9 ноября.
Канон иной святому благоверному князю Андрею Смоленскому, Переяславскому чудотворцу.
![Святому благоверному князю Андрею Смоленскому, Переяславскому Святому благоверному князю Андрею Смоленскому, Переяславскому](img_i/023.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Блаже́нство ева́нгельское возлюби́в, богому́дре кня́же Андре́е, чистоту́ се́рдца де́вством почти́л еси́ и, суету́ ми́ра сего́ презре́в, устреми́лся еси́ зре́ти Бо́га, Иже тя́ просла́ви чудесы́ во врачева́нии разли́чне стра́ждущих. Сего́ ра́ди мо́лим тя́: проси́ на́м у Христа́ Го́спода, вся́ких скорбе́й избавле́ния и получе́ние Ца́рства небе́снаго.
Ин тропа́рь, гла́с 2:
Гра́д тво́й Смоле́нск я́ко чу́ждь име́я, водвори́лся еси́ во гра́д Переясла́вль, и в дому́ святи́теля Никола́я жесто́ким житие́м вре́менную жи́знь соверши́в, восте́кл еси́ в го́рняя предстоя́ти Христу́, Его́же моли́ о творя́щих па́мять твою́, да вси́ вопие́м ти́: ра́дуйся, свя́те кня́же Андре́е, Ангелом собесе́дниче и челове́ком помо́щниче.
Величание:
Ублажа́ем тя́, благове́рный вели́кий кня́же Андре́е, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.
Стихи́ра, гла́с 6:
Челове́че Бо́жий и кня́же чу́дный! Ты́, возше́д на ле́ствицу доброде́телей, возше́л еси́ по не́й к Го́рнему Иерусали́му и та́мо узре́л еси́ жела́емаго Христа́, Его́же ра́ди пло́ть твою́ изнури́л еси́ и те́ло ме́ртвенное на безсме́ртную жи́знь измени́л еси́, о на́с непреста́нно моли́ся, дарова́ти душа́м на́шим ми́р и ве́лию ми́лость.
Ин кано́н, гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припе́в: Святы́й благове́рный кня́же Андре́е, моли́ Бо́га о на́с.
Высоко́ житие́ име́я и восхожде́нии Боже́ственными ве́сь све́тел бы́в, просвеще́ние ми́ испроси́, похваля́ющу честны́я твоя́ по́двиги, и́миже до́бре пожи́в, получи́л, и́хже наде́ялся еси́, блаже́нне кня́же Андре́е.
Припе́в: Святы́й благове́рный кня́же Андре́е, моли́ Бо́га о на́с.
Мироуха́нная любя́ уче́ния и во чте́нии святы́х Писа́ний упражня́яся, сласте́й уклони́лся еси́, блаже́нне, смра́дных и безче́стных, и облагово́нился еси́, Боже́ственными дарова́ньми удобря́яся.
Сла́ва Отцу́ и Сы́ну и Свято́му Ду́ху:
Дрема́ние ве́ждома от души́, блаже́нне, отгна́л еси́, бдя́, и Бо́гу присоединя́яся всено́щными стоя́нии, непрекло́нен ну́ждами есте́ственными. Те́мже ко дню́ невече́рнему преше́л еси́.
И ны́не и при́сно и во ве́ки веко́в. Ами́нь.
Богородичен: Яко черто́г одушевле́нный Бо́жий, кади́льницу разу́мнаго и светоно́снаго Угля, Приснора́дованную блажи́м Богоро́дицу, зову́ще: ра́дуйся, всего́ ми́ра воззва́ние.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припе́в: Святы́й благове́рный кня́же Андре́е, моли́ Бо́га о на́с.
Глаго́лом живото́чным внима́я, испи́л еси́ во́ду спасе́ния, возгнуша́вся го́рькаго греха́, и поя́ глаго́лал еси́ Бо́гу, кня́же Андре́е: я́ко не́сть свя́т, па́че Тебе́, Го́споди.
Припе́в: Святы́й благове́рный кня́же Андре́е, моли́ Бо́га о на́с.
Ми́лование стяжа́л еси́ христоподо́бно, разда́л еси́ бога́тство тре́бующим, небе́снаго бога́тства восхоте́в, е́же и получи́л еси́, вопия́, кня́же Андре́е: я́ко не́сть свя́т, па́че Тебе́, Го́споди.
Сла́ва Отцу́ и Сы́ну и Свято́му Ду́ху:
Присво́ився Зижди́телю, любо́вию Боже́ственною прия́л еси́ небе́сное насле́дие, дре́ва Живо́тнаго получи́ти сподо́бился еси́, блаже́нне, благотворе́нием обожа́яся и поя́: я́ко не́сть свя́т, па́че Тебе́, Го́споди.
