9 ноября.

Канон святому мученику Нестору Солунскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Не́стор во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н, гла́с 4.

Пе́снь 1.

Ирмос: Колесни́цы фарао́новы и си́лу его́ вве́рже в мо́ре Кре́пкий во бра́нех, воспое́м пе́снь но́вую, я́ко просла́вися.

Припев: Святый мучениче Несторе, моли́ Бо́га о нас.

На колесни́цу пла́менную твое́ю кро́вию, му́дре, ра́дуяся, все́л еси́ и к небе́сней высоте́, иде́же Иису́с Безле́тный Све́т, с ра́достию возше́л еси́.

Припев: Святый мучениче Несторе, моли́ Бо́га о нас.

Броня́ми мы́сленными ве́ры тебе́, Не́сторе, обложи́в, и кре́ст, я́ко копие́, име́я в рука́х, вра́жия кре́пко ссе́кл еси́ полки́.

Сла́ва Отцу́ и Сы́ну и Свято́му Ду́ху:

Теплото́ю Христо́вы укрепля́емь любве́, вну́трь вскочи́л еси́ в три́знище и вся́ разори́л еси́ Ли́евы ко́зни, и побе́ду победи́тельну поста́вил еси́.

И ны́не и при́сно и во ве́ки веко́в. Ами́нь.

Богородичен: Зачала́ еси́ во чре́ве Собезнача́льнаго Отцу́ и родила́ еси́, Неискусому́жная, па́че естества́ пло́тию, пребы́вши Де́ва и́стинно, Чи́стая: те́мже Тя́ вси́ почита́ем.

Пе́снь 3.

Ирмос: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.

Припев: Святый мучениче Несторе, моли́ Бо́га о нас.

Укрепи́вся держа́вою кре́пости вереи́ Сокруши́вшаго и а́дова врата́, со тща́нием в три́знище вше́л еси́ и кре́пце сокруши́л еси́ вра́жия ко́зни.

Припев: Святый мучениче Несторе, моли́ Бо́га о нас.

Ве́тхий пре́лести нача́льник под нога́ми твои́ми простре́ся, ю́ношески бо к посече́нию просте́рлся еси́ меча́, Не́сторе, му́чеников похвало́: те́мже восхваля́ем тя́.

Сла́ва Отцу́ и Сы́ну и Свято́му Ду́ху:

Предразруши́в горды́ню пребеззако́нников, Бо́гу поже́рл еси́, му́чениче, же́ртву, кро́вь твою́ возме́здие свяще́нную Тому́ подая́: те́мже ти́ возмзди́ бога́тыми дарова́ньми.

И ны́не и при́сно и во ве́ки веко́в. Ами́нь.

Богородичен: Еже от Ада́ма ро́да безобра́зие, внесе́нное сне́дию, во чре́ве Твое́м носи́мый Иису́с, Богоро́дице, преесте́ственно назда́в, пе́рвую добро́ту подаде́ на́м.

Седа́лен, гла́с 4.

Не устраши́вся враго́в томи́тельства, ни ужа́сся плотски́х ра́н, но безбоя́зненно поте́кл еси́ к боре́нию, му́дре, нося́ непобеди́мое Креста́ боже́ственное ору́жие. Те́мже, внеза́пу льсти́ваго умертви́в, умерщвле́н бы́л еси́, Не́сторе, и жи́зни сподо́бился еси́, Христу́ предстоя́.

Сла́ва, и ны́не, Богородичен:

Грехолюби́в сы́й, молю́ Тя, безгре́шнаго Бо́га ро́ждшую, взе́млющаго грехи́ ми́ра, Пречи́стая: многогре́шную ду́шу мою́ уще́дрити и грехи́ моя́ мно́гия очи́стити, гре́шных бо Ты́ еси́ очище́ние и спасе́ние ве́рных, и заступле́ние.

КрестоБогородичен:

От Безнача́льнаго Отца́ Рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, увы́ Мне́, любе́знейший Иису́се, вопия́ше, ка́ко сла́вимый я́ко Бо́г от Ангел, от беззако́нных ны́не челове́к, Сы́не, хотя́, распина́ешися? пою́ Тя, Долготерпели́ве.

Пе́снь 4.

Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.

Припев: Святый мучениче Несторе, моли́ Бо́га о нас.

Дими́триевыми озари́вся светолу́чными уче́нии, е́ллинския суеты́ мра́ка отбе́гл еси́, и муче́ния све́том облиста́лся еси́.

Припев: Святый мучениче Несторе, моли́ Бо́га о нас.

Неве́рия сла́ное возмути́л еси́ мо́ре сла́достию твоея́, му́чениче, благи́я ве́ры, нечести́вых во́инства глубино́ю твои́х крове́й потопи́л еси́.

