16 октября.
Канон священномученику Агафангелу, исповеднику, митрополиту Ярославскому
![священномученику Агафангелу, исповеднику, митрополиту Ярославскому священномученику Агафангелу, исповеднику, митрополиту Ярославскому](img_i/109.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 2:
По вся дни Бо́га ра́ди умервщля́емь,/ святи́телю и испове́дниче Христо́в Агафа́нгеле,/ во вре́мя безбо́жных гоне́ний лю́тых/ попече́ние о Це́ркви Ру́сской от святи́теля Ти́хона прия́л еси́/ и, наве́ты диа́вольския разори́в,/ кора́бль церко́вный му́дре/ си́лою возлюби́вшаго тя Го́спода упра́вил еси́.// Его́же моли́ дарова́ти нам мир и ве́лию ми́лость.
Канон свята́го. Гла́с 8.
Пе́снь 1.
Ирмос: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.
Припев: Священному́чениче Агафа́нгеле, моли́ Бо́га о нас.
Положи́вый в сокро́вищницу Це́ркве Ру́сския плод усте́н, испове́дающих и́мя Бо́жие, святи́телю о́тче Агафа́нгеле, приими́ днесь, я́ко ле́пту, пе́ние от души́, благи́х вдо́вствующия.
Припев: Священному́чениче Агафа́нгеле, моли́ Бо́га о нас.
Ре́вностию по Бо́зе бе́здну гоне́ний немо́кренно преше́л еси́, свя́те Агафа́нгеле, и ны́не моли́твами твои́ми на неукло́нное испове́дание ве́ры нас утверди́, воспева́ющих и пою́щих в сердца́х на́ших Го́сподеви.
Сла́ва Отцу́ и Сы́ну и Свято́му Ду́ху:
Егда́ даде́ся ти благода́ть не то́чию во Христа́ ве́ровати, но и по Нем пострада́ти, святи́телю сла́вне, ты путе́м ско́рбным безбоя́зненно пешеше́ствовал еси́, ве́рным о́браз быв. Те́мже и вни́де во врата́ Небе́сная.
И ны́не и при́сно и во ве́ки веко́в. Ами́нь.
Богородичен: Твоего́ чре́ва Плод, Богоневе́сто, земны́я вся от кля́твы избавля́ет, те́мже благослове́нна Ты в ро́дех, Пречи́стая Влады́чице.
Пе́снь 3.
Ирмос: Утвержде́й на ка́мени ве́ры,/ на сем сози́жду Мою́ Це́рковь, реки́й, Го́споди,/ спаси́ мя, вопию́ща:/ Ты еси́, Христе́, Сын Бо́га Жива́го,// и в Тебе́ утверди́ся дух мой.
Припев: Священному́чениче Агафа́нгеле, моли́ Бо́га о нас.
Егда́ воста́ша врази́ и отсту́пницы на святы́ни земли́ Ру́сския, тогда́ ты уча́ше нело́жно, богому́дре Агафа́нгеле, ка́ко подоба́ет в дому́ Бо́жии жи́ти, я́же есть Це́рковь Бо́га Жи́ва, столп и утвержде́ние и́стины.
Припев: Священному́чениче Агафа́нгеле, моли́ Бо́га о нас.
Ре́чи безу́мныя слы́шав, я́ко несть Бог, прииди́те, и отста́вим вся пра́здники Бо́жия, преще́ния го́рдых не убоя́лся еси́, о́тче Агафа́нгеле, ча́да церко́вная к едине́нию ве́ры призыва́я.
Сла́ва Отцу́ и Сы́ну и Свято́му Ду́ху:
Па́ству твою́ апо́стольски поуча́л еси́, святи́телю Агафа́нгеле, повелева́я отлуча́тися вся́каго бра́та, безчи́нно ходя́ща, в науче́ния стра́нна и разли́чна не прилага́тися, но благода́тию сердца́ утвержда́ти.
И ны́не и при́сно и во ве́ки веко́в. Ами́нь.
Богородичен: Еди́на сло́вом Сло́во пло́тию ро́ждшая, Чи́стая, изба́ви се́тей вра́жиих ду́ши на́ша и утверди́ на ка́мени Боже́ственных хоте́ний, я́ко на Тя упова́ние возложи́хом.
Седа́лен, гла́с 4.
