12 октября.

Канон преподобному Кириаку Отшельнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Пусты́нный жи́тель, и в телеси́ Ангел, и чудотво́рец показа́лся еси́, богоно́се о́тче на́ш Кириа́че, посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющих к тебе́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Канон свята́го. Гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Преподобне отче Кириаче, моли́ Бо́га о нас.

Сла́ву боже́ственнаго ра́зума, Христе́, пода́ждь ми́ и благода́ть, преподо́бнаго досто́йно Кириа́ка воспе́ти, того́ моли́твами: Ты́ бо еси́ па́че сло́ва Сокро́вище му́дрых уче́ний.

Припев: Преподобне отче Кириаче, моли́ Бо́га о нас.

Пе́снь принося́щаго тебе́ ны́не, Кириа́че блаже́нне, благосе́рдно прии́м, боже́ственней причасти́тися мне́ Христа́ умоли́ лучи́ и светозаре́нию и су́що получи́ти спасе́ния.

Припев: Преподобне отче Кириаче, моли́ Бо́га о нас.

Си́лою Влады́чнею кре́пко утвержда́емь, Того́же стопа́м, о́тче, после́довав, нача́льники тмы́, Кириа́че всеблаже́нне, победи́л еси́, и к вы́шнему дости́гл еси́ поко́ю.

Сла́ва Отцу́ и Сы́ну и Свято́му Ду́ху:

Ра́вну показа́л еси́ на земли́ к безпло́тным ре́ть, все́ покори́в плотско́е мудрова́ние живоно́сному ду́ху, те́м в небе́сных ны́не лику́еши с ни́ми дво́рех, богоно́сне.

И ны́не и при́сно и во ве́ки веко́в. Ами́нь.

Богородичен: Пе́сньми Пречи́стую Мари́ю, ве́рнии, похва́лим, Богома́терь облагода́тствованную, покро́в боже́ственный, ти́хое приста́нище, все́х ве́рных спасе́ние.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Припев: Преподобне отче Кириаче, моли́ Бо́га о нас.

Непреста́нно ше́ствовав жи́зни стезю́, измла́да бо возлюби́л еси́ Творца́ твоего́, преподо́бне, Его́же жажда́я иска́л еси́, еле́ня подо́бяся тече́нию на исто́чники во́д.

Припев: Преподобне отче Кириаче, моли́ Бо́га о нас.

На серде́чней досце́ написа́ние твое́ прие́м, богоглаго́ливе, пе́рстом Ду́ха, я́ко одушевле́нная кни́га, де́йственно соблю́л еси́ Христо́вы живи́тельныя за́поведи.

Припев: Преподобне отче Кириаче, моли́ Бо́га о нас.

Удержа́в, преподо́бне, в посте́х чре́во, ла́комственная жела́ния и плотску́ю сла́дость ты́ умертви́л еси́, с чистото́ю, о́тче, пожи́в чре́з все́ житие́.

Сла́ва Отцу́ и Сы́ну и Свято́му Ду́ху:

Веселя́ся, разу́мный Тро́ице хра́м тебе́ сама́го сотвори́л еси́, у́м очища́я, и те́ло, и ду́х, треблаже́нне, и бы́л еси́ прия́телище Трисо́лнечнаго Све́та.

И ны́не и при́сно и во ве́ки веко́в. Ами́нь.

Богородичен: Де́ва родила́ еси́, Неискусобра́чная, и Де́ва пребыла́ еси́, Ма́ти безневе́стная, Богоро́дице Мари́е, Христа́ Бо́га на́шего моли́, спасти́ся на́м.

Конда́к, гла́с 8.

Яко побо́рника кре́пкаго и засту́пника чту́щи тя́ свяще́нная ла́вра всегда́, пра́зднует ле́тне па́мяти. Но, я́ко име́я дерзнове́ние ко Го́споду, от враго́в находя́щих соблюди́ ны, да зове́м: ра́дуйся, о́тче треблаже́нне.

Седа́лен, гла́с 5.

Воздержа́нием житие́ твое́ украси́л еси́, и у́ды умертви́в, победи́л еси́ вра́жия прило́ги, о́тче преподо́бне, и пусты́ни насе́льник, свети́льник же ми́ра у́мный, Кириа́че, яви́лся еси́. Те́м моли́ся Го́споду поми́ловати ду́ши на́ша.

