10 октября.

Канон cвященномученику Петру, митрополиту Крутицкому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Бо́жиим смотре́нием к святи́тельскому служе́нию/ святы́м Патриа́рхом Ти́хоном призва́нный,/ ста́ду Христо́ву яви́лся еси́ страж неусы́пный/ и защи́тник небоя́зненный,/ священному́чениче Пе́тре./ Жесто́кая заточе́ния и да́льная изгна́ния,/ страда́ния и смерть от богобо́рцев претерпе́л еси́./ Вене́ц му́ченический прие́м,/ на Небеси́ ны́не ра́дуешися./ Моли́ Ми́лостиваго Бо́га,/ да сохрани́т Це́рковь на́шу от нестрое́ний,/ единомы́слие и мир лю́дем Свои́м да́рует// и спасе́т ду́ши на́ша.

Кано́н, гла́с 6.

Пе́снь 1.

Ирмос: Ка́зньми во Еги́пте/ Моисе́й фарао́на обличи́/ и, тому́ невразумле́ну,/ морску́ю пучи́ну разве́рзе жезло́м свои́м/ вла́стию, Бо́гом да́нною./ Изра́иль же, гони́теля ви́дев поги́бель,/ песнь Изба́вителю вопия́ше:// сла́вно бо просла́вися.

Припев: Священному́чениче Пе́тре, моли́ Бо́га о нас.

Вождь пресла́вный лю́дем ве́рным быв, святи́телю Пе́тре, я́коже Моисе́й, шата́ния и мяте́жи претерпе́л еси́, и пусты́нная скита́ния с наро́дом раздели́л еси́. Ны́не сла́ву Бо́жию я́ве зри́ши, и за ны Го́споду мо́лишися.

Припев: Священному́чениче Пе́тре, моли́ Бо́га о нас.

И́мя Илиино́ бысть еди́но упова́ние седми́ ты́сящ во Изра́или, та́кожде и лю́дие земли́ на́шея, тя жи́ва ве́дуще, о́тче Пе́тре, пра́выя ве́ры не отступа́ху. Мы же ве́мы тя на Небесе́х живу́ща и о нас моля́щася.

Сла́ва Отцу́ и Сы́ну и Свято́му Ду́ху:

Первоверхо́вному апо́столу тезоимени́т быв, святи́телю Пе́тре, того́ ве́ру стяжа́л еси́, и Иоа́нну в любви́ подража́л еси́, Иа́ковлеву же ре́вность име́я, я́ко Па́вел к па́стве взыва́л еси́: подража́йте мне, я́коже аз Христу́.

И ны́не и при́сно и во ве́ки веко́в. Ами́нь.

Богородичен: Проро́чески предвозвеще́нная, Де́во, апо́столом Бо́жия Ма́ти яви́лася еси́, святи́телем же боже́ственная Помо́щница, и всем христиа́ном непосты́дная Предста́тельница.

Пе́снь 3.

Ирмос: Лук си́льных изнемо́же,/ му́чеников же не преста́ше песнь:/ несть свят я́ко Госпо́дь,// Той су́дит конце́м земли́.

Припев: Священному́чениче Пе́тре, моли́ Бо́га о нас.

Все упова́ние на Бо́га возложи́в, во искуше́ниих сме́ртных не уныва́л еси́, священному́чениче Пе́тре, глаго́ля: а́ще и страда́ния претерпева́ю, но вем, я́ко Госпо́дь мя не оста́вит, да́руя души́ мое́й мир. Те́мже ны́не и нас в моли́твах твои́х не оста́ви.

Припев: Священному́чениче Пе́тре, моли́ Бо́га о нас.

Ве́рный сын Це́ркве Ру́сския яви́лся еси́, святи́телю Пе́тре, те́мже, во у́зах сый, ве́рныя лю́ди науча́л еси́: послу́шная ча́да преда́ний церко́вных бу́дите, и противля́йтеся преда́телем и раско́льником, нововведе́ния льсти́вая умы́слившим.

Сла́ва Отцу́ и Сы́ну и Свято́му Ду́ху:

Во вся́цем де́ле Бо́га пред собо́ю зря, па́че первосвяти́тельскаго до́лга вели́чие разумева́я, Це́ркви страж неусы́пный и защи́тник тве́рдый ста́ду Христо́ву яви́лся еси́, священному́чениче Пе́тре добропобе́дный.