Взира́я на Нача́льника и Соверши́теля ве́ры Иису́са, ве́рою не́мощи превозмо́гл еси́, святи́телю Агафа́нгеле, в темни́цах и изгна́нии терпеливоду́шно пребыва́я, беды́ от гони́телей, беды́ от лжебра́тии терпя́. Те́мже и жизнь ве́чную восприя́л еси́.
Сла́ва, и ны́не, Богородичен:
К Засту́пнице земли́ на́шея, Присноде́ве Богоро́дице, ны́не притеце́м и к первопи́санней ико́не Ея́ припаде́м, с ве́рою зову́ще из глубины́ души́: о Ма́ти Бо́жия, спаси́ зе́млю Ру́сскую, исцели́ боле́зни ея́ и ве́рныя лю́ди уте́ши.
Пе́снь 4.
Ирмос: Ты моя кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Припев: Священному́чениче Агафа́нгеле, моли́ Бо́га о нас.
Ви́ждь враги́ моя́, я́ко умно́жишася и ту́не возненави́деша мя, вопия́л еси́ псало́мски, Агафа́нгеле крепкоду́шне, сохрани́ ду́шу мою́ и изба́ви мя, я́ко Тебе́ ра́ди претерпе́х поноше́ние, и просла́влю си́лу Твою́, Человеколю́бче.
Припев: Священному́чениче Агафа́нгеле, моли́ Бо́га о нас.
Испове́дал еси́, о́тче Агафа́нгеле, Христа́ пред отсту́пники и гони́тели, му́жественне воспева́я: стра́ха ва́шего не убои́мся, ниже́ смути́мся, я́ко с на́ми Бог, Го́спода же Бо́га на́шего, Того́ освяти́м, и Той бу́дет нам в страх.
Сла́ва Отцу́ и Сы́ну и Свято́му Ду́ху:
И́мене Своего́ ра́ди в ско́рбех сохрани́ тя Христо́с Бог мы́шцею Свое́ю высо́кою, тебе́ взыва́ющу: я́ко а́ще не Госпо́дь бы был в нас, внегда́ воста́ти челове́ком на ны, у́бо живы́х поже́рли бы́ша нас. Ны́не же си́лу Его́ воспева́ем.
И ны́не и при́сно и во ве́ки веко́в. Ами́нь.
Богородичен: Добро́ту Иа́ковлю, кра́сную Тя, Всечи́стая, Еди́ну обре́т от ве́ка Пребезнача́льное Сло́во, и всели́вся в Тя, обнови́ челове́ческое естество́, Его́же моли́ от вся́кия мне изба́витися ско́рби.
Пе́снь 5
Ирмос: Я́ко Бо́га ино́го, Бла́же,/ па́че Тебе́, не зна́ем,/ к Тебе́, Све́ту Незаходи́мому, от но́щи у́тренююще,// воспева́ем Тя, Человеколю́бче.
Припев: Священному́чениче Агафа́нгеле, моли́ Бо́га о нас.
Отлуче́н быв те́лом, но не душе́ю, от па́ствы твоея́, испове́дниче Христо́в, по вся дни ту́ю в се́рдце свое́м носи́л еси́, после́дуя Го́споду Человеколю́бцу.
Припев: Священному́чениче Агафа́нгеле, моли́ Бо́га о нас.
Ку́ю изме́ну даст челове́к за ду́шу свою́? Сие́ сло́во Госпо́дне в се́рдце храня́, житие́ непоро́чное и испове́дание чи́стое Спаси́телю в дар прине́сл еси́.
Сла́ва Отцу́ и Сы́ну и Свято́му Ду́ху:
О вся́цей ско́рби Бог не оста́ви тебе́, да возмо́жеши су́щия в ско́рбех утеша́ти, и гоня́щия благословля́ти, сло́вом, житие́м, любо́вию о́браз ве́рным подава́я.
И ны́не и при́сно и во ве́ки веко́в. Ами́нь.
Богородичен: Напра́ви стопы́ моя́ к покая́нию, Путеводи́тельнице христиа́ном, Богоро́дице Чи́стая, я́ко да из тьмы грехо́вныя исхо́д обря́щу.
Пе́снь 6.
Ирмос: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиями,// я́ко от тли о́наго спаси́.
Припев: Священному́чениче Агафа́нгеле, моли́ Бо́га о нас.
Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиями,// я́ко от тли о́наго спаси́.
Припев: Священному́чениче Агафа́нгеле, моли́ Бо́га о нас.
А́ще блага́я прия́хом от руки́ Госпо́дни, зла́я ли не сте́рпим, взыва́л еси́, святи́телю, да сы́нове Бо́жии обрете́мся.
