16 октября.
Канон священномученику Дионисию Ареопагиту.
![Священномученику Дионисию Ареопагиту Священномученику Дионисию Ареопагиту](img_i/049.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Бла́гости научи́вся и трезвя́ся во все́х, благо́ю со́вестию священноле́пно обо́лкся, поче́рпл еси́ от сосу́да избра́ннаго неизрече́нная, и ве́ру соблю́д, ра́вное тече́ние соверши́л еси́, священному́чениче Диони́сие, моли́ Христа́ Бо́га спасти́ся душа́м на́шим.
Канон свята́го. Гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Священномучениче Дионисие, моли́ Бо́га о нас.
Па́влом боже́ственным науче́н, небе́сных, Диони́сие, ви́дцем, небе́сный таи́нник а́бие и боговеща́тель бы́л еси́.
Припев: Священномучениче Дионисие, моли́ Бо́га о нас.
Иже благода́тию Бо́жиею озари́вся, просвети́, блаже́нне, пою́щих тя́ ду́ши твоя́ разуме́ти богодухнове́нная уче́ния, Диони́сие.
Сла́ва Отцу́ и Сы́ну и Свято́му Ду́ху:
Умо́м преочище́нным и душе́ю, небе́сных удобре́ний сия́ния уве́дети сподо́бился еси́, и те́х ликостоя́ния, Диони́сие.
И ны́не и при́сно и во ве́ки веко́в. Ами́нь.
Богородичен: Черто́г светоно́сный, па́че ума́ воплоще́ния яви́лася еси́ все́х Соде́теля: из Тебе́ бо пло́ть, Богома́ти, на́шу оде́ял е́сть.
Пе́снь 3.
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Припев: Священномучениче Дионисие, моли́ Бо́га о нас.
Небе́сных круго́в превозше́д, о́тче, преми́рных чи́ны, и во́инства, и све́тлости, высоковеща́ньми слове́с и всему́дрыми уче́нии все́м изъясни́л еси́.
Припев: Священномучениче Дионисие, моли́ Бо́га о нас.
Высо́каго виде́ния насы́щся, преподо́бне, име́н Боже́ственных Боже́ственное разуме́ние богосло́вил еси́, Тро́ичный богосло́в бы́в благода́тию, богоблаже́нне Диони́сие.
Сла́ва Отцу́ и Сы́ну и Свято́му Ду́ху:
Умертви́вся ны́нешним жела́нием, е́же к Бо́гу, и любому́дрию кре́пко научи́вся, су́щим па́че ума́ животво́рным дарова́нием богоно́сный орга́н, о́тче, бы́л еси́.
И ны́не и при́сно и во ве́ки веко́в. Ами́нь.
Богородичен: Дея́нием, Де́во, Вседе́тельнаго Ду́ха, те́ло Влады́це все́х плодоноси́ла еси́, в Не́мже осуди́ся ми́ра гре́х и Жи́знь источи́ся ве́чнующая.
Седа́лен, гла́с 8.
В пучи́не прему́дрости уча́, Ду́ха глубины́, Тро́ицы еди́но Божество́ пропове́дал еси́, преподо́бне, списа́в вся́ Ангельския чи́ны и та́йная те́х сия́ния, богому́дре. Те́м и ни́жнюю иера́рхию счиня́я, ко еди́ному вся́ возве́л еси́ еди́нству, иера́рше Диони́сие. Моли́ Христа́ Бо́га прегреше́ний оставле́ние дарова́ти честву́ющим любо́вию святу́ю па́мять твою́.
Сла́ва, и ны́не, Богородичен:
Со́лнца о́блаче разу́мнаго, Боже́ственнаго Све́та свети́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослепле́нием страсте́й безстра́стия заре́ю просвети́, молю́ся. И оскверне́нное мое́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти: Богоро́дице Присноде́во, моли́ Христа́ Бо́га, прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.
КрестоБогородичен:
Агнца, и Па́стыря, и Изба́вителя, Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственная Стра́сти Твоя́.
Пе́снь 4.
Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.
Припев: Священномучениче Дионисие, моли́ Бо́га о нас.
Церко́вное благочи́ние украси́л еси́: в ни́х бо, о́тче, живописа́л еси́ зра́чныя о́бразы я́вственно священнописа́нием безобра́зных си́л; и́миже тайново́дятся и просвеща́ются вся́ ве́рных, богому́дре, собо́ры.
Припев: Священномучениче Дионисие, моли́ Бо́га о нас.
Струи́ твоего́ богосло́вия, богоприя́тне, цветники́ напая́ют слове́сныя, присноцве́тущия зело́ и насажде́нныя на пра́вости богосло́вия: еди́нство бо Существа́ в Трие́х Ли́цех, честно́е Единонача́лие пропове́дал еси́.
Сла́ва Отцу́ и Сы́ну и Свято́му Ду́ху:
Ангельскаго священнонача́льства си́льное, святи́телю, жела́ние и раче́ние, е́же к Бо́гу, и неукло́нное ма́ние к высоте́ боже́ственней и непостижи́мей, научи́л еси́ богому́дренно, ве́рою вопию́щия: си́ле Твое́й сла́ва, Человеколю́бче.
