20 октября.

Канон преподобному Сергию Нуромскому, Вологодскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Жела́нием духо́вным разгара́яся, преблаже́нне, сле́з твои́х тече́нием ду́шу твою́ напои́л еси́, и я́же из глубины́ воздыха́ньми уязвля́я се́рдце твое́, бо́дренными моли́твами, и всено́щным предстоя́нием Влады́це Христу́ многодоброде́телен пло́д прине́сл еси́ са́м себе́. Сего́ ра́ди, я́ко Бо́жий уго́дник, свети́ло ми́ру показа́лся еси́, сия́я чудесы́. Се́ргие преподо́бне о́тче на́ш, те́плый моли́твенниче, Бо́га всегда́ моли́, да спасе́т ду́ши на́ша.

Велича́ние:

Ублажа́ем тя́, преподо́бне о́тче Се́ргие, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Прииди́те, празднолю́бцы, соше́дшеся дне́сь, пе́сньми и похвала́ми воспои́м блаже́ннаго, и́ноком наста́вника, отце́м похвалу́, исто́чника исцеле́ний, ве́рным засту́пника вели́каго, бесо́м прогони́теля, страсте́м искорени́теля, свети́льника пресве́тлаго, чудотво́рца вели́каго. К нему́же возопии́м: О, всечестны́й Се́ргие преподо́бне! Не преста́й моля́ся ко Христу́ Бо́гу спасти́ся душа́м на́шим.

Кано́н преподо́бному, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Сергие, моли́ Бо́га о нас.

Во́ду страсте́й мои́х изсуши́, Бо́же, исто́чник безсме́ртия излия́в души́ мое́й, и да́ждь ми́ пе́ти чи́стою душе́ю и устна́ми Твоего́ преподо́бнаго Се́ргия, я́ко да пою́ при́сно: Изба́вителю и Бо́гу на́шему пои́м, я́ко просла́вися.

Припев: Преподобне отче Сергие, моли́ Бо́га о нас.

Любо́вию Христо́вою уязви́вся, преподо́бне, восле́д Того́ усе́рдно от души́ после́довал еси́, восприи́м житие́ Ангельское и поя́: Изба́вителю и Бо́гу на́шему пои́м, я́ко просла́вися.

Сла́ва Отцу́ и Сы́ну и Свято́му Ду́ху:

Утверди́в тво́й по́мысл Боже́ственными запове́дании, жите́йских мо́лв отве́рглся еси́, и в пусты́нях скита́яся, преподо́бному Па́влу собесе́дник, блаже́нне, бы́л еси́, с ни́мже воспева́л еси́: Изба́вителю и Бо́гу на́шему пои́м, я́ко просла́вися.

И ны́не и при́сно и во ве́ки веко́в. Ами́нь.

Богородичен: Уста́ви непреста́нное смуще́ние мои́х по́мыслов, Богоро́дице Де́во, и серде́чную боле́знь утоли́ воспева́ющих: Изба́вителю и Бо́гу на́шему пои́м, я́ко просла́вися.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Преподобне отче Сергие, моли́ Бо́га о нас.

Зача́ло прему́дрости, преподо́бне, прие́м, стра́х Бо́жий, сего́ положи́л еси́ в души́ твое́й основа́ние доброде́тели, и на се́м основа́нии утверди́в вся́ помышле́ния, Го́сподеви вопия́л еси́: пое́т Тя́ ду́х мо́й.

Припев: Преподобне отче Сергие, моли́ Бо́га о нас.

Мудрова́нием до́льним высоту́ смире́ния возлюби́л еси́, и на го́ру безстра́стия возше́л еси́, умертви́в душетле́нныя стра́сти.

Сла́ва Отцу́ и Сы́ну и Свято́му Ду́ху:

В предстоя́нии твое́м моли́твеннем бо́дро име́я душе́вное твое́ о́ко, во е́же прозира́ти гряду́щая, ска́зовал еси́ и собесе́днику твоему́, преподо́бному Па́влу, хотя́щая ему́ по́слежде бы́ти.

И ны́не и при́сно и во ве́ки веко́в. Ами́нь.

Богородичен: Прему́дрость и Сло́во Отчее несказа́нно родила́ еси́, Богоро́дице, души́ моея́ я́зву исцели́, и серде́чную боле́знь утоли́.

Седа́лен, гла́с 4:

Жите́йских мо́лв, преподо́бне, отве́ргся, удали́ся еси́ в пусты́ню, Го́спода, изба́вльшаго тя́ от лю́тых при́сно ча́я, и Тому́ прилепи́вся, жи́знь Ангельскую пожи́л еси́ с пло́тию, сего́ ра́ди и прия́л еси́ нестаре́ющееся блаже́нство, в не́мже ны́не водворя́яся, помина́й на́с, чту́щих пресвяту́ю па́мять твою́.

