18 октября.

Канон святой мученице Харитине Амисийской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Агница Твоя́, Иису́се, Харити́на, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Канон. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святая мученице Харитино, моли́ Бо́га о нас.

Твои́ми, о Харити́но, дарова́нии у́м мо́й облагода́тельствуй, облагода́тившися страда́ньми свяще́нными, свяще́нно воспева́ти тя́ я́ко страстоно́сицу, и му́ченицу, и де́вством сия́ющую.

Припев: Святая мученице Харитино, моли́ Бо́га о нас.

Благода́ть Пресвята́го Ду́ха тя́ одарова́вши, радостотво́рными украси́ плете́ньми и ра́дость ве́чнующую насле́дити укрепи́, мужему́дренно пострада́вшую.

Сла́ва Отцу́ и Сы́ну и Свято́му Ду́ху:

На Кресте́ Тя́ воздви́жена, Влады́ко, разуме́вши благосла́вная Твоя́ му́ченица, ра́ны терпи́т боле́зненныя, укрепля́ема си́лою Твое́ю, на́ше естество́ укрепи́вшаго.

И ны́не и при́сно и во ве́ки веко́в. Ами́нь.

Богородичен: Село́ вмести́тельно была́ еси́ Боже́ственнаго Естества́, Богороди́тельнице Чи́стая. Те́м Харити́на, лю́бящи Тя́, де́вственно всле́дствовавши Тебе́, Сы́ну Твоему́ приведе́ся.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святая мученице Харитино, моли́ Бо́га о нас.

Вже́гшее твою́ ду́шу жела́ние боже́ственное плотска́я раче́ния и лю́тая вре́ния му́к погаси́.

Припев: Святая мученице Харитино, моли́ Бо́га о нас.

Разсе́дшася пред нога́ми твои́ми му́ченическими врага́ зря́ще Христо́вою благода́тию, хвале́ния Ему́ прино́сим.

Сла́ва Отцу́ и Сы́ну и Свято́му Ду́ху:

Кре́постию Вседе́тельною вражде́бную главу́ сокруши́ла еси́, твоея́ главы́ претерпе́вши, му́ченице, кре́пко пожже́ние.

И ны́не и при́сно и во ве́ки веко́в. Ами́нь.

Богородичен: Еди́ну в жена́х, Благослове́нную Тя́, Чи́стая, лю́бящи, Твои́ми благи́ми благода́тьми му́ченица Харити́на просла́вися.

Седа́лен, гла́с 4.

Облагода́тствивши ду́шу твою́ богода́нными доброде́тельми, просвети́лася еси́ и́стинно муче́нием твои́м, честна́я, и уневе́стилася еси́ Творцу́ твоему́, нетле́нна чистото́ю пребы́вши, Харити́но, те́м врага́ попра́ла еси́, многови́дная страда́ния же и боле́зни преодоле́нно претерпе́вши. Сего́ ра́ди ве́рою пресвяту́ю твою́ па́мять торжеству́ем.

Сла́ва, и ны́не, Богородичен:

Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́менном зача́тии Твое́м, Богоро́дице, купину́, огне́м неопали́мую, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки Де́ва пребыва́ет.

КрестоБогородичен:

Де́ва и Агница, ви́девши на Кресте́, без се́мене из Нея́ Агнца ро́ждшагося и копие́м прободе́на, печа́ли уя́звлена стрела́ми, вопия́ше боле́зненно, восклица́ющи: что́ но́вое та́инство? Ка́ко умира́еши, Иже живота́ еди́н Госпо́дь? Те́мже воскресни́, па́дшаго воздвиза́я пра́отца.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святая мученице Харитино, моли́ Бо́га о нас.

Же́ртву я́ко непоро́чну, к заколе́нию тя́ из оте́ческих, му́ченице страстоно́сице, восхи́тиша ру́к мучи́тели, Отца́ Небе́снаго зело́ возлюби́вшую.

Припев: Святая мученице Харитино, моли́ Бо́га о нас.

Отрокови́цам му́дрым после́довавши, душе́вную свещу́ твою́ бога́тно кровьми́ напои́ла еси́, всесла́вная, и боже́ственный насле́довала еси́, му́ченице радостоимени́тая, черто́г.

