10 октября.

Канон преподобному Савватию, начальнику пустыни Соловецкаго монастыря.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 3:

Удали́вся ми́ра и водвори́вся в пусты́ни, до́брым по́двигом подвиза́лся еси́, злострада́нием, и внима́нием, и моли́твами, отону́дуже и по сме́рти источа́еши исцеле́ния, Савва́тие, о́тче на́ш, моли́ Христа́ Бо́га, спасти́ся душа́м на́шим.

Стихи́ра, гла́с 6:

Иже на земли́ Ангела и на небеси́ челове́ка Бо́жия, мѵ́ра благово́ние, пи́щу благи́х доброде́телей, по́стников похвалу́, Савва́тия почти́м: насажде́н бо в дому́ Госпо́дни, и процвете́ пра́ведно, я́ко ке́др в пусты́ни, умно́жив ста́до Христо́во слове́сных ове́ц в преподо́бии и пра́вде.

Кано́н преподо́бнаго, гла́с 2.

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Савватие, моли́ Бо́га о нас.

Просвеще́нием Трисо́лнечнаго Божества́ озари́вся, преподо́бне, свети́льник сия́я яви́лся еси́, просвеща́я ве́рно светоно́сную твою́ па́мять чту́щия.

Припев: Преподобне отче Савватие, моли́ Бо́га о нас.

Со́весть име́л еси́ бла́гу и о́ко серде́чное взира́ющее к Бо́гу, те́мже и Христо́с вня́т моли́тве твое́й, му́дре, и с преподо́бными сочта́ тя.

Сла́ва Отцу́ и Сы́ну и Свято́му Ду́ху:

Ве́сь Тро́ицы бы́л еси́ жили́ще и та́мо душе́вное возложи́л еси́ жела́ние, преподо́бне, сего́ ра́ди ве́чную па́мять восприя́л еси́ и жи́знь неконча́емую.

И ны́не и при́сно и во ве́ки веко́в. Ами́нь.

Богородичен: Пло́тию ро́ждши Безпло́тнаго, Богоро́дице Чи́стая, стра́сти лю́тыя утоли́ ума́ моего́, Де́во, и испра́ви мя́, Ма́ти Бо́жия, заблу́ждшаго, я́ко да сла́влю Тя́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Преподобне отче Савватие, моли́ Бо́га о нас.

Напо́лнив се́рдце твое́ сле́зными пото́ки, преподо́бне Савва́тие, плоды́ вся́ких доброде́телей износя́щее, чуде́с показа́нием, преблаже́нне.

Припев: Преподобне отче Савватие, моли́ Бо́га о нас.

Высото́ю смире́ния украша́емый, преподо́бне, низве́ргл еси́ на зе́млю велехва́льнаго, Савва́тие, о́тче преблаже́нне, изря́дными де́лы твои́ми, посто́м и моли́твами.

Сла́ва Отцу́ и Сы́ну и Свято́му Ду́ху:

Исцеле́ния безчи́сленная источа́ет гро́б тво́й, преблаже́нне о́тче, и отго́нит боле́зни челове́ческия, и душе́вныя врачу́ет стра́сти, похваля́ющих труды́ твоя́, всече́стне.

И ны́не и при́сно и во ве́ки веко́в. Ами́нь.

Богородичен: Из ложе́сн Твои́х возсия́ пресла́вно Вели́кое Со́лнце — Христо́с Бо́г, Богоро́дице Де́во, вся́ земны́я концы́ просвети́в, и преподо́бных ли́к че́стно прия́т.

Седа́лен, гла́с 4:

Жите́йское мо́ре воздержа́нием без труда́ преплы́в, ко приста́нищу ти́хому безстра́стия, ра́дуяся, приста́л еси́, преподо́бне о́тче Савва́тие, богому́дре и преблаже́нне.

Сла́ва, и ны́не, Богородичен:

Де́вство и рождество́, вы́ше естества́, в Тебе́, Богоро́дице, совокупи́ся, я́ко все́х Соде́теля и Бо́га воплоти́вшагося породила́ еси́, Спа́са ду́ш на́ших.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м, Го́споди, вопло́щся, и спа́сл еси́ всего́ мя, челове́ка. Те́м зову́ Ти: сла́ва си́ле Твое́й, Го́споди.

