20 октября.

Канон святым мученикам Сергию и Вакху.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Или́ се́й, гла́с 5:

Удобре́ние Христо́вых страстоте́рпец и о́чи Христо́вы Це́ркве, о́чи просвети́те ду́ш на́ших, Се́ргие многострада́льне и Ва́кхе пресла́вне: моли́теся ко Го́споду, я́ко да убежи́м тмы́ грехо́вныя и све́та яви́мся о́бщницы невече́рняго моли́твами ва́шими, святи́и.

Кано́н святы́х. Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припев: Святии мученицы Сергие и Вакхе, моли́те Бо́га о нас.

Се́ргие, уго́дниче Христо́в, смоле́бника прии́м и спомо́щника Ва́кха приснопа́мятнаго, с ни́мже стра́сти богому́дренно соверши́л еси́, сло́во мне́ му́дрости, ва́с пою́щу, да́руйте.

Припев: Святии мученицы Сергие и Вакхе, моли́те Бо́га о нас.

На недви́жимем Христо́вы ка́мени ве́ры, святи́и му́ченицы, положи́вше основа́ние, на тве́рдем степе́ни утвержде́ни, забра́ло и столпи́ благоче́стия яви́стеся.

Припев: Святии мученицы Сергие и Вакхе, моли́те Бо́га о нас.

Глаго́лом ве́ровавше Христо́вым и к Нему́ неукло́нно взира́юще, все́ оплева́сте преходя́щее благосла́вие, святи́и, сла́вы же присносу́щныя уя́звени бы́сте раче́нием.

Сла́ва Отцу́ и Сы́ну и Свято́му Ду́ху:

Ро́да, и оте́чества, и че́сти Христа́ ра́ди обнажи́вшеся, веселя́стеся, и, оде́яни в женоле́пное одея́ние, мужему́дренно нетле́ния оде́ждею све́тло облеко́стеся.

И ны́не и при́сно и во ве́ки веко́в. Ами́нь.

Богородичен: Ми́лостива бы́ти ве́рным и благоуве́тлива, Богома́ти, умоли́ Сло́ва, Его́же родила́ еси́ теле́сно, к на́м прише́дшаго: Тя́ бо предста́тельницу и спасе́ние стяжа́хом.

Пе́снь 3.

Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Припев: Святии мученицы Сергие и Вакхе, моли́те Бо́га о нас.

Еди́н Ве́дый, я́ко Бо́г, вся́ пре́жде бытия́, к Нему́ ва́ша ны́не ви́дев предложе́ния, му́дрости сло́вом, и боже́ственнаго зна́ния, и тве́рдаго смы́сла оби́льно испо́лни, я́ко Своя́ во́ини, блаже́ннии.

Припев: Святии мученицы Сергие и Вакхе, моли́те Бо́га о нас.

Зако́нно уго́дницы Христу́ пострада́ти изво́ливше, тле́ющую сла́ву и теку́щую, и ми́ра всего́, и мироде́ржца по́мыслом богому́дрым страстоте́рпцы му́ченицы возненави́десте, любо́вию Зижди́теля.

Сла́ва Отцу́ и Сы́ну и Свято́му Ду́ху:

Пречи́стыми ума́ приложе́нии Го́споду предстоя́ще, и от та́мо су́щия зари́ исполня́еми, и неизрече́ннаго блаже́нства я́ве наслажда́ющеся, ва́с чту́щия от напа́стей, страстоте́рпцы, изба́вите.

И ны́не и при́сно и во ве́ки веко́в. Ами́нь.

Богородичен: Сме́ртию держи́мь пе́рвее Ада́м, ны́не изба́вися Твои́м Рождество́м, Еди́на Богоневе́сто: Жи́знь бо и́стинно Ипоста́сную, соедине́ну пло́ти, Чи́стая, по Ипоста́си па́че естества́ и сло́ва родила́ еси́.

Седа́лен, гла́с 8.

Мучениколю́бцы, прииди́те, разу́мныя би́серы Госпо́дни и страстоте́рпцы Се́ргия почти́м и Ва́кха святы́я, я́ко вра́жию ле́сть му́жески попра́вшия и и́дольскую всю́ кре́пость разори́вшия, те́мже досто́йно с небесе́ венцы́ побе́ды прие́мше, со Ангелы лику́ют. К ни́мже вси́ возопие́м: моли́те Христа́ Бо́га прегреше́ний оставле́ние дарова́ти чту́щим любо́вию святу́ю па́мять ва́шу.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

КрестоБогородичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя Стра́сти Твоя́.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святии мученицы Сергие и Вакхе, моли́те Бо́га о нас.

Свети́ла два́ от за́пада возсия́вша, проти́вно зе́млю тогда́ держа́щу нечести́вому, творя́ща ше́ствие, к Твоему́ же восто́ку приидо́ша светоно́сному, Христе́, и спаси́тельному.

Припев: Святии мученицы Сергие и Вакхе, моли́те Бо́га о нас.