И ны́не и при́сно и во ве́ки веко́в. Ами́нь.

Богородичен: Рождество́ Твое́, Богоро́дице, чу́дно яви́ся, о́трочество во свята́я святы́х сокры́то есть, чистота́ же и боже́ственное избра́ние непостижи́мы, Еди́на Тро́ическаго сове́та Таи́ннице.

Ин конда́к, глас 4:

Дух ми́рен и кро́ток стяжа́в,/ тве́рдое упова́ние на милосе́рдие Бо́жие име́я,/ блюсти́тель ве́рный Це́ркве Росси́йския/ и испове́дник Христо́в яви́лся еси́,/ священному́чениче Пе́тре,/ при́сный о нас пред Бо́гом предста́телю// и моли́твенниче о душа́х на́ших.

Седа́лен, глас 6:

Чиста́ есть со́весть моя́, и сме́рти ника́коже страшу́ся, рекл еси́, о́тче Пе́тре, те́мже служе́ния, мне вве́реннаго, не оставля́ю, отсту́пники же, преда́ния церко́вная отверга́ющия и нововведе́ния льсти́вая умы́слившия, осужда́ю, грех бо расколоучи́тельства благоче́стием не покрыва́ется, ниже́ му́ченическою кро́вию омыва́ется. Вы же, бра́тие, бе́гайте творя́щих разделе́ния и собла́зны, и Бог ми́ра сокруши́т сатану́ под нога́ми ва́шими.

Сла́ва, и ны́не, Богородичен:

Еди́на пло́тию Бо́га ро́ждшая, мо́лимся Ти, Чи́стая: изба́ви сете́й вра́жиих ду́ши на́ша и утверди́ на ка́мени Боже́ственных за́поведей, я́ко на Тя упова́ние возложи́хом.

Пе́снь 4.

Ирмос: О, та́инство смотре́ния Бо́жия/ и ле́то посеще́ния Госпо́дня,/ освяще́ние кровьми́ на́шея земли́,/ утвержде́ние Це́ркве!/ Во гла́де, огни́, прока́зе и бра́ни/ изше́л еси́ на спасе́ние люде́й Твои́х,// сла́ва си́ле Твое́й, Го́споди.

Припев: Священному́чениче Пе́тре, моли́ Бо́га о нас.

Бо́жий глас, призыва́яй тя к святи́тельскому служе́нию, чрез Патриа́рха Ти́хона уразуме́л еси́, те́мже, му́жеством вооружи́вся и сме́рти не убоя́вся, ве́рный служи́тель Госпо́день яви́лся еси́ и му́ченическую кончи́ну за Христа́ прия́л еси́.

Припев: Священному́чениче Пе́тре, моли́ Бо́га о нас.

Глаго́лы первосвяти́теля Ти́хона на тебе́ я́ве испо́лнишася, священному́чениче Пе́тре, ты бо святи́тельство во изгна́ниих и в безлю́дных пусты́нех провожда́л еси́, темни́ца тебе́ и́ноческая ке́лия яви́ся, храм же твой Небеса́ бы́ша, и сослужи́телие твои́ А́нгели Бо́жии.

Сла́ва Отцу́ и Сы́ну и Свято́му Ду́ху:

Ве́рный помо́щник первосвяти́теля Ти́хона быв, Про́мыслом Бо́жиим тому́ прее́мник яви́лся еси́, и призыва́л еси́ лю́ди тве́рдо ве́ровати во еди́ну Святу́ю, Собо́рную и Апо́стольскую Це́рковь.

И ны́не и при́сно и во ве́ки веко́в. Ами́нь.

Богородичен: От ве́ка избра́нная и от младе́нства при́званная, в храм я́ко Неве́ста введена́ была́ еси́, Присноде́во Ма́ти, и, Неневе́стная пребы́вши, Бо́га пло́тию родила́ еси́.

Пе́снь 5

Ирмос: Ны́не ви́дим свет у́тренния зари́,/ светле́е со́лнца просия́вших святы́х,/ и́миже нощь бра́ни преше́дше, со Иса́ием возопии́м:/ пра́вде научи́теся, вси земни́и,// Го́споди Бо́же наш, мир даждь нам.

Припев: Священному́чениче Пе́тре, моли́ Бо́га о нас.