Сла́ва, и ны́не, Богородичен:

Пречи́стеи ру́це Твои́, Богоро́дице Де́во Ма́ти, просте́рши, покры́й на́с, упова́ющих на Тя́, Сы́на Твоего́ моля́щи изба́вити на́с от вся́ких искуше́ний ви́димых и неви́димых вра́г, и пода́ти душа́м на́шим ми́р и ве́лию ми́лость.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Сергие, моли́ Бо́га о нас.

Вмени́л еси́ в се́рдце твое́м, е́же при́сно прилепля́тися Бо́гови, и сего́ ра́ди на безмо́лвие прише́л еси́, в не́мже непреста́нно пребыва́я, к Бо́гу вопие́ши: си́ле Твое́й сла́ва, Человеколю́бче.

Припев: Преподобне отче Сергие, моли́ Бо́га о нас.

В пусты́ннем озлобле́нии и ско́рбех, зело́ обрета́ющих тя́, прибе́жище и си́лу име́л еси́ Бо́га, те́мже на Того́ возложи́в упова́ние, вся́ победи́л еси́ творя́щия тебе́ напа́сти, блаже́нне.

Сла́ва Отцу́ и Сы́ну и Свято́му Ду́ху:

Жела́я всели́тися во дворы́ Госпо́дни, скончава́л еси́, преподо́бне, жи́знь твою́, де́нь и но́щь в моли́твах и во бде́ниих не дая́ поко́я телеси́ твоему́, до́ндеже дости́гл еси́ при́сно жела́емаго ти́ блаже́нства.

И ны́не и при́сно и во ве́ки веко́в. Ами́нь.

Богородичен: Просвети́ мя́, Влады́чице, заре́ю ми́лости Твоея́, во тме́ прегреше́ний мои́х су́ща, Деви́це, и к све́ту покая́ния наста́ви мя́, молю́ся, и спасе́ния жи́зни.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Преподобне отче Сергие, моли́ Бо́га о нас.

В моли́твах и бде́ниих прилежа́ Бо́гови, сле́зными исто́чники те́ло с душе́ю в чистоте́ предста́вил еси́, те́мже и по сме́рти твое́й сподо́бился небе́сных дарова́ний.

Припев: Преподобне отче Сергие, моли́ Бо́га о нас.

Обре́т тя́ равноа́нгельный, преподо́бный Па́вел, во вну́тренней пусты́ни кры́ющася, бы́сть дру́г тво́й и собесе́дник, преподо́бне Се́ргие, те́мже вку́пе и подвиза́лися есте́, и клевре́ти бы́сте бли́жнии.

Сла́ва Отцу́ и Сы́ну и Свято́му Ду́ху:

Обле́кся во смире́ние Христо́во, я́ко а́гня незло́биво прине́л еси́ себе́, сего́ ра́ди и зе́млю кро́тких насле́довал еси́, иде́же водворя́яся, сла́виши Го́спода.

И ны́не и при́сно и во ве́ки веко́в. Ами́нь.

Богородичен: Ду́шу мою́ огорче́нную я́дом, сопроти́внаго угрызе́нием, исцели́, Христе́, де́йственным врачева́нием, моли́твами ро́ждшия Тя́ и преподо́бнаго Се́ргия.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Сергие, моли́ Бо́га о нас.

Зва́нию Христо́ву после́довав и, Того́ свято́е и́го на себе́ взе́м, в ве́чный поко́й пости́гл еси́, иде́же пра́зднующих гла́с безконе́чный и непрестаю́щая ра́дость, я́же угото́ва Бо́г лю́бящим Его́ повеле́ния.

Припев: Преподобне отче Сергие, моли́ Бо́га о нас.

Го́рлица пустыннолю́бная бы́л еси́ в жи́зни се́й, блаже́нне, безпреста́нныя сле́зы точа́, взыска́я Го́спода де́нь и но́щь, Его́же обре́т ны́не, от вся́каго вре́да лука́ваго избавля́й пою́щих тя́.

Сла́ва Отцу́ и Сы́ну и Свято́му Ду́ху:

Гро́б тво́й, преподо́бне Се́ргие, в не́мже лежа́т честны́я мо́щи твоя́, благоуха́ет арома́ты Боже́ственных дарова́ний и источа́ет ве́рным исцеле́ния.

И ны́не и при́сно и во ве́ки веко́в. Ами́нь.

