17 октября.

Канон праведному князю Стефану Щиляновичу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

На земли́ в прему́дрости сла́ву стяжа́л еси́, бога́тство Го́сподеви твоему́ вручи́л еси́, и То́й тя́ с небе́сными водворя́ет, те́ло твое́ на земли́, свя́те, сохрани́ невреди́мо: ты́ бо в целому́дрии и чистоте́ житие́ пра́ведно пожи́л еси́, те́м со дерзнове́нием моли́ спасти́ся на́м.

Кано́н свята́го, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Благоверне княже Стефане, моли́ Бо́га о нас.

Глубину́ ути́шив моего́ помышле́ния, Христе́, низпосли́ се́рдцу моему́ све́т Твоего́ богоразу́мия, я́ко да возмогу́ разу́мно воспе́ти Стефа́нова, я́же в житии́, исправле́ния.

Припев: Благоверне княже Стефане, моли́ Бо́га о нас.

От младе́нства обре́теся се́рдце твое́ Пресвята́го Ду́ха чи́стое жили́ще, Стефа́не преподо́бне, Имже укрепля́емь, возмо́гл еси́ разу́мно преплы́ти жите́йское мо́ре, волна́ми непогружа́емь тщеста́вия.

Сла́ва Отцу́ и Сы́ну и Свято́му Ду́ху:

В тишине́ бы́в жи́зни ве́чныя, Стефа́не преподо́бне, непреста́нно моли́ся Христу́ о ми́ре ми́ра, и о спасе́нии ду́ш, серде́чною любо́вию воспева́ющих Христу́ Бо́гу: Препросла́вленный Госпо́дь, я́ко просла́вися.

И ны́не и при́сно и во ве́ки веко́в. Ами́нь.

Богородичен: Младе́нца родила́ еси́, Отцу́ и Пресвято́му Ду́ху соприсносу́щна и сопресто́льна, Мари́е Богоневе́сто, те́мже дерзнове́ние, я́ко Ма́ти, к Нему́ иму́щи, утверди́ у́м мо́й в тишине́, воспева́ти Творца́ моего́: препросла́вленный Госпо́дь, я́ко просла́вися.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Благоверне княже Стефане, моли́ Бо́га о нас.

Цвету́щь у́м име́л еси́, взира́нием к Бо́гу, Стефа́не блаже́нне, к Нему́же ны́не моли́ся, свободи́ти на́с мы́сленнаго треволне́ния, я́ко да в тишине́ глубо́це ра́достно воспева́ем: не́сть свя́т, я́ко Бо́г на́ш, и не́сть пра́веден, па́че Тебе́, Го́споди.

Припев: Благоверне княже Стефане, моли́ Бо́га о нас.

Глаго́лом живо́тным внима́я, Стефа́не досточу́дне, и́же в зако́не и благода́ти пра́вдою просия́вшим благоче́стно ревну́я, вла́сть вре́менную презира́я, и к бога́тству се́рдца неприлага́я, но любо́вию вопия́: не́сть свя́т, я́ко Бо́г на́ш.

Сла́ва Отцу́ и Сы́ну и Свято́му Ду́ху:

Пра́ведна и непоро́чна, уста́ Боже́ственная именова́ша и́же в зако́не Иова: во благода́ти Стефа́н пра́вдою того́ и благоче́стием подража́я, ве́рою же пра́вою и благоче́стием и́стинным па́че того́ ди́внейший бы́сть, те́мже с ни́м воспева́ем: не́сть свя́т, я́ко Бо́г на́ш.

И ны́не и при́сно и во ве́ки веко́в. Ами́нь.

Богородичен: Ты́ вели́кое дарова́ние, еди́на Благослове́нная, сподо́билася еси́ бы́ти: вы́ше естества́ бо, Богоневе́сто, Невмести́маго во чре́ве понесла́ еси́, Вопло́щшагося Сло́ва Бо́жия, те́мже Ти́ зове́м: не́сть непоро́чны, па́че Тебе́, Влады́чице.

Седа́лен, гла́с 4.

Ми́лостивен нра́в и ве́ру благочести́ву, любо́вь же нелицеме́рну и наде́жду тве́рду, име́л еси́ от ю́ности ко Го́споду, Стефа́не, сего́ ра́ди восхваля́ем твои́х доброде́телей умноже́ния, я́ко не возне́слся еси́ вла́стию скоро́ преходя́щею, Ца́рствия ра́ди непроходи́маго, и не повреди́л еси́ до́блести душе́вныя сла́стию жития́ кра́сною, жи́зни ра́ди бу́дущия. Те́мже моли́ся Христу́ Бо́гу и на́м жи́телем бы́ти небе́сным.