Сла́ва Отцу́ и Сы́ну и Свято́му Ду́ху:
Ты, Го́споди, нам прибе́жище и си́ла, в тесноте́ темни́чней вопия́л еси́, богому́дре, егда́ бо немощству́ем, тогда́ о Го́споде си́льни есмы́.
И ны́не и при́сно и во ве́ки веко́в. Ами́нь.
Богородичен: Освяти́ ум мой и просвети́ се́рдце мое́, Пресвята́я Ма́ти Бо́жия, и одержа́щих мя зол измени́, христиа́н Засту́пнице.
Конда́к, гла́с 4.
Исполня́я во пло́ти твое́й лише́ние скорбе́й/ за Те́ло Христо́во, е́же е́сть Це́рковь,/ стра́ждущим ча́дом Ея́ ми́лостию и смире́нием,/ препода́нием ми́ра и му́дростию послужи́л еси́,/ сего́ ра́ди на све́щнице архиере́йстем,/ я́ко свети́льник горя́й и светя́й, возсия́л еси́/ и мо́щи твоя́ гра́ду Яросла́влю/ во утвержде́ние дарова́л еси́,// святи́телю Агафа́нгеле, о́тче наш.
Икос:
К Це́ркви и земли́ Ру́сской любо́вию распала́яся, неве́рие и злове́рие со дерзнове́нием облича́л еси́, ча́да церко́вная повинова́тися и покаря́тися зако́нным па́стырем поуча́я. Те́мже, страда́ния по Христе́ во́лею на ра́мо взем, си́лу мучи́тельскую си́лою Христо́вою препобеди́л еси́. И ны́не во Ца́рствии Бо́жии весе́лие вкуша́я за ле́та, в ня́же ви́дяше зла́я, помина́й любо́вию чту́щих тя, святи́телю Агафа́нгеле, о́тче наш.
Пе́снь 7.
Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.
Припев: Священному́чениче Агафа́нгеле, моли́ Бо́га о нас.
Име́я щит ве́ры Христо́вы, стре́лы разжже́нныя мучи́телей отрази́л еси́, святи́телю, вопия́: а́ще бо па́ки возмо́жете и па́ки побежде́ни бу́дете, аз же благословлю́ Бо́га оте́ц на́ших.
Припев: Священному́чениче Агафа́нгеле, моли́ Бо́га о нас.
Со беззако́нными вмени́вся, на путь нечести́вых не ступи́л еси́ и, ненави́димь Го́спода ра́ди быв, любо́вию се́рдце утверди́л еси́, воспева́я Бо́гу оте́ц на́ших.
Сла́ва Отцу́ и Сы́ну и Свято́му Ду́ху:
Па́че си́лы гони́тельми отягоща́емь, ле́гкое и́го Христо́во подъя́л еси́, му́дре, и посреде́ мятежа́ и бра́ней земны́х поко́й обре́л еси́, воспева́я Бо́гу оте́ц на́ших.
И ны́не и при́сно и во ве́ки веко́в. Ами́нь.
Богородичен: А́гнца зря́щи непра́ведне на Дре́ве воздвиза́ема, Многопе́тая А́гница пла́чущи восклица́ше, ма́терски слезя́щи, и долготерпе́ние Того́ поя́ше.
Пе́снь 8.
Ирмос: Нече́стия орга́ны ину́ю песнь,/ благоче́стия же боговеща́ннии поя́ху гу́сли:// благослови́те, дела́ Госпо́дня, Христа́ во ве́ки.
Припев: Священному́чениче Агафа́нгеле, моли́ Бо́га о нас.
Си́лою мно́гою глаго́лы ве́чныя благовествова́л еси́, святи́телю: се, Го́споди, удаля́ющии себе́ от Тебе́ поги́бнут, лю́дие же ве́рнии испове́дятся Тебе́ во ве́ки.
Припев: Священному́чениче Агафа́нгеле, моли́ Бо́га о нас.
Си́лою мно́гою глаго́лы ве́чныя благовествова́л еси́, святи́телю: се, Го́споди, удаля́ющии себе́ от Тебе́ поги́бнут, лю́дие же ве́рнии испове́дятся Тебе́ во ве́ки.
Сла́ва Отцу́ и Сы́ну и Свято́му Ду́ху:
Напису́я ве́рным благочести́вно ра́зум Боже́ственный, Свята́го Ду́ха трость яви́лся еси́, Ему́же со Отце́м и Сы́ном испове́даешися во ве́ки.