И ны́не и при́сно и во ве́ки веко́в. Ами́нь.
Богородичен: Священноде́йствитель спасе́ния бы́сть Сы́н Тво́й все́м пою́щим Тя́, и наста́вник, и просвети́тель, и пра́вда, Де́во, и избавле́ние. Те́м Тя́, Богоро́дицу, и́стинно и госпо́дьственно ве́рнии единому́дренно сла́вим.
Пе́снь 5
Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.
Припев: Священномучениче Дионисие, моли́ Бо́га о нас.
Глаго́л твои́х веща́ние, я́ко не́кий небе́сный шу́м носи́мь, безбо́жныя ра́зумы огроми́ сло́вом благода́ти и веле́ний боже́ственных заря́ми светле́йшими ве́рных сердца́ просвети́.
Припев: Священномучениче Дионисие, моли́ Бо́га о нас.
Уподо́бился еси́ купцу́, и́щущему до́брыя би́серы, всебога́те, и обре́л еси́ еди́н Би́сер, и́стинно многоце́нен, и, уди́влься его́ боготво́рну световерже́нию, святи́телю, Бо́га испове́дал еси́.
Сла́ва Отцу́ и Сы́ну и Свято́му Ду́ху:
Исто́чник му́дрости, любому́дрейше о́тче, возлюби́л еси́, и, тоя́ раче́нием и любо́вию одержи́мь, вели́к бы́л еси́, и ре́ки боже́ственных веле́ний всегда́ то́чиши, богогла́се.
И ны́не и при́сно и во ве́ки веко́в. Ами́нь.
Богородичен: Яко Обра́дованная, добротворя́щее прия́ла еси́ благоле́пие, вся́ еди́нем хоте́нием Сотво́ршаго, и боже́ственною добро́тою и просвеще́нием благове́рия, Богома́ти, на́с Удобри́вшаго.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Священномучениче Дионисие, моли́ Бо́га о нас.
Зако́нно любому́дрствуя, му́дрости да́р получи́л еси́, боже́ственне богосло́вя правосла́вныя догма́ты, всеблаже́нне, оста́вил еси́, и́хже наслажда́ющеся, ве́рнии, тя́ блажи́м.
Припев: Священномучениче Дионисие, моли́ Бо́га о нас.
Ра́зумом боголе́пным, богому́дре, удобря́емь, боже́ственному учи́телю слу́х тво́й приклони́л еси́, и преми́рную от него́ му́дрость навы́кл еси́, Диони́сие.
Сла́ва Отцу́ и Сы́ну и Свято́му Ду́ху:
Житие́ твое́ чу́дно, сло́во же ди́внейше, язы́к тво́й светоза́рен, уста́ огнедухнове́нна и духодви́жима, у́м же тво́й испы́тен, о́тче, богоблаже́нне.
И ны́не и при́сно и во ве́ки веко́в. Ами́нь.
Богородичен: Гла́с Ти́ Гаврии́лов ра́достно, Де́во, взыва́ем ве́рнии, из Тебе́ бо неизрече́нно на́м живонача́льный Творе́ц изше́л е́сть и примеси́ся челове́ком, Человеколю́бец.
Конда́к, гла́с 8.
Небе́сная врата́ проше́д ду́хом, я́ко учени́к, до тре́тияго небесе́ дости́гшаго апо́стола, Диони́сие, неизрече́нных обогати́лся еси́ вся́ким ра́зумом и озари́л еси́ во тме́ неве́дения седя́щия. Те́мже зове́м: ра́дуйся, о́тче всеми́рный.
Икос:
Ангел от челове́ков, доброде́тельми бы́в вели́кий Диони́сий, ве́сь, я́ко крила́т, навы́че умо́м небе́сныя ра́зумы. Те́м пе́сньми, я́ко Ангела, почти́м, вопию́ще к нему́ такова́я: ра́дуйся, уве́девый Христа́ Па́влом; ра́дуйся, мно́гия ко Христу́ обрати́вый; ра́дуйся, многобо́жия храмо́в губи́телю; ра́дуйся, богоразу́мнаго сове́та смотре́ние; ра́дуйся, кни́го богоначерта́нная та́йных сокро́вищ; ра́дуйся, скрижа́ль богозра́чная и зерца́ло небе́сное; ра́дуйся, я́ко Стра́сть Госпо́дню ви́дел еси́; ра́дуйся, я́ко усе́рдно Того́ ра́ди закала́ешися; ра́дуйся, исто́чниче, источа́я ра́зум; ра́дуйся, ка́пле, угаша́ющи безу́мие; ра́дуйся, стезе́ неле́стная спасе́ния; ра́дуйся, прегра́до нечести́вых прехо́да; ра́дуйся, о́тче всеми́рный.
Пе́снь 7.
Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.
Припев: Священномучениче Дионисие, моли́ Бо́га о нас.
