11 октября.

Канон преподобному исповеднику Харитону.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нныя, сия́я чудесы́, Харито́не, о́тче на́ш, моли́ Христа́ Бо́га спасти́ся душа́м на́шим.

Велича́ние:

Ублажа́ем тя́, преподо́бне о́тче Харито́не, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́м на небесе́х обре́л еси́ мзду́ трудо́в твои́х, де́монов погуби́л еси́ полки́, Ангелов пости́гл еси́ чи́ны, и́хже житию́ непоро́чно поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шим.

Кано́н свята́го. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Преподобне исповедниче Харитоне, моли́ Бо́га о нас.

Мо́ря стра́стнаго пучи́ну преплы́в, живоно́сным ору́жием Креста́ фарао́на лука́ваго мы́сленнаго, блаже́нне, боже́ственною си́лою потопи́л еси́.

Припев: Преподобне исповедниче Харитоне, моли́ Бо́га о нас.

Го́споду возложе́н, блаже́нне, от ма́терних пеле́н, пред мучи́тельским суди́щем Христа́ богому́дренно пропове́дал еси́, Моисе́йски бо низложи́л еси́ противобо́рных шата́ния.

Сла́ва Отцу́ и Сы́ну и Свято́му Ду́ху:

Пре́лести оста́вив Еги́пет, Харито́не преподо́бне, и пустынногра́жданин бы́в, чи́сто бесе́довал еси́ Чи́стому и прия́л еси́ небе́сное насле́дие.

И ны́не и при́сно и во ве́ки веко́в. Ами́нь.

Богородичен: Безсе́менно Отчею во́лею от Боже́ственнаго Ду́ха Бо́жия Ты́ зачала́ еси́ Сы́на и пло́тию родила́ еси́, из Отца́ безма́терня и на́с ра́ди из Тебе́ безо́тча.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Преподобне исповедниче Харитоне, моли́ Бо́га о нас.

Весели́тся о тебе́ ученико́в слове́сная па́ства твоя́ духо́вно, преподо́бне, твое́й обща́щися све́тлости.

Припев: Преподобне исповедниче Харитоне, моли́ Бо́га о нас.

Мудрова́ние плотско́е, я́ко вино́вное вражды́ на Бо́га, жи́зни Ду́ху, преподо́бне Харито́не, повину́л еси́.

Сла́ва Отцу́ и Сы́ну и Свято́му Ду́ху:

Низложи́л еси́ Дави́дски иноплеме́нника Голиа́фа, преподо́бне, мы́сленнаго си́лу всеору́жием Ду́ха.

И ны́не и при́сно и во ве́ки веко́в. Ами́нь.

Богородичен: Ты́ еди́на су́щим на земли́ па́че естества́ благи́х хода́таица, Ма́ти Бо́жия, была́ еси́. Те́м Тебе́, — ра́дуйся, — зове́м.

Седа́лен, гла́с 8.

Страда́ния боле́зньми искуси́вся, поще́ния страда́ньми утверди́вся, зла́та светле́йший благоче́стием облиста́л еси́ и чи́стое прия́телище бы́л еси́ Ду́ха: лука́вых духо́в тму́ разгна́л еси́. Те́м собра́в мона́шествующих мно́жества, па́стырь и́х бы́л еси́ и свети́льник светле́йший, Харито́не блаже́нне. Моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому защище́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Преподобне исповедниче Харитоне, моли́ Бо́га о нас.

Веселя́ся преподо́бный о Го́споде, я́ко победи́тель, вопия́ше на враги́ безпло́тныя: Бо́г мо́й — кре́пость моя́ и Госпо́дь.

Припев: Преподобне исповедниче Харитоне, моли́ Бо́га о нас.

Венча́ша тя́ благода́ти, Харито́не, страда́льческим венце́м Христо́ва Ца́рства: пре́лести бо пия́нство искорени́л еси́, блаже́нне.

