10 октября.

Канон святому мученику Каллистрату и дружине его.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н. Гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Святый мучениче Каллистрате, моли́ Бо́га о нас.

Стезю́ ше́ствовав неукло́нно страда́ния, бы́л еси́ заблу́ждшим пу́ть, к Боже́ственным воспокое́нием, блаже́нне, вводя́щий: те́м, соше́дшеся, благохва́лим тя́, Каллистра́те, ве́рою.

Припев: Святый мучениче Каллистрате, моли́ Бо́га о нас.

Якоже светле́йша звезда́ возсия́в, озари́л еси́ богозна́ния све́том Христо́ву Це́рковь, тму́ же отгна́в, му́чениче, неве́дения, и ны́рища преле́стная низложи́л еси́.

Припев: Святый мучениче Каллистрате, моли́ Бо́га о нас.

Вся́к иску́с терпели́во подъе́м, Каллистра́те, за все́х Жи́знь умре́ти не отре́клся еси́: те́м к безсме́ртному поко́ю, ра́дуяся, преше́л еси́, со Ангельскими ли́ки весели́шися.

Сла́ва Отцу́ и Сы́ну и Свято́му Ду́ху:

Угль Боже́ственнаго Ду́ха огне́м свяще́нный Гимна́сий распала́емь показа́ся и ле́сти ти́ну попали́, чудесы́ же ороша́ет пали́мых жже́нием страсте́й.

И ны́не и при́сно и во ве́ки веко́в. Ами́нь.

Богородичен: Еди́на в жена́х ражда́еши Еди́наго от Тро́ицы преесте́ственно, Всенепоро́чная, иску́са му́жеска не позна́вши: те́м Тя́ сла́вим и из Тебе́ Рожде́ннаго вы́шше вся́кия вины́ и сло́ва.

Пе́снь 3.

Ирмос: Утверже́й сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Припев: Святый мучениче Каллистрате, моли́ Бо́га о нас.

Не поже́р отню́д ва́янным бого́м, чиста́ же́ртва прине́слся еси́ все́х Бо́гу, за ны́ пожре́нному, му́чениче страстоте́рпче Каллистра́те.

Припев: Святый мучениче Каллистрате, моли́ Бо́га о нас.

Укра́шен багряни́цею, обагре́нною от свяще́нных, му́чениче, и́стинно крове́й твои́х, Царю́ веко́в венцено́сец, блаже́нне, предстои́ши.

Сла́ва Отцу́ и Сы́ну и Свято́му Ду́ху:

Обнаже́н яви́ся вра́г твое́ю боже́ственною сла́вою и су́щих с тобо́ю страда́лец, оде́явшихся с высоты́, му́чениче доблему́дре Гимна́сие.

И ны́не и при́сно и во ве́ки веко́в. Ами́нь.

Богородичен: Моле́ние сотвори́ приле́жно к Твоему́ Сы́ну, Де́во, е́же спасти́ ны от ожида́емых бе́д и ве́чнующаго муче́ния.

Конда́к, гла́с 4.

Вся́к тру́д дне́сь Це́рковь ны́не соверша́ющи, святи́и, восхваля́ет та́инственно, я́ко за ню́ страда́льчествовавшия, му́ченицы боже́ственнии, добропобе́днии, всему́дрии.

Та́же седа́лен, гла́с 5.

Каллистра́товы стра́сти восхва́лим, Гимна́сиевы боле́зни воспесносло́вим, с ни́ми терпели́во пострада́вшия любо́вию ублажи́м, ве́рнии, и к ни́м возопии́м: ору́жницы благоче́стия, проси́те дарова́ти на́м ми́р и ве́лию ми́лость.

Сла́ва, и ны́не, Богородичен:

Души́ моея́ стра́сти многоболе́зненныя и пло́ти моея́ неду́ги вско́ре исцели́, ума́ моего́ изступле́ния уста́ви, Пренепоро́чная, и в тишине́ помышле́ния моли́твы приноси́ти чи́стыя Царю́ все́х сподо́би, Богоро́дице, и испроси́ прегреше́ний оставле́ние.

КрестоБогородичен:

На Кресте́ Тя́ зря́щи, Христе́, Ма́ти Твоя́, во́лею посреде́ разбо́йников ви́сяща, терза́ющи Ма́терски утро́бы, глаго́лаше: безгре́шне Сы́не, ка́ко непра́ведно на Кресте́, я́ко злоде́й, распя́лся еси́, ро́д челове́ческий оживи́ти хотя́, я́ко Преблаги́й?

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святый мучениче Каллистрате, моли́ Бо́га о нас.

Воево́да я́коже изя́щнейший, му́чениче, гони́телю ополчи́вся, улови́л еси́ к боже́ственней жи́зни плене́нныя дре́вле, я́же име́яше.

Припев: Святый мучениче Каллистрате, моли́ Бо́га о нас.

