Шрифт

11 октября.

Канон святому мученику благоверному князю Вячеславу Чешскому.

Святому мученику благоверному князю Вячеславу Чешскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Дне́сь Ангели с челове́ки ра́дуются вку́пе о́бщим весе́лием, не́бо и земля́ све́тло лику́ют в па́мять твою́, свя́те Вячесла́ве, и мы́, гре́шнии, приле́жно ти́ вопие́м: помоли́ся к Влады́це о на́с, изба́вити ны́ от напа́сти ви́димых и неви́димых вра́г, чту́щия пресве́тлую па́мять твою́.

Ин тропа́рь, гла́с то́йже:

Страны́ Че́шския кня́же преди́вный, правосла́вное насле́дие блаже́нныя Людми́лы умно́живый, о́бразе кро́тости и смире́ния, му́дрости и безстра́шия, ве́рность за́поведем Христо́вым в житии́ твое́м сохрани́вый, и́стинную ве́ру в окруже́нии язы́чества утвержда́я, те́мже и вене́ц сла́вы от Царя́ царе́й прия́л еси́, и ны́не правосла́вных ми́ра всего́ назида́еши, моли́, свя́те Вячесла́ве, Всеблага́го Бо́га умири́ти ми́р и спасти́ ду́ши на́ша.

Кано́н свята́го, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Благоверне княже Вячеславе, моли́ Бо́га о нас.

Лику́им дне́сь, ве́рнии, ра́достно, све́тлыми душа́ми пою́ще Спа́са на па́мять пречу́дную Христо́ва служи́теля Вячесла́ва.

Припев: Благоверне княже Вячеславе, моли́ Бо́га о нас.

Влады́чним Страсте́м сла́вне уподо́бился еси́, я́ко а́гня непоро́чно, без пра́вды убива́емь, те́м с ли́ки му́ченик, богоблаже́нне, ны́не весели́шися.

Припев: Благоверне княже Вячеславе, моли́ Бо́га о нас.

Сме́рть хода́таицу жи́зни прии́м, вся́ческим Влады́це ны́не в сла́ве предстои́ши, ея́же и на́м улучи́ти умоли́, свя́те, творя́щим твою́ па́мять пречу́дную.

Сла́ва Отцу́ и Сы́ну и Свято́му Ду́ху:

Кто́ испове́сть твоя́ чудеса́, сла́вне, я́же твори́ши в ми́ре без числа́? Вы́ну бо все́м ве́рным оби́льно дае́ши исцеле́ние.

И ны́не и при́сно и во ве́ки веко́в. Ами́нь.

Богородичен: Впа́дша мя́ в разбо́йники душегу́бными де́лы и сме́ртию потопле́на воздви́гни, молю́ Ти ся, Госпоже́: Сы́ну Своему́ и Бо́гу за мене́ помоли́ся.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Благоверне княже Вячеславе, моли́ Бо́га о нас.

Любо́вию Христо́вою при́сно разжиза́емь к це́ркви святе́й, та́мо, преблаже́нне, я́ко а́гнец незло́бив, непра́ведное претерпе́л еси́ убие́ние.

Припев: Благоверне княже Вячеславе, моли́ Бо́га о нас.

Кро́вию ти́ пресве́тлою Це́рковь твоя́ укра́шшися, све́тлы лучи́ испуща́ет чуде́с, пою́щи па́мять ти́, достосла́вне.

Сла́ва Отцу́ и Сы́ну и Свято́му Ду́ху:

Заря́ми Тро́ичными измла́да просве́щся, Христу́ насле́дник, свя́те, бы́сть, Его́же моли́ посла́ти ми́р душа́м на́шим.

И ны́не и при́сно и во ве́ки веко́в. Ами́нь.

Богородичен: Чу́до Бо́жия Рождества́ Ти, Чи́стая, вся́каго естества́ прехо́дит чи́н: Бо́га бо Пресу́щна зача́т во чре́ве и, ро́ждши, пребыва́еши Присноде́ва.

Ин конда́к, гла́с 3:

Кня́же, во́ине страны́ Боге́мии преди́вныя, смире́нным кня́жеским служе́нием спасе́ние стяжа́вый, у ца́рскаго престо́ла, свя́те Вячесла́ве, вене́ц сла́вы му́ченика за Христа́ прия́л еси́, и ны́не усе́рдно мо́лишися о ве́рных, Ду́хом Бо́жиим к ве́чному блаже́нству угото́ванных, страну́ Че́шскую храни́ти в Правосла́вии с любо́вию призыва́я, во е́же спасти́ся душа́м на́шим.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Благоверне княже Вячеславе, моли́ Бо́га о нас.

Благоде́тельно измла́да в ве́ре чи́сте воспита́н, чи́стыми свои́ми труды́ любо́вию Влады́це после́довал еси́, наде́ждею На́нь льсти́ваго врага́ посрами́в.

