9 ноября.

Канон преподобному Нестору Летописцу, Печерскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь преподобного Нестора Летописца, Печерского, в Ближних пещерах, глас 4

Великих князей русских деяния/ и преподобных отец Печерских жития и чудеса написавый,/ свое же, Богомудре Несторе, многих ти ради добродетелей имя/ написано на небеси стяжавый, моли и нам написатися в Книги Животныя.

Кано́н свято́му, гла́с 4.

Пе́снь 1.

Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Припев: Преподобне отче Несторе, моли́ Бо́га о нас.

Ли́цы и́ночестии, в ле́тней па́мяти богоно́снаго отца́ стеци́теся усе́рдно к святе́й пеще́ре, и любо́вию кла́няющеся ра́це моще́й Не́стора любому́драго, воспо́йте Бо́гу, я́ко во святы́х Свои́х сла́вно просла́вися.

Припев: Преподобне отче Несторе, моли́ Бо́га о нас.

Лико́м и́ноческим сочета́ющуся и в дне́шний де́нь па́мять твою́ воспе́ти дерза́ющу, мне́, па́че все́х грубе́йшему, моли́твами твои́ми спосо́бствуй, Не́сторе свя́те, Бо́г бо в тебе́ ди́вно просла́вися.

Сла́ва Отцу́ и Сы́ну и Свято́му Ду́ху:

Лико́м Ангельским причте́н бы́ти хотя́й, лико́м равноа́нгельным во пло́ти причта́лся еси́, о́тче, от ни́хже Ангельскому житию́ научи́вся, возше́л еси́ к у́мному жела́нию: те́мже тя́ чти́м, я́ко Бо́г в тебе́ ди́вно просла́вися.

И ны́не и при́сно и во ве́ки веко́в. Ами́нь.

Богородичен: Ли́ки святы́х и преподо́бных оте́ц с ли́ки Ангельскими предстоя́ще, сла́вите Ро́ждшую все́х святы́х Святе́йшее Сло́во; сла́вити же дне́сь Бо́жию Ма́терь, и на́м земны́м помози́те, Та́ бо от все́х ди́вно просла́вися.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Преподобне отче Несторе, моли́ Бо́га о нас.

Предложе́ние твоего́ ума́ бе́, а́ки лу́к напряже́н, о́тче, живы́й бо во юдо́ле се́й плаче́вной, восхожде́ние име́л еси́ в се́рдце свое́м вы́ну к Бо́гу; и мне́ у́бо, жи́знь свою́ веду́щу вы́ну в печа́лех, Не́сторе, помози́, моля́ся о мне́, да возвесели́тся о Го́споде се́рдце мое́.

Припев: Преподобне отче Несторе, моли́ Бо́га о нас.

Седмьнадесятоле́тен сы́й, мы́сленне прия́л еси́ му́жа соверше́нна во́зраст: просия́л бо еси́, а́ки в ста́рческих седи́нах, де́лы благи́ми, сия́ и во мне́ испра́ви, блаже́нне, и возвесели́тся о Го́споде се́рдце мое́.

Сла́ва Отцу́ и Сы́ну и Свято́му Ду́ху:

Чистоту́ и смире́ние глубо́ко к нищете́ прие́мь, возлете́л еси́, свя́те, а́ки крило́ма, на го́ру и́ноческих доброде́телей; отню́дуже, усмотри́в в мгнове́нии о́ка преходя́щ ми́ра сего́ о́браз, и па́че в любо́вь Бо́жию впери́л еси́ се́рдце твое́.

И ны́не и при́сно и во ве́ки веко́в. Ами́нь.

Богородичен: Са́д чистоты́ Ро́ждшая, плодо́м сего́, ве́рующих Тя́ бы́ти Ма́терь Бо́жию, напита́ла еси́ оби́льно; и мне́ у́бо, ве́рою покланя́ющемуся Тебе́, Богоневе́стная Де́во, да́ждь от сего́ плода́ поне́ ма́ло вкуси́ти, да печа́льное возвесели́тся се́рдце мое́.

Седа́лен, гла́с 4:

От вели́ких оте́ц упра́влен в благи́я нра́вы и в ю́ности ве́сь Бо́гови присоедини́вся, плотски́я по́хоти умертви́л еси́ поще́нием кре́пким, ду́х оживи́л еси́ наде́ждою бла́г ве́чных; Ангельски на земли́ пожи́в, со Ангелы ны́не водворя́ешися, те́м тя́ почита́ем, Не́сторе блаже́нне.