Сла́ва Отцу́ и Сы́ну и Свято́му Ду́ху:

Воздвиза́емо к жи́зни яви́лся еси́ дре́во, благопло́дием пита́я по́двиг твои́х ве́рных полноту́, Не́сторе Христо́в, му́чеников хвала́.

И ны́не и при́сно и во ве́ки веко́в. Ами́нь.

Богородичен: Очисти́лище мне́ бу́ди грехо́в и да́ждь мне́ ру́ку по́мощи, бе́дствующему, Всесвята́я Влады́чице, христиа́н тве́рдое заступле́ние.

Пе́снь 5

Ирмос: Утро све́тлое на́м посли́ я́ко Бла́г и наста́ви ны́ в стра́х Тво́й, Влады́ко.

Припев: Святый мучениче Несторе, моли́ Бо́га о нас.

Словесы́ боже́ственнаго ра́зума по́мысл напои́в, муче́ния кла́с зре́л, сла́вне Не́сторе, израсти́л еси́.

Припев: Святый мучениче Несторе, моли́ Бо́га о нас.

Исцеле́нием слове́с твои́х, о Дими́трие, му́чениче Христо́в, безбо́жия беззако́ние вели́кое Не́стор уста́вил е́сть.

Сла́ва Отцу́ и Сы́ну и Свято́му Ду́ху:

Ко врагу́ ви́димому спле́тся, Бо́жию неви́димо по́мощь стяжа́л еси́, Не́сторе сла́вне.

И ны́не и при́сно и во ве́ки веко́в. Ами́нь.

Богородичен: Ра́дуйся, Ро́ждшая Бо́га на́шего без се́мене; ра́дуйся, еди́на Богома́ти Пречи́стая; ра́дуйся, Неве́сто неневе́стная.

Пе́снь 6.

Ирмос: Бу́ря мя́ помышле́ний пости́гши, во глубину́ низвлачи́т мя́ безме́рных грехо́в, но Ты́, Упра́вителю Благи́й, предвари́в, упра́ви, я́ко проро́ка, и спаси́ мя.

Припев: Святый мучениче Несторе, моли́ Бо́га о нас.

Печа́тию назна́менав твое́ се́рдце, до́блественно уязви́л еси́ му́жества твоего́ копие́м, се́рдце Ли́ево, страда́льче. И, ра́дуяся, умерщвля́ешися за все́х Жи́знь, Иису́са.

Припев: Святый мучениче Несторе, моли́ Бо́га о нас.

Яко жени́х, от черто́га пло́ти твоея́, му́дре, изше́л еси́, оде́ждами, истка́нными от крове́й твои́х, му́чениче, свяще́нных, я́сно украша́емь, и Влады́це предста́л еси́ Христу́.

Сла́ва Отцу́ и Сы́ну и Свято́му Ду́ху:

Возвы́сив на ка́мени твоя́ но́ги благоче́стия, поста́ви Христо́с Жи́зни ка́мень и напра́ви, Не́сторе, к Себе́ стопы́ твоя́ и враги́ твоя́ посрами́.

И ны́не и при́сно и во ве́ки веко́в. Ами́нь.

Богородичен: Расто́ргни плени́цы мои́х прегреше́ний, Яже Бо́га ро́ждшая, взе́млющаго ми́ра гре́х, Де́во Мари́е, на Тя́ бо наде́жду спасе́ния возложи́х.

Конда́к, гла́с 2.

Страда́льчествовав до́бре, безсме́ртную сла́ву насле́довал еси́ ны́не, я́ко во́ин изря́дный Влады́ки бы́л еси́, моли́твами Дими́трия му́ченика: с ни́м у́бо, Не́сторе му́дре, моля́ не преста́й о все́х на́с.

Икос:

В пу́ть Госпо́день от младе́нства ше́ствовал еси́, треблаже́нне, и Того́ благоче́стно свиде́тельств возжеле́л еси́, и кре́ст на ра́мена, Не́сторе богому́дре, усе́рдно взе́м, пре́лесть лю́тую идолонеи́стовства разори́л еси́, сокруши́в и сте́р Ли́евы ко́зни и ловле́ния. Те́мже ве́рою притека́ем в тво́й кро́в, вопию́ще: пребога́те, моли́ Христа́ Бо́га о все́х на́с.

Пе́снь 7.

Ирмос: Глаго́лавый на горе́ с Моисе́ом и о́браз де́вства явле́й в купине́, благослове́н еси́, Бо́же оте́ц на́ших.

Припев: Святый мучениче Несторе, моли́ Бо́га о нас.

Озари́вый ве́рных сердца́ заре́ю подвиго́в страстоте́рпца, благослове́н еси́, Го́споди, Бо́же оте́ц на́ших.