Ка́ко обнови́ти Це́рковь Христо́ву восхоте́ли есте́, ино́го бо основа́ния положи́ти никто́же мо́жет, рекл еси́, священному́чениче Пе́тре, преда́телем первосвяти́теля Ти́хона и хули́телем преда́ний. Те́мже мно́гия ве́рныя от сете́й льсти́вых спасл еси́.

Припев: Священному́чениче Пе́тре, моли́ Бо́га о нас.

Самочи́нцем, обще́ния льсти́вно прося́щим, отвеща́л еси́, местоблюсти́телю о́тче Пе́тре: не на́ши есте́, отшли́ бо от нас, посему́ пока́йтеся и бу́дем единоду́шни, тще́тно есть ва́ше мудрова́ние.

Сла́ва Отцу́ и Сы́ну и Свято́му Ду́ху:

Я́ко го́рькую ча́шу местоблюсти́тельство прия́л еси́, святи́телю Пе́тре, и на Голго́фу возше́л еси́, во́лю Бо́жию на земли́ хотя́ соверши́ти.

И ны́не и при́сно и во ве́ки веко́в. Ами́нь.

Богородичен: Благове́стия арха́нгельскаго сподо́бившися и Небе́сная земны́м совоку́пльши, Де́во, вы́ну Благове́стница христиа́ном явля́ешися во утеше́ние и обетова́ние Ца́рствия гряду́щаго.

Пе́снь 6.

Ирмос: Ио́ново чуде́сное избра́ние/ очище́нию во чре́ве ки́тове/ нас тре́петно моли́ти науча́ет:/ су́щим зва́нным нам избра́нным яви́тися/ тле́нию вре́менному и промысли́тельному// и спаси́тельному совоскресе́нию.

Припев: Священному́чениче Пе́тре, моли́ Бо́га о нас.

Святи́телем Моско́вским в любви́ после́дуя, пе́рвее со Христо́м и наро́дом Бо́жиим бы́ти потща́лся еси́, свя́те Пе́тре, те́мже и гони́тели победи́л еси́.

Припев: Священному́чениче Пе́тре, моли́ Бо́га о нас.

Раско́лы творя́ху безбо́жницы, ле́стию зло́бу покрыва́юще, ты же, о́тче Пе́тре, сие́ разуме́в, ника́коже тем уступи́л еси́, кро́тостию вражду́ препобежда́я.

Сла́ва Отцу́ и Сы́ну и Свято́му Ду́ху:

Клеветы́ многому́дренныя воздвиго́ша на тя разори́тели Це́ркве Христо́вы, ты же местоблюсти́тельства до сме́рти не отре́клся еси́, и ко́зни их сокруши́л еси́, страда́льче неустраши́мый.

И ны́не и при́сно и во ве́ки веко́в. Ами́нь.

Богородичен: Зря́ще Тя, Де́во, ро́ждшую Царя́ и Влады́ку и Творца́ ми́ра, мо́лим: спаси́ нас, во гресе́х погиба́ющих.

Конда́к, гла́с 7:

Ско́рби, труды́ и боле́зни,/ суд безбо́жный и неми́лостивый/ претерпе́л еси́, первосвяти́телю Пе́тре,/ оба́че сих не устраши́лся еси́,/ Еди́ному Судии́ ве́рен пребыва́я,/ Тому́ ны́не предстоя́й, о нас моли́ся,// прославля́ющих любо́вию па́мять твою́.

Икос:

Мно́жае в труде́х, пребо́ле в ра́нах, в темни́цах же и́злиха и в сме́ртех мно́гащи был еси́, священному́чениче Пе́тре, глад, зи́му и наготу́ претерпева́я, укоря́емь благословля́ше, ху́лимый не отвещава́ше. Те́мже и озлобля́емь не умира́ше, и уме́рший почита́емь, жив был еси́, в нищете́ мно́гия обогаща́я и слуга́ Бо́жий всем явля́яся. Христу́ о нас, свя́те, моли́ся, прославля́ющих любо́вию па́мять твою́.

Пе́снь 7.

Ирмос: Ка́ко о́гненная пещь/ Бо́гови приобще́ние бысть,/ попале́ние кумиротворе́ния,/ отце́м ве́рности испове́дание,/ Бо́жия пра́вды прозре́ние,/ я́ко бли́зится паде́ние вавило́нское,/ отроко́в же во ве́ки воспое́тся песнь:// отце́в и наш Бо́же, благослове́н еси́.

