17 октября.

Канон священномученику Петру Капетолийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Пе́тре,/ моли́ Хpиста́ Бо́га// спасти́ся душа́м на́шим.

Кано́н, гла́с 4.

Пе́снь 1.

Ирмос: Отве́рзу уста моя,/ и напо́лнятся Духа,/ и слово отры́гну Цари́це Ма́тери,/ и явлюся, све́тло торжеству́я,/ и воспою́, ра́дуяся, Тоя́ чудеса.

Припев: Священномучениче Петре, моли́ Бо́га о нас.

Начало был еси мучеником, Христе,/ при Понти́йстем Пила́те мученик быв,/ возлю́бль же немощно́е плотски́м страданием.

Припев: Священномучениче Петре, моли́ Бо́га о нас.

Служил еси, преподобне, без поро́ка Божию жертву, люди очища́я,/ жертву же кровию себе принесл еси.

Сла́ва Отцу́ и Сы́ну и Свято́му Ду́ху:

Мертв убо телом явися,/ душею же оживе́, тяклоимени́те Пе́тре,/ веры основание, бесо́в язва.

И ны́не и при́сно и во ве́ки веко́в. Ами́нь.

Богородичен: Пою Тя, Господи Боже мой,/ яко родися от Матере, Девы Чистыя,/ и Ту явил еси надежду душа́м нашим.

Пе́снь 3.

Ирмос: Лук сильных изнемо́же/ и немощетву́ющии препоя́сашася силою:/ сего ради утверди́ся в Господе сердце мое.

Припев: Священномучениче Петре, моли́ Бо́га о нас.

Яко старейшина пречестна наказа, Пе́тре,/ удо́м исправление, супрузе и внуком,/ ко Христу приводя.

Припев: Священномучениче Петре, моли́ Бо́га о нас.

Скверну отмыл еси всю, Пе́тре,/ очи́стив ду́шу с телом,/ явил еси Божественный храм, священномучениче, духовный.

Сла́ва Отцу́ и Сы́ну и Свято́му Ду́ху:

Дело́м делатель бывая, телесное же прешед средогра́дие,/ явился еси Боже́ственней добро́те,/ страстоте́рпче Пе́тре славный.

И ны́не и при́сно и во ве́ки веко́в. Ами́нь.

Богородичен: Да Ада́мово паде́ние Создавый Адама воздвигнет,/ от Девы милосердия ради паче словесе́ родился еси.

Пе́снь 4.

Ирмос: Небеса доброде́тель Твоя покрыла есть,/ и земля испо́лнися славы Твоея, Христе́,/ темже верно вопие́м:/ слава силе Твоей, Го́споди.

Припев: Священномучениче Петре, моли́ Бо́га о нас.

Облече́ся любовию, Пе́тре, яко щитом,/ яко шлемом, упованием обложи́вся,/ щито́м веры соста́вы победил еси бесо́вския.

Припев: Священномучениче Петре, моли́ Бо́га о нас.

Яростно боря́ше на тя пра́ведных враг,/ но не́мощен терпе́нием твоим явля́шеся, имже вопия́ше, славне:/ слава силе Твоей, Господи.

Припев: Священномучениче Петре, моли́ Бо́га о нас.

Божественную ревность от любве восприи́м,/ зловерных не стерпел еси хуле́ния,/ но, яко в сеть, вве́рже, Пе́тре, обличе́нием безумныя.

Сла́ва Отцу́ и Сы́ну и Свято́му Ду́ху:

Силою ума в немощи пло́тской доброе испове́дание устрои́в,/ отмета́ющимся испове́да, Петре, Иису́сово Божество́.

И ны́не и при́сно и во ве́ки веко́в. Ами́нь.

Богородичен: Отроча́ нам дано бысть от проро́чества,/ Рожде́нное прежде болезни Божия Матере,/ егоже начальство на ра́ме Его Божественный Иса́ия пропове́даше.

Пе́снь 5

Ирмос: Ты, Господи, мой свет/ в мир прише́л еси,/ Свет Святы́й, обраща́яй из мра́чна неве́дения/ верою воспева́ющия Тя.

Припев: Священномучениче Петре, моли́ Бо́га о нас.

Постави Христос Себе обиталище тебе, преподобне,/ любве ради нело́жныя Тебе прежде возлюбившаго.

Припев: Священномучениче Петре, моли́ Бо́га о нас.

Мученика Христова Божия усыне́ния тебе, преподобне,/ подо́бника Его страсте́м/ Божественная любы́ явила есть.

Сла́ва Отцу́ и Сы́ну и Свято́му Ду́ху:

Добр ревнитель, не яко Петрово отверже́ние,/ ты, преподобне, явися Богословия,/ о Пе́тре преблаже́нне.

И ны́не и при́сно и во ве́ки веко́в. Ами́нь.

Богородичен: Тя, оружие необоримо, на враги предлагаем,/ Тя, исправление и надежду нашему спасению, Богоневестная, и́мам.

Пе́снь 6.

