20 октября.

Канон иной преподобному Сергию Нуромскому, Вологодскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Жела́нием духо́вным разгара́яся, преблаже́нне, сле́з твои́х тече́нием ду́шу твою́ напои́л еси́, и я́же из глубины́ воздыха́ньми уязвля́я се́рдце твое́, бо́дренными моли́твами, и всено́щным предстоя́нием Влады́це Христу́ многодоброде́телен пло́д прине́сл еси́ са́м себе́. Сего́ ра́ди, я́ко Бо́жий уго́дник, свети́ло ми́ру показа́лся еси́, сия́я чудесы́. Се́ргие преподо́бне о́тче на́ш, те́плый моли́твенниче, Бо́га всегда́ моли́, да спасе́т ду́ши на́ша.

Велича́ние:

Ублажа́ем тя́, преподо́бне о́тче Се́ргие, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Прииди́те, празднолю́бцы, соше́дшеся дне́сь, пе́сньми и похвала́ми воспои́м блаже́ннаго, и́ноком наста́вника, отце́м похвалу́, исто́чника исцеле́ний, ве́рным засту́пника вели́каго, бесо́м прогони́теля, страсте́м искорени́теля, свети́льника пресве́тлаго, чудотво́рца вели́каго. К нему́же возопии́м: О, всечестны́й Се́ргие преподо́бне! Не преста́й моля́ся ко Христу́ Бо́гу спасти́ся душа́м на́шим.

Други́й кано́н, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Сергие, моли́ Бо́га о нас.

Тле́нная я́же на земли́ оста́вив, восте́кл еси́ к небе́сным оби́телем, и престо́лу все́х Влады́ки предстои́ши, Ему́же о на́с, преподо́бне Се́ргие, моли́ся, восхваля́ющих при́сно па́мять твою́.

Припев: Преподобне отче Сергие, моли́ Бо́га о нас.

От ю́ности Бо́гови освяти́лся еси́, преподо́бне, и к Нему́ приближа́яся доброде́тельми, полки́ бесо́вския потреби́л еси́, и ны́не отгоняеши нечи́стыя ду́хи от челове́к, моля́щихся тебе́ с ве́рою.

Сла́ва Отцу́ и Сы́ну и Свято́му Ду́ху:

Яко кри́н, в пусты́ни Дави́дски процве́л еси́, преподо́бне, оби́тель яви́вся Пресвято́му Ду́ху, Иже и показа́ тя сла́вна вселе́нней, испроси́ на́м у Того́ оставле́ние прегреше́ний на́ших, тя́, преподо́бне, восхваля́ющим.

И ны́не и при́сно и во ве́ки веко́в. Ами́нь.

Богородичен: Всесвята́я Богоро́дице, Соде́теля и Спа́са ро́ждшая все́м пою́щим Тя́, спаси́ гра́д Тво́й и оби́тель Твою́, не преста́й моля́щи за ны́ Сы́на Твоего́ и Бо́га на́шего.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподобне отче Сергие, моли́ Бо́га о нас.

Яко фи́никс, процве́л еси́ во юдо́ли плаче́вней, исто́чник сле́з пролива́я и возраста́я Ду́хом Святы́м, от Него́же незави́стная чудеса́ на́м подае́ши.

Припев: Преподобне отче Сергие, моли́ Бо́га о нас.

Не восхоте́л еси́ сла́вы сея́ тле́нныя, взыску́я небе́сныя, сего́ ра́ди оста́вль вся́, в пусты́ню всели́лся еси́, посто́м и моли́твами угожда́я Бо́гови, те́мже и прия́л еси́ от Него́ нетле́нную по́честь трудо́в твои́х.

Сла́ва Отцу́ и Сы́ну и Свято́му Ду́ху:

Те́сный и приско́рбный пу́ть на земли́ ше́ствуя, богому́дре, простра́нствия о́наго небе́снаго дости́гл еси́, отону́дуже с ве́рою приходя́щим к тебе́ источа́еши чудеса́ пресла́вная.

