1 октября.
Канон преподобной княгине Евфросинии Суздальской
![Преподобной, княжне Евфросинии Суздальской Преподобной, княжне Евфросинии Суздальской](img_i/002.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 8:
В тебе́, ма́ти, изве́стно спасе́ся е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Евфроси́ние, дух твой.
Ин тропарь, глас 4:
Свята́я твоя́ па́мять/ Су́ждальскую страну́ весели́т,/ ве́рныя же вся созыва́ет во всечестны́й храм твой,/ иде́же ны́не соверша́ется всесла́вная па́мять твоя́,/ Евфроси́ние преподо́бная,/ моли́ Христа́ Бо́га,// спасти́ся душа́м на́шим.
Канон святыя, глас 8.
Песнь 1
Ирмос: Во́ду проше́д, я́ко су́шу, / и еги́петскаго зла избежáв, / изрáильтянин вопия́ше: / Избáвителю и Бо́гу на́шему пои́м.
Припев: Преподо́бная благове́рная княжно́ Евфроси́ние, моли́ Бо́га о нас.
Све́том моли́тв твои́х озари́ нас,/ с любо́вию приступа́ющих святу́ю па́мять твою́ воспе́ти,/ преподо́бная ма́ти.
Припев: Преподо́бная благове́рная княжно́ Евфроси́ние, моли́ Бо́га о нас.
И спро́шена моли́твами и от чре́ва ма́терия избра́на бы́вши,/ всю себе́ в же́ртву Христу́ Бо́гу принесла́ еси́/ и сосу́д избра́н боже́ственных даро́в яви́лася еси́, блаже́нная.
Сла́ва Отцу́ и Сы́ну и Свято́му Ду́ху:
Сохрани́ти хотя́щи де́вство Христу́ Жениху́ и послуша́ние соблюсти́ роди́телем,/ моли́твенно воззва́ла еси́ к Богоро́дице/ и Той хода́тайством жела́нное устрое́ние жи́зни улучи́ла еси́, пресла́вная.
И ны́не и при́сно и во ве́ки веко́в. Ами́нь.
Богородичен: Всего́ мя спаса́ет Сло́во Пребоже́ственное,/ из чре́ва Твоего́ воплоти́тися благоволи́вшее,/ Чи́стая Ма́ти Де́во.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Припев: Преподо́бная благове́рная княжно́ Евфроси́ние, моли́ Бо́га о нас.
Свобо́ду получи́вши от бра́ка Бо́жиим смотре́нием,/ кра́сному добро́тою Христу́ обручи́лася еси́ произволе́нием/ и, Тому́ усе́рдно порабо́тавши,/ ны́не в Небе́сных оби́телех Того́ утеша́ешися оби́льно.
Припев: Преподо́бная благове́рная княжно́ Евфроси́ние, моли́ Бо́га о нас.
Небе́сная возлюби́вши, вся кра́сная ми́ра сего́ оста́вила еси́, преподо́бная,/ и, во оби́тель все́льшися, неле́ностными труды́ по́стничества Бо́гу угоди́ла еси́,/ Его́же моли́ спасти́ся душа́м на́шим.
Сла́ва Отцу́ и Сы́ну и Свято́му Ду́ху:
Всено́щными стоя́нии твои́ми/ безпло́тным Ангелом подо́билася еси́,/ тех споспе́шники иму́щи в твои́х непреста́нных к Бо́гу моли́твах.
И ны́не и при́сно и во ве́ки веко́в. Ами́нь.
Богородичен: При́зри на не́мощь рабо́в Твои́х, Всепе́тая Богоро́дице,/ и изба́ви нас от скры́тых сете́й врага́/ и губи́теля душ на́ших.
Седален, глас 3
Пасо́ма от Го́спода, я́ко овча́ кро́ткое,/ сопроти́вных полки́ победи́ла еси́ благода́тию Свята́го Ду́ха/ и, сконча́вши му́жественно по́двиг,/ венцы́ побе́дныя прия́ла еси́ в Небе́сных селе́ниих, иде́же упокоева́ющися,/ Бо́га приле́жно моли́ спасти́ся душа́м на́шим.