Други́й седа́лен, гла́с 4.

Сия́ния Боже́ственнаго вну́трь испо́лнився, со́лнечных лу́чь мно́жайшею заре́ю, исцеле́ние от свята́го те́ла просте́рл еси́, бе́сы от челове́к отгна́л еси́ и неду́ги разли́чныя уврачева́л еси́. И ны́не Царю́ си́л предстоя́, Стефа́не, небе́сных бла́г на́м ниспосла́ти моли́ся, ве́рою почита́ющим светоно́сный де́нь па́мяти твоея́.

Сла́ва, и ны́не, Богородичен:

Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́менном зача́тии Твое́м, Богоро́дице, купину́, огне́м неопали́мую, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки Де́ва пребыва́ет.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Благоверне княже Стефане, моли́ Бо́га о нас.

Пою́ще све́тло и воспева́юще ве́село, торжеству́ем духо́вно в па́мяти пра́веднаго Стефа́на, прославля́ем Христа́ Бо́га немо́лчными пе́сньми, взыва́юще: сла́ва си́ле Твое́й, Го́споди.

Припев: Благоверне княже Стефане, моли́ Бо́га о нас.

Тала́нт, да́нный ти́, усугуби́л еси́, а́лчущия напита́в, си́рых и вдови́ц предста́тель бы́в, сего́ ра́ди ча́еши от Влады́ки Жизнода́вца восприя́ти черто́г неразруши́мый с ли́ки пра́ведных, с ни́ми же вопия́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Пропове́дник боже́ственный, де́лы сло́во исполня́я, пло́д духо́вный в се́рдце мно́жайший име́я, бла́гость со благосты́нею, и милосе́рдие с кро́тостию, пе́ние со благодаре́нием, Стефа́не, вопие́ши Христу́ Бо́гу: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Безпло́тных чи́нове, ли́к боже́ственных апо́стол, про́роков сосло́вие, и му́ченичестии собо́ри, преподо́бных и пра́ведных совокупле́ния, дивя́тся Рождеству́ Твоему́, Пречи́стая, с ни́миже моли́ся умири́ти на́шу жи́знь.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Благоверне княже Стефане, моли́ Бо́га о нас.

Просвети́тельную зарю́ во уме́ прие́мь, Стефа́н пречу́дный му́дрым де́вам подо́бяся, и свою́ лампа́ду ми́лостивным де́ланием уясни́, с ни́ми вну́трь черто́га Христо́ва вни́ти сподо́бися.

Припев: Благоверне княже Стефане, моли́ Бо́га о нас.

Моли́твы ча́стыя и моле́ния множа́йша Царе́ви си́л возсыла́ет Стефа́н блаже́нный, те́мже стра́шен во бра́нех супроти́вным явля́ется.

Сла́ва Отцу́ и Сы́ну и Свято́му Ду́ху:

Са́ном миродержа́ния дарова́н бы́в, смиренному́дрием же опоя́сан, благоче́стием оде́ян и стра́хом Боже́ственным огражде́н, Стефа́н вопия́ше: Христе́, Спа́се мо́й, просвети́ мя́ сия́нием Твои́м, ино́го бо ра́зве Тебе́ Бо́га не зна́ю.

И ны́не и при́сно и во ве́ки веко́в. Ами́нь.

Богородичен: Де́во Чи́стая, ро́ждшая Влады́ку и Бо́га моего́, Ему́же всегда́ моли́ся, низпосла́ти се́рдцу моему́ Боже́ственное умиле́ние, и уму́ моему́ смиренному́дрие, во хра́ме Твое́м зову́щу: ра́зве Тебе́ Предста́тельницы тве́рдыя не зна́ем.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Благоверне княже Стефане, моли́ Бо́га о нас.

Непостижи́мую глубину́ Бо́жия смотре́ния умо́м взира́я, и ева́нгельским глаго́лом до́бре внима́я, отцепре́данный уста́в че́стно соблюда́еши, Стефа́не, рачи́телю целому́дрия.

Припев: Благоверне княже Стефане, моли́ Бо́га о нас.

