18 октября.

Канон преподобным Дамиану пресвитеру, Матфею и Иеремии прозорливым.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Христо́вых повеле́ний све́том сердца́ своя́ просвети́вше, стра́стный мра́к прогна́сте, те́мже Тро́ицы селе́ние бы́сте тричи́сленнии отцы́, Дамиа́не, Иереми́е с Матфе́ем, от Нея́же благода́ть прие́мше, неду́жныя исцеля́ете, бу́дущая возвеща́ете, и Ангелом соприча́стницы су́ще, моли́теся Христу́ Бо́гу дарова́ти на́м прича́стие святы́х.

Кано́н преподо́бным отце́м, гла́с 5.

Пе́снь 1.

Ирмос: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ еди́ному пои́м, я́ко просла́вися.

Припев: Преподобнии отцы, моли́те Бо́га о нас.

Спаси́телю Бо́гу хвале́ние принесе́м, славосло́вяще уго́дника Его́ преблаже́ннаго Дамиа́на, неду́жным му́драго врача́, и возопии́м Да́вшему такова́я дарова́ния, я́ко просла́вися.

Припев: Преподобнии отцы, моли́те Бо́га о нас.

Наста́вника своего́ равноа́нгельному житию́ подража́л еси́ ре́вностию непреста́нною, от него́же наста́влен, украси́лся еси́ доброде́телию, немо́лчно во хвале́нии по вся но́щи без сна́ пребыва́я и взыва́я Бо́гу, я́ко просла́вися.

Припев: Преподобнии отцы, моли́те Бо́га о нас.

С проро́ки предстоя́ ны́не Спаси́телю Бо́гу, я́ко дерзнове́ние имы́й, моли́ся благода́тию облиста́ти сердца́, ве́рою тя́, богодухнове́нне Иереми́е, блажа́щих и Спаси́телю вопию́щих, я́ко просла́вися.

Сла́ва Отцу́ и Сы́ну и Свято́му Ду́ху:

Всеви́дящее о́ко Бо́жие, ви́дя твое́ чи́стое се́рдце, блаже́нне Матфе́е, даде́ тебе́ да́р та́йны челове́ческия ве́дати и открыва́ти на по́льзу все́м, да тобо́ю наставля́еми пою́т Бо́гу, я́ко просла́вися.

И ны́не и при́сно и во ве́ки веко́в. Ами́нь.

Богородичен: Разу́мное со́лнце су́щи Де́во Чи́стая, на́ша у́мы помраче́нныя страстьми́ и сластьми́ озари́, да Тобо́ю просвеща́еми, пое́м Бо́гу, я́ко просла́вися.

Пе́снь 3.

Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Припев: Преподобнии отцы, моли́те Бо́га о нас.

Си́лою Бо́жиею укрепля́ем, бы́л еси́, блаже́нне, кро́ток и молчали́в, к Бо́гу бесе́дуя те́плыми моли́твами, и упражня́яся приле́жным чте́нием Святы́х Писа́ний, и те́м утвержда́яся о Го́споде.

Припев: Преподобнии отцы, моли́те Бо́га о нас.

Бра́шно твое́ и питие́ бы́сть сло́во Бо́жие, и́мже пита́л еси́ ду́шу твою́, преподо́бне, те́ло же твое́ хле́бом то́кмо и водо́ю, и си́м пита́лся еси́ до дне́ сме́рти своея́, вся́ ду́ху покоря́я востаю́щия стра́сти.

Припев: Преподобнии отцы, моли́те Бо́га о нас.

В ста́рости масти́те, испо́лнив ле́та своя́, Иереми́е, прия́л еси́ да́р прови́дети та́йны серде́чныя, и облича́л еси́ на еди́не лука́вая челове́ческая помышле́ния, и наставля́л блюсти́ся от диа́воля сове́та.

Сла́ва Отцу́ и Сы́ну и Свято́му Ду́ху:

К первонача́льным отце́м Пече́рским прише́д, всели́лся еси́ с ни́ми, и и́ночествуя, вся́ по́хоти теле́сныя победи́л еси́, те́мже прия́л еси́ от Бо́га дарова́ние, я́ве зре́ти ли́ца подзе́мных ефио́пов, Матфе́е чу́дне.

И ны́не и при́сно и во ве́ки веко́в. Ами́нь.