И ны́не и при́сно и во ве́ки веко́в. Ами́нь.

Богородичен: Спасе́ние Тя́ на вся́ко вре́мя и ме́сто призыва́ю, не пре́зри мене́, Всенепоро́чная, без истле́ния Бо́га ро́ждшая, Изба́вителя и Спа́са моего́.

Седа́лен, гла́с 4:

Жите́йских мо́лв, преподо́бне, отве́ргся, удали́ся еси́ в пусты́ню, Го́спода, изба́вльшаго тя́ от лю́тых при́сно ча́я, и Тому́ прилепи́вся, жи́знь Ангельскую пожи́л еси́ с пло́тию, сего́ ра́ди и прия́л еси́ нестаре́ющееся блаже́нство, в не́мже ны́не водворя́яся, помина́й на́с, чту́щих пресвяту́ю па́мять твою́.

Сла́ва, и ны́не, Богородичен:

Пречи́стеи ру́це Твои́, Богоро́дице Де́во Ма́ти, просте́рши, покры́й на́с, упова́ющих на Тя́, Сы́на Твоего́ моля́щи изба́вити на́с от вся́ких искуше́ний ви́димых и неви́димых вра́г, и пода́ти душа́м на́шим ми́р и ве́лию ми́лость.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобне отче Сергие, моли́ Бо́га о нас.

Яко пти́ца обре́л еси́ себе́ пусты́ню безмо́лвия, в не́йже подвиза́вся, в слеза́х и умиле́нии провожда́л еси́ жи́знь твою́, те́мже све́та и ра́дости о́ныя бы́в сы́н, моли́ о чту́щих тя́.

Припев: Преподобне отче Сергие, моли́ Бо́га о нас.

Яко жи́в, сы́й с на́ми водворя́лся еси́, та́ко и ны́не, со преподо́бными Влады́це предстоя́, моли́ изба́витися все́м на́м от вся́каго гне́ва, и преще́ния, и бу́дущаго гре́шных томле́ния.

Сла́ва Отцу́ и Сы́ну и Свято́му Ду́ху:

Ста́до, е́же стяжа́л еси́ труды́ твои́ми, о́тче, не оста́ви, но посеща́й я́ко оте́ц чадолюби́вый, все́м же, притека́ющим к чудотво́рному твоему́ гро́бу, пода́ждь согреше́ний разреше́ние.

И ны́не и при́сно и во ве́ки веко́в. Ами́нь.

Богородичен: Евина кля́тва, Богома́ти, упраздни́ся Тобо́ю, Всенепоро́чная, Воплоще́нно бо Сло́во родила́ еси́ Присносу́щное, благослове́ньми ми́р венча́вшее.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Припев: Преподобне отче Сергие, моли́ Бо́га о нас.

Ум тво́й к Бо́гу впери́в, вся́, на земли́ су́щая презре́л еси́, сего́ ра́ди, водворя́яся ны́не во оби́телех небе́сных, подава́й на́м при́сно спасе́ние и избавле́ние, да вси́ тя́, блаже́нне, воспева́ем непреста́нно.

Припев: Преподобне отче Сергие, моли́ Бо́га о нас.

Све́тлость жития́ твоего́, преподо́бне Се́ргие, все́х просвеща́ет, слепы́м прозре́ние, хромы́м хожде́ние да́рует, все́м же, пра́зднующим святу́ю па́мять твою́, от грехо́в разреше́ние.

Сла́ва Отцу́ и Сы́ну и Свято́му Ду́ху:

Пото́ки сле́зными угаси́л еси́ страстна́я разжже́ния, огне́м же любве́ Бо́жия совокупи́лся еси́ росе́ безстра́стия, Христу́ Бо́гу на́шему, Ему́же не преста́й о на́с моли́тися, да пода́ст на́м ве́лию ми́лость.

И ны́не и при́сно и во ве́ки веко́в. Ами́нь.

