17 октября.

Канон священномученику Иерофею, епископу Афинскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бла́гости научи́вся и трезвя́ся во все́х благо́ю со́вестию священноле́пно обо́лкся, поче́рпл еси́ от сосу́да избра́ннаго неизрече́нная, и ве́ру соблю́д, ра́вное тече́ние соверши́л еси́, священному́чениче Иерофе́е. Моли́ Христа́ Бо́га спасти́ся душа́м на́шим.

Канон. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Священномучениче Иерофее, моли́ Бо́га о нас.

Небе́снаго ученика́, тайноводи́теля, богоприя́тне, Па́вла, мирска́го ловца́, учи́теля име́я, виде́ния го́рнейшаго учени́к бы́л еси́.

Припев: Священномучениче Иерофее, моли́ Бо́га о нас.

Духодви́жный я́вственно Па́влов тя́ язы́к, веща́ющ Бо́жия та́йны, блаже́нне, объя́ше, и боговеща́теля соде́я.

Сла́ва Отцу́ и Сы́ну и Свято́му Ду́ху:

Унзе́н любо́вию духо́вною и боже́ственными словесы́ в ра́зуме бесе́дуя все́х Влады́це, всесвяще́нне, свяще́нная словеса́ возложи́л еси́.

И ны́не и при́сно и во ве́ки веко́в. Ами́нь.

Богородичен: Све́та присносу́щнаго прия́телище боголе́пное бы́вши, Де́во Чи́стая, скве́рн мя́ вся́каго греха́ и тиме́ний измы́й, Влады́чице.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Священномучениче Иерофее, моли́ Бо́га о нас.

Яко священносло́вяща свяще́нная пи́смена и благоче́стия сло́во пропове́дающа, вси́ почита́ем тя́, ве́село соше́дшеся, и твою́ свяще́нную па́мять сла́вим.

Припев: Священномучениче Иерофее, моли́ Бо́га о нас.

Кре́постию, и ма́нием, и боже́ственным раче́нием к Благоде́телю все́х возпростира́яся, у́м тво́й озари́л еси́ луча́ми та́мошними и ду́шу просвети́л еси́, преблаже́нне.

Сла́ва Отцу́ и Сы́ну и Свято́му Ду́ху:

Тезоиме́нне наре́клся еси́ свяще́нное Боже́ственное и свято́е богому́дрое яви́лся еси́ возложе́ние Вседержи́телю и Творцу́ веко́в, и хра́м украси́л еси́ небе́сный.

И ны́не и при́сно и во ве́ки веко́в. Ами́нь.

Богородичен: Не́бо простры́й и земны́й, Чи́стая, содержа́й кру́г, и по всему́ естество́м Божества́ во обя́тиих Твои́х пло́тски содержа́ся, и ве́рным Тя́ утвержде́ние все́м показа́.

Конда́к, гла́с 8.

Священнонача́льника Афи́нскаго восхваля́ем тя́, я́ко тайноучи́вшеся тобо́ю стра́нным и неизрече́нным: яви́лся бо еси́ богоприя́тный песносло́вец. Но моли́, всеблаже́нне Иерофе́е, от вся́ких на́м грехопаде́ний изба́витися, да зове́м: ра́дуйся, о́тче богому́дре.

Та́же седа́лен, гла́с 5.

Апо́стольским веща́нием огласи́в тво́й у́м и упа́с, преподо́бне, ве́рных составле́ния, же́ртву чи́сту прине́сл еси́ Царю́ и Творцу́, вопло́щшемуся за ны́ от Де́вы Богоро́дицы и воскре́сша со сла́вою, испове́дав Его́, Иерофе́е.

Сла́ва, и ны́не, Богородичен:

Те́плая предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со Ангелы, умире́ние да́ти ми́ру, и спасе́ние, и ве́лию ми́лость.

КрестоБогородичен:

На Кресте́ зря́щи Тя́, Христе́, Ма́ти Твоя́, во́лею посреде́ разбо́йников ви́сяща, растерза́ющися утро́бою ма́терски, глаго́лаше: Безгре́шный Сы́не, ка́ко непра́ведно на Кресте́, я́коже злоде́й, пригвожде́н еси́, челове́ческий ро́д хотя́ оживи́ти, я́ко Благоутро́бен?

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Священномучениче Иерофее, моли́ Бо́га о нас.

Вити́йскими боговеща́ньми украси́л еси́ ликостоя́ния, блаже́нне Иерофе́е, ве́рных и свяще́нный собо́р, богому́дре, возвесели́л еси́ апо́стольский, удивле́нием боже́ственным де́йствуя, и поя́: си́ле Твое́й сла́ва, Человеколю́бче.

Припев: Священномучениче Иерофее, моли́ Бо́га о нас.