Богородичен: Преобразу́ющияся в разли́чныя ви́ды лука́выя ефио́пы и де́йствующим во удесе́х на́ших, Богоро́дице, посеще́нием лица́ Твоего́ устраши́ и прожени́, да без смуще́ния пое́м Твою́ спаси́тельную си́лу.

Седа́лен, гла́с 8:

Яко сугу́бую прие́мый бла́годать от Бо́га, сугу́быя исцеля́еши стра́сти: душе́вныя приле́жными моли́твами, теле́сныя же — пома́занием свята́го еле́я; на́с, стра́ждущих обои́ми неду́ги, уврачу́й, и отжени́ ураня́ющия ны́ стра́сти, и моли́ся Христу́ Бо́гу получи́ти ве́чный живо́т почита́ющим свято́е успе́ние твое́.

Сла́ва, и ны́не, Богородичен:

Всенепоро́чная Неве́сто, простра́нное селе́ние Бо́жия Сло́ва, страсте́й мя́, су́ща скве́рное селе́ние, очи́сти и све́тлое обита́лище доброде́телем покажи́, прожени́ тму́ беззако́ний и прича́стия сподо́би Све́та невече́рняго, моли́твами Твои́ми, да пою́ Твою́ несказа́нную ми́лость.

Пе́снь 4.

Ирмос: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Припев: Преподобнии отцы, моли́те Бо́га о нас.

Благово́нный гро́зд виногра́да Бо́жия Ма́тере показа́лся еси́, напое́н росо́ю уче́ний преподо́бных оте́ц, и иска́пал еси́ вино́ исцеле́ний все́м, к тебе́ с ве́рою притека́ющим, Дамиа́не, Бо́жий служи́телю.

Припев: Преподобнии отцы, моли́те Бо́га о нас.

Ору́жием ве́ры и любве́ пла́менем огражде́н бы́в, блаже́нне, отгна́л еси́ враго́в, вредя́щих неду́гами челове́ки; приле́жная бо твоя́ моли́тва, о́блаки проходя́щи, прогоня́ше боле́зни, досточу́дне Дамиа́не.

Припев: Преподобнии отцы, моли́те Бо́га о нас.

Яко прови́дец челове́ческих помышле́ний, предзре́л еси́ плещи́ даю́щих враго́м и хотя́щих изы́ти от святы́я сея́ огра́ды, растворе́нным любве́ сло́вом нака́зовал еси́, Иереми́е, ста́ти к боре́нию кре́пко и проти́ву враго́в непоколеби́му бы́ти.

Сла́ва Отцу́ и Сы́ну и Свято́му Ду́ху:

Открове́нными очи́ма я́ве узре́л еси́ еди́ною в це́ркве обходя́ща бе́са во о́бразе во́ина и мета́юща на бра́тию от воскри́лия ри́з, лепко́выя цве́тцы, да исхо́дят пре́жде благослове́ния сно́м омраче́нны, те́х, о́тче, нака́зовал еси́ стоя́ти неле́ностно и кре́стным ору́жием себе́ огражда́ти.

И ны́не и при́сно и во ве́ки веко́в. Ами́нь.

Богородичен: Обстои́ма мя́ де́монскими полки́ и устреля́ема ласкосе́рдствующими страстьми́, Ма́ти Бо́жия, укрепи́ и пода́ждь ми́ благода́ть победи́ти те́х ле́стныя ко́зни, да пребу́ду поя́ Твою́, Чи́стая, по́мощь.

Пе́снь 5

Ирмос: Утреннююще, вопие́м Ти́: Го́споди, спаси́ ны́. Ты́ бо еси́ Бо́г на́ш, ра́зве бо Тебе́ ино́го не зна́ем.

Припев: Преподобнии отцы, моли́те Бо́га о нас.

О все́х, в боле́зни приходя́щих, блаже́нный тво́й наста́вник Феодо́сий повелева́ше тебе́ моли́тву твори́ти, ты́ же смире́н сы́й и благопокори́в недосто́йна себе́ вменя́л еси́ исцеле́ния да́ра, но повеле́ние творя́ отца́ своего́, моли́твою и еле́ем подава́л еси́ здра́вие боля́щим.

Припев: Преподобнии отцы, моли́те Бо́га о нас.