Богородичен: Се́ во чре́ве Твое́м, Пречи́стая, Христа́ Бо́га на́шего па́че сло́ва име́ла еси́, я́коже Иса́ия предрече́, па́че естества́ Сего́ родила́ еси́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобне отче Сергие, моли́ Бо́га о нас.

От ю́ности, блаже́нне Се́ргие, име́л еси́ житие́ твое́ чи́сто, сего́ ра́ди Пречи́стому Влады́це ны́не предстои́ши со Ангельскими ли́ки, моля́ Его́ изба́вити на́с от все́х зо́л.

Припев: Преподобне отче Сергие, моли́ Бо́га о нас.

От вся́каго наве́та вра́жия потщи́ся изба́вити на́с, блаже́нне Се́ргие, я́ко да све́тло пра́зднуем пречестну́ю твою́ па́мять.

Сла́ва Отцу́ и Сы́ну и Свято́му Ду́ху:

В пусты́ни безмо́лвия еди́нствующу ти́, богоно́сне, лука́вый вра́г злонра́вныя разбо́йники на тя́ вообража́ет, хотя́ озло́бити боголюби́вую твою́ ду́шу, Бо́г же вня́т моли́тве твое́й, победи́ того́ и ловле́ния его́.

И ны́не и при́сно и во ве́ки веко́в. Ами́нь.

Богородичен: Иже во утро́бу Твою́ всели́ся Сло́во, Пренепоро́чная Влады́чице, все́ челове́ческое существо́ обожи́ и мно́жество преподо́бных ли́к привлече́.

Конда́к, гла́с 8.

Яко звезда́ пресве́тлая, от Святы́я горы́ провозше́д, добро́тами чуде́с твои́х ве́сь ми́р просвети́л еси́: взе́м бо кре́ст Христо́в, после́довал еси́ Ему́, и в пусты́ннем озлобле́нии, в моли́твах и поще́ниих, во бде́ниих и злострада́ниих изнури́л еси́ пло́ть твою́, те́мже и Христо́с да́ром чуде́с обогати́ тебе́. Ему́же о на́с моля́ся, посеща́й ча́да твоя́, да зове́м ти́: ра́дуйся, Се́ргие о́тче на́ш, пусты́нный жи́телю.

Икос:

Зако́ну Бо́жию повину́яся, от младе́нства путе́м приско́рбным, блаже́нне, ше́ствовал еси́, вся́, я́же в ми́ре сла́дкая и кра́сная, преоби́дев, всели́лся еси́ в пусты́ню, в не́йже кре́ст сво́й взе́м, распя́л еси́ себе́ ми́рови, и ми́р тебе́ ра́спят бы́сть. Те́мже от все́х слы́шише: ра́дуйся, я́ко презре́л еси́ теку́щая и тле́нная; ра́дуйся, я́ко, Бо́гом наставля́емь, пусты́ни дости́гл еси́; ра́дуйся, я́ко, в не́й подвиза́вся, Бо́гу угоди́л еси́, врага́ победи́в; ра́дуйся, я́ко собра́л еси́ учени́к ста́до, и́миже Бо́г просла́вися; ра́дуйся, пресве́тлым житие́м твои́м святы́я Ангелы удиви́вый и челове́ки по́льзовавый; ра́дуйся, я́ко на небеси́ со Ангелы ликовству́еши, Тро́ице предстоя́, и о на́с мо́лишися; ра́дуйся, исто́чниче чуде́с неисчерпа́емый. Ра́дуйся, Се́ргие о́тче на́ш, пусты́нный жи́телю.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобне отче Сергие, моли́ Бо́га о нас.

Се́рдце стяжа́в чи́сто, вмести́лище бы́л еси́ Свята́го Ду́ха, сего́ ра́ди многоцеле́бныя твоя́ мо́щи струи́ исцеле́ний источа́ют пою́щим: оте́ц на́ших Бо́же, благослове́н еси́.

Припев: Преподобне отче Сергие, моли́ Бо́га о нас.