И ны́не и при́сно и во ве́ки веко́в. Ами́нь.
Богородичен: Су́щи Ангел честне́йшая, Зижди́теля бо Ангелов во Твою́ боку́ носи́ла еси́ и родила́ еси́, Богома́ти, на избавле́ние челове́ком, пою́щим Тя́: я́ко не́сть Пречи́стыя, ра́зве Тебе́, Влады́чице.
Седа́лен, гла́с 8:
Удиви́ся в ми́ре житие́ твое́, преблаже́нне свя́те кня́же Андре́е, страсте́м бо поревнова́в Спа́са своего́, распя́лся еси́ ми́ру, презря́ всю́ земну́ю сла́дость и сла́ву. Те́м и вене́ц сугу́б прия́л еси́ от Подвигополо́жника Христа́ Бо́га, Его́же моли́ о на́с, творя́щих пречестну́ю па́мять твою́.
Сла́ва, и ны́не, Богородичен:
Се́ Тебе́ ро́ди родо́в славосло́вят, я́коже прорекла́ еси́, Отрокови́це, Созда́теля бо все́х была́ Боже́ственный хра́м и пала́та, в Не́йже всели́ся Вы́шний и обложи́ся пло́тию, да спасе́т на́с.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припе́в: Святы́й благове́рный кня́же Андре́е, моли́ Бо́га о на́с.
Пресели́вся, блаже́нне, от оте́чества твоего́ во гра́д Переясла́вль, в не́мже пребыва́я, пло́ть твою́ злострада́нием изнури́л еси́ и вре́менную жи́знь на безсме́ртную премени́л еси́, иде́же ны́не со Ангелы ликовству́еши.
Припе́в: Святы́й благове́рный кня́же Андре́е, моли́ Бо́га о на́с.
Красне́йш процве́л еси́, блаже́нне, я́ко кри́н, доброде́тельми в дому́ Бо́жии, напо́лнил еси́ сво́й гра́д чудесы́ и яви́лся еси́ хода́тай на́ш, свя́те, ко Го́споду моли́твами твои́ми.
Сла́ва Отцу́ и Сы́ну и Свято́му Ду́ху:
Соде́ла тя́ Госпо́дь хра́м Пресвято́му Ду́ху, ду́шу бо твою́ чи́сту соблюде́ и добро́тою украси́в в дому́ чу́днаго святи́теля Никола́я, с ни́мже, свя́те, о на́с при́сно моли́ся.
И ны́не и при́сно и во ве́ки веко́в. Ами́нь.
Богородичен: Седя́й на Престо́ле превознесе́нне, я́ко Престо́л Тя́ име́я, Пречи́стая Де́во, Мари́е, Богоневе́сто Влады́чице; херуви́мов бо честне́йшая и серафи́м сла́внейшая яви́лася еси́, Чи́стая, на руку́ бо Твое́ю почи́ препросла́вленный Бо́г на́ш.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припе́в: Святы́й благове́рный кня́же Андре́е, моли́ Бо́га о на́с.
Уподо́бился еси́ распе́ншемуся во́лею на дре́ве Христу́ Бо́гу на́шему, всече́стне, сраспе́нся Ему́ вся́ким воздержа́нием и мно́гими добродея́нми.
Припе́в: Святы́й благове́рный кня́же Андре́е, моли́ Бо́га о на́с.
Уподо́бился еси́ купцу́, и́щущему до́браго би́сера, и́же обре́т еди́н многоце́нен, ше́д, не скры́л еси́ в песце́ жития́ сего́, но умно́жив, тмо́ю тала́нт возрасти́л еси́, от него́же подае́ши дина́рь благода́ти неоску́дно.
Сла́ва Отцу́ и Сы́ну и Свято́му Ду́ху:
Возше́л еси́, богому́дре, на не́бо, я́коже Илия́ на колесни́це, доброде́тельми твои́ми, Ду́хом облегчава́емь, ны́не ве́рных сохрани́ от вся́каго искуше́ния.
И ны́не и при́сно и во ве́ки веко́в. Ами́нь.
Богородичен: Исцели́, Чи́стая, неду́гующаго ума́ моего́ омраче́ние, пра́веднаго сего́ моли́твами, Ты́ бо, Пренепоро́чная Влады́чице, породила́ еси́ Христа́ на спасе́ние ве́рных.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припе́в: Святы́й благове́рный кня́же Андре́е, моли́ Бо́га о на́с.
Непреткнове́нно ше́ствуя стезя́ми Боже́ственнаго ра́зума, богому́дре, свы́ше наставля́емь, я́ко из купины́ тебе́ возгласи́ Госпо́дь в мы́сли твое́й, и а́бие получи́л еси́ страсте́й свобожде́ние си́лою Ду́ха.