Припев: Священному́чениче Пе́тре, моли́ Бо́га о нас.

Ки́и А́нгели ороша́ху тя в пещи́ страда́ний, егда́ а́лчбу, жа́жду, наготу́, тесноту́ и ра́ны мно́гия на всяк день претерпева́л еси́, святи́телю, благода́рне Го́споду Сил взыва́я: Бо́же, благослове́н еси́.

Припев: Священному́чениче Пе́тре, моли́ Бо́га о нас.

Житие́ твое́, священному́чениче Пе́тре, я́ко умира́ние на кресте́ бысть, все́ми бо у́ды страда́л еси́, со́лнце мно́гая ле́та не ви́дя, смра́дом дыша́, пи́щи и сна лише́ние терпя́, непреста́нно же моля́ся: Бо́же, благослове́н еси́.

Припев: Священному́чениче Пе́тре, моли́ Бо́га о нас.

С разбо́йники заточе́н и с па́ствою разлуче́н быв, ничи́мже мучи́телем уступи́л еси́, свя́те Пе́тре, враго́м Бо́жиим рабо́тати отверга́яся, отце́м же святы́м подо́бяся, вопия́л еси́: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Стра́жею ненави́димь, па́ствою же люби́мь, к той взыва́л еси́: не отступи́те преда́ний оте́ческих, в по́двизех и муче́ниих моля́щеся: Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богородичен: Сы́на Бо́жия пло́тию родила́ еси́, и ка́ко Той умира́ше, при Кресте́ стоя́щи, ви́дела еси́, Де́во, му́чеников похвало́. Моли́ о всех, Честно́му Дре́ву покланя́ющихся и Тя почита́ющих.

Пе́снь 8.

Ирмос: Вострепета́ша халде́и,/ Еди́наго Бо́га не позна́вшии,/ убива́юще бо, утверди́ша живо́т/ и, пла́менем низве́дше живоно́сный ток,/ песнь из огня́ я́ве слы́шаша:/ благослови́те, сы́нове челове́честии, Го́спода,// по́йте и превозноси́те во вся ве́ки.

Припев: Священному́чениче Пе́тре, моли́ Бо́га о нас.

Безбо́жнии гони́телие, сме́рти твоея́ и́щуще, пре́жде о сей лжи́во пове́даша, свя́те Пе́тре, по́слежде же грех уби́йства твоего́ соверши́ша. Те́мже му́ченическим венце́м украси́ тя Госпо́дь, Его́же ны́не превозно́сиши во ве́ки.

Припев: Священному́чениче Пе́тре, моли́ Бо́га о нас.

Гони́телем, страда́ньми и темни́чным заточе́нием тя устраша́ющим, отвеща́л еси́, о́тче: не могу́ преступи́ти кля́твы Це́ркви и Патриа́рху; не мни́те, я́ко еди́н есмь аз, и́бо со мно́ю в моли́твах вся па́ства пребыва́ет, ея́же ра́ди живу́ и умира́ю.

Припев: Священному́чениче Пе́тре, моли́ Бо́га о нас.

Изнемо́гше в мучи́тельстве беззако́ннии, любоблаже́нне Пе́тре, неми́лостивно тя убива́ют, живота́ ве́чнаго тя сподобля́юще и Це́рковь украша́юще, ве́рныя же науча́юще вопи́ти: Го́спода по́йте и превозноси́те во вся ве́ки.

Припев: Священному́чениче Пе́тре, моли́ Бо́га о нас.

Глаго́лаша беззако́ннии тебе́, свя́те Пе́тре, я́ко ту́не страда́еши и ничто́же мо́жеши, и у́не ти есть, да местоблюсти́тельства отрече́шися. Ты же, крепкоду́шне му́чениче, отвеща́л еси́: не аз избра́х его́, претерпе́вый же до конца́, той спасе́н бу́дет.

Сла́ва Отцу́ и Сы́ну и Свято́му Ду́ху:

Всем житие́м Це́ркви послужи́в, святи́телю Пе́тре, му́ченическою сме́ртию но́вый дар той прино́сиши, гони́тели облича́я и Христа́ явля́я. Мы же, по словеси́ твоему́, о земны́х не пеку́щеся, ти после́дуем, превознося́ще Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Воспева́ем успе́ние Твое́, Ма́ти Христа́ Бо́га на́шего, из ме́ртвых воскре́сшаго, и со апо́столы мо́лим: с на́ми до сконча́ния ве́ка пребу́ди.