Сла́ва Отцу́ и Сы́ну и Свято́му Ду́ху:

Се́рдце твое́, раче́нием Женихо́вым распаля́емо, у́глие пре́лести, доблему́дренная, проли́тием погаси́ кро́ве и мо́ре многобо́жия изсуши́.

И ны́не и при́сно и во ве́ки веко́в. Ами́нь.

Богородичен: Воплоще́ннаго родила́ еси́ Бо́жия Сло́ва, Богороди́тельнице Чи́стая; Его́же Харити́на, лю́бящи тепле́йше, огню́ противоополчи́ся и многови́дным му́кам.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святая мученице Харитино, моли́ Бо́га о нас.

Главы́ остриже́нием и у́глия разжже́нием оскорбля́юще тя́, богому́драя, ра́зума твоего́ кре́пости ника́коже поколеба́ша.

Припев: Святая мученице Харитино, моли́ Бо́га о нас.

Гво́здие Твое́ и заколе́ние прообразу́ющи, Го́споди, разжже́нных рожно́в терплю́ боле́знь, — му́ченица вопия́ше.

Сла́ва Отцу́ и Сы́ну и Свято́му Ду́ху:

Отто́рженным ру́к твои́х и но́г, де́во чи́стая, ногте́м, теку́щею честно́ю твое́ю кро́вию ве́рныя освяти́ла еси́ и де́монския кро́ве ми́р христоподо́бно очи́стила еси́.

И ны́не и при́сно и во ве́ки веко́в. Ами́нь.

Богородичен: Ум земны́й Твоего́ па́че естества́ зача́тия не мо́жет разуме́ти, Ма́ти Де́во, Отрокови́це: Бо́га бо родила́ еси́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святая мученице Харитино, моли́ Бо́га о нас.

Благода́тьми и зна́мении Христо́с венча́ свяще́нную твою́ главу́, за Него́же пострада́ти изво́лила еси́, страстоте́рпице, ра́дости боже́ственныя тезоимени́тая.

Припев: Святая мученице Харитино, моли́ Бо́га о нас.

Ио́ну из глубины́ Изба́вивый, и тебе́, в морску́ю пучи́ну вве́рженную, спаса́ет жи́ву, богому́драя, и глубино́ю крове́й твои́х врага́ погрузи́л е́сть.

Сла́ва Отцу́ и Сы́ну и Свято́му Ду́ху:

Ору́жием терпе́ния враги́ умертви́ла еси́ и, терпя́щи зубо́в всеконе́чное истерза́ние, сла́вная, льво́в безпло́тных че́люсти сломи́ла еси́.

И ны́не и при́сно и во ве́ки веко́в. Ами́нь.

Богородичен: Кре́пость Тя́ обре́тши, Де́во, и утвержде́ние, Харити́на страстоте́рпица му́ки кре́пко терпи́т и, ра́дующися, во сле́д Тебе́, все́х Влады́це, приво́дится.

Конда́к, гла́с 2.

Кре́пким ра́зумом, Харити́но, ду́шу утве́рждши ве́рою, бори́теля врага́ я́ве посрами́ла еси́, у Христа́ предста́, всеблаже́нная, червлени́цу от крове́й твои́х нося́щи, и при́сно со Ангелы ра́дуешися, моли́ за ны́, страстоте́рпице.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святая мученице Харитино, моли́ Бо́га о нас.

Юныя три́ о́троки от пе́щи Изба́вивый спаса́ет от колесе́ тя́, му́ченице, огневи́днаго, благода́рственно воспева́вшую: благослове́н еси́ в хра́ме сла́вы Твоея́, Го́споди.

Припев: Святая мученице Харитино, моли́ Бо́га о нас.

С де́вами, свещено́сица, на небе́сная восхо́диши, о́гненныя свещи́ кре́пко, внегда́ пе́ти, терпе́ла еси́: благослове́н еси́ в хра́ме сла́вы Твоея́, Го́споди.

Припев: Святая мученице Харитино, моли́ Бо́га о нас.