Сла́ва, и ны́не
Мно́гими обдержи́мии напа́стьми,/ к Тебе́ прибега́ем, Влады́чице Чи́стая:/ покры́й нас покро́вом Твои́м/ и моли́твами Твои́ми от страсте́й и бед спаси́.
Песнь 4
Ирмос: Услышах, Господи, слух Твоего смотрения и прославих Тя, Едине Человеколюбче.
Припев: Преподо́бная благове́рная княжно́ Евфроси́ние, моли́ Бо́га о нас.
Бо́дренным о́ком ума́ твоего́/ в зре́нии неви́димаго Бо́га вы́ну пребыва́ла еси́, блаже́нная:/ Его́же лицезре́нием ны́не наслажда́ющися,/ моли́ уны́ния дрема́нию оттрясти́ся от оче́й на́ших.
Припев: Преподо́бная благове́рная княжно́ Евфроси́ние, моли́ Бо́га о нас.
Боже́ственным сло́вом и благода́тию Свята́го Ду́ха воспита́вшися,/ на высоту́ доброде́телей востекла́ еси́, преподо́бная ма́ти,/ и́хже стезе́ю ше́ствовати и нас укрепи́ моли́твами твои́ми.
Сла́ва Отцу́ и Сы́ну и Свято́му Ду́ху:
Огне́м Боже́ственнаго стра́ха попали́вши страсте́й те́рние/ и теплото́ю Уте́шителя согре́вшися,/ была́ еси́ безстра́стия зерца́ло,/ его́же прича́стники и нас покажи́ хода́тайством твои́м.
И ны́не и при́сно и во ве́ки веко́в. Ами́нь.
Богородичен: Омраче́нныя грехми́ ду́ши на́ша просвети́, Пречи́стая,/ и во све́те за́поведей Сы́на Твоего́ и Бо́га ходи́ти научи́ ны.
Пе́снь 5
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Припев: Преподо́бная благове́рная княжно́ Евфроси́ние, моли́ Бо́га о нас.
Нося́щи крест свой,/ после́довала еси́ позва́вшему тя Го́споду бо́дренно,/ свети́льник и́нокиням бы́вши в житии́ твое́м, пресла́вная ма́ти.
Припев: Преподо́бная благове́рная княжно́ Евфроси́ние, моли́ Бо́га о нас.
В терпе́нии, послуша́нии и во́ли своея отрече́нии те́сный путь соверша́вши,/ ны́не в простра́нных селе́ниих обита́вши,/ в ни́же доспе́ти и нас устро́й.
Сла́ва Отцу́ и Сы́ну и Свято́му Ду́ху:
Вся кра́сная ми́ра сего́ попра́вши,/ бу́ди нам помо́щница,/ изнемога́ющим в боре́нии с пре́лестьми ве́ка сего́.
И ны́не и при́сно и во ве́ки веко́в. Ами́нь.
Богородичен: Присноде́ву пое́м Тя, Богоро́дице:/ Ты бо Бо́га Сло́ва пло́тию ми́рови ро́ждши,/ пребыла́ еси́ Де́ва.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Припев: Преподо́бная благове́рная княжно́ Евфроси́ние, моли́ Бо́га о нас.
Мно́гими по́двиги плотска́я умертви́вши стремле́ния,/ и нас, подража́ти тебе́ в по́стничестве возжела́вших,/ те́сным путе́м твои́м ше́ствовати умудри́.
Припев: Преподо́бная благове́рная княжно́ Евфроси́ние, моли́ Бо́га о нас.
Воздержа́ние, моли́тву и любо́вь стяжа́вши, преподо́бная,/ и́ноческаго жития́ о́браз яви́лася еси́,/ в не́мже преуспе́ти и нам посо́бствуй хода́тайством твои́м.
