряни́це всечестна́я, / все́х Царя́ Богоневе́сто, / увязе́ние све́тлое, / архиере́ев благоле́пие. / Ра́дуйся, еди́на Пречи́стая.

Молитва

О свяще́нная главо́, преподо́бне о́тче, преблаже́нне а́вво Андрони́че, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.