16 октября.

Канон обретения мощей преподобного Иосифа Оптинского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь на обре́тение, глас 3:

Я́ко к боже́ственней ча́ши утеше́ния,/ к ра́це моще́й твои́х притека́ем, о́тче Ио́сифе,/ ты бо, насле́довав благода́ть вели́каго ста́рца,/ напои́л еси́ то́ю оби́льно сосло́вия и́ноческая,/ избра́нниче возлю́бленный Бо́жия Ма́тере,/ те́мже с Не́ю моли́ся Христу́/ оби́тели твое́й дарова́ти утвержде́ние// и душа́м на́шим ве́лию ми́лость.

Кано́н моле́бный, глас 2.

Песнь 1

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Припев: Преподобне отче Иосифе, моли Бога о нас!

Тебе́ о твои́х даре́х долг принося́ще, преблаже́нне Ио́сифе, и твоему́ житию́ плету́ще похва́льный вене́ц, благода́тная воздая́ния улучи́ти жела́ем, твои́ми, пребога́те, святы́ми моли́твами.

Припев: Преподобне отче Иосифе, моли Бога о нас!

Ста́рца вели́каго Амвро́сия ча́до люби́мое яви́лся еси́, той бо на тя с наде́ждею взира́ше, не посрами́ и на́ша ча́яния, о́тче Ио́сифе, с любо́вию притека́ющих к тебе́ и прося́щих ми́лости.

Слава: Повину́лся еси́ вседу́шно духо́вному отцу́ твоему́, и Боже́ственный почи́ на тебе́ Святы́й Дух, блаже́нне Ио́сифе, Его́же де́йствием пресве́тло украси́лся еси́, кра́йняго ра́ди твоего́ послуша́ния.

И ныне: Исто́чник безстра́стия ро́ждшая, уя́звленнаго мя страстьми́ исцели́, Отрокови́це, и ве́чнаго огня́ исхити́, Еди́на Богоблагода́тная.

Песнь 3

Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас пою́щих Тя.

Припев: Преподобне отче Иосифе, моли Бога о нас!

От де́тства к Бо́гу любо́вию взят, Ма́терию Бо́жиею наставля́емь я́ве и та́йно, ангелоподо́бно житие́ на земли́ показа́л еси́ и лику́еши ны́не с Небе́сными Си́лами.

Припев: Преподобне отче Иосифе, моли Бога о нас!

Тьмы лука́вых духо́в мимоте́кл еси́, любо́вию наставля́емь, о́тче Ио́сифе, да Све́та Непристу́пнаго яви́шися прича́стник, те́мже у тебе́ по́мощи про́сим.

Слава: Наказу́яй сы́на своего́ наслади́тся о нем и посреде́ зна́емых о нем похва́лится, те́мже посреде́ святы́х весели́теся ны́не, от Бо́га познава́еми и от всех восхваля́еми, Амвро́сие му́дре и Ио́сифе сла́вне.

И ныне: Мари́е, злата́я Кади́льнице, страсте́й мои́х смрад отжени́ и утверди́ мя, Чи́стая, коле́блемаго прило́ги вра́жии.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,// прославля́ю, Многоми́лостиве.

Припев: Преподобне отче Иосифе, моли Бога о нас!

Тя мо́лим и к тебе́ усе́рдно прибега́ем, о́тче Ио́сифе, я́ко подража́телю Па́стыря овца́м Превели́каго, от высо́т свяще́нных ны́не призира́я, упаси́ ча́да твоя́.

Припев: Преподобне отче Иосифе, моли Бога о нас!

От младе́нства позна́лся еси́ Бо́гу и к мона́шескому де́ланию приступи́л еси́, я́ко отроча́, те́мже и вшел еси́, блаже́нне Ио́сифе, в Ца́рство Небе́сное, ра́дуяся.

Слава: У́мре оте́ц его́, и а́ки не у́мре, глаго́лет прему́дрый, подо́бна бо себе́ оста́ви по себе́, те́мже благодаря́т о тебе́ Бо́га мона́хов мно́жества и оби́тель Ша́мординская.

И ныне: Ра́дость Тебе́, Де́во, пра́отцев се́тование разреша́ющую, Гаврии́л, свяще́нный Арха́нгел, благовествова́ше, с Небесе́ слете́в, Чи́стая Богоневе́сто.

Песнь 5

Ирмос: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го бо́га не зна́ем.

Припев: Преподобне отче Иосифе, моли Бога о нас!

Добротолю́бия стяжа́телю и добро́ты и́стинныя таи́нниче, Боже́ственное и́мя, е́же па́че вся́каго и́мене, призыва́л еси́ непреста́нно, о́тче, наказу́я, наставля́я и уча́ терпе́нию Госпо́дню.