Богородичен: Без се́мени заче́нши Бо́га, Зижди́теля естеству́ нетле́нно родила́ еси́, Того́ моли́, Богома́ти, спасти́ся на́м.

Конда́к, гла́с 8.

Яко звезда́ пресве́тлая, от Святы́я горы́ провозше́д, добро́тами чуде́с твои́х ве́сь ми́р просвети́л еси́: взе́м бо кре́ст Христо́в, после́довал еси́ Ему́, и в пусты́ннем озлобле́нии, в моли́твах и поще́ниих, во бде́ниих и злострада́ниих изнури́л еси́ пло́ть твою́, те́мже и Христо́с да́ром чуде́с обогати́ тебе́. Ему́же о на́с моля́ся, посеща́й ча́да твоя́, да зове́м ти́: ра́дуйся, Се́ргие о́тче на́ш, пусты́нный жи́телю.

Икос:

Зако́ну Бо́жию повину́яся, от младе́нства путе́м приско́рбным, блаже́нне, ше́ствовал еси́, вся́, я́же в ми́ре сла́дкая и кра́сная, преоби́дев, всели́лся еси́ в пусты́ню, в не́йже кре́ст сво́й взе́м, распя́л еси́ себе́ ми́рови, и ми́р тебе́ ра́спят бы́сть. Те́мже от все́х слы́шише: ра́дуйся, я́ко презре́л еси́ теку́щая и тле́нная; ра́дуйся, я́ко, Бо́гом наставля́емь, пусты́ни дости́гл еси́; ра́дуйся, я́ко, в не́й подвиза́вся, Бо́гу угоди́л еси́, врага́ победи́в; ра́дуйся, я́ко собра́л еси́ учени́к ста́до, и́миже Бо́г просла́вися; ра́дуйся, пресве́тлым житие́м твои́м святы́я Ангелы удиви́вый и челове́ки по́льзовавый; ра́дуйся, я́ко на небеси́ со Ангелы ликовству́еши, Тро́ице предстоя́, и о на́с мо́лишися; ра́дуйся, исто́чниче чуде́с неисчерпа́емый. Ра́дуйся, Се́ргие о́тче на́ш, пусты́нный жи́телю.

Пе́снь 7.

Ирмос: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Сергие, моли́ Бо́га о нас.

В черто́зех небе́сных водворя́яся, преподо́бне, и оде́жду светови́дну нося́, мно́гими доброде́тельми преукраше́н сы́й, моли́ся обрести́ на́м ми́лость, пою́щим: оте́ц на́ших Бо́же, благослове́н еси́.

Припев: Преподобне отче Сергие, моли́ Бо́га о нас.

Лу́чшии по́мыслом бы́в вне́ пло́ти, преподо́бне, стра́сти удержа́в, бесо́в шата́ния разори́л еси́, и ны́не, с преподо́бными все́ми в небе́сных селе́ниих живы́й, спаса́й вся́ пою́щия: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

На гора́х доброде́телей, я́ко еле́нь, пребыва́я, ко Христу́ Ка́мени неотто́ржене прилепи́лся еси́, у Него́же ро́су прие́м во устуже́ние духо́вных твои́х жела́ний, ороша́емь зове́ши: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ на́м ро́ждшая.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Сергие, моли́ Бо́га о нас.

Любо́вию ко Христу́ распала́емь, усе́рдно вся́, я́же в пусты́ни, ско́рбная ше́ствия претерпе́л еси́ и бесо́в вся́ лю́тая устремле́ния победи́л еси́, те́мже и досто́йным венце́м от Бо́га венча́лся еси́, и с преподо́бными ликовству́я, пое́ши: Го́сподеви по́йте и превозноси́те Его́ во ве́ки.

Припев: Преподобне отче Сергие, моли́ Бо́га о нас.

Плотско́е мудрова́ние, о́тче Се́ргие, умертви́л еси́ и сего́ ра́ди на небесе́х со Ангелы жи́ти сподо́бился еси́, иде́же святы́х собо́ри ликовству́ют, непреста́нно пою́ще: Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Сле́з тече́нием просвети́л еси́ ду́шу, очи́стив у́м тво́й от страстны́х приложе́ний. Пресвяты́я Тро́ицы до́м показа́лся еси́, и с ли́ки святы́х пое́ши: Го́спода по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Умертве́ния ми́ пло́д принесе́ дре́вле естество́м ра́й жи́зни: Ты́ же Пло́д, Боже́ственный ра́й, процвела́ еси́, Богоро́дице, и́мже пита́яся, не ктому́ сме́рти порабоще́н бу́ду.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Сергие, моли́ Бо́га о нас.