Припев: Благоверне княже Вячеславе, моли́ Бо́га о нас.

Све́тлостию сия́я, свя́те Вячесла́ве, грехи́ омраче́ны су́щия просвети́ твои́ми моли́твами, с ли́ки му́ченик имы́й дерзнове́ние за на́с моли́тися.

Сла́ва Отцу́ и Сы́ну и Свято́му Ду́ху:

Мечи́ ссека́емь, свя́те, непобеди́ме, врага́ лука́ваго мече́м терпе́ния ссе́кл еси́, те́м и вене́ц прия́т из руки́ Вседержи́теля.

И ны́не и при́сно и во ве́ки веко́в. Ами́нь.

Богородичен: Неизглаго́ланы и непостижи́мы, богоподо́бны вои́стину су́ть Твоего́, Богоро́дице, Рождества́ земны́м и небе́сным, Присноде́во, та́йны.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Благоверне княже Вячеславе, моли́ Бо́га о нас.

Твои́ми страстьми́, прехва́льне, неболе́зненную жи́знь восприя́в, свя́те Вячесла́ве, стра́ждущим все́м яви́ся заступле́ние, на по́мощь ве́рно тя́ зову́щим.

Припев: Благоверне княже Вячеславе, моли́ Бо́га о нас.

Па́че со́лнца, блаже́нне, просвети́л еси́ се́вера, и ю́га, и за́пада концы́ пресве́тлыми заря́ми чуде́с твои́х. Те́м на́с озари́, свя́те, па́мять твою́ пра́зднующих.

Сла́ва Отцу́ и Сы́ну и Свято́му Ду́ху:

Су́щим в беда́х помо́щник ты́ бы́сть, ни́щим кормле́ние, печа́льным уте́ха, те́м и по сме́рти, свя́те, вся́ избавля́еши ве́рно тя́ зову́щия на по́мощь.

И ны́не и при́сно и во ве́ки веко́в. Ами́нь.

Богородичен: Богоро́дицу Тя́ от души́ испове́дующия, Влады́чице ми́ру Блага́я, спаса́й, Тя́ бо заступле́ние, Непоро́чная, и́мамы, су́щую вои́стину Богоро́дицу.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Благоверне княже Вячеславе, моли́ Бо́га о нас.

Житие́ чи́сто поще́нием стяжа́в, Вячесла́ве преди́вне, и Ангелом сограждани́н яви́вся, с ни́миже моли́ о спасе́нии ду́ш на́ших.

Припев: Благоверне княже Вячеславе, моли́ Бо́га о нас.

Княже́ние земно́е оста́вил еси́ вре́менное и ца́рское украше́ние прия́т из десни́цы Влады́чни, тле́нными ве́чная, я́ко му́др, стяжа́в.

Сла́ва Отцу́ и Сы́ну и Свято́му Ду́ху:

Приими́ похвале́ние из окая́нных усте́н, свя́те, не могу́ща похвале́ния ти́ досто́йна исплести́ и моли́ Ми́лостиваго Бо́га дарова́ти на́м ве́лию ми́лость.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице, ро́ждшая земны́м Ко́рмчию и Го́спода, по́хотем ми́ злолю́тым устро́й смуще́ние и тишину́ пода́ждь се́рдцу моему́.

Конда́к, гла́с 1.

С ли́ки Ангельскими предстоя́, блаже́нне кня́же Вячесла́ве, наслажда́ешися Боже́ственныя и неизрече́нныя добро́ты, и, отту́ду благоде́тельныя да́ры поче́рп чуде́с, все́м притека́ющим ве́рою под твою́ святы́ню источа́еши цельба́м дарова́ние.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Благоверне княже Вячеславе, моли́ Бо́га о нас.

Ста́рый злоде́й зави́де свято́му твоему́ житию́ и науща́ет на убие́ние безу́мнаго ти́ собра́та. Ты́ же чи́стою со́вестию немо́лчно Творцу́ своему́ вопия́ше: благослове́н Бо́г оте́ц на́ших.

Припев: Благоверне княже Вячеславе, моли́ Бо́га о нас.

Ве́село лику́ет Пра́га дне́сь, пресла́вный ти́ гра́д, почита́я па́мять твою́, и, чудесы́ твои́ми озаря́я све́тло, вся́ страны́ созыва́ет вопи́ти: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Ле́стию прелука́ваго дре́вле очервле́на бы́сть земля́ твоя́ братоуби́йственною руко́ю; ны́не же, кро́вию ти́ окропи́вшися, благоуха́ния же́ртву Христо́ви приноша́ет, вопию́щи: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Тобо́ю на́м, Деви́це, Све́т возсия́, те́мным, Ты́ бо родила́ еси́ Зижди́теля все́м и Бо́га, у Него́же проси́, Пречи́стая, при́сно посыла́ти на́м, ве́рным, ве́лию ми́лость.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Благоверне княже Вячеславе, моли́ Бо́га о нас.