Сла́ва, и ны́не, Богородичен:

Тя́ приста́нище, и сте́ну, и прибе́жище, и наде́жду, и покро́в, и предста́тельницу те́плую обре́тше, ве́рнии, к Тебе́ притека́ем, и вопие́м приле́жно, и взыва́ем ве́рно: поми́луй, Богоро́дице, на Тя́ упова́ющия и от прегреше́ний изба́ви.

КрестоБогородичен:

Кресто́м Сы́на Твоего́, Богора́дованная, и́дольская ле́сть вся упраздни́ся, и де́монская кре́пость попра́ся, сего́ ра́ди, ве́рнии, по до́лгу Тя́ всегда́ пое́м, и благослови́м, и Богоро́дицу и́стинно испове́дающе Тя́, велича́ем.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Кириаче, моли́ Бо́га о нас.

Ужасе́ся твоего́ со́лнце воздержа́ния и кре́пости, ле́ты мно́гими тя́ гне́вающася не возмо́же отню́д ви́дети, ниже́ во дни́ пи́щи прие́млюща, преподо́бне, благомо́щно песнопою́ща бде́нии непреста́нными: си́ле Твое́й сла́ва, Человеколю́бче.

Припев: Преподобне отче Кириаче, моли́ Бо́га о нас.

Зако́ны но́выми и ве́тхим заве́том, му́дре, ра́зумом, блаже́нне, святы́х муже́й поуча́яся, вся́кия доброде́тели ви́д навы́к, му́дрыя пчелы́ нра́ву ревну́я, и сосу́д бы́в избра́нен, вопия́л еси́: си́ле Твое́й сла́ва, Человеколю́бче.

Припев: Преподобне отче Кириаче, моли́ Бо́га о нас.

Бога́тство сла́дости, хвала́ и ра́дость преподо́бных еси́, Христе́ Бо́же, того́ ра́ди любя́й Тя́ Кириа́к вся́ в ми́ре уте́шная вмени́ уме́ты, те́м и в пусты́нях непроходи́мых любе́зне наслажда́шеся Твоея́ красоты́.

Припев: Преподобне отче Кириаче, моли́ Бо́га о нас.

Ве́м дре́вле Ме́ррския сладча́йшия во́ды проро́ка, зе́лий же го́рькую я́дь преложи́в ты́, Кириа́че, в сла́дкое вкуше́ние, дерзнове́ние показу́я я́ве ко Го́споду, и́стинно Своя́ рабы́ Боже́ственною си́лою сла́вящему.

Сла́ва Отцу́ и Сы́ну и Свято́му Ду́ху:

Яко учени́к и подража́тель Влады́ки Христа́, ра́бия лу́нствующася сы́на, о́тче, моли́твою исцеля́еши, благода́ть прие́м неду́ги отгоня́ти и де́монския полки́ низлага́ти о́бразом Боже́ственнаго Креста́.

И ны́не и при́сно и во ве́ки веко́в. Ами́нь.

Богородичен: Ты́ ве́рных хвала́ еси́, Безневе́стная, Ты́ предста́тельница, Ты́ и прибе́жище христиа́н, стена́ и приста́нище, к Сы́ну бо Твоему́ мольбы́ но́сиши, Всенепоро́чная, и от бе́д спаса́еши ве́рою и любо́вию Богоро́дицу Чи́стую Тя́ сла́вящия.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и к све́ту за́поведей Твои́х, пути́ моя́ напра́ви, молю́ся.

Припев: Преподобне отче Кириаче, моли́ Бо́га о нас.

От Христа́ прие́мь непобеди́мую благода́ть Ду́ха, низложи́л еси́ у́бо держа́вно лю́таго мироде́ржца, душе́вныя стра́сти удержа́в, Кириа́че, безстра́стия венце́м венча́лся еси́.

Припев: Преподобне отче Кириаче, моли́ Бо́га о нас.

Кре́пок яви́лся еси́, боле́зньми поще́ния терпе́в тве́рдо, до ста́рости пребы́в глубоча́йшия неосла́блен, преподо́бне, в пусты́нях, я́ко ца́рских дворо́в в черто́зех, со мно́гим весе́лием живя́.

Припев: Преподобне отче Кириаче, моли́ Бо́га о нас.

Всено́щная соверша́я, блаже́нне, бде́ния и к Бо́гу исходя́ не го́рдостно, моли́твою Невеще́ственному бесе́дуеши Уму́ и све́тлыя приима́л еси́, Кириа́че, све́та лучи́, светода́тельне умо́м просвеща́емь.