Яко до́бр пу́тник, до́бре ше́ствовал еси́ жи́зни сея́ пу́ть, подтвержда́я себе́ и́ноческими по́двиги, егда́ же доспе́л еси́ кончи́ны своея́, недоста́точное боле́знию наверши́в, чи́ст па́че зла́та отше́л еси́ в поко́й безболе́зненный.

Припев: Преподобнии отцы, моли́те Бо́га о нас.

Прозре́нием от Бо́га тебе́ да́нным, что́ либо ви́дел еси́, блаже́нне, нело́жно вся́кому ска́зовал еси́, и сбыва́шеся сло́во твое́ в пра́вду; те́м, я́ко проро́ком сла́ву и преподо́бным состоя́теля, досто́йно тя́ ублажа́ем, Иереми́е.

Сла́ва Отцу́ и Сы́ну и Свято́му Ду́ху:

Никогда́же изходи́л еси́ из це́ркве пре́жде оконча́ния пе́ния, но всегда́ последи́, несы́тное име́я жела́ние во славосло́вии Бо́жии пребыва́ти, сего́ ра́ди Бо́г просла́вил тя́ пред Ангелы и челове́ки, богоно́се Матфе́е.

И ны́не и при́сно и во ве́ки веко́в. Ами́нь.

Богородичен: Святу́ю го́ру Бо́жию и до́м Сла́вы Вы́шняго ве́дуще Тя́, Чи́стая Де́во, во смире́нии припа́дая, молю́ся: возведи́ мя на высоту́ доброде́тельнаго жития́ и сотвори́ мя́ чи́стый хра́м к восприя́тию Боже́ственных дарова́ний.

Пе́снь 6.

Ирмос: Обы́де мя́ бе́здна, гро́б мне́ ки́т бы́сть, а́з же возопи́х к Тебе́, Человеколю́бцу, и спасе́ мя десни́ца Твоя́, Го́споди.

Припев: Преподобнии отцы, моли́те Бо́га о нас.

Ше́ствовав на земли́ пра́выя стези́, при кончи́не моли́тву к Венцеда́вцу раствори́л еси́ слеза́ми, прося́ Того́ бла́гость, е́же не лиши́ти тя́ Ца́рствия небе́снаго и сожи́тия отца́ твоего́ преподо́бнаго Феодо́сия.

Припев: Преподобнии отцы, моли́те Бо́га о нас.

В све́те непристу́пнем с преподо́бными прича́стия не лиши́тися жела́я, со смире́нием ко Христу́ возсыла́л еси́ мольбы́, и получи́л еси́, е́же проси́л: му́дрый бо Соде́тель извести́ тебе́, извеще́нием чу́дным, я́ко да благонаде́жден оты́деши в поко́й пра́ведных почи́ти.

Припев: Преподобнии отцы, моли́те Бо́га о нас.

В ста́рости глубо́це обнови́ся ю́ность твоя́ духо́вне, преподо́бне Иереми́е, оста́вль бо ве́тхий покро́в теле́сный, в но́вое отше́л еси́ душе́ю селе́ние, к дре́вним проро́ком на зре́ние Сла́вы Бо́жия.

Сла́ва Отцу́ и Сы́ну и Свято́му Ду́ху:

Седя́й еди́ною под церко́вным би́лом, узре́л еси́ вели́кую то́лпу мра́чных бесо́в, и вопроси́в, уве́дал еси́ и́х к не́коему бра́ту иду́щих, сего́ ра́ди мно́гих от бра́тии любе́зно са́м нака́зовал еси́, ка́ко о́ных блюсти́ся; научи́ у́бо и на́с, блаже́нне, да не вни́дут в две́ри серде́ц на́ших.

И ны́не и при́сно и во ве́ки веко́в. Ами́нь.

Богородичен: Изба́ви мя́, Влады́чице, бесо́вских страсте́й обстоя́ний, да не вни́дут в до́м души́ моея́ те́х лука́выя то́лпы, загради́ мы́сленныя две́ри се́рдца стра́хом и да́ждь ми бо́дрствовати и внима́ти спасе́нию моему́.

Конда́к, гла́с 2:

Якоже дре́внии проро́цы благода́ть проро́чествия прие́мше и нело́жне ду́хом предзре́вше, прореко́ша наити́ хотя́щая, та́ко и вы́ в жи́зни на́шей зла́я, грехо́в ра́ди на́ших на ны́ гряду́щая, предвозвести́сте; и ны́не да не пости́гнут ны́ зла́я, испроси́те от Христа́ Бо́га исправле́ние дело́м на́шим и ве́лию ми́лость.