Ту́чами слове́с твои́х напои́л еси́ сердца́ и наста́вил еси́ к воде́ присножи́зненней, страда́льче Госпо́день досточу́дне.

Припев: Святый мучениче Каллистрате, моли́ Бо́га о нас.

Яко ове́н закала́ется, име́я я́коже а́гнцы предзакала́емыя его́, приснопа́мятный Каллистра́т, кре́пкия ору́жники преусе́рднейшия.

Сла́ва Отцу́ и Сы́ну и Свято́му Ду́ху:

Узре́лый, Гимна́сие, я́коже лоза́, му́чениче, сло́вом твоего́ страда́ния гро́зд процвете́, благоче́стия вино́ источа́ющь.

И ны́не и при́сно и во ве́ки веко́в. Ами́нь.

Богородичен: Оскве́рншееся страстьми́ се́рдце мое́, Отрокови́це, очи́сти и прия́телище сотвори́ чи́стых и Боже́ственных осия́ний.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Святый мучениче Каллистрате, моли́ Бо́га о нас.

Всеусе́рдно, му́чениче, возлюби́в Христа́ Бо́га на́шего, пострада́л еси́ и держа́ву погуби́л еси́ вра́жию немощну́ю.

Припев: Святый мучениче Каллистрате, моли́ Бо́га о нас.

Воинствосло́вии боже́ственными показа́лся еси́ ве́рх, Каллистра́те, во́инством Ангелов, му́чениче, причи́слился еси́, ра́дуяся.

Сла́ва Отцу́ и Сы́ну и Свято́му Ду́ху:

Укра́шен сла́вою му́ченическия све́тлости, Гимна́сие, ра́дуяся ны́не преложи́лся еси́ к све́тлостем Ангельским.

И ны́не и при́сно и во ве́ки веко́в. Ами́нь.

Богородичен: Восто́к яви́лася еси́ пра́вды Со́лнца, Всенепоро́чная, Его́же моли́ спасти́ чи́сто сла́вящия Тя́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святый мучениче Каллистрате, моли́ Бо́га о нас.

Льво́в че́люсти, му́дре, неви́димых сокруши́л еси́ и, пи́щу иногда́ вра́жию су́щия, Бо́жия ча́да показа́л еси́ и сла́дости невеще́ственныя о́бщники, му́чениче Каллистра́те.

Припев: Святый мучениче Каллистрате, моли́ Бо́га о нас.

Красно́ о Бо́зе боже́ственное сло́во сотворя́я, бого́м безду́шным пре́жде окая́нно служа́щих боже́ственны яви́л еси́, с ни́ми пострада́в, пресла́вне Каллистра́те.

Сла́ва Отцу́ и Сы́ну и Свято́му Ду́ху:

Христу́ ва́ша вы́я преклони́вше, му́ченицы, прия́сте заколе́ние, и же́ртвы соверше́нныя Бо́гу принесо́стеся, и перворожде́нных Це́рковь украси́сте.

И ны́не и при́сно и во ве́ки веко́в. Ами́нь.

Богородичен: Освяти́ у́м мо́й, и просвети́ мое́ се́рдце, свята́я Ма́ти Бо́жия, и одержа́щих мя́ злолю́тых изба́ви, да Тя́ сла́влю, Богоро́дице Присноде́во.

Конда́к, гла́с 4.

Многообра́зныя ра́ны претерпе́вше и венцы́ от Бо́га я́ве прии́мше, о на́с моли́теся, блаже́ннии, Христу́, па́мять всепра́зднственную ва́шу соверша́ющих, велича́йший Каллистра́те со страда́вшими с тобо́ю, е́же умири́ти па́ству и лю́ди: То́й бо е́сть ве́рных утвержде́ние.

Икос:

Моще́й твои́х зря́, Каллистра́те, ра́ку, пою́ и велича́ю боле́зни и страда́ния, я́же подъя́л еси́, стражда́. Те́м молю́ тя: уми́лостиви и мне́ Христа́, Страстополо́жника твоего́, пода́ти ми́ сло́во благода́тию, да возмогу́ по́двиги твоя́ похвали́ти; богосло́вно бо никто́же возмо́жет в челове́цех изрещи́ твоя́ до́блести, ка́ко вше́л еси́ му́жественно в суди́ще, помышле́ния, до́ле пле́жущая, облича́я мучи́тельская: Христо́с е́сть ве́рных утвержде́ние.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святый мучениче Каллистрате, моли́ Бо́га о нас.

Просвети́вся, я́ко зла́то, огне́м муче́ний, Страсте́й Христо́вых зна́мение яви́лся еси́ и ны́не возложи́лся еси́ сокро́вищем боже́ственным, сла́вне, вопия́: отце́в на́ших Бо́же, благослове́н еси́.

Припев: Святый мучениче Каллистрате, моли́ Бо́га о нас.

Укрепи́вся страстьми́, ме́чь яви́лся еси́, всеблаже́нне, небокова́нный, ссеца́я неви́димых де́монов полки́ и зовя́, Каллистра́те: отце́в на́ших Бо́же, благослове́н еси́.