Сла́ва Отцу́ и Сы́ну и Свято́му Ду́ху:

Светоно́сия испо́лнився и проро́ческаго дарова́ния, преподо́бне, чи́стый тво́й язы́к провозвести́ му́чащаго дре́вле неду́га Ориге́нова, вредоу́мнаго и душетле́ннаго, отню́д соверше́нное истребле́ние.

И ны́не и при́сно и во ве́ки веко́в. Ами́нь.

Богородичен: Разу́мно уве́де проро́ков сосло́вие Твоя́ та́инства: небе́сную бо две́рь Влады́ка Тя́ показа́, Чи́стая, и из Тебе́, Де́во, воплоти́вся, пра́вды су́щим во тме́ возсия́ Со́лнце.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Кириаче, моли́ Бо́га о нас.

Бо́г положе́нием бы́в Христа́ обоже́нием, су́щаго естество́м Бо́га, есте́ственныя ра́ны неможе́ния исправля́л еси́, блаже́нне, неду́жныя исцеля́я, де́монствующияся а́бие леча́ боже́ственною благода́тию.

Припев: Преподобне отче Кириаче, моли́ Бо́га о нас.

Избежа́л еси́ к тебе́ приходя́щаго мно́жества наро́да и па́ки стра́шныя пото́ки пости́гл еси́, уклоня́яся, приснопа́мятне, тщи́х похва́л челове́ческих сла́виц.

Сла́ва Отцу́ и Сы́ну и Свято́му Ду́ху:

Яко сна́ тле́ннаго ми́ра всю́ сла́ву зря́, Еди́наго Живу́щаго Бо́га лу́чшия сла́вы возлюби́л еси́ прича́стник бы́ти, ея́же, му́дре, пра́ведно сподо́бился еси́.

И ны́не и при́сно и во ве́ки веко́в. Ами́нь.

Богородичен: Яко одушевле́нный киво́т, прия́ла еси́ Сло́во Безнача́льное, я́ко свято́е святи́лище, Созда́теля вмести́ла еси́, я́ко престо́л огнеобра́зный, но́сиши Влады́ку, Богома́ти, всея́ тва́ри.

Конда́к, гла́с 2.

Чистото́ю душе́вною боже́ственно вооружи́вся и непреста́нную моли́тву, я́ко копие́, вручи́в кре́пко, ссе́кл еси́ де́монская ополче́ния, Кириа́че, о́тче на́ш, моли́ся непреста́нно о все́х на́с.

Икос:

Ка́ко восхвалю́ окая́нный а́з твоя́ по́двиги, преподо́бне о́тче? Сле́з же ка́ко пучи́ну отры́гну? Ты́ бо, в житии́ преизя́ществуя, Ангельский пости́гл еси́ ли́к. Вся́ не́гли воздержа́нием стра́сти умертви́л еси́, му́дре, и пло́ть порабо́тив, покори́л еси́ сию́ ду́ху, моли́тву же име́я, я́ко ме́чь, тмы́ предста́теля низложи́л еси́, моли́ся непреста́нно о все́х на́с.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Кириаче, моли́ Бо́га о нас.

Зако́нов и слове́с богодохнове́нных наслади́ горта́нь поуче́нием па́че ме́да Тво́й ве́рнейший уго́дник: благослове́н еси́, Го́споди, песнопоя́, Бо́же, во ве́ки.

Припев: Преподобне отче Кириаче, моли́ Бо́га о нас.

Блаже́нне богоглаго́ливе, приво́диши пою́щия тя́ Христу́, очище́ны от ти́ны страсте́й моли́твами твои́ми, вопию́щия, Кириа́че, и глаго́лющия: благослове́н еси́, Го́споди Бо́же, во ве́ки.

Припев: Преподобне отче Кириаче, моли́ Бо́га о нас.

Льво́в избежа́в свере́пства, Дании́л просла́вися, слуги́ же те́х имя́ше повелева́я Кириа́к, зовы́й Тебе́: благослове́н еси́, Го́споди Бо́же, во ве́ки.

Припев: Преподобне отче Кириаче, моли́ Бо́га о нас.

Всю́ Ду́ха благода́ть всели́, Христе́, рачи́тель бо Твоея́ пречи́стыя добро́ты бы́сть, вседу́шно Кириа́к, зовя́й Тебе́: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Тро́ичен: Дея́нию приложи́в виде́ние, Триипоста́сное пропове́дал еси́ Существо́, во Отце́ и Сы́не и Ду́се, зовя́й, Кириа́че богоприя́тне: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Угаси́ пла́мень страсте́й мои́х и укроти́ ересе́й бу́рю, Богома́ти: Тя́ бо име́ем предста́тельницу христиа́не и побо́рницу, и Тя́ ве́рою воспева́ем во ве́ки.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Преподобне отче Кириаче, моли́ Бо́га о нас.