Припев: Преподобне отче Савватие, моли́ Бо́га о нас.

Зе́млю до́льнюю премину́в, небе́сную стяжа́л еси́ жи́знь, и со безпло́тными ли́ки смеси́лся еси́, преподо́бне Савва́тие, соде́лав ду́шу твою́ хра́м Ду́ха Свята́го, и кро́тких зе́млю насле́довал еси́.

Припев: Преподобне отче Савватие, моли́ Бо́га о нас.

Яко Христо́во смире́ние возлюби́в, преподо́бне Савва́тие, стяжа́л еси́ безстра́стие, смири́в же всю́ де́монскую горды́ню, блаже́нне, низложи́в, низве́ргл еси́.

Сла́ва Отцу́ и Сы́ну и Свято́му Ду́ху:

Возсия́, я́ко со́лнце от восто́ка, чуде́с луча́ми и Ангельскому житию́ поревнова́в, непреста́нными моли́твами, преподо́бне, просвети́л еси́ всю́ подсо́лнечную.

И ны́не и при́сно и во ве́ки веко́в. Ами́нь.

Богородичен: Блажи́т Тя́, Пресвята́я Богоро́дице, вся́к во́зраст и вся́ка душа́ ве́рных, Бо́жие бо Сло́во па́че ума́ и сло́ва родила́ еси́, Препе́тая.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Савватие, моли́ Бо́га о нас.

Возсия́ тебе́ Госпо́дь от Де́вы, Его́же возжеле́л еси́, преподо́бне Савва́тие, жили́ще име́ющу в морско́м о́строве любве́ ра́ди Его́, и ны́не Того́ сла́вы наслажда́ешися непреста́нно.

Припев: Преподобне отче Савватие, моли́ Бо́га о нас.

Еди́ной Христо́ве любви́, преподо́бне Савва́тие, приложи́вся и все́ю душе́ю потща́вся испо́лнитель Бо́жиих за́поведей бы́ти, и мно́гих чуде́с, преподо́бне, прия́л еси́ благода́ть.

Сла́ва Отцу́ и Сы́ну и Свято́му Ду́ху:

Незло́бив и кро́ток бы́в, вся́ зло́бы вра́жия погуби́л еси́, и ми́лостив до конца́ я́влься, ми́лость душе́вную стяжа́л еси́ от Еди́наго Бо́га, и благода́ть и ми́лость прия́л еси́ и́стинную.

И ны́не и при́сно и во ве́ки веко́в. Ами́нь.

Богородичен: Воспо́йте Го́сподеви, вся́ земля́, по́йте вси́ яви́вшемуся из чре́ва Де́вы неизрече́нно и Сию́ ве́рным показа́вшаго тве́рдую наде́жду и похвалу́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподобне отче Савватие, моли́ Бо́га о нас.

Си́лою Христо́вою укрепля́емь, преподо́бне Савва́тие, вся́ кова́рствия лука́ваго низве́ргл еси́, и ны́не безстра́стия умо́м очище́нным, предстои́ши Бо́гу Вседержи́телю, на Него́же все́ жела́ние возложи́л еси́.

Припев: Преподобне отче Савватие, моли́ Бо́га о нас.

Твоя́, всеблаже́нне Савва́тие, преподо́бныя мо́щи, во гро́бе лежа́ще, неду́ги врачу́ют, де́монския же полки́ отгоня́ют всегда́, от души́ приходя́щих с ве́рою.

Сла́ва Отцу́ и Сы́ну и Свято́му Ду́ху:

Боже́ственных повеле́ний, о́тче, нра́вы стяжа́в, кро́тость, и безмо́лвие, и смире́ние, сего́ ра́ди от Благоде́теля Бо́га бога́тно дарова́ние прия́л еси́, исцеле́ния да́р тре́бующим да́руеши.