Ве́сь Бо́гу освяще́н бы́л еси́ всеобра́зно, блаже́нне, изступа́я к Нему́ богосло́вными священносло́вии, священноявле́н, богоприя́тне, и боже́ствен песносло́вец, и му́др боговеща́тель, прису́щим смы́сленно суди́мь.

Сла́ва Отцу́ и Сы́ну и Свято́му Ду́ху:

Ны́не ви́дя, о́тче, боже́ственная ясне́йше мимоше́дших все́х свяще́ннейше гада́ний и се́ний, су́щих на земли́, и́стиннейшая боговиде́ния сия́ний, моли́ спасти́ся ве́рно пою́щим: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Ты́ Бо́га невмести́маго, вме́щшагося во чре́во Твое́, Пречи́стая, родила́ еси́, я́ко Чи́стая де́вственными укра́шена светлостьми́, Всеблаже́нная. Те́м Тя́, Богоро́дицу, и́стинно благохва́лим и Рождество́ Твое́ вси́ сла́вим.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Священномучениче Иерофее, моли́ Бо́га о нас.

Купножи́тель, о́тче, апо́стольскому сы́й собра́нию, с ни́миже предста́л еси́ на Успе́ние боже́ственное, богогла́се, Жизнода́вца пло́тию на́м ро́ждшия, Пресвяты́я и Чи́стыя Богома́тере.

Припев: Священномучениче Иерофее, моли́ Бо́га о нас.

Преесте́ственно разуме́в и ста́рчески, я́же па́че словесе́, виде́ния, испове́да все́м прие́млющим ве́рно сия́ние и твоя́, всеблаже́нне, созри́тельная богосло́вия, разуме́ти лю́бящим, вседо́блественнейше.

Сла́ва Отцу́ и Сы́ну и Свято́му Ду́ху:

Пребога́тными луча́ми па́че естества́ светозаре́нием светя́ся, извествова́нием боже́ственных открове́ний и чистото́ю, мно́гих одержа́л еси́ вре́менным испыта́нием, и виде́нием, мудре́йшая боже́ственная науча́емь.

И ны́не и при́сно и во ве́ки веко́в. Ами́нь.

Богородичен: Неискусому́жно, Де́во, непреде́льнаго естество́м Божества́, вмужи́вшагося Сло́ва на́с ра́ди, челове́ков, зачала́ еси́ от крове́й, Отрокови́це, де́вственных, воображе́на па́че сло́ва, и зако́на, и естества́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Священномучениче Иерофее, моли́ Бо́га о нас.

Навыче́нием боголе́пным боже́ственному зна́нию науча́емь, словеса́, о́тче, твоя́, я́ко втора́я словеса́ оста́вил еси́ я́ве священнозна́ния, ду́ши на́ша просвеща́ющая.

Припев: Священномучениче Иерофее, моли́ Бо́га о нас.

Блаже́н и́стинно бы́л еси́, богоблаже́нне, очище́нною душе́ю и су́щее блаже́нство, и еди́но жела́емое возлюби́л еси́, добро́ты Спа́совы, Иерофе́е.

Сла́ва Отцу́ и Сы́ну и Свято́му Ду́ху:

На пречи́стыя лучи́ взира́я, богоприя́тне, разу́мными блиста́ньми Боже́ственных све́тлостей, те́х наслажде́ния и светодая́ния о́бщник яви́лся еси́, блаже́нне.

И ны́не и при́сно и во ве́ки веко́в. Ами́нь.

Богородичен: Госпо́дьственно и и́стинно Тя́, Богоро́дице, сла́вим, су́що бо Су́щаго Бо́га неизрече́нно родила́ еси́, пло́тию по Ипоста́си совоку́пльшася, Пресвята́я Ма́ти Де́во.

Конда́к, гла́с 4.

Якоже сто́лп непоколеби́мь, Иерофе́е, преще́ния враго́в не устраши́ся, но пре́лести разруши́л еси́ тверды́ню, я́ко ка́мень че́стен валя́яся, о́тче. Те́м Влады́ка тя́, хра́брствовавша, венча́ет живонача́льною и Боже́ственною десни́цею. Его́же о все́х на́с умоли́.

Икос:

Зако́ну покаря́ющеся Твоему́, Христе́, ученицы́ Твои́ и и́же от язы́к все́м пропове́дающе сло́во Боже́ственнаго Твоего́ прише́ствия, Це́рквам все́м рукополага́ют ве́рныя, па́стыри же и пропове́датели. Па́стыря у́бо и сего́ положи́ша, его́же избра́л еси́ от младе́нства, и просвети́в, я́ко непоро́чна, Тебе́, и произво́ли на сие́ того́ возве́д, и ста́до Твое́ вручи́в, свиде́теля яви́л еси́ Твоего́ Ца́рствия, моля́щася о все́х на́с.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Священномучениче Иерофее, моли́ Бо́га о нас.

Святы́х свята́я тща́ся ви́дети, богоблаже́нне, чистото́ю жития́ и зре́ния Боже́ственнаго высо́кое, му́дре, стяжа́л еси́, и, поя́, взыва́л еси́: благослове́н Бо́г оте́ц на́ших.