Припев: Преподобне отче Иосифе, моли Бога о нас!

Не от челове́к прия́л еси́ хвалу́, но и́стинную сла́ву избра́л еси́, о́тче, Крест Царя́ Христа́ при́сно нося́, почита́я в челове́цех о́браз Госпо́день, даю́щаго смире́нным Свои́м благода́ть.

Слава: Зело́ ми́лостива и нищелюби́ва показа́ тя Спас наш ми́ру, о́тче, и врача́ боля́щим, Ио́сифе, и засту́пника оби́димым, в ми́лости бо никому́же когда́ отказа́л еси́.

И ныне: Разуме́в Тя издале́ча, Де́во, Бо́га нося́щую на руку́ Твое́ю, Иса́иа нам предвозвести́: ра́зве бо Сы́на Твоего́ ино́го бо́га не ве́мы.

Песнь 6

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Припев: Преподобне отче Иосифе, моли Бога о нас!

Я́ко крин благово́нный, та́инственно от недр земны́х, изда́шася честны́я мо́щи твоя́, преблаже́нне Ио́сифе, благослове́ние вели́каго а́ввы и твое́ подава́юще и веселя́ще чуде́с заре́ю духо́вная ча́да.

Припев: Преподобне отче Иосифе, моли Бога о нас!

Не ну́ждею, но любо́вию, свы́ше насажде́нною в се́рдце твое́, после́довал еси́ вели́кому Амвро́сию, и тобо́ю напая́еми есмы́ вино́м любве́ Боже́ственныя.

Слава: Обоня́ют ны́не несумне́нно притека́ющии к тебе́ благоуха́ние тишины́ Небе́сныя, ю́же источа́ет ра́ка моще́й твои́х, и оби́тель О́птинская ублажа́ет тя, Ио́сифе приснопа́мятне.

И ныне: От всех родо́в Творе́ц избра́ Тебе́, Всенепоро́чная, добро́ту Иа́ковлю, Ю́же возлюби́ и, из Тебе́ возсия́в, яви́ся.

Конда́к, глас 3:

Мир сия́нием озаря́еши,/ о́тче наш Ио́сифе блаже́нне,/ не́мощь бо естества́ препобеди́в,/ Ду́ха Свята́го сосу́д соде́лался еси́/ и, по́двиг ста́рчества восприи́м,/ му́дрый наста́вник ве́рным был еси́./ Ны́не, пребыва́я при́сно со святы́ми,// испроси́ нам ве́лию ми́лость.

И́кос:

Испо́лньшимся времено́м, призва́ тя Госпо́дь чреду́ ста́рчества возгла́вити и поста́ви, я́ко свещу́ на све́щнице, да озаря́еши богоразу́мия све́том вся недоуме́нныя, притека́ющия к тебе́, преподо́бне о́тче наш Ио́сифе, избра́нный собесе́дниче Пренепоро́чныя, насе́льниче черто́гов го́рних, иде́же ли́цы святы́х непреста́нно славосло́вят Творца́ вся́ческих, Того́ моли́, да пода́ст нам ве́лию ми́лость.

Песнь 7

Ирмос: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Припев: Преподобне отче Иосифе, моли Бога о нас!

Целому́дрием и смире́нием, о́тче преподо́бне, возвыша́емь, плотски́я прило́ги мужему́дренно отгоня́л еси́, те́мже и дара́ми духо́вными Христо́с Бог тя обогати́, сего́ ра́ди и вене́ц неувяда́емый прия́л еси́, Ио́сифе преди́вне.

Припев: Преподобне отче Иосифе, моли Бога о нас!

Благоче́стие и преподо́бие, и любы́ и́стинная к Бо́гу и бли́жнему, из твоея́ души́ излива́хуся, о́тче Ио́сифе, явля́юще в тебе́ чу́дное де́йство Ду́ха Свята́го.

Слава: Дух разсужде́ния отца́ твоего́ в тебе́ показа́ Госпо́дь, преподо́бне Ио́сифе, ре́ки бо воды́ живы́я истеко́ша от чре́ва твоего́, си́лою но́вою напая́юще жа́ждущия жи́зни ве́чныя.

И ныне: Зако́на и проро́ков исполне́ние, Отрокови́це, Гаврии́л Тя показу́я, вопия́ше: се ражда́еши, Еди́на Всепе́тая, Пребоже́ственнаго Творца́ тва́ри и Го́спода Сла́вы.

Песнь 8

Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Припев: Преподобне отче Иосифе, моли Бога о нас!