И ны́не и при́сно и во ве́ки веко́в. Ами́нь.

Богородичен: Душе́вныя моя́ стра́сти, Пречи́стая, исцели́, Яже безстра́стия бы́вши исто́чник, просвети́вшая преподо́бных ли́ки Рождество́м Твои́м.

Конда́к, гла́с 2:

Жите́йския молвы́ отбе́г, всели́лся еси́ в морски́й о́стров, му́дре, и кре́ст тво́й взе́м, Христу́ после́довал еси́, в моли́твах, и во бде́ниих, и в поще́ниих, злострада́ньми пло́ть твою́ изнуря́я: те́м бы́л еси́ преподо́бных удобре́ние. Сего́ ра́ди любо́вию па́мять твою́ пра́зднуем, преподо́бне Савва́тие, моли́ Христа́ Бо́га непреста́нно о все́х на́с.

Икос:

Ка́ко возмогу́ твоя́ премно́гая чудеса́, о́тче, изрещи́, или́ труды́ твоя́ и злострада́ния, и́миже потруди́лся еси́, преподо́бне Савва́тие, а́ще не ты́, свя́те, пода́си ми́ сло́во, недосто́йному рабу́ твоему́? Ты́ бо еси́ мона́хов похвала́ и утвержде́ние, с ни́миже Христа́ Бо́га моли́ непреста́нно о все́х на́с.

Пе́снь 7.

Ирмос: Образу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Припев: Преподобне отче Савватие, моли́ Бо́га о нас.

Все́х теку́щих, привре́менных страсте́й, преподо́бне Савва́тие, сподо́бился еси́ убежа́ти, всю́ наде́жду стяжа́в к Бо́гу, Его́же ра́ди де́йствуеши, блаже́нне, пресла́вная чудеса́, поя́: отце́в на́ших Бо́же, благослове́н еси́.

Припев: Преподобне отче Савватие, моли́ Бо́га о нас.

Ору́жием моли́тв твои́х лука́выя победи́в полки́, с небесе́ благода́ть прия́л еси́ цели́ти неду́ги и прогоня́ти де́моны от взыва́ющих ве́рою: благослове́н Бо́г отце́в на́ших.

Сла́ва Отцу́ и Сы́ну и Свято́му Ду́ху:

Пло́ть твою́ повину́в ду́ху, о́тче преподо́бне Савва́тие, в воздержа́нии вся́цем пожи́л еси́, в труде́х и бде́ниих, прехва́льне, име́я чи́сту со́весть, житие́ небе́сное, воспева́я: благослове́н Бо́г отце́в на́ших.

И ны́не и при́сно и во ве́ки веко́в. Ами́нь.

Богородичен: Ору́жие, Чи́стая Де́во, храня́щее пре́жде врата́ Еде́мская, плещи́ все́м дае́т, низложи́вшим по́стнически бори́теля врага́ и при́сно взыва́ющим: отце́в на́ших Бо́же, благослове́н еси́.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Преподобне отче Савватие, моли́ Бо́га о нас.

Мы́слию очище́нною, преподо́бне Савва́тие, к Бо́гу приближа́яся и все́м вся́к бы́в, да Христа́ приобря́щеши, моли́ спасти́ вся́ пою́щия тя́, преподо́бне о́тче.

Припев: Преподобне отче Савватие, моли́ Бо́га о нас.

Сле́з твои́х ка́пли погаси́ша о́гнь грехо́вный, реку́ же чуде́с показа́л еси́ все́м на́м, вся́кия стра́сти потопля́ющу, притека́ющих к тебе́, о́тче прехва́льне.

Сла́ва Отцу́ и Сы́ну и Свято́му Ду́ху:

Ве́ру и наде́жду неразори́му и любо́вь и́стинную име́л еси́, о́тче, и боже́ственное прираде́ние, терпе́ние бла́го и поуче́ние духо́вных слове́с, смиренному́дрие и соверше́нное беззло́бие.

И ны́не и при́сно и во ве́ки веко́в. Ами́нь.