Обличе́н терпе́нием твои́м пребеззако́нный, ру́це связу́ет и но́зе, и во глубины́ вмета́ет тя́, пою́щую: благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Сло́вом твои́м боже́ственным безслове́сие враго́в обличи́ла еси́, страсте́й страстьми́, му́ченице, животво́рных испо́лнила еси́ лише́ние, — благослове́н еси́, — зову́щи, — Бо́же мо́й, Го́споди.

И ны́не и при́сно и во ве́ки веко́в. Ами́нь.

Богородичен: Де́ву еди́ну, я́ко чи́сту Тя́ и нетле́нну, Сло́во чи́стое возлюби́ и из Тебе́ возсозда́ Воплоща́емый, Отрокови́це, всего́ челове́ка, Харити́ну просла́вив чудесы́.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святая мученице Харитино, моли́ Бо́га о нас.

Красна́ добро́тами твои́х я́зв была́ еси́ и причта́лася еси́, де́во, нетле́нна пребы́вши, кра́сному Сло́ву, всечестна́я, от Де́вы на́с ра́ди воплоще́нному Христу́, Ему́же вопие́м: благослови́те вся́ дела́ Госпо́дня Го́спода.

Припев: Святая мученице Харитино, моли́ Бо́га о нас.

Все́ми бори́ма прило́ги му́чащих тя́, до́блественно претерпе́ла еси́ колесе́ паля́ща лю́тость, рожно́в разжже́ния, в глубину́ вверже́ние и зубо́в, честна́я, и ногте́й искорене́ния, Христа́ велича́ющи во ве́ки.

Припев: Святая мученице Харитино, моли́ Бо́га о нас.

Но́зе твои́ добро́тами боле́зней, сла́вная, украси́стеся, те́м, на во́ды ступа́ющи, не омокри́стеся, с тобо́ю пребыва́ющим, де́во му́ченице, сла́вным Бо́жиим Ангелом, с ни́миже вопия́ла еси́: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Чу́до, удивля́ющее вся́к у́м по сконча́нии, ка́ко роди́телю издаде́ мо́щи твоя́ глубина́ прие́мшая, я́же погребе́ оте́чески, сокро́вищствует благода́ть от тебе́, Харити́но, Ца́рство прии́м небе́сное.

И ны́не и при́сно и во ве́ки веко́в. Ами́нь.

Богородичен: Яви́лася еси́ превы́шшая небе́с, Бо́га небе́снаго поро́ждши, онебеси́вшаго земноро́дных, Пречи́стая, все́ смеше́ние, и Харити́ны честну́ю па́мять просвети́вша, Ему́же пои́м: благослови́те вся́ дела́ Госпо́дня Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святая мученице Харитино, моли́ Бо́га о нас.

Да венце́в сла́вы, я́ко нетле́нная, де́во му́ченице, получи́ши, вся́ких муче́ний ви́д претерпе́ла еси́, веселя́щися ду́хом и ра́зума тве́рдостию.

Припев: Святая мученице Харитино, моли́ Бо́га о нас.

Яко удобре́ная, и кра́сная, и богоуго́дная де́ва, я́ко непобеди́мая му́ченица и Влады́чня неве́ста непоро́чная, златови́дными крилы́ к небе́сным возлете́ла еси́.

Припев: Святая мученице Харитино, моли́ Бо́га о нас.

Ты́, светови́дная страстоте́рпице, возсия́ла еси́ луча́ми, мра́к лука́вствия де́монов и страсте́й отго́ниши богода́нными ти́ всегда́ чудоде́йствы, досточу́дная.

Сла́ва Отцу́ и Сы́ну и Свято́му Ду́ху:

Ра́достный тво́й де́нь, веселя́щися, лю́ди совокупля́ет твоя́ до́блести воспе́ти, и по́двиги, и боре́ния, и му́жественное страда́ние, великому́ченице радостотезоимени́тая.

И ны́не и при́сно и во ве́ки веко́в. Ами́нь.

Богородичен: Све́т на́м возсия́ из утро́бы неискусобра́чныя Твоея́, Де́во, Его́же сия́ньми озари́вшися боже́ственно, све́т бы́сть ра́дости, тезоимени́тая, Богороди́тельнице Неискусобра́чная.

Молитва

О свята́я мученице Харитино. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.