Сла́ва, и ны́не, Богородичен:

Стра́шных чуде́с несказа́нный о́браз ви́жду в Тебе́, Пречи́стая Де́во, я́ко Бо́га зачала́ еси́ и Необыме́ннаго объя́ла еси́ утро́бою Твое́ю, но какова́ се́ бы́сть та́йна, не испыту́ю, па́че же ве́рую и со стра́хом ублажа́ю Тя́, пою́щи: ра́дуйся, Бо́га Невмести́маго простра́нное селе́ние.

Пе́снь 4.

Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.

Припев: Преподобне отче Несторе, моли́ Бо́га о нас.

Услы́шав сла́вная и преди́вная на горе́ Пече́рской, прише́л еси́ та́мо, преподо́бне, и ви́дев с огне́м и росо́ю низходя́щую благода́ть Бо́жию в нача́ле основа́ния це́ркве, ю́н еще́ сы́й, со ста́рцы воспе́л еси́: сла́ва си́ле Твое́й, Го́споди.

Припев: Преподобне отче Несторе, моли́ Бо́га о нас.

Бо́льшую и соверше́ннейшую в души́ твое́й ски́нию творя́ Ду́ху Свято́му, любе́зным восприя́тием за́поведи от богоно́сных оте́ц позлати́л еси́ о́ну, Не́сторе свя́те: те́м, я́ко в кра́сный черто́г, прии́де и оби́тель в тебе́ сотвори́ Оте́ц с Сы́ном и Ду́хом.

Сла́ва Отцу́ и Сы́ну и Свято́му Ду́ху:

Аки сла́дкое млеко́, уче́ние оте́ц богоно́сных прие́мь, сло́во де́лом испо́лнил еси́, блаже́нне, и испо́лнен бы́л еси́ вы́шния Прему́дрости, ю́же и мы́ от писа́ний твои́х чту́ще, увеселя́ем ду́ши на́ша ве́дением на си́х гора́х бы́вшия Бо́жия благода́ти.

И ны́не и при́сно и во ве́ки веко́в. Ами́нь.

Богородичен: Сла́дкое млеко́ покая́ния и не́ктар небе́сный умиле́ния пе́сни любо́вию Тебе́ принося́щим, подае́ши, Чи́стая Отрокови́це, я́же и а́з, стра́хом одержи́мь, любо́вию же дви́жимь, приношу́ Ти, Влады́чице, и молю́: услади́ се́рдце мое́, Сла́дкаго Иису́са Христа́ моего́ ро́ждшая.

Пе́снь 5

Ирмос: От све́та пресеки́й перворо́дный све́т, я́ко во све́те дела́ пою́т Тя́, Христе́, Соде́теля, во све́те Твое́м пути́ на́ша напра́ви.

Припев: Преподобне отче Несторе, моли́ Бо́га о нас.

От любве́ ле́стнаго ми́ра удали́вся, жела́нием вожделе́л еси́, Не́сторе, вели́ких оте́ц стопа́м, нра́вом и уче́ниям после́довати: си́м да́ждь и на́м прилежа́ти, и во све́те дея́ний о́ных, моли́твами твои́ми, пути́ на́ша напра́ви.

Припев: Преподобне отче Несторе, моли́ Бо́га о нас.

Глубо́ким смире́нием огражде́н сы́й, преподо́бне, высото́ю тщесла́вия ходя́щаго врага́ низве́рг, нога́ми попра́л еси́; хода́тайством твои́м к Бо́гу, о́тче, да́ждь и на́м смире́ние и во о́ном стопы́ на́ша напра́ви.

Сла́ва Отцу́ и Сы́ну и Свято́му Ду́ху:

Ангельски жи́знь свою́ упра́вльша, вси́ тя́, а́ки Ангела Бо́жия, име́яху; те́м и на диа́конский степе́нь взы́ти сподо́бился еси́, в не́мже до́бре ше́ствие свое́ упра́вив, и на́ша пути́ во святы́ни, Не́сторе, упра́ви.

И ны́не и при́сно и во ве́ки веко́в. Ами́нь.

Богородичен: Пу́ть ро́ждшая Жи́зни, Всесвята́я Де́во, стезя́ми собла́зн ходя́щих, я́ко Милосе́рдая, наставля́еши на стези́ пра́вды; и мене́, заблу́ждающаго, Влады́чице, не пре́зри, но я́ко ро́ждшая Наста́вника заблу́ждшим, во све́те Его́ пути́ моя́ напра́ви.