Богородичен: Спаси́ мя, Ма́ти Бо́жия, спасе́ния нача́ло ми́ра я́вльшися, избавля́ющи мя́ молвы́, и нечи́стых страсте́й, и вся́кия проти́вныя ско́рби, да Тя́ сла́влю во вся́ ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Припев: Преподобне отче Савватие, моли́ Бо́га о нас.

Процве́л еси́ в по́двизех по́стнических, прехва́льне о́тче на́ш Савва́тие, я́ко шипо́к благово́нен, и я́коже кри́н, объюха́л еси́ со́вести ве́рных доброде́тельми и чудесы́. Те́мже, преподо́бне, отжени́ от на́с стра́сти смердя́щия.

Припев: Преподобне отче Савватие, моли́ Бо́га о нас.

Отве́рзеся тебе́, о́тче, небе́сное Ца́рствие, сконча́вшему до́брое тече́ние, и ви́диши, я́же Ангели ви́дят, и трудо́в воздая́ние тебе́ подае́т по́чести Христо́с, честву́я тя́, Своего́ уго́дника. Те́мже тя́, преподо́бне, ублажа́ем.

Сла́ва Отцу́ и Сы́ну и Свято́му Ду́ху:

Сле́з твои́х проли́тием о́гнь грехо́вный погаси́л еси́, Бо́гу угоди́в, Савва́тие преподо́бне, сокруши́л еси́ де́монов ко́зни. Те́мже, предстоя́ще ра́це моще́й твои́х, ве́рно ублажа́ем тя́, досточу́дне.

И ны́не и при́сно и во ве́ки веко́в. Ами́нь.

Богородичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростию Твое́ю обличи́ мене́: мо́лит Тя́, Христе́, ро́ждшая Тя́ Де́ва, и Ангельстии чи́ни, и преподо́бных собо́ри.

Свети́лен:

Святы́ни хра́м бы́л еси́, блаже́нне, по боже́ственному прича́стию, ра́йский граждани́н, в не́мже напитава́ешися невозбра́нно дре́ва разу́мнаго и нетле́нныя сла́вы, па́мять творя́, Савва́тие, о́тче богому́дре, ве́рно хва́лящих тя́.

Сла́ва, и ны́не, Богородичен:

Ра́дуйся, ве́рных похвало́; ра́дуйся, преподо́бных утвержде́ние; ра́дуйся, правосла́вных сла́во; ра́дуйся, све́т су́щих во тме́; ра́дуйся, хра́ме пресвяты́й; ра́дуйся, Бо́жий раю́, кля́твы разреше́ние, Благослове́нная Мари́е.

Молитва преподобному Савватию Соловецкому

О, преподо́бне о́тче, уго́дниче Христо́в Савва́тие, все́ю душе́ю Го́спода возлюби́вый и удали́выйся в пусты́ню сию́ и тече́ние по́двига спаси́тельнаго соверши́вый. О ве́рный ра́бе Царя́ Небе́снаго, учи́телю доброде́телей, о́браз смире́ния, граждани́не пусты́нный, А́нгелом собесе́дниче, Херуви́ме земны́й, челове́че Небе́сный. О све́те немра́чный ото́ка Солове́цкаго, па́че же ве́лие свети́ло всея́ Це́ркви правове́рных. Молю́ся ти, пречестны́й, аз, многогре́шный (Имена): услы́ши убо́гое мое́ моле́ние, раба́ твоего́, вонми́ глаго́лам нечи́стых усте́н мои́х, твоея́ ны́не по́мощи тре́бующаго. Се бо враг прелука́вый на вся́ко вре́мя тщи́тся мя погуби́ти, иски́й го́рько поглоти́ти ду́шу мою́ и несть мне спасе́ния, иде́же по́мощь прия́ти, зане́ не́мощию пло́ти моея́ обложе́н есмь и страстьми́ весь до́лу преклони́хся, не и́мам к Бо́гу дерзнове́ния. Ны́не же то́чию к твоему́ поверга́ю себе́ заступле́нию: поми́луй мя, омраче́ннаго все́ми злы́ми де́лы, воздежи́ о мне всечестне́и твои́ ру́це ко Го́споду, о моли́твенниче те́плый, Савва́тие преподо́бне. Да за благоутро́бие щедро́т Свои́х пода́ст ми грехо́в оставле́ние и в день Су́дный изба́вит мя ве́чнаго муче́ния и Ца́рствию Своему́ сподо́бит благода́тию Свое́ю, Ему́же бу́ди всегда́ сла́ва, честь и поклоне́ние во ве́ки. Ами́нь.