Икос:

Тезоимени́тым свои́м подража́вше и Ангельски на земли́ пожи́вше, вели́ких дарова́ний сподо́бистеся Иереми́е и Матфе́е, предвозвеща́юще бо бу́дущая, мно́гих ко исправле́нию приведо́сте, бе́сы посрами́сте, челове́ки удиви́сте; и ны́не по вре́менной жи́зни в безконе́чной с Ангельскими ли́ки живу́ще, проси́те у Христа́ Бо́га исправле́ния дело́м на́шим и ве́лия ми́лости.

Пе́снь 7.

Ирмос: В пещи́ о́гненней песносло́вцы спасы́й о́троки: благослове́н Бо́г оте́ц на́ших.

Припев: Преподобнии отцы, моли́те Бо́га о нас.

Предста́ тебе́ Ангел Бо́жий, свя́те Дамиа́не, во о́бразе преподо́бнаго Феодо́сия, и па́д на пе́рси твоя́, лобыза́ше любе́зно, я́ко люби́маго Бо́гу, челове́ком же и Ангелом, ты́ же воспе́л еси́: благослове́н Бо́г оте́ц на́ших.

Припев: Преподобнии отцы, моли́те Бо́га о нас.

Явле́йся ре́кл е́сть: се́ ча́до, о не́мже мо́лишися Го́сподеви, по́слан е́смь извести́ти тебе́, я́ко по проше́нию твоему́ бу́дет ти́, и водвори́шися в Ца́рствии Бо́жии со святы́ми. Сия́ словеса́ слы́шав, ра́достно воспе́л еси́, Дамиа́не: благослове́н Бо́г оте́ц на́ших.

Припев: Преподобнии отцы, моли́те Бо́га о нас.

Что́ е́сть сладча́е и что́ е́сть бо́льшее, я́ко е́же жи́ти со святы́ми вку́пе? Иде́же живе́т Христо́с, во све́те невече́рнем, та́мо и тебе́ угото́вася упокое́ния ме́сто, Дамиа́не, е́же и на́м получи́ти, моли́ся, пою́щим: благослове́н Бо́г оте́ц на́ших.

Припев: Преподобнии отцы, моли́те Бо́га о нас.

В ли́це со святы́ми, в че́сти с проро́ки, в стоя́нии со Ангелы сподо́блен еси́, учине́н, Иереми́е, бы́ти от Бо́га, Ему́же моли́ся предста́ти и на́м чи́сте пою́щим: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Любо́вь име́я ко бра́тии при́сно, Матфе́е, вся́ открове́нная тебе́ открыва́л еси́ на по́льзу все́м и нака́зовал еси́ ке́ллии приседе́ти, пла́катися же о гресе́х свои́х и пе́ти: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Изба́вленнии Тобо́ю, Пречи́стая, от все́х бесо́вских наве́тов, непреста́нно Ро́ждшемуся из Тебе́ зове́м: благослове́н Бо́г оте́ц на́ших.

Пе́снь 8.

Ирмос: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

Припев: Преподобнии отцы, моли́те Бо́га о нас.

Явльшагося тебе́ от Отца́ све́тов по́сланна, разуме́л еси́ бы́ти наста́вника твоего́ Феодо́сия богоно́снаго, его́же пригласи́в, извести́л еси́, что́ предста́вый глаго́лаше, и что́ тебе́ обеща́, Дамиа́не? То́йже пове́даемым удивля́шеся, и превознося́ше Го́спода во ве́ки.

Припев: Преподобнии отцы, моли́те Бо́га о нас.

С весе́лием истя́зовал еси́ обеща́ния от наста́вника твоего́ и отца́, глаго́лющи: бу́дет ли, о́тче, е́же на проше́ние мое́ обеща́л ми́ еси́? То́й же отвеща́: не ве́м, ча́до, о не́мже вопроша́еши мя́, Ангел бо Бо́жий бы́сть, обеща́вый тебе́, и то́й всели́т тя́ та́мо, иде́же пою́т святи́и Го́сподеви во ве́ки.

Припев: Преподобнии отцы, моли́те Бо́га о нас.

Ра́достен и благонаде́жден сы́й от сицева́го извеще́ния, отше́л еси́ в светоно́сная ме́ста светоно́сными проводи́мь Ангелы, с ни́миже и пое́ши Го́спода во ве́ки.