Пе́снь 6.

Ирмос: Внегда́ скорбе́ти ми́, возопи́х ко Го́споду, и услы́ша мя́ Бо́г спасе́ния моего́.

Припев: Преподобне отче Несторе, моли́ Бо́га о нас.

В преподо́бии и пра́вде чи́н сво́й управля́я, хра́м Ду́ху Свято́му ве́сь сотвори́лся еси́, и вше́д в хра́м нерукотворе́нный, престо́лу Вы́шняго предстои́ши; и мне́, хотя́щему бы́ти та́мо, моли́твами твои́ми, о́тче, помози́, молю́ тя, моли́твенника спасе́ния моего́.

Припев: Преподобне отче Несторе, моли́ Бо́га о нас.

Кра́снаго са́да Де́лателя Небе́снаго кра́сное бы́л еси́ прозябе́ние, кра́сными бо де́лы укра́шен, благи́я плоды́, и́хже ны́не благоуха́ние обоня́ем, возрасти́л еси́; молю́ у́бо тя́, блаже́нне, пода́ждь сия́ в да́р и мне́ от Бо́га Спа́са моего́.

Сла́ва Отцу́ и Сы́ну и Свято́му Ду́ху:

От труда́ по́двигов твои́х, Не́сторе преподо́бне, мно́гия изли́в по́ты, напои́л еси́ ни́ву души́ твоея́, и израсти́в доброде́телей кла́сы, пожина́еши ны́не рукоя́ти, живы́й во ве́ки в небе́сных кро́вех, в ни́хже и мне́ бы́ти моли́ Христа́ Спа́са моего́.

И ны́не и при́сно и во ве́ки веко́в. Ами́нь.

Богородичен: Насе́янная Ду́хом Отчим земле́ свята́я, ра́дуйся, я́ко прозябла́ еси́ на́м Дре́во благосенноли́ственное; зно́ем мя́ страсте́й опале́нна под се́нь о́наго приведи́, Влады́чице, молю́ Тя́ я́ко Хода́таицу спасе́ния моего́.

Конда́к, гла́с 2:

Яко сы́й богоно́снаго Феодо́сия учени́к и и́стинный жития́ того́ подража́тель, пе́рвый честны́х его́ моще́й самови́дец бы́ти сподо́бился еси́, я́же с про́чиими святоле́пно прене́с, насле́дил еси́ с те́мижде Ца́рство небе́сное, е́же получи́ти и на́м, чту́щим тя́, Го́сподеви моли́ся.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Преподобне отче Несторе, моли́ Бо́га о нас.

Авраа́мовым стопа́м после́дуя, свя́те, исполне́нием за́поведей прине́сл еси́, я́коже о́н Исаа́ка, чи́ст у́м Влады́це, сего́ ра́ди от жи́зни сея́ преше́л еси́ в зе́млю, точа́щую безконе́чную сла́дость, иде́же и мне́ моли́ бы́ти, Не́сторе, собесе́дниче богоно́сных оте́ц на́ших.

Припев: Преподобне отче Несторе, моли́ Бо́га о нас.

От стра́стнаго ми́ра сего́ преста́влься, преше́л еси́ в безстра́стный ми́р, иде́же в ми́ре с сына́ми ми́ра живы́й, и на́с, в ми́ре се́м су́щих, не отступа́й, моля́ Творца́ своего́, да соприча́стницы тебе́ бу́дем, пою́ще: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Не уклони́л еси́ се́рдца своего́ в словеса́ лука́вствия в жи́зни се́й многомяте́жной, преподо́бне, те́м и возду́шных духо́в лука́вствия безмяте́жно проше́д, к небе́сным врато́м доспе́л еси́: я́же и на́м отве́рзти потщи́ся моли́твами твои́ми, я́ко благослове́н еси́.

И ны́не и при́сно и во ве́ки веко́в. Ами́нь.

Богородичен: Уклони́хся от стези́ пра́вды и не хожда́х нога́ма мои́ма на пути́ пра́вы, но на стремни́нах страсте́й заблужда́ющи, уязви́х плесне́ мои́ те́рнием греха́, оба́че и храмля́я, притека́ю к Твое́й бла́гости и молю́ся: Влады́чице, исцели́ мя, Ты́ бо еси́ души́ моея́ врачева́ние.

Пе́снь 8.

Ирмос: В Вавило́не о́троцы, боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени, ороша́еми, поя́ху: благослови́те, вся́ дела́ Госпо́дня, Го́спода.