Тече́ньми сле́з напои́л еси́, блаже́нне, свяще́нную твою́ ду́шу умиле́нием боже́ственным, и многопло́дну показа́л еси́, поя́: благослови́те, вся́ дела́, Го́спода и превозноси́те Его́ во ве́ки.

Припев: Преподобне отче Кириаче, моли́ Бо́га о нас.

Фесви́тянин дре́вле су́шею пресуши́ ту́чныя ка́пли, ты́ же дождя́ проли́тие на во́зраст жа́твы низве́л еси́, всеблаже́нне, поя́: благослови́те, вся́ дела́, Го́спода и превозноси́те Его́ во ве́ки.

Припев: Преподобне отче Кириаче, моли́ Бо́га о нас.

Ты́ злосла́вных ле́сть обличи́л еси́, Ориге́на ученико́в бу́ияго и басносло́вца, до́блими по́двиги: благослови́те, поя́, правосла́вно Го́спода и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Тро́ичен: Тро́ицы Еди́но благоче́стно научи́л еси́, о́тче, Существо́, в тре́х со́лнцех я́ко еди́ну зарю́ же и све́тлость: благослови́те, глаго́ля, правосла́вно Го́спода и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Ада́ма, Де́во, па́дшаго яви́лася еси́ дщи́, Бо́жия же Ма́ти Обнови́вшаго мое́ существо́, Его́же пое́м, вся́ дела́, я́ко Го́спода и превозно́сим во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от Деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподобне отче Кириаче, моли́ Бо́га о нас.

Верте́п тя́, му́дре, прия́т, прие́мшаго исто́чник благода́тный, чудоде́йствовавша боже́ственнаго дре́вле отца́ Харито́на Моисе́йски, Кириа́че, и стена́ незы́бленна па́стве о́наго бы́л еси́ и храни́тель тверде́йший.

Припев: Преподобне отче Кириаче, моли́ Бо́га о нас.

Су́що раче́нием жи́зни кре́ст на ра́мена взе́м, житие́, Кириа́че, поуче́ние положи́л еси́ сме́рти, те́м и ны́не к нестаре́ющейся преста́вился еси́ сла́дости нетле́нней, небе́сным лико́м во све́те при Бо́зе сликовству́еши при́сно.

Припев: Преподобне отче Кириаче, моли́ Бо́га о нас.

Облиста́в заре́ю, разже́гся Ду́ха, и яви́лся еси́ превы́шним ликостоя́нием све́тел, но озари́ мо́й у́м, блаже́нне, разу́мным и трисия́нным све́том Божества́, моли́твами твои́ми и от страсте́й мя́ и прегреше́ний спаси́.

Сла́ва Отцу́ и Сы́ну и Свято́му Ду́ху:

Венча́вшеся победи́тельною диади́мою, Харито́не богоглаго́ливе и Кириа́че блаже́нне, и предстоя́ще в высоча́йших Христу́, па́ству свою́ оте́чески от бе́д избавля́юще, ны́не призира́йте пра́зднующую ва́ша па́мяти.

И ны́не и при́сно и во ве́ки веко́в. Ами́нь.

Богородичен: Напрязи́, и благопу́тствуй, и ца́рствуй, Сы́не Богома́тере, исма́ильтянина врага́ покаря́я, ра́тующаго ны́, моли́твами, мо́лимся, Ро́ждшия Тя́ неискусому́жно, я́ко Бо́г и Человеколю́бец.

Свети́лен.

Ду́шу очи́стив, преподо́бне, страсте́й омраче́ния зе́льным посто́м и моли́твою непреста́нною, зерца́ло, о́тче, бы́л еси́ боже́ственных осия́ний, возвожде́ния посыла́я на́м ны́не, свети́льниче мона́хов, Кириа́че богоно́се.

Сла́ва, и ны́не, Богородичен:

Истинно Богоро́дицу Тя́ испове́дуем, Влады́чице, Тобо́ю спа́сшиися, и́бо Бо́га неизрече́нно родила́ еси́, разруши́вшаго Кресто́м сме́рть, к Себе́ же привле́кши преподо́бных собо́ры, с ни́миже Тя́ восхваля́ем, Де́во.

Молитва

О свяще́нная главо́, преподо́бне о́тче, преблаже́нне а́вво Кириа́че, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.