21 октября.

Канон преподобномученику Игнатию Старозагорскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Трегу́бым венце́м я́ве увенча́ тя́ Христо́с, по́стничества же, и му́ченичества, и боже́ственнаго де́вства, е́же соблю́л еси́ до конца́, свя́те Игна́тие сла́вне. Те́мже и ра́ка моще́й твои́х прогоня́ет страсте́й и боле́зней злы́х вся́ я́звы.

Велича́ние:

Ублажа́ем тя́, святы́й преподобному́чениче Игна́тие, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 2:

Све́тлый избра́нник Христо́в и новому́ченик Игна́тий, и́же к му́ченичеству жа́дный и усе́рдный, дерзнове́нный испове́дник и хра́брый, и в страда́ниих до́блий и неустраши́мый, и́же пове́шением за Христа́ блаже́нный коне́ц прие́мый и му́ченичества нетле́нный вене́ц от Него́ получи́вый, всегда́ мо́лится за на́с ко Го́споду.

Кано́н свята́го преподобному́ченика, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподобномучениче Игнатие, моли́ Бо́га о нас.

Ума́ моего́ помраче́ние просвети́ боже́ственными твоими́ мольба́ми и сло́во ми́ да́руй, му́чениче Игна́тие, я́ко да воспою́ твоя́ по́двиги до́блия и е́же превы́шше вероя́тия му́жество.

Припев: Преподобномучениче Игнатие, моли́ Бо́га о нас.

Трегу́быя же и велича́йшия подъя́л еси́, сла́вне, побе́ды на злоде́я де́вством и по́стничеством твои́м, страда́нием же пресла́вным того́ обезси́лил еси́, му́чениче Игна́тие.

Сла́ва Отцу́ и Сы́ну и Свято́му Ду́ху:

Даде́ся, Игна́тие, да́р вои́стинну треблаже́нный на́м, лю́бящим тя́: твое́ те́ло, страда́льче, и возвесели́л еси́ на́ша мы́сли зна́меньми побе́ды твоея́ и добро́тами.

И ны́не и при́сно и во ве́ки веко́в. Ами́нь.

Богородичен: Разуме́ти не мо́жет челове́ческий у́м, Всенепоро́чная, ве́лие та́инство Боже́ственнаго Рождества́ Твоего́: всю́ бо Нося́щаго тва́рь рука́ми носи́ла еси́. О, стра́шнаго слы́шания!

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Преподобномучениче Игнатие, моли́ Бо́га о нас.

Досто́йно на земли́ и на небеси́ тя́, му́чениче, просла́ви Христо́с, я́ко Того́ просла́вльша му́ченичеством твои́м: прославля́ющих бо Его́ воспрославля́ти обеща́ся.

Припев: Преподобномучениче Игнатие, моли́ Бо́га о нас.

Се́ благоуха́ние сладча́йшее, се́ благоуха́ние та́инственное, се́ воня́ небе́сная от гро́ба ны́не исхо́дит Игна́тия дне́сь. Прииди́те, и́м его́ наслади́мся.

Сла́ва Отцу́ и Сы́ну и Свято́му Ду́ху:

Де́нь сугу́быя ра́дости наста́ на́м, твои́м друго́м, страда́льче, тя́ нося́ основа́ние и пучи́ну всечестну́ю. Сего́ ра́ди и мы́ ра́дуемся сугу́бо о не́м, Игна́тие.

И ны́не и при́сно и во ве́ки веко́в. Ами́нь.

Богородичен: Безсе́менно зачала́ еси́, Де́во, нетру́дно носи́ла еси́, Чи́стая, нетле́нно же родила́ еси́ Бо́га Пресу́щественнаго. О, чуде́с пресла́вных! Ки́й у́м челове́ческий не удиви́тся?

Седа́лен, гла́с 3.

Кре́пость необори́мую Христо́ву име́я, всехва́льне, посрами́л еси́ враго́в безу́мие, ага́рян злочести́вых, Игна́тие великоду́шне: по́прище соверши́л еси́ му́ченичества пресла́вное и Христа́ пропове́дал еси́ Живода́вца всесоверше́нна. Сего́ ра́ди и неувяда́емыми венцы́, ра́дуяся, от Него́ оде́ялся еси́.

Сла́ва, и ны́не, богоро́дичен, гла́с то́йже:

Непроходи́мая две́ре и непристу́пная, е́юже про́йде Христо́с и показа́ присту́пно челове́ком не́бо, непристу́пную престу́пником две́рь ми́ отве́рзи покая́ния, возводя́щую ко гра́ду небе́сному, и к Боже́ственным вводя́щую селе́нием возлю́бленным, иде́же ра́дость и весе́лие.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Преподобномучениче Игнатие, моли́ Бо́га о нас.

Ми́лостива соде́лай к на́м Го́спода твои́ми моли́твами, свя́те, я́ко да изба́вльшеся ве́чнующаго огня́, сла́вы сподо́бимся, и́же тя́ неизрече́нно возлюби́вшии.