Припев: Преподобне отче Несторе, моли́ Бо́га о нас.

Си́лою духо́вною укрепле́н, прелете́л еси́, богому́дре, крило́ма твои́х доброде́телей к го́рним, и по ле́тех си́х живе́ши ны́не, иде́же ле́та не оскудева́ют, к ни́мже и на́м доспе́ти моли́, пою́щим: благослови́те вся́ дела́ Госпо́дня Го́спода.

Припев: Преподобне отче Несторе, моли́ Бо́га о нас.

От до́му Бо́жия Ма́тере преше́л еси́, Не́сторе, в До́м Бо́жий, всесветя́щийся Иерусали́м, и Ангелом в числе́ гра́ждан небе́сных сожи́тельствуя, хода́тайствуй и на́м те́мжде причте́нным бы́ти, в па́мяти твое́й пою́щим пе́сньми Го́спода.

Сла́ва Отцу́ и Сы́ну и Свято́му Ду́ху:

Тро́ичен: Тро́ическое еди́но естество́: Отче, и Сы́не, и Ду́ше Святы́й, еди́но ца́рство, си́лу и вла́сть иму́щее, на́с от вла́сти кня́зя тмы́ изба́ви, моли́твами богоно́сных оте́ц на́ших Пече́рских, с ни́миже и Не́стора приво́дим Ти́ в моли́тву дне́сь, благословя́ще Тя́ во ве́ки, Го́спода.

И ны́не и при́сно и во ве́ки веко́в. Ами́нь.

Богородичен: Тро́ическому предстоя́щи престо́лу, Ма́ти Де́во, и сла́ву Триипоста́снаго Божества́ вы́ну зря́щи, моли́ся за ны́ гре́шныя, да и мы́ небе́сныя сла́вы не лиши́мся, пе́сньми Тя́ сла́вяще и из Тебе́ ро́ждшагося Го́спода.

Песнь 9

Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Припев: Преподобне отче Несторе, моли́ Бо́га о нас.

Отше́л еси́ в селе́ния пра́ведных и ду́хом предстои́ши Присносу́щному Све́ту; при́зри у́бо на ны́, живу́щия в се́лех многомяте́жнаго ми́ра, и посо́бствуй су́щим во бра́нех, Не́сторе блаже́нне, я́ко пе́сньми тя́ ны́не велича́ем.

Припев: Преподобне отче Несторе, моли́ Бо́га о нас.

С ни́миже любо́вь стяжа́л еси́ живы́й те́лом, с си́ми, и ду́хом изше́д, сожи́тельствуеши не отлуче́н, я́коже показу́ют мо́щи твоя́, преподо́бне, со святы́ми в пеще́ре лежа́щия, с ни́миже предста́ни о на́с моля́щися Бо́гу, па́мять твою́ велича́ющих.

Сла́ва Отцу́ и Сы́ну и Свято́му Ду́ху:

Лю́бит ми́лость и и́стину Госпо́дь, и ты́, преблаже́нне, подо́бяся Тому́, ми́лостивый бу́ди хода́тай о спасе́нии на́шем, да тебе́ ра́ди и мы́, обре́тше благода́ть, не отпаде́м ве́чныя сла́вы, я́ко успе́ние твое́ свято́е пе́сньми велича́ем.

И ны́не и при́сно и во ве́ки веко́в. Ами́нь.

Богородичен: Лю́бит все́х Влады́ка хода́тайство Твое́, Пречи́стая Де́во, и моли́твы Твоя́ о челове́честем ро́де прие́млет; моли́ся у́бо и о на́с, рабе́х Твои́х, Всецари́це, да улучи́м ми́лость в де́нь Су́дный, вы́ну бо Тебе́ я́ко Хода́таицу, кла́няющеся, велича́ем.

Молитва преподобному Нестору Летописцу Печерскому

О, преподобне отче, премудре наставниче и Боголюбезне подвижниче Несторе Летописче! Предстояй со дерзновением престолу Вечныя Славы, не забуди нас грешных и недостойных, бурями страстей отягченных, и ходатайством твоим непрестанным защити страну нашу, тебе присную, и соотчичи твоя от всяких зол и скорбей. Утверди сердца наша в православней вере, отечество свое научи любити и в братолюбии крепце пребывати. Настави нас на стези спасения, да молитвами твоими, заступниче наш, внидем в вечное Царство славы, восхваляюще Господа и прославляюще твое заступление во веки веков. Аминь.