Му́дросте и Си́ло Вы́шняго, изба́ви на́с мра́чнаго диа́воля нанесе́ния, и от челове́к тлетво́рнаго лю́таго языковре́дия, моли́твами Твоего́ уго́дника Стефа́на.

Сла́ва Отцу́ и Сы́ну и Свято́му Ду́ху:

Сокро́вища се́мен земнора́сленных истощева́я, и се́мя духо́вное в се́рдце сокро́виществуя Стефа́н блаже́нный: алчу́щия пита́я, наги́я одева́я, жела́я согре́ян бы́ти в ло́нех Авраа́млих.

И ны́не и при́сно и во ве́ки веко́в. Ами́нь.

Богородичен: Мари́е, Госпоже́, Пречи́стая Влады́чице, на руку́ Твое́ю понесла́ еси́ Содержа́щаго го́рстию вся́ческая, и млеко́м пита́ла еси́, ма́нну Одожди́вшаго Изра́илю дре́вле в пусты́ни, Того́ моли́, Богоро́дице, да ми́лостив ми́ бу́дет в де́нь су́дный, Иису́с Человеколю́бец.

Конда́к, гла́с 2.

Вы́шняго жела́нием прославля́я, и То́й тя́ в па́мяти, пра́ведне, прославля́ет. Восхожде́нием доброде́телей соверши́л еси́ ду́шу, прему́дре свя́те Стефа́не, на земли́ непоро́чно житие́ соверши́в, Зижди́телю все́х благоугоди́л еси́: моли́ непреста́нно о все́х на́с.

Икос:

Язы́ком проглаго́лати непостиза́ю, и умо́м недоумева́юся, неве́жда сы́й, но, Иже умудри́вый рыболо́вцы и неве́жды улови́ти мре́жею Боже́ственнаго пропове́дания вселе́нную, пода́ждь ми́ преподо́бнаго Твоего́ дея́ния чи́сто разуме́ти, и бо́дренно смотре́ти, ра́достно же глаго́лати такова́я: ра́дуйся, о́трасле, прозя́бшая от ко́рене благове́рна; ра́дуйся, ве́тве, име́ющая цве́т богоразу́мия; ра́дуйся, возраще́ние целому́дрия; ра́дуйся, благоче́стия ди́вный рачи́телю; ра́дуйся, вдо́в и си́рых чу́дный промысли́телю; ра́дуйся, а́лчущих сла́дкий пита́телю; ра́дуйся, во бра́нех непобеди́мая хра́бросте; ра́дуйся, я́ко свы́ше осия́нием яви́лся еси́; ра́дуйся, я́ко зре́нием мно́гия ужаси́л еси́; ра́дуйся, я́ко бе́сы от челове́к отгна́л еси́; ра́дуйся, я́ко исцеле́ния мно́гая пода́л еси́. Ра́дуйся, Стефа́не, я́ко Зижди́телю твоему́ благоугоди́л еси́: моли́ непреста́нно о все́х на́с.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Благоверне княже Стефане, моли́ Бо́га о нас.

Внима́я слы́шанию Боже́ственнаго гла́са и про́поведи свяще́ннаго Ева́нгелия, препита́в жи́тницами а́лчущия, подо́бно дре́внему Ио́сифу, и ри́зами одева́я наги́я, я́коже Иов Авситиди́йский, Стефа́н преподо́бный, с ни́миже вопи́я: благослове́н Бо́г оте́ц на́ших.

Припев: Благоверне княже Стефане, моли́ Бо́га о нас.

Моли́твы и ми́лостыни к Бо́гу ча́сте посыла́ет Стефа́н, подража́я свяще́ннаго Корни́лия, и в до́м прие́мля му́жи, свяще́нством и доброде́телию сия́ющия, и от ни́х науча́емь, вопия́ше Христу́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Якоже о́н, Ангеловым увеща́нием, призыва́ет верхо́внаго во апо́столех уве́дети и́стину, та́ко и Стефа́н серде́чным жела́нием, испыту́я стези́ пра́выя, глаго́лаше: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Невеще́ственнаго Све́та селе́ние, Твоя́ утро́ба, Пречи́стая Госпоже́, бы́сть, све́тлость ми́ру Бо́жия ра́зума подаде́, безбо́жие прогна́вши, еди́на Богома́ти Влады́чице.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Благоверне княже Стефане, моли́ Бо́га о нас.