Припев: Святый мучениче Несторе, моли́ Бо́га о нас.

Нече́стия угаси́в пла́мень росо́ю крове́й твои́х, боже́ственный му́чениче Не́сторе, пое́ши: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Же́ртву жи́ву в воню́ благово́ния Го́споду прине́с, му́чениче Не́сторе, благослове́н еси́, взыва́л еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Святе́йши херуви́м яви́лася еси́, ро́ждшая Пресвято́е Бо́га Сло́во, Всесвята́я Влады́чице, на́с освяща́ющаго.

Пе́снь 8.

Ирмос: Земля́ и вся́, я́же на не́й, мо́ре и вси́ исто́чницы, небеса́ небе́с, све́т и тма́, мра́з и зно́й, сы́нове челове́честии, свяще́нницы, благослови́те Го́спода и превозноси́те Его́ во ве́ки.

Припев: Святый мучениче Несторе, моли́ Бо́га о нас.

Земля́ кро́вь твою́ честну́ю прия́т, пролия́вшуюся за Христа́, небеса́ же ду́шу, я́коже неве́сту укра́шену, му́чеников же ли́цы и пра́ведных все́х ду́си ра́достию срето́ша тя́, му́чениче.

Припев: Святый мучениче Несторе, моли́ Бо́га о нас.

О, души́ твоея́ боголюби́выя, сме́рть привре́менную в ничто́же вмени́вшия, но е́же жи́ти в Го́споде избра́вшия! О, боже́ственнаго му́жества, нему́жества враго́в крепча́йша! Не испове́дающих бо Христа́ обличи́л еси́.

Сла́ва Отцу́ и Сы́ну и Свято́му Ду́ху:

По́двигом твои́м до́брым подвиза́вся, тече́ние и́стинно, му́чениче, сконча́л еси́, му́дре, и соблю́л еси́ твою́ ве́ру; про́чее тебе́ вене́ц пра́вды лежи́т, его́же тебе́ пода́ст Христо́с во ве́ки.

И ны́не и при́сно и во ве́ки веко́в. Ами́нь.

Богородичен: Не убою́ся враго́в ловле́ний, Тя́ име́я по́мощь, не убою́ся злы́х, к Тебе́ прите́к, Богороди́тельнице, в Тебе́ бо хвалю́ся и в Тебе́ пре́йду, Чи́стая, сте́ну греха́, спа́сся моли́твами Твои́ми.

Песнь 9

Ирмос: Яко сотвори́ Мне́ вели́чия Си́льный и свя́то и́мя Его́, и ми́лость Его́ в ро́д и ро́д боя́щимся Его́.

Припев: Святый мучениче Несторе, моли́ Бо́га о нас.

Багряни́цу, от кро́ве твоея́ очервле́ну, свяще́нно оде́ял еси́, и держа́ в десни́це, я́коже ски́птр, кре́ст, ца́рствуеши со Христо́м, Не́сторе блаже́нне.

Припев: Святый мучениче Несторе, моли́ Бо́га о нас.

Зре́л гро́зд яви́лся еси́ лозы́ мы́сленныя, точи́лы же муче́ния изгне́тся, умиле́ния на́м вино́ источи́л еси́, при́сно хва́лящим тя́.

Сла́ва Отцу́ и Сы́ну и Свято́му Ду́ху:

Лику́я со Ангелы пред лице́м Иису́совым и сла́вы насыща́яся Того́, творя́щих твою́ ве́рно, Не́сторе, па́мять честну́ю при́сно помина́й.

И ны́не и при́сно и во ве́ки веко́в. Ами́нь.

Богородичен: Све́та яви́лася еси́ прия́телище, разори́вшаго мглу́ дре́вняго неразу́мия и́стинно, свяще́ния хра́м, златы́й свети́льник, небе́с вы́шши, Чи́стая.

Свети́лен.

Безбо́жнаго велича́ние и вра́жию горды́ню Креста́ си́лою и моли́твами Дими́трия, сла́внаго му́ченика, низложи́л еси́, пе́рвее, Не́сторе, стра́сти победи́в, и му́ченик изря́ден яви́лся еси́ Христо́в, му́дре страда́льче.

Сла́ва, и ны́не, Богородичен:

Яко ору́жие непобеди́мое и сте́ну необори́му, и сто́лп вся́кия кре́пости, и спасе́ния приста́нище, и боже́ственное основа́ние вои́стинну, и мо́ст, преводя́й от земли́ к небе́сным, пое́м Тя́, Богоро́дице, Тобо́ю спаса́емии.

Молитва

О святы́й уго́дниче Бо́жий, му́чениче Не́сторе! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.