Моли́твенника Ти́ приво́дим преподо́бнаго Се́ргия, те́м прося́ще от грехо́в свободи́тися и Твои́м всеору́жием сохране́ным бы́ти на́м от наве́т вра́жиих, зову́щим: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Плотско́е взыгра́ние воздержа́нием увяди́л еси́, блаже́нне, те́мже па́стырь показа́лся еси́ боголюбе́знаго твоего́ ста́да, о не́мже не преста́й моля́ся ко Христу́ Бо́гу, зовы́й: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Святы́х Свята́го, во святы́х Почива́ющаго, свя́то родила́ еси́, Де́во Всенепоро́чная, за милосе́рдие мно́гое Челове́ка бы́вшаго, из Тебе́ воплоще́нна, су́ща пре́жде Безпло́тнаго.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Преподобне отче Сергие, моли́ Бо́га о нас.

Тве́рдым по́мыслом на ра́мо кре́ст взе́м, Христу́ после́довал еси́, я́ко и́нок пребла́г, сего́ ра́ди от святы́х моще́й твои́х, блаже́нне Се́ргие, излива́еши пресла́вная чудеса́ благоче́стно Христа́ славосло́вящим.

Припев: Преподобне отче Сергие, моли́ Бо́га о нас.

Утверди́вся кре́постию Ду́ха, врага́ кре́пкаго смири́л еси́, и победи́тель бы́в, ве́рных ду́ши просвеща́еши Боже́ственными чудесы́ и зна́меньми.

Сла́ва Отцу́ и Сы́ну и Свято́му Ду́ху:

По́двигом боже́ственным, о́тче, в пусты́ни подвиза́лся еси́, и сего́ ра́ди предлежи́т тебе́, преподо́бне, до́браго де́лания вене́ц, те́м Христу́ моля́ся не преста́й о ве́рою чту́щих тя́.

И ны́не и при́сно и во ве́ки веко́в. Ами́нь.

Богородичен: Уны́л и́мам по́мысл и ду́шу сластьми́ отягче́ну, но к Тебе́ прибега́я, Богороди́тельнице Чи́стая, вопию́ Ти: воздви́гни и спаси́ мя, отча́яннаго и осужде́ннаго.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу велича́ем.

Припев: Преподобне отче Сергие, моли́ Бо́га о нас.

На го́ры честны́х за́поведей восте́кл еси́, я́коже дре́вле Моисе́й, те́м Христа́ зри́ши ны́не я́ве, я́коже в купине́ о́н, и источа́еши на́м, я́ко мѵ́ро благода́тное, животво́рныя во́ды исцеле́ния.

Припев: Преподобне отче Сергие, моли́ Бо́га о нас.

Манове́нием боже́ственным управля́емь, Се́ргие, стра́сти вся́кия пребы́л еси́ неприча́стен, и в безстра́стие, я́ко во оде́жду, обле́клся еси́, те́м ны́не Пречи́стому Све́ту причаща́яся, помина́й на́с, ве́рно ублажа́ющих тя́.

Сла́ва Отцу́ и Сы́ну и Свято́му Ду́ху:

О, свяще́нный сосу́де Христа́ Бо́га на́шего, Ангелом собесе́дниче и преподо́бным единокро́вниче и пра́ведным! Приими́ сие́ от недосто́йных у́ст приноси́мое тебе́ хвале́ние, и испроси́ ми от грехо́в избавле́ния.

И ны́не и при́сно и во ве́ки веко́в. Ами́нь.

Богородичен: Светоно́сну две́рь Тя́ предзря́ше Иезекии́ль, Еюже про́йде Све́т Истинный, Христо́с Бо́г на́ш, Того́ моли́ приле́жно, Чи́стая, покая́ния ми́ две́рь отве́рзти, молю́ся Ти́.

Свети́лен.

Мирска́го весе́лия, я́ко скве́рны, уклони́лся еси́, посто́м и моли́твами пло́ть увяди́в, и ду́шу твою́ очи́стив, сла́вою обогати́лся еси́ небе́сною, сла́вне, те́мже моля́ не преста́й о на́с Го́спода.