Ороша́емь свы́ше Ду́ха Пресвята́го росо́ю, и бразды́ серде́чныя плодоно́сны име́я, духо́вная се́мена и богодохнове́нная словеса́ объе́мь, жи́зни нестаре́ющияся, и с ликостоя́нии пра́ведных вопия́ Стефа́н: благослови́те, вся́ дела́ Госпо́дня, Го́спода, и превозноси́те во вся́ ве́ки.

Припев: Благоверне княже Стефане, моли́ Бо́га о нас.

Хра́мину душе́вную утверди́в не на печце́, но на тве́рдом ка́мени Христо́ва разуме́ния, ве́тром мы́сленным и волна́м жите́йским, прирази́вшимся е́й, соблю́л еси́ сию́ непоколеби́му. Ны́не в ра́дости лику́я, Стефа́не, зове́ши: благослови́те, вся́ дела́ Госпо́дня, Го́спода, и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Зла́тник, его́же прия́л еси́ от Влады́чния десни́цы, Стефа́не, умно́жил еси́, те́мже ча́еши слы́шати отве́т благи́й от Суди́и пра́веднаго, егда́ прии́дет во сла́ве Своего́ Ца́рствия, вопия́: благослови́те, вся́ дела́ [Госпо́дня], Го́спода, и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Мари́е, злата́я кади́льнице, Пресвята́я Влады́чице Богоро́дице, уста́ви мы́сли моея́ колеба́ние, я́коже Сы́н Тво́й ути́шил е́сть во́лны морски́я, и исцели́ ума́ моего́ развраще́ние, я́коже Он кровоточи́вую, да пою́ Ти́, Пречи́стая: благослове́н Пло́д Твоего́ чре́ва.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу велича́ем.

Припев: Благоверне княже Стефане, моли́ Бо́га о нас.

От роди́тельнаго наказа́ния вкорени́л еси́ в ду́шу ра́зум благове́рия, и кни́жным уче́нием восприя́л еси́ да́р Боже́ственнаго умиле́ния, Стефа́не преподо́бне, всегда́ моли́ спасти́ на́с, твою́ па́мять велича́ющих.

Припев: Благоверне княже Стефане, моли́ Бо́га о нас.

О жи́зни настоя́щей небре́гл еси́, разумева́я, я́ко прехо́дит, к бу́дущей прите́кл еси́, я́ко ко пребыва́ющей. Те́мже в не́й све́тлость Боже́ственную созерца́я, моли́ся сию́ и на́м насле́дити, Христа́ велича́ющи.

Сла́ва Отцу́ и Сы́ну и Свято́му Ду́ху:

Недоумева́ющь, ка́ко соплету́ вене́ц пе́ния, и возглашу́ Стефа́нова благодея́ния, и не́сть ми́ разуме́ти, ка́цех потре́бует похва́л от мои́х скве́рных усте́н. Но, я́же принесо́х ти́ со усе́рдием, приими́ со бла́гостию, предстоя́ Зижди́телю со дерзнове́нием, помяни́ и на́с, хва́лящих тя́.

И ны́не и при́сно и во ве́ки веко́в. Ами́нь.

Богородичен: Влады́чице ми́ра, блага́я Засту́пнице, приими́ от на́с приноси́мое Ти́ хвале́ние, я́коже Сы́н Тво́й прия́т две́ ле́пте вдови́чи, и пода́ждь на́м ми́рное житие́ и единомы́слие.

Свети́лен.

Све́т Трисия́нный в се́рдце прие́мь, све́том наставля́емь уче́ний Правосла́вия, све́т и Ду́ха, благода́тию просвеща́ющаго тя́, Стефа́не, све́те прекра́сный.

Сла́ва, други́й.

Це́рковь красу́ется и лику́ет, ра́ку благоуха́нную в себе́ иму́щи, я́ко неве́ста игра́ет, и Жениху́ своему́, Христу́, хвале́ния пе́сни прино́сит, ра́достен пра́здник с ча́ды свои́ми соверша́ющи.

И ны́не, Богородичен:

Сове́та вели́каго Ангела, Отца́ благоволе́нием, и Свята́го Ду́ха наи́тием, во утро́бе Твое́й понесла́ еси́, Богоро́дице, Того́ моли́ сохрани́ти достоя́ние, е́же стяжа́, Пресвята́я Влады́чице.

Молитва

О, святы́й уго́дниче Бо́жий благоверне княже Стефане, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.