Сла́ва Отцу́ и Сы́ну и Свято́му Ду́ху:

Муча́щия пре́жде сконча́ния твоего́, Харито́не, воздержа́ния боле́зньми сла́сти умертви́в, живоно́сною ме́ртвостию, преподо́бне, оде́ялся еси́.

И ны́не и при́сно и во ве́ки веко́в. Ами́нь.

Богородичен: Неизрече́нно Твое́ рождество́ показа́ся, Богороди́тельнице, еди́на Чи́стая и Благослове́нная: те́м Ти́ припа́дающе, — ра́дуйся, — взыва́ем.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Преподобне исповедниче Харитоне, моли́ Бо́га о нас.

Ты́, преподо́бне, Све́та нескве́рнено зерца́ло, Вы́шняго просвеще́ния, све́тло яви́лся еси́, Харито́не всеблаже́нне.

Припев: Преподобне исповедниче Харитоне, моли́ Бо́га о нас.

Ты́, преподо́бне, сугу́быми сия́еши благода́тьми, страда́ния бо ра́нами благоче́стно озари́лся еси́ и боле́зньми по́стничества.

Сла́ва Отцу́ и Сы́ну и Свято́му Ду́ху:

Ты́, преподо́бне, душа́м вра́чь яви́лся еси́, боже́ственныя от млады́х ногте́й взыска́в му́дрости, всеблаже́нне.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем, Тя́ держа́ву и наде́жду на́шего спасе́ния, Богоневе́сто, стяжа́хом.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподобне исповедниче Харитоне, моли́ Бо́га о нас.

Не песо́к, но Христа́ основа́ние положи́в, назда́л еси́, о́тче, доброде́тель, зла́та честне́йшую, и Тро́ицы Пресвяты́я до́м бы́л еси́.

Припев: Преподобне исповедниче Харитоне, моли́ Бо́га о нас.

Орга́н зло́бы зми́й зна́ется, но, твои́ми, богоно́се, угожде́нии, Харито́не, побежде́н, непра́ведныя от пра́веднаго про́мысла отмща́ет.

Сла́ва Отцу́ и Сы́ну и Свято́му Ду́ху:

Ничто́же тебе́ от Христо́вы любве́ отлучи́: ни ураня́емо те́ло, ни сме́ртный су́д претя́щий, во едине́нии Боже́ственнем наслажда́яся, блаже́нне.

И ны́не и при́сно и во ве́ки веко́в. Ами́нь.

Богородичен: О, чу́до, все́х чуде́с нове́е! Яко Де́ва во чре́ве вся́ческая Содержа́щаго сло́вом, неискусому́жно заче́нши, не те́сно вмести́.

Конда́к, гла́с 2.

Наслади́вся, богому́дре, воздержа́ния и пло́ти твоея́ вожделе́ния обузда́в, яви́лся еси́ ве́рою возраща́емь и, я́ко жи́зни дре́во посреде́ рая́, процве́л еси́, Харито́не всеблаже́нне свяще́ннейший.

Икос:

Отве́рзи моя́ уста́, преблаже́нне, благоприя́тными твои́ми моли́твами, предстоя́ Бо́гу, всесла́вне преподобному́чениче, да воспою́ боже́ственное твое́ житие́ и возглаго́лю досто́йно доброде́тели твоя́, я́же на земли́ те́плою любо́вию соверши́л еси́. Испове́дник бо бы́л еси́ крепча́йший, воздержа́ние же ве́рою испра́вил еси́, бде́ние и чистоту́ возлюби́в, Харито́не всеблаже́нне свяще́ннейший.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Преподобне исповедниче Харитоне, моли́ Бо́га о нас.

Иже в пещи́ авраа́мским подо́бяся ре́вностию благоче́стия, веле́ние мучи́тельско, богоно́сне, попра́л еси́: благослове́н еси́, зовы́й, Бо́же мо́й, Го́споди.

Припев: Преподобне исповедниче Харитоне, моли́ Бо́га о нас.

Яко в пещи́ искуше́ния разжже́ния боже́ственна, хладода́тельная с небесе́ благода́ть посети́ тебе́, преподо́бне: благослове́н еси́, зовы́й, Бо́же мо́й, Го́споди.