Припе́в: Святы́й благове́рный кня́же Андре́е, моли́ Бо́га о на́с.
Немо́кренно преплы́л еси́ жития́ сего́ свире́пую пучи́ну, в не́йже погрузи́л еси́ главу́ па́губнаго зми́я, тво́й же, блаже́нне, кора́бль направля́емь руко́ю Держа́щаго вся́, Иже у́чит челове́ки не уклоня́тися к паде́нию Ада́мля зла́го нра́ва грехо́вна.
Сла́ва Отцу́ и Сы́ну и Свято́му Ду́ху:
Исто́чник приснотеку́щий яви́лся еси́, блаже́нне, чуде́сную благода́ть источа́ющь и неду́ги от челове́к отгоня́ющь, держа́ву вра́жию и си́лу низложи́л еси́, и по́чести побе́ды вене́ц от руки́ Бо́жия прия́л еси́, пребога́те.
И ны́не и при́сно и во ве́ки веко́в. Ами́нь.
Богородичен: Госпо́дь си́л с Тобо́ю, Пречи́стая, я́коже изво́лил е́сть, бы́в Отрокови́це, все́х на́с от о́бласти льсти́ваго хода́тайством Твои́м изба́вил е́сть: те́мже Тя́ по до́лгу ро́дове родо́в при́сно ублажа́ют.
Конда́к, гла́с 8:
Насажде́н во дво́рех Госпо́дних, свои́ми преподо́бными де́тельми в дому́ свята́го чудотво́рца Никола́я кра́сно процве́л еси́, ми́ра красоту́ и сла́ву сего́ све́та ни во что́ вмени́в, еди́наго Христа́ возлюби́л еси́; сле́з твои́х тече́нием напая́емь, уязви́лся еси́ жела́нием бу́дущих даро́в. Те́мже зове́м ти́: ра́дуйся, свя́те кня́же Андре́е, гра́ду Переясла́влю похвала́ и все́й Росси́йстей земли́ вели́кое утвержде́ние.
Икос:
Челове́к у́бо бы́сть естество́м, но яви́ся сограждани́н и собесе́дник Ангелом, на земли́ я́ко безпло́тен пожи́в, плотско́е все́ помышле́ние отве́ргл еси́, те́мже и мы́, земни́и, зове́м ти́, глаго́люще: ра́дуйся, отца́ благочести́ваго сы́не; ра́дуйся, от ма́тере роди́выйся благове́рныя; ра́дуйся, я́ко от ю́ности после́довал еси́ Христо́ви; ра́дуйся, я́ко увяди́л еси́ вся́ плотски́я стра́сти; ра́дуйся, я́ко прише́ствием твои́м гра́д Переясла́вль освяти́вый; ра́дуйся, я́ко в не́м житие́м твои́м пу́ть на́м ко спасе́нию показа́вый; ра́дуйся, я́ко чудесы́ твои́ми вся́ лю́ди удивля́еши; ра́дуйся, я́ко от честна́го гро́ба твоего́ то́ки целе́б излива́еши; ра́дуйся, благочести́вейшим Царе́м и Вели́ким Князе́м похвала́ и блюсти́телю; ра́дуйся, те́плый на́ш предста́телю и от вся́кия ско́рби изба́вителю; ра́дуйся, свя́те Андре́е, вели́кий кня́же, гра́ду Переясла́влю и все́й Росси́йстей земли́ похвало́ и вели́кое утвержде́ние.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припе́в: Святы́й благове́рный кня́же Андре́е, моли́ Бо́га о на́с.
Проше́л еси́ му́жественно плотско́е мудрова́ние посто́м кре́пким и умо́м смиренному́дрым, кре́стным ору́жием победи́л еси́ го́рдаго зми́я лука́ваго, кня́же Андре́е пребога́те, на него́же и на́м бу́ди помо́щник.
Припе́в: Святы́й благове́рный кня́же Андре́е, моли́ Бо́га о на́с.
Якоже просла́вил еси́ Го́спода де́лы благи́ми, непоро́чно соблю́д боже́ственная Его́ повеле́ния, та́ко и Он просла́ви и упоко́и тя́ в не́дрех Авраа́млих, иде́же на́с, чту́щих тя́, помина́й.
Сла́ва Отцу́ и Сы́ну и Свято́му Ду́ху:
Ра́дуйтеся, Росси́йстии кня́зи, и вси́ христолюби́вии лю́дие ве́село ликовству́йте, свяще́ннии собо́ри собери́теся во святы́й хра́м, иде́же лежа́т многоцеле́бныя мо́щи на́шего засту́пника, богоно́снаго кня́зя Андре́я Смоле́нскаго, моля́ще его́, я́ко да бу́дет на́м помо́щник в се́м житии́ и в де́нь Су́дный.