Припев: Святый мучениче Каллистрате, моли́ Бо́га о нас.

Кре́пок яви́лся еси́ на нече́стие, му́чениче Каллистра́те, кре́постию Тро́ическою, Ея́же ны́не сия́ньми вопие́ши просвеща́емь: отце́в на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Тве́рдым по́мыслом Христа́ возлюби́в, му́чениче Гимна́сие, со все́ми купноревни́тели закла́н бы́л еси́, воспева́я благода́рственно, богодохнове́нне: отце́в на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Из Тебе́ Воплоти́вшагося па́че ума́ и сло́ва, Богора́дованная, моли́ спасти́ся любо́вию Тя́ чту́щим и согла́сно зову́щим: отце́в на́ших Бо́же, благослове́н еси́.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Святый мучениче Каллистрате, моли́ Бо́га о нас.

Искорени́в пре́лести те́рния, рая́ показа́лся еси́, му́чениче, са́д красне́йший, благоче́стия принося́ плоды́ Боже́ственною благода́тию.

Припев: Святый мучениче Каллистрате, моли́ Бо́га о нас.

Взира́я к наде́ждам бу́дущим во упова́нии соверше́нном, к подвиго́м отлучи́лся еси́ и, победи́в, зако́нно венча́лся еси́, Каллистра́те.

Сла́ва Отцу́ и Сы́ну и Свято́му Ду́ху:

Твоего́ хра́ма врачевство́ стяжа́вше, благоче́стно приходя́щии злоудо́бных избавля́ются, благохва́ляще тя́ ве́рою, Гимна́сие сла́вне.

И ны́не и при́сно и во ве́ки веко́в. Ами́нь.

Богородичен: Яко вы́шши все́х тва́рей, Богора́дованная Отрокови́це, по́мысл мо́й вы́шши льсти́теля собла́знов, Всенепоро́чная, сотвори́.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святый мучениче Каллистрате, моли́ Бо́га о нас.

Исцеле́ние все́м ра́ка моще́й твои́х то́чит тре́бующим, му́чениче Каллистра́те, и уставля́ет стра́сти вои́стинну неудобоисце́льныя, и отго́нит лука́вых духо́в тму́ Боже́ственнаго Ду́ха де́йством, и си́лою, и благода́тию.

Припев: Святый мучениче Каллистрате, моли́ Бо́га о нас.

Яви́стеся, му́ченицы Христо́вы, я́ко богоплете́нная плени́ца, связу́еми дру́г дру́гу благода́тию, и к высоте́ восходя́ще, и освяща́юще зе́млю лия́нием кро́ве. Те́м па́мять ва́шу пра́зднуем ве́рно, веселя́щеся.

Припев: Святый мучениче Каллистрате, моли́ Бо́га о нас.

Вене́ц прия́л еси́ я́ве неувяда́емый, и сла́ву ве́чную, и весе́лие, и ра́дость, конца́ не иму́щую, и Ца́рство небе́сное, богому́дре Каллистра́те, со страда́вшими с тобо́ю, с ни́миже помина́й на́с ко Го́споду.

Сла́ва Отцу́ и Сы́ну и Свято́му Ду́ху:

Боже́ственная па́мять му́драго Каллистра́та, Гимна́сия же дне́сь и страда́вших с ни́ми, со́лнца мно́жае возсия́вши, свеща́тельными блиста́ньми просвеща́ет концы́. Ихже моли́твами, Христе́, осужде́ния свободи́ ны.

И ны́не и при́сно и во ве́ки веко́в. Ами́нь.

Богородичен: Гла́с Тебе́ Гаврии́лов весе́лым по́мыслом взыва́ем: ра́дуйся, ра́досте ве́рных; ра́дуйся, све́щниче златы́й и трапе́зо, горо́ и две́рь мы́сленная; ра́дуйся, боже́ственная колесни́це Царя́ Христа́; ра́дуйся, разреше́ние кля́твы, Всеблагослове́нная.

Свети́лен.

О, чу́до! Ка́ко бре́ннии зла́ти естество́м яви́шася? Ибо ни о́гнь, ниже́ ме́чь, ниже́ звере́й зу́бы, ни му́ки, ни ра́ны си́х погуби́ша, но, пло́тию безпло́тнаго низложи́вше, Го́споду о на́с мо́лятся.

Сла́ва, и ны́не, Богородичен:

Ра́дуйся, Бо́жия пала́то; ра́дуйся, горо́ присе́нная; ра́дуйся, Боже́ственная трапе́зо; ра́дуйся, неопали́мая купино́; ра́дуйся, престо́ле сла́вы; ра́дуйся, ста́мно всезлата́я; ра́дуйся, све́щниче всесве́тлый; ра́дуйся, ле́гкий о́блаче, Девома́ти Мари́е.

Молитва

О святы́й уго́дниче Бо́жий, му́чениче Каллистра́те! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.