И ны́не и при́сно и во ве́ки веко́в. Ами́нь.
Богородичен: Безсме́ртнаго Бо́га ро́ждшая, тече́ние сме́ртное укроти́ла еси́, те́мже умертви́, Чи́стая, стра́сти телесе́ моего́, да Тя сла́влю во ве́ки.
Песнь 9
Ирмос: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока Своего́,/ в ни́хже посети́ нас Восто́к с высоты́,// и напра́вил ны есть на путь ми́ра.
Припев: Священному́чениче Агафа́нгеле, моли́ Бо́га о нас.
У́зы твоя́ помина́ющия и любо́вию чту́щия па́мять твою́, ве́чных и нереши́мых уз изба́вити моли́ся Христу́, святи́телю Агафа́нгеле, я́ко хода́тай еси́ те́плый о ча́дех Це́ркве Ру́сския.
Припев: Священному́чениче Агафа́нгеле, моли́ Бо́га о нас.
Дар моли́твы терпе́нием в ско́рбех стяжа́в, о умире́нии Це́ркве Ру́сския по вся дни Бо́га умоля́л еси́, о́тче Агафа́нгеле. И ны́не благословя́щия о тебе́ Го́спода помяни́.
Сла́ва Отцу́ и Сы́ну и Свято́му Ду́ху:
Еди́наго Бо́га возлюби́в, свяще́нное служе́ние испове́данием запечатле́л еси́ и, я́ко клас зре́лый земли́ Ру́сския, в Небе́сных жи́тницах упоко́ился еси́, сла́вне Агафа́нгеле.
И ны́не и при́сно и во ве́ки веко́в. Ами́нь.
Богородичен: Тя ве́рою пою́щия просвети́, Всенепоро́чная, просвеще́нием Сы́на Бо́жия, из Твоея́ проше́дшаго утро́бы, и тьмы нас несвети́мыя изми́ Твои́м предста́тельством.
Свети́лен.
Предста́вил еси́ себе́ же́ртву жи́ву Бо́гови, свя́ту, благоуго́дну, в слове́снем служе́нии и испове́дании, святи́телю Агафа́нгеле, и та́ко просвети́ся свет твой на Святе́й Руси́, я́ко да сла́вит вы́ну о тебе́ Отца́ Небе́снаго.
Богородичен:
Свет от Све́та ми́ру ро́ждшая, Пречи́стая, све́тлости святы́х сподо́би лю́ди земли́ Ру́сския, Тебе́ почита́ющия и моле́бное пе́ние Тебе́ принося́щия: не забу́ди нас, рабо́в Твои́х, Еди́на Благослове́нная.
Молитва
О богому́дре святи́телю и испове́дниче Христо́в Агафа́нгеле, измла́да возжеле́вый служи́ти олтарю́ Госпо́дню! Ты, пе́рвее лю́ди сиби́рския и прибалти́йския в стране́ на́шей архипа́стырским служе́нием до́бре упра́вив, последи́ Яросла́встей па́стве дарова́н был еси́, во вре́мя же богобо́рческих гоне́ний заве́том первосвяти́теля Ти́хона попече́ние о Ру́сской Це́ркви прия́л еси́. Тогда́ свяще́нное испове́дание я́ко забра́ло восприи́м, уста́ богоху́льная дерзнове́нно загради́л еси́ и безпло́тныя враги́ посрами́л еси́, ча́да церко́вная поуча́я преда́ния святы́х оте́ц соблюда́ти, еди́нство святы́я ве́ры в сою́зе бра́тскаго ми́ра храни́ти и па́стырем зако́нным повинова́тися. Те́мже, заточе́ния, изгна́ние и мно́гая лише́ния за и́мя Христо́во претерпе́в, блаже́нства изгна́нных пра́вды ра́ди сподо́бился еси́ и ны́не с ли́ком новому́ченик и испове́дник Росси́йских Престо́лу Пренебе́сному предстои́ши. Те́мже моли́ Всеблага́го Бо́га, да сохрани́т Це́рковь Ру́сскую от ересе́й, раско́лов, нестрое́ний и гоне́ний, да возроди́тся земля́ на́ша святы́м покая́нием и да просла́вят ве́рнии лю́дие ея́ еди́ным се́рдцем и еди́ными усты́ Ди́внаго во святы́х Свои́х Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![священномученику Агафангелу, исповеднику, митрополиту Ярославскому священномученику Агафангелу, исповеднику, митрополиту Ярославскому](img_b/109.jpg)