Шрифт

9 ноября.

Канон преподобному Димитрию Новому, Басарбовскому.

Преподобному Димитрию Новому, Басарбовскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, о́тче, изве́стно спасе́ся, е́же по о́бразу: прии́м бо кре́ст, после́довал еси́ Христу́, и де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней; те́мже и со Ангелы сра́дуется, преподо́бне Дими́трие, ду́х тво́й.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ непоро́чно поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шим.

Кано́н преподо́бнаго, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Димитрие, моли́ Бо́га о нас.

Све́тлую луче́ю Свята́го Ду́ха, Дими́трие, озаря́емь, озари́ восхваля́ющих тя́ любо́вию христиа́нскою в пе́снех, мона́хов похвало́, преподо́бных сла́во, басарбо́вская красото́ и ве́ры наказа́телю.

Припев: Преподобне отче Димитрие, моли́ Бо́га о нас.

Препобежда́я кры́ющагося в дре́ве врага́ попра́л еси́, и се́ти его́ легко́ прете́кл еси́ ору́жии ве́ры, лику́я, о́тче Дими́трие, и, ра́дуяся, жи́знь обыма́еши от дре́ва разуме́ния.

Сла́ва Отцу́ и Сы́ну и Свято́му Ду́ху:

Осиява́емь све́том благода́ти, во о́гнь вше́л еси́, я́коже трие́ о́троцы пребы́в несгара́емь, Бо́гу сохра́ньшу тя́, о́тче Дими́трие, и показу́ющу все́м последи́ иму́щее бы́ти успе́яние твое́ и просия́ние.

И ны́не и при́сно и во ве́ки веко́в. Ами́нь.

Богородичен: Стремле́нии неудержа́нными разлива́ся бя́ше на ны́, но прибли́жшася Ро́ждшемуся из Тебе́ и прира́зшися, разруши́ся и низложи́ся, Богоро́дице Де́во, присносу́щную бо Жи́знь вои́стинну воплоще́нно родила́ еси́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Димитрие, моли́ Бо́га о нас.

Ум ве́сь проти́ву страсте́м, преблаже́нне, положи́в, и́стины после́дователь показа́лся еси́, о́тче, те́мже я́ко фи́никс в пеще́ре процве́л еси́.

Припев: Преподобне отче Димитрие, моли́ Бо́га о нас.

В сле́д Христо́ва уче́ния ше́ствуя, из оте́ческаго ме́ста изше́л еси́, Дими́трие, и в пеще́ру все́лься, побе́ду на сопроти́внаго воздви́гл еси́, Бо́жией по́мощи укрепля́ющей тя́.

Сла́ва Отцу́ и Сы́ну и Свято́му Ду́ху:

Тве́рдостию ра́зума, преблаже́нне, укрепля́емь, вра́жия ко́зни победи́л еси́, Дими́трие, все́м та́ откры́в, вознесе́нную его́ бро́вь низложи́л еси́.

И ны́не и при́сно и во ве́ки веко́в. Ами́нь.

Богородичен: Спаси́тельнаго смотре́ния е́же о на́с Бо́г Сло́во, све́тлая две́рь Ты́, Ма́ти Де́во, показа́лася еси́ вои́стинну, Ты́ бо ввела́ еси́ на́м разу́мную лучу́ превысо́каго Божества́.

Седа́лен, гла́с 4.

Госпо́дню нищету́ возлюби́в, бога́тство преходя́щее возненави́дел еси́, сего́ ра́ди ве́чнующее Ца́рство стяжа́л еси́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Димитрие, моли́ Бо́га о нас.

Души́ устрое́ние очи́стив и разшири́в Боже́ственными виде́нии, вмести́лище дарова́ний Боже́ственных вои́стинну соде́лал еси́ ю́, богоблаже́нне, и прикоснове́нием ру́к твои́х неду́жныя исцеля́л еси́, подража́тель Влады́це бы́в.

Припев: Преподобне отче Димитрие, моли́ Бо́га о нас.

На тя́ лю́те свире́певшия, о́тче, поже́рты бы́ша, я́коже Дафа́н окая́нный и Авиро́н поги́бше: неви́димо бо тя́ Боже́ственная благода́ть сохраня́ше, пеку́щися о мно́зех, и́же тобо́ю спасо́шася, после́довавше уче́нием твои́м.

Сла́ва Отцу́ и Сы́ну и Свято́му Ду́ху:

В зако́не Бо́жии обуча́я чу́вства твоя́, боже́ственне, к разуме́нию безпло́тных разу́мную и преподо́бную твою́ мы́сль упра́вил еси́, непренемога́тельно преходя́ от сла́вы в сла́ву, и от си́лы, о́тче, в си́лу.

И ны́не и при́сно и во ве́ки веко́в. Ами́нь.