Взира́нии непреста́нными к Бо́гу, о́тче, умертви́л еси́ пло́ть, и врага́ победи́л еси́, и ны́не преста́вился еси́ к небе́сным оби́телем, иде́же со Ангелы Бо́гови предстоя́, сла́виши Сего́ при́сно.

Припев: Преподобне отче Сергие, моли́ Бо́га о нас.

Стопа́м после́дуя преподо́бнаго Се́ргия, в Росси́и я́ко со́лнце возсия́вшаго, от Бо́га спасе́ние стяжа́л еси́, и ны́не с те́мже Христу́ предстои́ши, прие́мля бога́тыя да́ры.

Сла́ва Отцу́ и Сы́ну и Свято́му Ду́ху:

Блаже́нства ра́йскаго вои́стину сподо́бился еси́, богому́дре, во́лею бо Обнища́вшему на́с ра́ди после́довал еси́, Его́же ра́ди вся́ су́щая в ми́ре презре́л еси́, те́мже и То́й просла́ви тя́ боже́ственными прославле́ньми.

И ны́не и при́сно и во ве́ки веко́в. Ами́нь.

Богородичен: Спаси́ мя, Ма́ти Бо́жия, ми́рови Спасе́ние ро́ждшая, от многообра́зных ми́ нахожде́ний, на Тя́ бо наде́жду спасе́ния моего́ возложи́х ве́рно, ра́б Тво́й.

Свети́лен.

Мирска́го весе́лия, я́ко скве́рны, уклони́лся еси́, посто́м и моли́твами пло́ть увяди́в, и ду́шу твою́ очи́стив, сла́вою обогати́лся еси́ небе́сною, сла́вне, те́мже моля́ не преста́й о на́с Го́спода.

Сла́ва, и ны́не, Богородичен:

Вои́стину Богоро́дицу Тя́ испове́дуем, Тобо́ю спа́сшиися, Влады́чице, и́бо Бо́га неизрече́нно родила́ еси́, разо́ршаго Кресто́м сме́рть, к Себе́ же привле́кшаго преподо́бных собо́ры, с ни́ми же Тя́ восхваля́ем, Де́во.

Молитва

О, великий чудотворче, преподобне отче наш Сергие! Услыши нас грешных молящихся тебе и имя твое святое на помощь призывающих, не презри нас чтущих тя: моли о нас грешных Содетеля нашего Господа Бога, тебе бо дадеся благодать молитися за нас. Не мним бо тя мертва суща: аще бо телом и преставился еси от нас, и рака твоя пред очима нашима видима есть, но святая твоя душа со ангельскими лики предстоит у Престола Вседержителева. О, пастырю наш, преподобне отче Сергие! Потщися сохранити нас от пагубныя смерти и от бесовскаго искушения, умом от малодушия помраченных. Не остави нас, светильниче Христов, плененных быти, но помози нам молитвами твоими от вечныя муки избавитися и наследники Царствия Небеснаго быти со всеми святыми от века угодившими Господу Богу нашему Иисусу Христу, Емуже подобает честь, поклонение, слава и держава, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Молитва иная

О, преподобне и достоблаженне отче Сергие, добрый наш пастырю и учителю! Ты еще на земли сей раб преискренний Спаса Христа показался еси, и многия дары благодатныя от Него прияти сподобился еси: по блаженнем же твоем успении Престолу неприступныя Его Славы предстоя, велие к Нему дерзновение имаши. Сего ради моли и о нас, влающихся в пустыни мира сего и сует его. Огради нас предстательством твоим от всех враг видимых и невидимых, от тлетворных ветр, смертоносныя язвы, от глада, труса, потопа, огня, меча, нашествия иноплеменных и от всякаго зла. Наипаче же, святче Божий, пролей теплое твое моление ко Господу о богохранимей державе Российстей, да в мире, тишине и благоденствии жительствуем. Моли, отче священный, Царя царствующих: страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Ограждай же молением твоим, преподобне, Церковь Христову Православную от ересей и расколов, ризу Христову раздрати тщащихся: испроси пастырем святыню, пастве о спасении ревность, старцем крепость и благое напутствие в жизнь вечную, средним лучшым быти, юныя уцеломудри и послушанию научи. Нам же всем, угодниче Божий, время на покаяние испроси, да не во гресех наших умрем, но да молитвами твоими, плоды достойны покаяния принесшым, вечную присноблаженную жизнь и сопребывание со святыми Его дарует нам Господь, да прославляем гласы немолчными Его неизреченное милосердие в безконечныя веки веков. Аминь.