Весе́лия добро́тами на́с озаря́еши, пресла́вне, па́че со́лнца в земли́ Боге́мстей благода́тными заря́ми свы́ше освяще́н, превозноша́я Христа́ во ве́ки.

Припев: Благоверне княже Вячеславе, моли́ Бо́га о нас.

Те́ло твое́ свято́е, блаже́нне, прии́м, Пра́га дне́сь, прехва́льный ти́ гра́д, преди́вная чудеса́ ми́рови провозвеща́ет, превозноша́я Христа́ во ве́ки.

Сла́ва Отцу́ и Сы́ну и Свято́му Ду́ху:

Кро́тостию укра́шен, преди́вне, и ра́зумом благове́рия просве́щся, Тро́ицы Пресвяте́й яви́лся еси́ вои́стину пропове́дник, превозноша́я Христа́ во ве́ки.

И ны́не и при́сно и во ве́ки веко́в. Ами́нь.

Богородичен: От Све́та Светода́вца Словесе́ зача́т и неизрече́нно родила́ еси́ Пресу́щаго: Ду́х бо Бо́жий, Деви́це, в Тя́ всели́ся, те́м Тя́ пое́м, Чи́стая, во ве́ки вся́.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Благоверне княже Вячеславе, моли́ Бо́га о нас.

Ве́лия благода́ти сподо́бився, сла́вне, просвети́л еси́ всю́ вселе́нную, исцеле́ния все́м оби́льно подава́я.

Припев: Благоверне княже Вячеславе, моли́ Бо́га о нас.

Приими́, свя́те, ра́дость Ангельскую и, предстоя́ Зижди́телю своему́, о на́с помоли́ся, тебе́ велича́ющих.

Сла́ва Отцу́ и Сы́ну и Свято́му Ду́ху:

Прии́м ны́не блаже́нный поко́й, не преста́й моля́ся, пресла́вне, свята́го блаже́нства причасти́тися вы́ну тя́ велича́ющим.

И ны́не и при́сно и во ве́ки веко́в. Ами́нь.

Богородичен: Богоро́дице, ро́ждшая Сло́во па́че словесе́, Зижди́теля Своего́, Де́во, Того́ умоли́ спасти́ся душа́м на́шим.

Свети́лен.

От земли́ преступи́л еси́ ко Влады́це, преблаже́нне Вячесла́ве, прииди́ ны́не духо́вно и присети́ ми́лостию пою́щих дне́сь честно́е ти́ пра́зднество.

Молитва благоверному князю Вячеславу Чешскому

О, святы́й благове́рный кня́же му́чениче Вячесла́ве, избра́нный воево́до земли́ Че́шския и всех христиа́н слове́нских те́плый пред Бо́гом предста́телю! Днесь, в па́мять твою́ единоду́шно соше́дшеся в честне́м хра́ме сем и пред ико́ною твое́ю умиле́нно моля́щеся, си́це из глубины́ се́рдца на́шего к тебе́ взыва́ем: Ты в житии́ твое́м ревни́тель и защи́тник правосла́вныя ве́ры был еси́, и нас в ней те́плыми твои́ми к Бо́гу моли́твами непоколеби́мы утверди́. Ты вели́кое возложе́нное на тя служе́ние усе́рдно проходи́л еси́, и нас твое́ю по́мощию пребыва́ти коего́ждо, в не́мже призва́н есть, наста́ви. Ты супоста́тов полки́ от оте́чества твоего́ си́лою ра́тною и му́дростию управи́тельною отгна́л еси́, и на нас ополча́ющихся всех враго́в ви́димых и неви́димых низложи́. Ты в преде́лах страны́ своея́ пра́вду и мир и милосе́рдие насажда́ти потща́лся еси́, и нам от ми́лостиваго Бо́га в сих доброде́телех преуспе́яние испроси́. Ты безви́нную кровь твою́ а́ки А́вель от руки́ бра́та своего́ пред враты́ церко́вными пролия́л еси́, и нас, я́ко чад еди́ныя ма́тере Це́ркве, братолю́бию и кро́тости научи́. О, вели́кий и сла́вный кня́же Вячесла́ве, ра́ди вя́щшия сла́вы Небе́сныя вене́ц земна́го княже́ния оста́вивый и венце́м му́ченическим пра́ведно увенча́нный! Ны́не с му́дрою наста́вницею, прама́терию твое́ю Людми́лою, и все́ми святы́ми у Престо́ла Бо́жия предстоя́, не забу́ди нас си́рых и убо́гих, я́коже в животе́ твое́м никого́же от таковы́х оста́вил еси́. И предста́тельством твои́м житие́ ти́хое и безгре́шное и к ве́чному Ца́рствию ше́ствие устро́й нам, да просла́вим Бо́га, ди́внаго во святы́х Свои́х, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому мученику благоверному князю Вячеславу Чешскому