Богородичен: Новопроцве́тший и красе́н безсме́ртия ра́й яви́лася еси́ вои́стинну: Дре́во Жи́зни в Тебе́ насажде́нное, превысоча́йшаго Божества́ си́лою, во чре́ве нося́щи и ро́ждши, е́же все́м источа́ет жизноно́сныя наде́жды, благоче́стно ве́дущим Тя́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Димитрие, моли́ Бо́га о нас.

Мы́слию неукло́нною к Жела́нному ти́ простира́яся, от Него́ изоби́льно дарова́ние велича́йших чуде́с прия́л еси́, о́тче, и притека́ющия с ве́рою к ра́це моще́й твои́х исцеля́еши, о́тче Дими́трие.

Припев: Преподобне отче Димитрие, моли́ Бо́га о нас.

Бре́мя тя́жестей теле́сных отве́рг, сосу́д богодухнове́нен избра́ния Свята́го Ду́ха бы́л еси́, блаже́нне, воздержа́нием сне́дей и моли́твою, терпе́нием и смиренному́дрием украша́яся.

Сла́ва Отцу́ и Сы́ну и Свято́му Ду́ху:

Боже́ственней благода́ти живу́щей в тебе́, в слу́хи все́х разше́дшейся, и в прису́тствии наро́да сла́вно Боже́ственным явле́нием содева́ющимся, вся́ ве́рою притека́ющия к святы́м твои́м моще́м исцеля́еши, о́тче Дими́трие.

И ны́не и при́сно и во ве́ки веко́в. Ами́нь.

Богородичен: Ве́рных предста́тельнице, неруши́мая стено́ воспева́ющих Тя́, всему́ ро́ду челове́ческому спасе́ние яви́лася еси́, Бо́га бо родила́ еси́ пло́тию я́вльшагося, ду́шу мою́ спаси́, Пречи́стая.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Димитрие, моли́ Бо́га о нас.

Любо́вь к Бо́гу и бли́жнему стяжа́в, Дими́трие, писа́ние зако́на и проро́ков исполня́я, вся́ доброде́тели соверши́л еси́.

Припев: Преподобне отче Димитрие, моли́ Бо́га о нас.

Ревни́тель к боже́ственным бы́в на земли́, равноа́нгельную жи́знь себе́ стяжа́л еси́, и Христо́с че́сть тебе́ дарова́, и со святы́ми ли́ки твою́, преподо́бне, сочета́.

Сла́ва Отцу́ и Сы́ну и Свято́му Ду́ху:

Пло́д прему́дрости себе́ показу́я, нача́ла прему́дрости — стра́ха Бо́жия вожделе́л еси́, и́мже наставля́яся в о́но соверше́нство, ели́ко возмо́жно е́сть объя́ти челове́ком, о́тче, дости́гл еси́.

И ны́не и при́сно и во ве́ки веко́в. Ами́нь.

Богородичен: Спа́са и Изба́вителя, Бо́га вся́ческих и Го́спода, спожи́вшаго с на́ми, ро́ждшая пло́тию, изба́ви от бе́д призыва́ющия Тя́, Пречи́стая Влады́чице.

Конда́к, гла́с 8.

Яко же́ртва непоро́чная от младе́нства Бо́гу прине́слся еси́ доброде́телию, Дими́трие блаже́нне, садоде́латель бы́в благоче́стия, те́мже бы́л еси́ преподо́бных удобре́ние и похвала́, и мона́хов чу́до, достохва́льне, сего́ ра́ди вопие́м ти́: ра́дуйся, о́тче Дими́трие.

Икос:

Иго Госпо́дне ле́гкое вседу́шно на ра́мена взе́м, после́довал еси́ Ему́, преподо́бне, и молвы́ мирски́я возненави́дев, в пеще́ре, блаже́нне, усе́рдно страда́л еси́, и вся́ концы́ а́ки со́лнце просвети́л еси́, те́мже ве́рно к тебе́ зове́м такова́я: ра́дуйся, кра́сная басарбо́вская сла́во; ра́дуйся, свети́льниче ми́ра пресве́тлый; ра́дуйся, пеще́ры добре́йшее прозябе́ние; ра́дуйся, мона́шествующих пра́вило и исправле́ние; ра́дуйся, неду́гующих ско́рое утеше́ние; ра́дуйся, здра́вых непоколеби́мое утвержде́ние; ра́дуйся, я́ко на небеси́ со Ангелы пребыва́еши; ра́дуйся, я́ко мно́гим терпе́нием бы́л еси́ сосу́д Свята́го Ду́ха; ра́дуйся, Бо́жиих де́телей и́стинный храни́телю; ра́дуйся, все́х страсте́й отгна́ние; ра́дуйся, те́плый на́ш хода́таю; ра́дуйся, все́х ве́рных прибе́жище; ра́дуйся, о́тче Дими́трие.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Димитрие, моли́ Бо́га о нас.