Сла́ва, и ны́не, Богородичен:

Вои́стину Богоро́дицу Тя́ испове́дуем, Тобо́ю спа́сшиися, Влады́чице, и́бо Бо́га неизрече́нно родила́ еси́, разо́ршаго Кресто́м сме́рть, к Себе́ же привле́кшаго преподо́бных собо́ры, с ни́ми же Тя́ восхваля́ем, Де́во.

Стихи́ры, гла́с 8.

О, пресла́внаго чудесе́, преблаже́нне Се́ргие! Яко от нетле́нна исто́чника, от свята́го твоего́ гро́ба честны́я твоя́ мо́щи, я́ко жи́вы, источа́ют пресла́вная чудеса́ и исцеле́ния приходя́щим к тебе́ с ве́рою челове́ком, бе́сы прогоня́ют и разли́чныя неду́ги исцеля́ют моли́твами твои́ми. Те́мже, соше́дшеся, любо́вию па́мять твою́ почита́ем.

О, пресла́внаго чудесе́! Мно́гими ле́ты земле́ю покрове́но бы́сть свято́е твое́ те́ло, и забве́но бы́сть на до́лгое вре́мя неизрече́нными судьба́ми Бо́жиими, по си́х же вознесе́ тя Госпо́дь на све́щник дарова́ний чуде́с челове́ческому ро́ду. Те́мже мо́лим тя́, преподо́бне Се́ргие, посеща́й на́с, тя́ почита́ющих.

О, пресла́внаго чудесе́! По мно́зех ле́тех преставле́ния твоего́, я́ко жи́в, вои́стину явля́ешися не́коему и́ноку, повелева́еши ему́ возвести́ти настоя́телю святы́я твоея́ оби́тели, да очи́стит ме́сто святы́х твои́х моще́й. Он же, презре́в твое́ повеле́ние, наказа́ние прия́т своего́ ослуша́ния. Ты́ же того́ па́ки поми́ловал еси́, те́мже пра́зднуем святу́ю па́мять твою́.

Сла́ва, гла́с 8:

Пусты́ня, я́же пре́жде имя́ши жили́ща де́монская, ны́не же вселе́ние бы́сть ста́ду учени́к твои́х, веселя́щися, украша́ется: в себе́ бо иму́щи честны́я мо́щи твоя́, освяща́ется разли́чными добро́тами чуде́с твои́х, созыва́ющи вся́ ве́рныя ко славосло́вию Бо́жию. Те́мже, соше́дшеся дне́сь в па́мяти твое́й, уми́льно мо́лимся: Се́ргие преподо́бне, Христу́ предстоя́, испроси́ Це́рквам единомы́слие дарова́ти на враги́ одоле́ние, и ми́ру ми́р, и душа́м на́шим ве́лию ми́лость.

И ны́не, Богородичен:

Влады́чице, приими́ моли́твы ра́б Твои́х и изба́ви на́с от вся́кия ну́жды и печа́ли.

Молитва

О, великий чудотворче, преподобне отче наш Сергие! Услыши нас грешных молящихся тебе и имя твое святое на помощь призывающих, не презри нас чтущих тя: моли о нас грешных Содетеля нашего Господа Бога, тебе бо дадеся благодать молитися за нас. Не мним бо тя мертва суща: аще бо телом и преставился еси от нас, и рака твоя пред очима нашима видима есть, но святая твоя душа со ангельскими лики предстоит у Престола Вседержителева. О, пастырю наш, преподобне отче Сергие! Потщися сохранити нас от пагубныя смерти и от бесовскаго искушения, умом от малодушия помраченных. Не остави нас, светильниче Христов, плененных быти, но помози нам молитвами твоими от вечныя муки избавитися и наследники Царствия Небеснаго быти со всеми святыми от века угодившими Господу Богу нашему Иисусу Христу, Емуже подобает честь, поклонение, слава и держава, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.