Припев: Преподобномучениче Игнатие, моли́ Бо́га о нас.

Кре́пость и противле́ние твоея́ души́ нечести́вии не устраши́ша, и со у́жасом возопи́ша про́чее: О, ки́я до́блести, ея́же ни у кого́же ви́дехом!

Сла́ва Отцу́ и Сы́ну и Свято́му Ду́ху:

Якоже бога́тство непристу́пное твое́ те́ло, му́чениче Христо́в свяще́ннейше, тя́ лю́бящии прия́хом я́ве, е́же и ны́не содержа́ще, ра́дости неизрече́нныя исполня́емся.

И ны́не и при́сно и во ве́ки веко́в. Ами́нь.

Богородичен: Ка́ко Твою́ воспою́ добро́ту, Чи́стая, или́ ка́ко Тя́ просла́влю, Богоневе́сто, словесы́, су́щую Боже́ственныя сла́вы Сокро́вище? Те́мже молча́нием молю́ Тя́: Влады́чице моя́ Непоро́чная, спаси́ мя.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Преподобномучениче Игнатие, моли́ Бо́га о нас.

Ни цве́т ю́ности, ни добро́та телесе́, ниже́ даро́в обеща́ния от неве́рных предлага́емая тебе́, возмого́ша души́ твоея́ тве́рдость поколеба́ти, непобеди́мый му́чениче Христо́в Игна́тие.

Припев: Преподобномучениче Игнатие, моли́ Бо́га о нас.

Льва́ и зми́я попра́л еси́, Игна́тие, до́блим твои́м страда́нием, я́коже ре́кл еси́ пре́жде страда́ния, а́ки проро́чествуя вои́стину, си́лою опоя́сан Христа́ непобеди́мою.

Сла́ва Отцу́ и Сы́ну и Свято́му Ду́ху:

Вы́ше ви́димых у́м возне́с, Игна́тие, о все́х вознеради́л еси́ зде́ су́щих. Те́мже вопия́л еси́ му́чащим тя́ и да́ры обещава́ющим: вся́ сия́ суета́ е́сть, о беззако́нницы!

И ны́не и при́сно и во ве́ки веко́в. Ами́нь.

Богородичен: Сугу́бо показа́лася еси́ Ты́, Богоро́дице Пречи́стая: е́же по Ипоста́си роди́ти Бо́га Сло́ва, и е́же обожи́ти челове́ческое естество́, от Тебе́ восприя́тое, Непоро́чная, от сама́го того́ еди́нства.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Преподобномучениче Игнатие, моли́ Бо́га о нас.

Хра́м Боже́ственный му́ченика я́ко ски́ния свиде́ния познава́ется, в не́мже лежи́т, я́коже ковче́г, свяще́нных его́ моще́й гро́б всесвяще́нный.

Припев: Преподобномучениче Игнатие, моли́ Бо́га о нас.

Разуме́ти у́м не мо́жет и язы́к изрещи́, ю́же восприя́л еси́ сла́ву: сонасле́дник бо бы́л еси́ Христу́ и насле́дник Бо́жий, я́коже писа́ся, сла́вне.

Сла́ва Отцу́ и Сы́ну и Свято́му Ду́ху:

Кри́ни ти́ процвето́ша, му́чениче, и цве́ти ча́шек после́доваша небе́снии. Уже́ наслажда́йся, Игна́тие, с боже́ственными страда́льцы твои́ми.

И ны́не и при́сно и во ве́ки веко́в. Ами́нь.

Богородичен: Ве́сь ми́р Сотво́ршаго, вели́кий ми́р в ма́лом восхва́лим вси́, Богоро́дицу в пе́снех, ди́вное на небеси́ и на земли́ чу́до.

Конда́к, гла́с 4.

На дре́ве тебе́ ра́ди Пове́шеннаго, подража́я Христу́, богоблаже́нне, на дре́во взя́лся еси́ пове́шен, тве́рдый. И обе́шен бы́в, в рука́х о́браз носи́л еси́ и кре́ст Го́спода, Его́же моли́ о на́с, тя́ почита́ющих, спасти́ся, свя́те Игна́тие всесла́вне.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Преподобномучениче Игнатие, моли́ Бо́га о нас.

Ве́сь боже́ствен бы́в, Игна́тие, претя́щим ти́ офома́ном благодерзнове́нно вопия́л еси́: страда́ния, я́же ми́ предлага́ете, ме́чь, сме́рть, обе́шение, ни во что́же вменя́ю любве́ ра́ди Христа́ моего́.

Припев: Преподобномучениче Игнатие, моли́ Бо́га о нас.

Моли́твами твои́ми боже́ственными, му́чениче Игна́тие, певце́в твои́х на́с свободи́ от вся́каго озлобле́ния, в не́мже ды́шем, и оскудева́ющих во оби́тели твоя́ приими́, я́ко проше́ние е́сть ве́лие.