Песнь 9

Ирмос: Твои́х, Богоро́дице, глаго́лов/ ви́дим исполне́ние:/ низложе́ние си́льных и вознесе́ние смире́нных,/ те́мже в хра́мех и темни́цах,/ в печа́лех и ра́достех, в гоне́ниих и ми́ре// Тя, Ма́терь Све́та, велича́ем.

Припев: Священному́чениче Пе́тре, моли́ Бо́га о нас.

Днесь торжеству́ем ра́достно, тя иму́ще па́стыря и отца́, о ча́дех моля́щагося, и велича́ем непреста́нно, священному́чениче Пе́тре, Це́ркве Ру́сския похвало́.

Припев: Священному́чениче Пе́тре, моли́ Бо́га о нас.

Возлю́бим друг дру́га, бра́тие, вси бо есмы́ сро́дницы святы́х новому́ченик, и Христо́с есть посреде́ нас, Его́же не преста́й, святи́телю Пе́тре, о нас умоля́ти.

Сла́ва Отцу́ и Сы́ну и Свято́му Ду́ху:

Пасха́льныя ра́дости да испо́лнимся, па́мять священному́ченика Петра́ торжеству́юще, и друг дру́га обы́мем, и вся прости́м, того́ моля́ще ра́дости Небе́сныя и нам сподо́битися.

И ны́не и при́сно и во ве́ки веко́в. Ами́нь.

Богородичен: Свети́ся, свети́ся, Це́рковь Ру́сская, ди́вный бо святи́тель в тебе́ возсия́. Ты же, Чи́стая, красу́йся, Богоро́дице, о прославле́нии предста́тельства Твоего́.

Свети́лен:

Егда́ в темни́це бе, священному́чениче Пе́тре, и́мя твое́, во святы́х хра́мех помина́емое, Це́рковь Ру́сскую в едине́нии храня́ше, ны́не же тебе́ на Небеси́ пребыва́ющу, и́же с ве́рою и любо́вию тя призыва́ют, вели́кия ми́лости сподобля́ются. Моли́ спасти́ся душа́м на́шим.

Сла́ва, и ны́не, Богородичен:

О мно́зе моля́ще Тя, Пречи́стая Де́во, вя́щших даро́в сподобля́емся, славосло́вити же Тя хотя́ще, преизоби́лен мир и ра́дость Боже́ственную обрета́ем. Те́мже пое́м, велича́ем, сла́вим, почита́ем, ублажа́ем и превозно́сим Тя, Богоро́дице.

Молитва

О святы́й священному́чениче Пе́тре, святи́телю сла́вный земли́ Ру́сския, архиере́йство я́ко ча́шу сме́ртную прие́мый, и престо́л патриа́рший до́бре соблюды́й, ве́рою вся претерпе́вый, и смире́нием благода́ть ве́лию стяжа́вый! Ку́ю похвалу́ воздади́м ти язы́ком худы́м? Во гресе́х и не́мощех су́ще, ка́ко дерзне́м призыва́ти тя? Оба́че ве́мы, я́ко со все́ми святы́ми земли́ на́шея, наипа́че же со святы́м Патриа́рхом Ти́хоном, не престая́ мо́лишися у Престо́ла Пресвяты́я Тро́ицы о Це́ркви Ру́сской, да сохрани́т ю́ Госпо́дь от вся́каго зла и искуше́ния, да пра́во пра́вят сло́во и́стины архипа́стыри и па́стыри ея́, да не изсяка́ет ве́ра в сердца́х людски́х, да в сове́те мно́зе разреша́ется вся́кое нестрое́ние, и вся любо́вию всем да быва́ет! О пресла́вный страда́льче! Ты, я́ко оте́ц чадолюби́вый, ве́си вся потре́бная нам, сего́ ра́ди еди́наго взыску́ем: тебе́ подража́тели бы́ти, я́коже и ты Христу́, да крест свой прии́мше, я́ко бре́мя благо́е и ле́гкое, путе́м у́зким ше́ствуем и та́ко оби́телей Небе́сных дости́гнем, иде́же вку́пе с тобо́ю и все́ми святы́ми сподо́бимся прославля́ти пречестно́е и великоле́пое и́мя Отца́, и Сы́на, и Свята́го Ду́ха, в безконе́чныя ве́ки. Ами́нь.