Припев: Преподобнии отцы, моли́те Бо́га о нас.

Вся́кое твое́ веде́ние бя́ше спаса́ющимся в наказа́ние, преподо́бие Матфе́е, ниже́ нача́льствующий отри́ну твое́ наказа́ние, и́мже возбужде́н доспе́ скоре́е блаже́нства, иде́же святи́и превозно́сят Го́спода во ве́ки.

Сла́ва Отцу́ и Сы́ну и Свято́му Ду́ху:

По мно́гих открове́ниих отше́л еси́ в ста́рости глубо́це, Матфе́е, открове́нным лице́м престо́лу Бо́жию предстоя́ти: моли́ся же и о на́с, свя́те, да с тобо́ю сподо́бимся Го́спода ви́дети и превозноси́ти хвала́ми во ве́ки.

И ны́не и при́сно и во ве́ки веко́в. Ами́нь.

Богородичен: Еди́н Сы́й существо́м от Тро́ицы Бо́г Сло́во, в Твою́, Чи́стая Де́во, утро́бу всели́ся, и на́м соесте́ствен пло́тию яви́ся, Его́же благословя́ще превозно́сим во ве́ки.

Песнь 9

Ирмос: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Припев: Преподобнии отцы, моли́те Бо́га о нас.

Что́ тя нареку́, блаже́нное сие́ ме́сто? Тве́рдь ли небе́сную, на не́йже тро́ица оте́ц, а́ки зве́зды, чудесы́ сия́ют и озаря́ют честну́ю и́х па́мять пра́зднующих, и пе́сньми благоче́стно и́х ублажа́ющих.

Припев: Преподобнии отцы, моли́те Бо́га о нас.

От вре́меннаго све́та к Ве́чному преста́вльшеся Све́ту, светоноше́нии ва́шими на́ша сердца́ просвети́те и испроси́те моли́твами ва́шими, да в све́те за́поведей Госпо́дних ходя́ще, у́зрим с ва́ми све́т невече́рний.

Припев: Преподобнии отцы, моли́те Бо́га о нас.

Благода́ть исцеле́ний от Бо́га святи́и еще́ в жи́зни се́й прие́мше, на́с страстьми́ одержи́мых ско́ро исцели́те, ве́рно бо притека́ем к моще́м ва́шим и, моля́щеся, пе́сньми велича́ем.

Сла́ва Отцу́ и Сы́ну и Свято́му Ду́ху:

Просла́вим Бо́га, святы́х Свои́х Дамиа́на, Иереми́ю и Матфе́я просла́вльшаго, и́же Его́ в телесе́х, а́ки Ангелы пожи́вше, просла́виша, Его́же и мо́лим, да па́мять и́х дне́сь хвала́ми велича́ющих, не лиши́т на́с с ни́ми небе́сныя Своея́ сла́вы.

И ны́не и при́сно и во ве́ки веко́в. Ами́нь.

Богородичен: Помяну́х кончи́ну, егда́ прии́дет вре́мя разреши́тися мне́ от соу́з плотски́х, трепе́щу, я́ко гряде́т де́нь Су́дный, от него́же кто́ мя́ изба́вит, а́ще не Ты́, Чи́стая Де́во? Те́мже к Тебе́ вы́ну во хвале́нии прибега́ю.

Свети́лен:

Свя́то пожи́вше на земли́, свя́ти есте́ и на небеси́, и с Ангельскими ли́ки предста́сте Бо́гу; от Него́же прие́мше возме́здие трудо́м свои́м, на́с не забу́дите, но, руководя́ще, наста́вите на пу́ть пра́в, да те́м ходя́ще, обря́щем ми́лость в де́нь Су́дный.

Богородичен:

Свя́т хра́м Тво́й зде́ и ди́вен в пра́вду, Сама́ бо, су́щи хра́м Бо́жия сла́вы, Свои́м про́мыслом создала́ еси́ и украси́ла еси́ оте́ц святы́х равноа́нгельным житие́м на́шего ра́ди жи́тельства; злообра́зие на́ше в благоле́пие претвори́, да вожделе́ет Ца́рь добро́ты ду́ш на́ших, и излие́т на ны́ вели́кую Свою́ ми́лость.

Молитва

К вам, о святи́и преподобнии отцы, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.