Сла́ва Отцу́ и Сы́ну и Свято́му Ду́ху:
Послуша́ния труды́ преше́дши и все́ми доброде́тельми украси́вшися,/ жезл настоя́тельства прия́ла еси́ во оби́тели и́ночестей,/ ны́не же венце́м сла́вы увенча́на еси́:/ сего́ ра́ди ублажа́ем тя, преподо́бная.
И ны́не и при́сно и во ве́ки веко́в. Ами́нь.
Богородичен: Я́же Бо́га Сло́ва Изба́вителя ми́ру пло́тию ро́ждшая,/ изба́ви, мо́лимся, от сете́й вра́жиих ду́ши на́ша,/ Богороди́тельнице Чи́стая.
Кондак, глас 2
Де́вства чи́стый сосу́д/ еле́ем моли́твы и любве́ испо́лнивши,/ неугаси́мый свети́льник в се́рдце свое́м возжгла́ еси́, преподо́бная,/ с ни́мже бо́дренно в сре́тение Небе́снаго Жениха́ изше́дши,/ в черто́г Того́ пресве́тлый прия́та была́ еси́,/ иде́же ны́не водворя́ющися с ли́ки А́нгелов и святы́х,/ моли́ся, мо́лимся, Христу́ Бо́гу,// ча́сти дев юро́дивых изба́витися нам.
Икос
Де́вство возлюби́вши, сохране́ния того́ испроси́ла еси́ у Присноде́вы/ и, к земно́му ше́ствующи жениху́, Небе́снаго сре́тила еси́,/ Ему́же уневе́стившися, вся жите́йская оста́вила еси́/ и, притру́дное соверша́вши по́стническое житие́,/ в небе́сный черто́г прия́та бы́ти сподо́билася еси́,/ иде́же ны́не с ли́ки А́нгелов и святы́х водворя́ющися, моли́ Христа́ Бо́га/ сотвори́ти и нас прича́стники блаженныя ча́сти твоея́.
Песнь 7
Ирмос: От Иудеи дошедше, отроцы в Вавилоне иногда, верою Троическою пламень пещный попраша, поюще: отцев Боже, благословен еси.
Припев: Преподо́бная благове́рная княжно́ Евфроси́ние, моли́ Бо́га о нас.
Восте́кши на высоту́ доброде́телей/ и безстра́стным во пло́ти житие́м А́нгелом уподо́бльшися,/ рая́ сла́дости насле́дница бы́ти сподо́билася еси́, взыва́ющи:/ благослове́н еси́, Го́споди Бо́же, во ве́ки.
Припев: Преподо́бная благове́рная княжно́ Евфроси́ние, моли́ Бо́га о нас.
Сия́ющи све́том безстра́стия,/ от страсте́й моли́твами твои́ми избавля́еши/ притека́ющих к тебе́ моли́твенно, преподо́бная, взыва́ющих:/ благослове́н еси́, Го́споди Бо́же, во ве́ки.
Сла́ва Отцу́ и Сы́ну и Свято́му Ду́ху:
Престо́лу предстоя́щи Вседержи́теля,/ избавле́ние от бед и скорбе́й моли́твами твои́ми/ испроси́ нам, чту́щим па́мять твою́, да взыва́ем:/ благослове́н еси́, Го́споди Бо́же, во ве́ки.
И ны́не и при́сно и во ве́ки веко́в. Ами́нь.
Богородичен: Пресвята́я Де́во Богоро́дице, хода́тайством Твои́м/ исцели́ на́ша теле́сныя не́мощи и душе́вныя неду́ги,/ да Тебе́ ра́достно воспое́м:/ ра́дуйся, Благода́тная.
Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Припев: Преподо́бная благове́рная княжно́ Евфроси́ние, моли́ Бо́га о нас.
За́поведи Го́спода внима́ющи,/ трезве́нием и бо́дренностию вся наве́ты и ко́зни врага́ препобеди́ла еси́,/ от ни́хже и нам изба́витися моли́твами твои́ми сподо́би.