Ни о́гнь, ни ме́чь, ни гоне́ния, ниже́ ра́ны благочести́ваго ра́зума о Бо́зе разлучи́ ва́с, жи́знь бо преоби́десте конча́емую, Его́ ра́ди, достосла́внии, и прия́сте блаже́нную сла́дость и неги́блющую.

Припев: Святии мученицы Сергие и Вакхе, моли́те Бо́га о нас.

Свети́льницы и́стинно неле́стнии тве́рдь Це́ркве Христо́вы озаря́ют све́том Боже́ственнаго сия́ния и ду́ши благочести́вых возвеселя́ют, чуде́с зари́ испуща́юще.

Сла́ва Отцу́ и Сы́ну и Свято́му Ду́ху:

Ва́кх боже́ственный и преизя́щный Се́ргий, ле́тным премене́нием благоче́стия рачи́тели и мучениколю́бцы духо́вно на пи́ршество призыва́ют, до́блести своя́ предлага́юще.

И ны́не и при́сно и во ве́ки веко́в. Ами́нь.

Богородичен: Ору́жие, две́ри Еде́мския храня́щее, уступа́ет ны́не ве́рным и прие́млет све́тло честно́ю кро́вию из Твоего́ чре́ва Ро́ждшагося, Всенепоро́чная, зна́менаныя ви́дящее и благода́тию.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Припев: Святии мученицы Сергие и Вакхе, моли́те Бо́га о нас.

Прогна́вше ле́сть и́стины ору́жием, и мучи́телей ра́ны кре́пко претерпе́вше, и победи́теле бы́сте, от Христа́ венча́вшеся, и ны́не досто́йно веселите́ся.

Припев: Святии мученицы Сергие и Вакхе, моли́те Бо́га о нас.

Укрепля́еми непобеди́мою си́лою и благода́тию Тро́ицы, дво́ица му́ченик низложи́ тмы́ кня́зя и тому́ порабоще́ныя, те́м че́стно ублажа́ются.

Сла́ва Отцу́ и Сы́ну и Свято́му Ду́ху:

Терпе́нием, и душе́вным му́жеством, и кре́постию по́мысла дво́ица му́ченик сла́вная превзы́де всю́ гони́телей го́рькую я́рость и со Ангелы водворя́ется.

И ны́не и при́сно и во ве́ки веко́в. Ами́нь.

Богородичен: Возсия́ла еси́, Богома́ти, я́ко у́тро, Со́лнце незаходи́мое, соедине́ное пло́тию по Ипоста́си, на руку́ нося́щи, и́стинныя пра́вды: те́м Тя́ вси́ прославля́ем.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святии мученицы Сергие и Вакхе, моли́те Бо́га о нас.

Целе́ний исто́чники му́ченик мо́щи бога́тно источа́ют: почерпе́м усе́рдно, у́бо ве́рнии, и страстоте́рпцы ублажи́м, сла́внаго Се́ргия и Ва́кха приснослову́щаго.

Припев: Святии мученицы Сергие и Вакхе, моли́те Бо́га о нас.

Ненави́дяще беззако́нных совселе́ния и пре́лесть упраздня́юще, небе́сное ше́ствие благостоя́нно, Се́ргий и Ва́кх ше́ствоваху и ко Христо́ву достиго́ша приста́нищу невла́емому.

Сла́ва Отцу́ и Сы́ну и Свято́му Ду́ху:

Отверза́ются страстоно́сцем му́чеником врата́ небе́сная, благогове́юще стра́сти честне́й, подо́бней Бо́га на́шего благода́тней и прогоня́ющей де́монския полки́.

И ны́не и при́сно и во ве́ки веко́в. Ами́нь.

Богородичен: Истинно Тя́, Ма́терь Бо́жию, Пречи́стая, му́дрствующе, возвеща́ем: Безнача́льнаго бо Сы́на Единоро́днаго, пре́жде ве́к возсия́вшаго из Отца́, несказа́нно, Де́во, родила́ еси́.

Конда́к, гла́с 2.

Ра́зум на враги́ му́жески вооружи́вше, всю́ те́х ле́сть разруши́сте, и, побе́ду свы́ше прии́мше, му́ченицы всехва́льнии, единомы́сленно вопию́ще: добро́ и красно́ е́же бы́ти с Бо́гом.

Икос:

На небесе́х, Христе́, живу́ще Се́ргий же и Ва́кх и Боже́ственнаго све́та от Тебе́ исполня́еми, мене́, во тме́ неве́дения ходя́щаго, предвари́ ско́ро и страсте́й исхити́, еди́не Безсме́ртне, оде́жду мне́ покая́ния низпосла́в, я́ко да све́тлым умо́м светоно́сный си́х пра́здник воспою́ и возопию́, веселя́ся: добро́ и красно́ е́же бы́ти с Бо́гом.

Пе́снь 7.

Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии мученицы Сергие и Вакхе, моли́те Бо́га о нас.

Ра́дуйся, дво́ице страстоте́рпцев сла́вная; ра́дуйся, победи́вшая све́тло мучи́тельская преще́ния; ра́дуйся, соверши́вшая тече́ние блаже́нное; ра́дуйся, пи́ще, всегда́ вну́трь пребыва́ющая; ра́дуйся, я́сне предстоя́щая Бо́гу, богоблаже́нная.