Яко ту́ча небе́сная зе́млю жа́ждущую, твоя́ уче́ния ве́рных сердца́ при́сно жела́ющая умаща́ют и несы́тно вопи́ти науча́т: оте́ц на́ших Бо́же, благослове́н еси́.
Припев: Священномучениче Дионисие, моли́ Бо́га о нас.
Ра́зумом богому́дренным безпло́тныя умы́ расписа́л еси́ и те́х, преблаже́нне, песносло́вия, боже́ствен бы́в, Це́рковь пе́ти наказа́л еси́: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Прия́телище Ду́ха Всесвята́го яви́лся еси́ благоключи́мое, и Того́ вдохнове́ния и явле́ния проро́чески провозглаша́я, му́дре Диони́сие, вопия́ше ве́село: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богородичен: Се́ ны́не испо́лнися Иса́ии богоглаго́ливаго прорече́ние: Де́ва бо во чре́ве Бо́га Сло́ва име́ и породила́ е́сть Жизнода́вца; Ему́же вси́ зове́м: благослове́н Бо́г оте́ц на́ших.
Пе́снь 8.
Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Припев: Священномучениче Дионисие, моли́ Бо́га о нас.
Све́тел, я́ко зерца́ло, бы́в, Диони́сие, и вмести́телен чи́стых явле́ний у́м соде́лав, доброде́телию, всебога́те, лучи́ па́че ума́ сия́ния прие́мля, вопия́л еси́: свяще́нницы благослови́те, лю́дие превозноси́те во вся́ ве́ки.
Припев: Священномучениче Дионисие, моли́ Бо́га о нас.
Оби́льнейшая благода́ть излия́ся во устна́х твои́х, те́м боже́ственная уче́ния предложи́л еси́, и те́х ра́зумы па́че смы́сла на́м простира́я и ясне́е и све́тло отверза́я, ве́рою пою́щим: свяще́нницы благослови́те, лю́дие превозноси́те во вся́ ве́ки.
Сла́ва Отцу́ и Сы́ну и Свято́му Ду́ху:
Зна́емейша бы́сть тобо́ю, Диони́сие, Афи́нская всесла́вная митропо́лия, Христу́ прине́сшая тя́ нача́ток всесвяще́нный Всецарю́, всегда́ пою́щи: о́троцы благослови́те, свяще́нницы воспо́йте, лю́дие превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия Всенепоро́чная, души́ моея́ стру́пы и грехо́вныя я́звы потреби́: Сы́на бо родила́ еси́, вла́сть иму́щаго свя́занныя плени́цами грехо́вными удо́бь осла́бити от у́з нереши́мых, еди́наго Благоде́теля и еди́наго Жизнода́вца.
Песнь 9
Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.
Припев: Священномучениче Дионисие, моли́ Бо́га о нас.
Святы́х апо́стол сподо́бился еси́ ви́дитель бы́ти и сострада́лец, и соо́бщник бы́л еси́ сла́вы, и с те́ми на виде́ние потща́лся еси́ телесе́ и́стинно живонача́льныя еди́ныя Богоро́дицы и честне́йшия, Юже досто́йно велича́ем.
Припев: Священномучениче Дионисие, моли́ Бо́га о нас.
Боже́ственнаго Ца́рствия на небесе́х насле́дник бы́л еси́, я́ко зако́нен архиере́й, о́тче, я́ко непобеди́мь страда́лец, свяще́нства ма́стию кро́вь сраствори́л еси́ му́ченическую. Те́м сугу́бым венце́м сподо́бился еси́ досто́йно, священнотаи́нниче Диони́сие.
Сла́ва Отцу́ и Сы́ну и Свято́му Ду́ху:
Яко име́я дерзнове́ние ко Христу́, иера́рше, му́дре Диони́сие, всегда́ моли́ изба́витися от искуше́ния благоче́стно пою́щим тя́, учениче́ неизрече́нных виде́ний, я́ко тайноуче́нныя и богонача́льныя священноявле́нник бла́гости.
И ны́не и при́сно и во ве́ки веко́в. Ами́нь.
Богородичен: Победи́вшу е́реси хра́брски, честну́ю Це́рковь яви́, ю́же Христо́с честно́ю Свое́ю кро́вию я́ко Бла́г стяжа́, Обра́дованная, Сы́н Тво́й и́стинно, и спаси́ от бе́д и от обстоя́ния, одержа́щаго на́с, Влады́чице.
Свети́лен.
Доброде́тельми восходя́, возвы́сився на небеса́, богоприя́тне, и позна́л еси́ Ангелов чи́ны, и все́х вы́шних стоя́ния, и Трисо́лнечную Зарю́, навы́к от Па́вла.
Богородичен:
Иже жи́зни боже́ственней и блаже́нней позави́дев ми́ дре́вле в раи́, вра́г прелука́вый и злоко́зненный, и от Еде́ма изгна́в мя́, умерщвля́ется Рождество́м Твои́м, Богоро́дице.
Молитва
О святы́й уго́дниче Бо́жий, священному́чениче Диони́сие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Священномученику Дионисию Ареопагиту Священномученику Дионисию Ареопагиту](img_b/049.jpg)