Сла́ва Отцу́ и Сы́ну и Свято́му Ду́ху:

Яко уя́звлен Тро́ическим Бо́жиим раче́нием, то́й равночи́сленныя огра́ды духо́вне пою́щия возложи́л еси́: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Преподобне исповедниче Харитоне, моли́ Бо́га о нас.

Пе́рси, разжига́емы огне́м непра́ведне, преподо́бне, ле́сть погаси́л еси́, са́м же неопали́мь пребы́л еси́, де́йством Свята́го Ду́ха и ко благоче́стию лю́ди пе́ти возста́вил еси́: благослови́те, вся́ дела́ Госпо́дня, Го́спода.

Припев: Преподобне исповедниче Харитоне, моли́ Бо́га о нас.

Во Христа́ обле́клся еси́ вои́стинну, дре́вняго челове́ка совле́кся и обличи́в, преподо́бне, тмы́ миродержи́теля ра́нами муче́ния, с весе́лием вопия́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Па́влов нело́жне, Харито́не, бы́в учени́к, того́ стопа́м после́довал еси́, преподо́бне, и наста́вник показа́лся еси́ мона́хом, все́м бы́в пра́вило доброде́тели вопию́щим: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ты́ еди́на во все́х роде́х, Де́во Чи́стая, яви́лася еси́ Ма́ти Бо́жия, Ты́ Божества́ была́ еси́ пребыва́лище, Всенепоро́чная, не опа́льшися огне́м непристу́пнаго Све́та. Те́м вси́ Тя́ благослови́м, Мари́е Богоневе́сто.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Преподобне исповедниче Харитоне, моли́ Бо́га о нас.

Ни гро́б, хода́тай забве́ния, покры́ти возмо́же твои́х, преподо́бне Харито́не, доброде́телей: твоя́ бо па́мять ве́чнующая со́лнечно возсия́, ю́же досто́йно велича́ем.

Припев: Преподобне исповедниче Харитоне, моли́ Бо́га о нас.

Прииди́те, ле́тнюю па́мять духо́вно соверша́юще, бра́тие, доброде́тельми подража́юще, богоно́сцу поревну́им и с ни́м возопии́м: Тя́ велича́ем, Трисвяты́й.

Сла́ва Отцу́ и Сы́ну и Свято́му Ду́ху:

Страстьми́ коле́блющияся и бу́рею грехо́вною, испове́дниче, погружа́емыя, ко Христу́ я́ко дерзнове́ние име́я, всегда́ сохраня́й, благоче́стно тя́ велича́ющия.

И ны́не и при́сно и во ве́ки веко́в. Ами́нь.

Богородичен: Ра́дуйся и весели́ся, Неве́сто Царя́ вели́каго, созерца́ющая све́тло Твоего́ Жениха́ красоту́, па́че зла́та сия́ющую и па́че со́лнца облиста́вшую.

Свети́лен.

Страда́нием у́бо пе́рвее до́бре искуси́вся, второ́е же посто́м тече́ние боже́ственное соверши́в, на небеса́ возше́л еси́ и Христу́ предстои́ши, Харито́не, о́тче преподо́бне, за ны́ моля́ся те́пле, пою́щия тя́.

Сла́ва, и ны́не, Богородичен:

Ра́дость неизрече́нную ро́ждши, Го́спода, ра́дости на́с небе́сныя прича́стники сотвори́, все́х Тебе́ почита́ющих вои́стинну, Пречи́стая, и от души́ вопию́щих Ти́: не забу́ди Твои́х рабо́в, Благослове́нная Мари́е.

Молитва преподобному Харитону Исповеднику

О, священная главо, преподобне отче, преблаженне авво Харитоне! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, недостойных, верою и любовию чтущих тя. Поминай нас у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших и испроси нам время на покаяние, да невозбранно прейдем от земли на небо, от мытарств же горьких, бесов, воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно, и во веки веков. Аминь.