Припев: Святии мученицы Сергие и Вакхе, моли́те Бо́га о нас.

Всесве́тлии на земли́ ходя́ще, де́монская очеса́ и ли́ца гони́телей, му́ченицы, омрачи́сте све́том благода́ти и заря́ми страда́ния, хва́льнаго воспева́юще Бо́га и пресла́внаго.

Сла́ва Отцу́ и Сы́ну и Свято́му Ду́ху:

Хра́ми Бо́га бы́вше одушевле́ннии Живу́щаго и, живу́ще, страда́льцы, си́лою Бо́жиею укрепля́еми и́стинно, полки́ победи́сте враго́в, всеблаже́ннии, кре́пкаго во бране́х Бо́га пе́сньми восхваля́юще.

И ны́не и при́сно и во ве́ки веко́в. Ами́нь.

Богородичен: Пречи́стый Ты́ хра́м была́ еси́ и пресвяты́й киво́т, прие́мши Творца́ неопи́саннаго и непостижи́маго, во утро́бе Твое́й вмести́вши, Единоро́днаго Бо́га Сло́ва, Благослове́нная Всечи́стая Влады́чице.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии мученицы Сергие и Вакхе, моли́те Бо́га о нас.

Иже росо́ю дре́вле отроко́м пла́мень Прохлади́вый, стоя́щия в по́двизех укрепи́ Твоя́ му́ченики, пою́щия: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Припев: Святии мученицы Сергие и Вакхе, моли́те Бо́га о нас.

Ядови́тая и душевре́дная ласка́ния мучи́тельская у́мно страстоте́рпцы отрази́ша, Христу́ вопию́ще и глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Припев: Святии мученицы Сергие и Вакхе, моли́те Бо́га о нас.

Действи́тельны храни́тели на́м, Се́ргия и Ва́кха, и́стинно вене́чники, Христо́с показа́, храня́щия и пою́щия: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Напра́ви мою́, Влады́ко Христе́, моли́твами му́ченик стезю́ доброде́телей и удо́бно Тебе́ взыва́ти сподо́би: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Блажу́ Тя́, и́стинную Бо́га на́шего Ма́терь, — ра́дуйся, — со Ангелом принося́ Ти́, Чи́стая, Всенепоро́чная Влады́чице, — Тя́ бо непреста́нно вся́ дела́ Госпо́дня пою́т и превозно́сят во вся́ ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святии мученицы Сергие и Вакхе, моли́те Бо́га о нас.

Всего́ Христа́ стяжа́ли есте́, ми́р бо ве́сь Того́ ра́ди оста́вили есте́, и ны́не, му́ченицы, в небе́сных водворя́етеся, ли́ки вы́шних си́л и муже́й блаже́нных ви́дяще све́тлости.

Припев: Святии мученицы Сергие и Вакхе, моли́те Бо́га о нас.

Дае́ши сопряже́ние всеизря́днейшее похвале́ния любо́вию Тебе́ принося́щим, благода́ть свы́ше и прегреше́ний оставле́ние, моля́щи еди́наго Милосе́рдаго, к Нему́же тща́шеся, низоре́вностных небрегли́ есте́.

Припев: Святии мученицы Сергие и Вакхе, моли́те Бо́га о нас.

Заре́ю Трисия́ннаго Божества́ просвеще́ни, непобеди́мии му́ченицы, многобо́жное преле́стное безбо́жие и мучи́телей стра́х отри́нуша, и ны́не нетле́нныя наслажда́ются сла́дости ра́йския.

Сла́ва Отцу́ и Сы́ну и Свято́му Ду́ху:

Тече́ние до́брое соверши́вше, благочести́ву же ве́ру сохрани́ти потща́вшеся, недви́жимое прия́ти сподо́бистеся Ца́рствие, пресла́внии му́ченицы, венце́м добро́ты и благоле́пия увязе́ни.

И ны́не и при́сно и во ве́ки веко́в. Ами́нь.

Богородичен: О, па́че ума́ чуде́с Твои́х! Бо́жие бо Сло́во, пло́ть бы́вшее, еди́на родила́ еси́ преесте́ственно, Ма́ти Де́во, вся́ческая Боже́ственным хоте́нием содержа́щаго му́дре и окормля́юща.

Свети́лен.

Светоза́рную дво́ицу страстоте́рпец, Се́ргия и Ва́кха, похва́лим: ра́н бо стремле́ния претерпе́ша и горды́ню низложи́ша всезло́бнаго мучи́теля Тро́ическою си́лою.

Богородичен:

Херуви́м яви́ся сла́внейши и серафи́м показа́ся вы́шши, я́ко Бо́га ро́ждши воплоще́нна, земны́м же показа́вша стези́ пра́выя наступа́ти, ко спасе́нию приводя́щия.

Молитва

Святи́и му́ченицы Сергие и Вакхе! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.