Припев: Преподо́бная благове́рная княжно́ Евфроси́ние, моли́ Бо́га о нас.
Щито́м ве́ры и шле́мом упова́ния вооружи́вшися,/ по́лчища вра́жеская отрази́ла еси́ моли́твами твои́ми от оби́тели,/ и ны́не нас храни́ти не преста́й хода́тайством твои́м.
Сла́ва Отцу́ и Сы́ну и Свято́му Ду́ху:
Срамны́х страсте́й совлещи́ся ру́бищ,/ в кра́сныя же доброде́тели ри́зы облещи́ся/ сподо́би нас моли́твами твои́ми.
И ны́не и при́сно и во ве́ки веко́в. Ами́нь.
Богородичен: Влады́чице Чи́стая,/ нас, к Тебе́ усе́рдно прибега́ющих,/ от страсте́й и бед свободи́ моли́твами Твои́ми.
Песнь 9
Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.
Припев: Преподо́бная благове́рная княжно́ Евфроси́ние, моли́ Бо́га о нас.
Нечистота́ми грехо́вными оскверне́нных нас убели́,/ блаже́нная Евфроси́ние, моли́твами твои́ми,/ к покая́нию подви́гши ожесте́вшия ду́ши на́ша.
Припев: Преподо́бная благове́рная княжно́ Евфроси́ние, моли́ Бо́га о нас.
Нестяжа́нием упраздни́вшися,/ безбе́дно преплыла́ еси́ жите́йское мо́ре, преподо́бная,/ его́же треволне́ний изба́витися сподо́би и нам, чту́щим па́мять твою́.
Сла́ва Отцу́ и Сы́ну и Свято́му Ду́ху:
То́ки слез твои́х огнь страсте́й угаси́ла еси́, блаже́нная,/ и́хже жже́ния изба́ви и нас моли́твами твои́ми.
И ны́не и при́сно и во ве́ки веко́в. Ами́нь.
Богородичен: Бу́ди нам прибе́жище, стена́ и покро́в, Пречи́стая Де́во,/ да Тя с безпло́тными ли́ки непреста́нно велича́ем.
Светилен
Свети́льник нога́м на́шим бысть житие́ твое́, преподо́бная,/ ему́же после́дующе,/ невече́рняго Све́та безбе́дно дости́гнем.
Молитва
О пресла́вная ма́ти, ско́рая на́ша помо́щнице и засту́пнице и неусы́пная о нас моли́твеннице! Предстоя́ще ико́не твое́й и на сию́ со умиле́нием, я́ко живе́й ти су́щей, взира́юще, мо́лимся тебе́ усе́рдно: приими́ проше́ния на́ша и принеси́ я ко Престо́лу Милосе́рдаго Отца́ Небе́снаго, я́ко дерзнове́ние мно́гое к Нему́ иму́щая. Испроси́ притека́ющим к тебе́ и всем правосла́вным Христиа́ном ве́чное спасе́ние и вре́менное благоде́нствие, на вся же блага́я дела́ и начина́ния на́ша ще́дрое благослове́ние и от вся́ких бед и скорбе́й ско́рое избавле́ние. Ей, чадолюби́вая ма́ти на́ша! Тебе́, предстоя́щей Престо́лу Бо́жию, ве́домы суть ну́жды на́ша духо́вныя и жите́йския: при́зри на ня ма́терним о́ком и твои́ми моли́твами вся зла́я от нас отврати́, па́че же злых и богопроти́вных обы́чаев умноже́ние. Утверди́ же во всех ве́ры согла́сное ве́дение, взаи́мную любо́вь и единомы́слие, да во всем житии́ на́шем, словесы́ же и писа́нии и де́лы, сла́вится всесвято́е и́мя Отца́ и Сы́на и Свята́го Ду́ха, Еди́наго Бо́га, в Тро́ице покланя́емаго, Ему́же честь и сла́ва во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобной, княжне Евфросинии Суздальской Преподобной, княжне Евфросинии Суздальской](img_b/002.jpg)