Сла́ва Отцу́ и Сы́ну и Свято́му Ду́ху:

Да́р боже́ственный тя́, и ро́г спасе́ния, и блаже́нство неотъе́млемое, и изве́стное сокро́вище, и бога́тство неоскудева́емое, все́ добро́ и красно́ дарова́ Христо́с лю́бящим тя́, о Игна́тие треблаже́нне.

И ны́не и при́сно и во ве́ки веко́в. Ами́нь.

Богородичен: Твои́х Всепе́тая, хода́тайств кроме́, умо́в челове́ческих ни еди́н же и́мать приити́ к Бо́гу. Ты́ бо еди́на была́ еси́ о́бщая межда́ сотворе́ннаго естества́ и несотворе́ннаго. О, веще́й пресла́вных!

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподобномучениче Игнатие, моли́ Бо́га о нас.

Све́тло к страда́нию стремле́ние твое́, све́тло же и предстоя́ние твое́, све́тло и страда́ние, светла́ же бы́сть и побе́да, ю́же подъя́л еси́ на ра́тника, разли́чными о́бразы к муче́нию твоему́ в нога́х твои́х бы́вшаго, треблаже́нне.

Припев: Преподобномучениче Игнатие, моли́ Бо́га о нас.

Вси́ любоде́йцы, и вси́ плотсти́и, и вси́ осуети́вшиися вои́стину прииди́те, — неве́рным глаго́лал еси́, сла́вне Игна́тие, — и в о́гнь вве́ржени бу́дете, а́ще не уве́руете во Христа́, и́стиннаго Бо́га Сло́ва и Творца́ ми́ра, оста́вльше пре́лесть.

Сла́ва Отцу́ и Сы́ну и Свято́му Ду́ху:

Попра́в зла́я кова́рства врага́ льстеца́ страда́нием твои́м, взя́лся еси́ на пресла́вную высоту́, досточу́дне, и Ангельския дости́гл еси́ высоты́, вопия́: Го́спода по́йте, дела́, и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ве́сь Гаврии́л боже́ственный сия́я сия́нием арха́нгельским, Богоневе́сто, Твои́м сверха́нгельския чистоты́ сия́нием противуосия́н, побежде́н бы́сть, Тя́ целу́я, и бы́сть ма́ло что́, я́коже звезда́ скры́тная возсия́нием восходя́щаго со́лнца.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Преподобномучениче Игнатие, моли́ Бо́га о нас.

Свяще́ннии ли́цы Ангельстии возвесели́шася восхо́дом твои́м, чи́нове же му́чеников, све́тло взыгра́юща, тя́ прия́ша в своя́ селе́ния, я́ко пострада́вша души́ мы́слию му́жественною, Игна́тие, и беззако́нных ле́сть обличи́вша.

Припев: Преподобномучениче Игнатие, моли́ Бо́га о нас.

Утвержде́ние ве́рных, и сла́ва, и похвала́, му́чениче Игна́тие, страда́нием бо твои́м показа́лся еси́ о́браз и́м за ве́ру страда́ти тверде́йше, неве́рным же посрамле́ние ве́чное, его́же никогда́же ина́че пострада́ша.

Сла́ва Отцу́ и Сы́ну и Свято́му Ду́ху:

Имаши вои́стину, и́маши ра́й ны́не, его́же жа́ждал еси́, его́же ра́ди подвиза́лся еси́ по́стничеством и страда́нием твои́м. Но и о на́с моли́ся, лю́бящих тя́, рая́ бы́ти жи́телие с тобо́ю во ве́ки вся́.

И ны́не и при́сно и во ве́ки веко́в. Ами́нь.

Богородичен: Пе́сньми Тя́, Чи́стая, пою́ Всепе́тую, Юже ми́рный и преми́рный язы́к и вся́кое дыха́ние, я́ко Бо́га ро́ждшую Препе́таго, Его́же пою́т ты́сящи ты́сящ, тмы́ же те́м Ангелов.

Свети́лен, гла́с 3.

Обе́шение твое́ с любо́вию целу́ю, Христо́в му́чениче, и́мже са́м у́бо возлете́л еси́ на небеса́ со сла́вою, а́з же разреше́ние прие́млю неду́гов мои́х все́х.

Сла́ва, гла́с 2.

Ра́дость на́м возсия́ боже́ственнаго весе́лия в па́мяти твое́й, блаже́нне Игна́тие богоно́се, приобре́тше бо гро́б тво́й, ра́достию и любо́вию зове́м: му́чениче, спаса́й ны́ от вся́кия ну́жды и вре́да чужда́го.

И ны́не, богоро́дичен, гла́с то́йже:

Бо́га, Его́же воплоти́ Богоро́дица Влады́чица, нося́щи на рука́х, непреста́нно мо́лит: уще́дри, Сладча́йший, благоволи́л бо еси́ Ма́терь Твою́ бы́ти Мя́, рабу́ Твою́, и ко Мне́ прибега́ющих Твоея́ сподо́би сла́вы.

Молитва

О святы́й уго́дниче Бо́жий, му́чениче Игна́тие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.