Молитва преподобным Зосиме и Савватию Соловецким

О, преподо́бнии и Богоно́снии отцы́ на́ши Зоси́мо и Савва́тие, земни́и а́нгели и Небе́снии челове́цы, бли́жнии дру́зи Христо́вы и уго́дницы Бо́жии, оби́тели ва́шея сла́во и украше́ние, всея́ же се́верныя страны́, па́че и всего́ Правосла́внаго оте́четва на́шего необори́мая стено́ и вели́кое заступле́ние! Се мы, недосто́йнии и многогре́шнии, с благогове́йною любо́вию ко святы́м моще́м ва́шим припа́дающе, ду́хом сокруше́нным и смире́нным приле́жно мо́лим вас: моли́те непреста́нно благосе́рдаго Влады́ку и Го́спода на́шего Иису́са Христа́, я́ко дерзнове́ние ве́лие к Тому́ иму́щии, да не отсту́пит от нас Его́ вседе́йствующая благода́ть, покро́в же и заступле́ние Пресвяты́я Влады́чицы на́шея Богоро́дицы на ме́сте сем да пребу́дет, и да не оскуде́ют никогда́же и́стиннии ревни́тели а́нгельскаго жития́ во святе́й оби́тели сей, иде́же вы, богоно́снии отцы́ и нача́льницы, безме́рными труды́ и поще́ньми, то́ки же сле́зными и всено́щными бде́нии, непреста́нными моли́твами и моле́ньми нача́ло и́ноческому житию́ положи́сте. Ей, уго́дницы святи́и, моли́твенницы к Бо́гу благоприя́тнейшии, те́плыми ва́шими к Нему́ мольба́ми огради́те и сохрани́те ны и свято́е селе́ние сие́ ва́ше от тру́са, пото́па, огня́ и меча́, наше́ствия иноплеме́нных и смертоно́сныя я́звы, от вражды́ и вся́ких нестрое́ний, от вся́кия беды́ и ско́рби и от вся́каго зла: да непреста́нно на ме́сте сем, в ми́ре и безмо́лвии, благоче́стно сла́вится пресвято́е и́мя Го́спода и Бо́га, и обрета́ют ве́чное спасе́ние и́щущие Его́. О, преблаже́ннии отцы́ на́ши, Зоси́мо и Савва́тие! Услы́шите ны гре́шныя, во святе́й оби́тели ва́шей и под кро́вом ва́шего защище́ния недосто́йно жи́тельствующыя, и благомо́щными ва́шими к Бо́гу хода́тайствы испроси́те душа́м на́шым грехо́в оставле́ние, жития́ исправле́ние и ве́чных благ восприя́тие в Небе́снем Ца́рствии: всем же ве́рующим, и́же на вся́ком ме́сте и во вся́кой ну́жде призыва́ют вас в по́мощь и заступле́ние, и и́же с благогове́йною любо́вию во оби́тель ва́шу притека́ют, не преста́ните излива́ти вся́кую благода́ть и ми́лость, сохраня́юще их от вся́кия сопроти́вныя си́лы, от вся́кия напа́сти и от вся́каго зла́го обстоя́ния, и подаю́ще им вся потре́бная к душе́вней и теле́сней по́льзе. Наипа́че же моли́те премилосе́рдаго Бо́га, да утверди́т и укрепи́т Це́рковь Свою́ святу́ю и все на́ше Правосла́вное оте́чество в ми́ре и тишине́, в любви́ и единомы́слии, в правове́рии и благоче́стии да сохрани́т и соблюде́т во ве́ки веко́в. Ами́нь.