Припев: Священномучениче Иерофее, моли́ Бо́га о нас.

Глаго́л веща́ние твои́х и списа́ний доброслове́сие возвеселя́ет любо́вию честву́ющия и поуща́ет к песнопе́нию, зва́ти науча́я: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Еди́ницу, Божество́м зна́емую, благосло́вил еси́, в Ли́цех Тро́ицу и пое́му во Ипоста́сех Тре́х, богому́дре, и, поя́, взыва́л еси́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Зако́нных есте́ств, Де́во Ма́ти, кроме́ родила́ еси́ Влады́чествующаго все́ми ви́димыми и разу́мными, Чи́стая, Его́же пое́м, согла́сно зову́ще: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Священномучениче Иерофее, моли́ Бо́га о нас.

Всеси́льное Ду́ха Свята́го де́йство в чисте́йшую твою́ ду́шу все́льшися, богоприя́тна пропове́дника и богоглаго́льника показа́, священноле́пно Изба́вителя пою́ща и ве́рою хва́ляща: свяще́нницы воспо́йте, лю́дие превозноси́те во вся́ ве́ки.

Припев: Священномучениче Иерофее, моли́ Бо́га о нас.

С благоче́стным взыска́нием испыта́в неизрече́нная строе́ния Христо́вых та́ин, я́сно изъяви́л еси́, высокослове́сием де́йствуя и сладча́йшим твои́х веща́ний сложе́нием, вопия́ непреста́нно: свяще́нницы воспо́йте, лю́дие превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Всебога́тая тя́ благода́ть Боже́ственнейшим вдохнове́нием и богосло́вием испы́тным испо́лнила е́сть: отсю́ду источи́л еси́, я́ко ре́ки, уче́ния, апо́стольская возвеселя́ща ликостоя́ния, с ни́миже ны́не воспева́еши: свяще́нницы воспо́йте, лю́дие превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Умерщвле́ну, Пречи́стая, ду́шу мою́ грехми́, и озло́блену ядови́тым угрызе́нием, Бо́га, могу́щаго животвори́ти вся́ческая, неискусобра́чно па́че естества́ ро́ждши, возста́ви вопию́щую: де́ти благослови́те, свяще́нницы воспо́йте, лю́дие превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Священномучениче Иерофее, моли́ Бо́га о нас.

Му́дрости прему́драго я́ко рачи́тель бы́в, благода́тный вене́ц благоле́пный, ра́дуяся, прия́л еси́ ны́не от нея́; и лико́вник небе́сный у вся́ческих Соде́теля бы́в, моли́ спасти́ся от бе́д хва́лящим тя́, Иерофе́е.

Припев: Священномучениче Иерофее, моли́ Бо́га о нас.

Всели́лся еси́ в вы́шния Боже́ственныя дворы́, и оби́тели ве́чныя насле́див, с во́инствы Ангельскими ны́не пра́зднуеши и с апо́стольскими чи́нми, и́мже свесели́шися ра́достне, с ни́миже и соводворя́яся, ве́рою честву́ющим тя́ Боже́ственнаго ми́ра проси́.

Сла́ва Отцу́ и Сы́ну и Свято́му Ду́ху:

Изве́стная воздая́ния восприе́м, и́же на земли́ явле́ния стяжа́л еси́, при́сною любо́вию взира́я к Бо́гу, ны́не приле́жно моли́, о́тче Иерофе́е, ми́лость и очище́ние пода́ти ве́рою па́мять твою́ соверша́ющим, светоно́сную и всесвяще́нную.

И ны́не и при́сно и во ве́ки веко́в. Ами́нь.

Богородичен: Яко Ма́ти все́х Соде́теля, ма́терним Твои́м дерзнове́нием умоли́ Твоего́ Сы́на спасти́ от наси́лия мучи́тельскаго плене́нныя рабы́ Твоя́, и клеветы́ челове́к лука́вых упраздни́ти, ми́р же пода́ти и спасе́ние пою́щим Тя́.

Свети́лен.

Ху́ждшее покори́л еси́ лу́чшему, богоприя́тне, у́м страсте́й вожда́ предвчини́в всему́дро, отвсю́ду, Иерофе́е, богосло́вия бы́л еси́ орга́н и апо́стол Христо́в, му́дре иера́рше, о ми́ре моли́ся.

Богородичен:

Успе́нию Твоему́ пречи́стому прише́д Иерофе́й с про́чими апо́столы, пе́снь пое́т Тебе́, Отрокови́це, стра́нную и неизрече́нную, боже́ственно изступа́я, я́ко и́стинно богоприя́тен; ему́же подо́бники и на́с покажи́, Богома́ти Деви́це.

Молитва

О святы́й уго́дниче Бо́жий, священному́чениче Иерофе́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.