Отве́ргл еси́ вре́менная, и с ли́ки небе́сными обита́еши, со Ангелы лику́еши, я́ко Ангельское житие́ пожи́в на земли́, с ни́миже и воспе́л еси́: благослове́н Бо́г оте́ц на́ших.

Припев: Преподобне отче Димитрие, моли́ Бо́га о нас.

Воспева́ют благода́рственная вси́ окре́стныя страны́ Басарбо́вския, иму́ще тя́ в себе́ граждани́на, прему́дре, и хва́лящеся взыва́ют ко Го́споду: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Непреста́нно моли́ся о на́с, Дими́трие богому́дре, и приле́жно проси́, да всегда́ ревну́юще тебе́, плоды́ доброде́телей прино́сим, и любо́вию зове́м: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́во Чи́стая, Неискусобра́чная, Свята́я, Благослове́нная, па́дших исправле́ние, согреша́ющих исправле́ние, спаси́ мя блу́днаго, спаси́, Сы́ну Твоему́ зову́ща: благослове́н еси́, Бо́же оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Димитрие, моли́ Бо́га о нас.

Со весе́лием, преподо́бне, ли́ки святы́х пречи́стую твою́ ду́шу причто́ша в ме́сте упокое́ния, иду́щу в селе́ния све́тлая, иде́же ли́ки пра́ведных водворя́ются, с ни́миже ны́не пое́ши: свяще́нницы, благослови́те, лю́дие, превозноси́те Христа́ во ве́ки.

Припев: Преподобне отче Димитрие, моли́ Бо́га о нас.

Самоизво́льно труда́ми порабо́тив себе́, посто́м и бде́нием те́ло твое́ удруча́я, о преблаже́нне, я́ко да лука́ваго врага́ и губи́теля ро́да челове́ческаго во вся́ смири́ши, сего́ ра́ди вене́ц побе́ды нося́, с весе́лием пое́ши: вся́ дела́ Го́спода по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Ра́достно па́мять твою́ соверша́ем, прехва́льне: в доброде́тель бо радостотво́рну обле́клся еси́ и́стинно, в ри́зу спасе́ния, и во оде́жду чи́сту и све́тлу весе́лия, е́юже ны́не красу́яся, пое́ши непреста́нно: лю́дие, превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Неискусобра́чно родила́ еси́ и де́вою пребыла́ еси́, и стра́нным рождество́м Твои́м совокупи́ла еси́ вся́, дре́внюю вражду́ ро́да на́шего примиря́я, Христа́ мирода́вца носи́вшая во объя́тиих Твои́х, Его́же ве́рно благословя́ще, любо́вию пое́м Тя́, еди́ну Богоро́дицу.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Димитрие, моли́ Бо́га о нас.

Благоуха́ет ра́ка твоя́ духо́вным благово́нием изоби́льно, веселя́ ча́да твоя́, окружа́ющая тя́ со усе́рдием, и́же прославля́ют Ангелы житие́ твое́, да́нную тебе́ све́тлость, сла́ву же и красоту́ пребыва́ющую.

Припев: Преподобне отче Димитрие, моли́ Бо́га о нас.

Све́т святы́х на небесе́х тебе́, я́ко пра́веднику, возсия́, о́тче: Христа́ бо пра́вду и́стинну явле́ннейше возлюби́л еси́, Его́же испыту́я житие́, после́довал еси́, преблаже́нне, по возмо́жности твое́й, жизноно́сной Его́ святы́не.

Сла́ва Отцу́ и Сы́ну и Свято́му Ду́ху:

Мно́гим све́том сия́я, богоно́се, и ли́ки Ангел зря́ пресве́тле, обходя́ща о́крест Тро́ичнаго Све́та, и прие́млюща благода́ть боговиде́ния, непреста́нно моля́ся дарова́ти оставле́ние грехо́в пою́щим тя́.

И ны́не и при́сно и во ве́ки веко́в. Ами́нь.

Богородичен: Яви́лася еси́, о Де́во Ма́ти Бо́жия, па́че естества́ ро́ждши пло́тию Сло́во, Его́же от се́рдца Своего́ Оте́ц позна́ пре́жде все́х ве́к, я́ко Бла́г, Его́же ны́не и превы́шше пло́ти ве́мы, а́ще и в пло́ть облече́ся.

Свети́лен.

От руки́ Зижди́телевы восприя́л еси́, преподо́бне, вене́ц трудо́в твои́х, и во оби́тели пра́ведных водворя́ешися, Дими́трие, зре́ния лица́ Влады́чня, и трисвята́го Ангельскаго пе́ния наслажда́яся.

Молитва

О свяще́нная главо́, преподо́бне о́тче, преблаже́нне а́вво Димитрие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Димитрию Новому, Басарбовскому