Ирмос: Возопи́, прообразу́й погребение тридневное, пророк Иона,/ в ки́те моляся:/ от тли избави мя, Иису́се Царю Сил.

Припев: Священномучениче Петре, моли́ Бо́га о нас.

Глаголы твоими собор пога́нский, обостряяся неи́стовством,/ и смерть совеща́ша преждесудную нанести на тя,/ страстоте́рпче Христов, Пе́тре славный.

Припев: Священномучениче Петре, моли́ Бо́га о нас.

Лю́тостное враг Христовых/ и противное от болезней ча́емая разруши́ смерть,/ но ты избыл еси проповеданием Христовым, Пе́тре славный.

Сла́ва Отцу́ и Сы́ну и Свято́му Ду́ху:

Избыл еси, страстоте́рпче, без надежды смерти и здрав бысть,/ иже душею крепкий и телом, беззаконным язва,/ Христов ви́димый местник.

И ны́не и при́сно и во ве́ки веко́в. Ами́нь.

Богородичен: Зачала́ еси во утробе всяческая Устро́ившаго, Богородице,/ во времени Безвре́меннаго родила́ еси/ и по Рождестве, якоже и прежде Рождества, пребыла еси Нетле́нная.

Пе́снь 7.

Ирмос: Авраа́мстии иногда́ в Вавило́не о́троцы,/ пе́щный пла́мень попра́ша, пе́сньми взывающе:/ отец наших Боже, благослове́н еси.

Припев: Священномучениче Петре, моли́ Бо́га о нас.

Боговещанный твой пред мучительскими суди́щи/ с дерзновением, Петре славный, язык взыва́ше:/ отец наших Боже, благословен еси.

Припев: Священномучениче Петре, моли́ Бо́га о нас.

Украше́нный душею, яко жених в черто́зе,/ в злоде́йсцей, Петре славне, темнице взыва́ше:/ отец наших Боже, благословен еси.

Сла́ва Отцу́ и Сы́ну и Свято́му Ду́ху:

Избавле́нный душею, свя́занный узы,/ мученический, всехвальне, путь, отче, прошел еси,/ благословен еси, вопия, тако Изволивый.

И ны́не и при́сно и во ве́ки веко́в. Ами́нь.

Богородичен: Пророчестии гласи о тебе, Дево Мати, имеша конец,/ я́ве Христа бо родила́ еси,/ милосердия многа ради нам уподо́бльшася.

Пе́снь 8.

Ирмос: На Кресте плотию пригвожде́ннаго/ и показавшаго нам оружие во спасение,/ о́троцы, превозносите Христа Бога нашего во веки.

Припев: Священномучениче Петре, моли́ Бо́га о нас.

Беззаконный сын к отцу мучителю свя́зана, страстотерпче, приводит тя, вопиюща:/ благослови́те вся дела Господня Господа.

Припев: Священномучениче Петре, моли́ Бо́га о нас.

Исправил есть Христос к цесарем Богословный твой глас,/ вопити без трепета, блаженне:/ благослови́те вся дела Господня Господа.

Сла́ва Отцу́ и Сы́ну и Свято́му Ду́ху:

Твоего не стерпя дерзновения, богоненавистный цесарь,/ смерти богоразли́чней, Петре, верный рабе Христов, осуждает тя, Богословяща:/ благослови́те вся дела Господня Господа.

И ны́не и при́сно и во ве́ки веко́в. Ами́нь.

Богородичен: Из Отца прежде век/ и после же из Матере неизреченно воплотившагося,/ о́троцы, превозносите Христа Бога нашего во веки.

Песнь 9

Ирмос: Ева убо неду́гом преслушания/ клятву вселила есть,/ Ты же, Дево Богородице,/ Прозябением чревоношения мирови благословение процвела еси,/ тем Тя вси величаем.

Припев: Священномучениче Петре, моли́ Бо́га о нас.

Отрезан ти бысть язык всечестны́й и кровию отечество благослови./ Язы́ком же Духа огненным Божественная вещающа ти веления, неверных неистовство обличатеся,/ тем же тя, мучениче, блажим.

Припев: Священномучениче Петре, моли́ Бо́га о нас.

Побежден бысть, видя, враг, приснопа́мятне, языка твоего отъятие,/ руце и нозе отсечение, изжига́еме жалами очи,/ к Христу пригваждаем и раздробляем, огневи тя и воде разделяем.

Сла́ва Отцу́ и Сы́ну и Свято́му Ду́ху:

Воздвиг пя́ту на врага, вседо́блий, и главу того сокрушил еси,/ венцем же победным увязе́ся от руки Иису́совы Вседержителя,/ Капетолео́ну приснопамятное похваление.

И ны́не и при́сно и во ве́ки веко́в. Ами́нь.

Богородичен: Ева убо от древа Животнаго изгнана бысть, возбране́на наслаждения./ Ты же, Дево Богородице, Живот Превечный ввела еси,/ мирови живоносное поспеше́ние, подаваемое веры ра́ди.

Молитва

О святы́й уго́дниче Бо́жий, священному́чениче Петре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.