Смире́нием укроща́л еси́ бу́йная сердца́ и отча́янныя сло́вом укрепля́л еси́, о́тче, ско́рби, не́мощи и боле́зни чад твои́х се́рдцем восприи́м, сего́ ра́ди, любо́вию привлача́еми, мо́лимся: поми́луй, утверди́ и просвети́ ду́ши на́ша.

Припев: Преподобне отче Иосифе, моли Бога о нас!

Нра́вом твои́м благи́м после́дствующе, нему́дрии, о́тче, умудри́шася и гре́шнии прилепи́шася пра́вде Бо́жией, те́мже ко гро́бу твоему́ прибега́юще, я́ко к целе́бному исто́чнику припа́даем.

Припев: Преподобне отче Иосифе, моли Бога о нас!

Ми́лованием мно́гим ни́щим быв бога́тство и врач, исцеля́яй я́звы и неду́ги вся́ческия, сего́ ра́ди ве́рою к тебе́, Ио́сифе, влече́мся, гла́дом ги́блющии духо́вным и немощьми́ плотски́ми обдержи́ми.

Слава: Крест тя́жкий поне́сл еси́ на ра́ме твое́м устрое́ния ю́ныя оби́тели Ша́мординския, но вся препобеди́л еси́ терпе́нием и любо́вию, и́стинный оте́ц сирота́м нарече́нный, Ма́тере Бо́жия ве́рный послу́шниче.

И ныне: Рай жи́зни су́щи, Богоро́дице, изба́ви мя вско́ре, Ма́ти Де́во, скорбе́й многообра́зных и сме́рти грехо́вныя моли́твами уго́дника Твоего́ Ио́сифа.

Песнь 9

Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.

Припев: Преподобне отче Иосифе, моли Бога о нас!

Па́мять пра́ведных с похвала́ми почти́м, сим бо венцы́ благоле́пны Христо́с возложи́, Льву богому́дрому, Мака́рию блаже́нному, Амвро́сию препросла́вленному, Ио́сифу благопослу́шному и преподо́бным ины́м, дея́нии просия́вшим и виде́ния сподо́бльшимся.

Припев: Преподобне отче Иосифе, моли Бога о нас!

Возвели́чил еси́, Го́споди, уго́дника Твоего́ Ио́сифа, я́ко столп огнетворя́щий, и наста́вника любоче́стна яви́л еси́ нам. Мы же со стра́хом мо́лим того́: о́тче преподо́бне, сподо́би ны до́бре преити́ лет на́ших обхожде́ние.

Слава: Ве́яние тишины́ Небе́сныя, духо́вное прохлажде́ние и мир бога́тый подае́т от Бо́га, я́ко уго́дник Его́ и наш оте́ц, и напая́ет нас вино́м боже́ственнаго смы́сла преподо́бный Ио́сиф приснопа́мятный.

И ныне: Его́же родила́ еси́, Сло́во па́че сло́ва, Богороди́тельнице Чи́стая, Того́ моли́ при́сно о чту́щих Тя и Богоро́дицу вои́стину Тя имену́ющих.

Моли́тва

О преподо́бне о́тче Ио́сифе, ста́рче О́птинский, ча́до возлю́бленное вели́каго ста́рца Амвро́сия! Ты, от ю́ности Христа́ возлюби́в, да́же до сме́рти ве́рен Тому́ пребы́л еси́ и избра́нник возлю́блен Пречи́стыя Богоро́дицы яви́лся еси́. Ели́цы же не́когда лик твой благода́тный ви́деша, весе́лия Небе́снаго вы́ну исполня́хуся, та́ко и мы, о́тче, днесь к честны́м твои́м моще́м (или́: к твоему́ свято́му о́бразу) припа́дающе, мо́лим тя: изба́ви нас от го́речи грехо́вныя, е́юже нас сопроти́вник напои́, помози́ нам немощны́м, до́лу пони́кшим, не земна́я то́кмо и тле́нная зре́ти, но душе́ю живо́ю к житию́ ве́чному устремля́тися, грехо́в осужде́ния и злопомне́ния изба́витися, за́висти и гне́ву не предава́тися, да тиша́йшее дыха́ние благода́ти серде́ц на́ших ко́снется. Ей, о́тче, ты дар сове́та и блага́го разсужде́ния стяжа́л еси́, наста́ви и нас жизнь свою́ по во́ли Бо́жией устроя́ти. И та́ко, тобо́ю окормля́еми, пра́во по́йдем путе́м спаси́тельным и дости́гнем Ца́рствия Небе́снаго, иде́же вку́пе со все́ми святы́ми сподо́бимся прославля́ти Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.