И ны́не и при́сно и во ве́ки веко́в. Ами́нь.
Богородичен: Преукра́шена боже́ственною сла́вою Ты́ еси́, Пречи́стая, еди́на бо от ве́ка Сло́во Бо́жие, заче́нши, родила́ еси́ и яви́лася еси́ Ма́ти и Де́ва, благослове́нна в жена́х Всенепоро́чная Мари́е Влады́чице.
Пе́снь 8.
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припе́в: Святы́й благове́рный кня́же Андре́е, моли́ Бо́га о на́с.
Все́м се́рдцем Святе́й Тро́ице приложи́вся, блаже́нне кня́же Андре́е, и от Нея́ лучи́ боголе́пно прии́м, светови́ден бы́л еси́, и со Ангелы лику́еши и пое́ши: благослови́те вся́ дела́ Госпо́дня Го́спода.
Припе́в: Святы́й благове́рный кня́же Андре́е, моли́ Бо́га о на́с.
Невозвра́тно ше́ствовал еси́ к небеси́, блаже́нне, боже́ственными стезя́ми, от зле́ же веду́щих до конца́ уклони́лся еси́ умерщвле́нием пло́ти, преподо́бне, к Бо́гу взыва́я: благослови́те вся́ дела́ Госпо́дня Го́спода.
Сла́ва Отцу́ и Сы́ну и Свято́му Ду́ху:
Все́льшаяся благода́ть в ду́шу твою́, свя́те, сотвори́ тя бесо́м стра́шна, живу́щии бо в челове́цех нечи́стии ду́си моли́твами твои́ми прогони́мы быва́ют, вси́ же притека́ющии к тебе́ ве́рно спаса́ются и пою́т: благослови́те вся́ дела́ Госпо́дня Го́спода.
И ны́не и при́сно и во ве́ки веко́в. Ами́нь.
Богородичен: Вода́ еси́ неисчерпа́емая, Ты́ еси́, Богоро́дице Влады́чице, от Тебе́ бо пию́щии вси́ благода́ти исполня́ются, душа́ми и телесы́ освяща́ются и вопию́т: благослови́те вся́ дела́ Госпо́дня Го́спода.
Песнь 9
Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.
Припе́в: Святы́й благове́рный кня́же Андре́е, моли́ Бо́га о на́с.
Источа́ют, сла́вне, твоя́ мо́щи исцеле́ния, и стра́сти отгоня́ют от приходя́щих к тебе́ с ве́рою, прогони́ми бо быва́ют ду́хи лю́тыя: ты́ воздвиза́еши ве́рныя восхвали́ти све́тлыя твоя́ по́двиги.
Припе́в: Святы́й благове́рный кня́же Андре́е, моли́ Бо́га о на́с.
Яко вели́кое со́лнце, возсия́л еси́ вели́чием по́двиг твои́х и озари́л еси́ вся́ Ру́сския страны́, свобожда́я вся́ких напа́стей, душе́вных и теле́сных, моля́щи со проро́ки и апо́столы, с му́ченики и преподо́бными и богоно́сным Дании́лом, и все́ми святы́ми Христа́ Бо́га о все́х на́с.
Сла́ва Отцу́ и Сы́ну и Свято́му Ду́ху:
На́м, чту́щим тя́ и похваля́ющим по́двиги твоя́, испроси́, блаже́нне, моли́твами твои́ми у Христа́ Бо́га ны́не и во исхо́де ду́ш на́ших, и на Стра́шнем Суди́щи получи́ти ми́лость, я́ко и мы́ со все́ми вопие́м ти́: ра́дуйся, вели́кий кня́же Андре́е, Ангелов собесе́дниче и челове́ков помо́щниче.
И ны́не и при́сно и во ве́ки веко́в. Ами́нь.
Богородичен: Вели́кий во́ин невеще́ственных си́л Ангельских Тебе́, Всечи́стая Влады́чице, благовести́, ре́к: ра́дуйся, Благода́тная, Госпо́дь с Тобо́ю. Те́мже и мы́ Тебе́ вопие́м, Всесвята́я: ра́дуйся, Сы́на Бо́жия воплоще́ние, всего́ ми́ра свобожде́ние.
Свети́лен:
Треблаже́нне кня́же Андре́е, предстоя́ со Ангелы Христо́ву ны́не Престо́лу и све́та отту́ду исполня́яся, ми́ру ми́р исхода́тайствуй и на́м спасе́ние, благоче́стно и благоприя́тно па́мять твою́ соверша́ющим, и в ско́рбех к тебе́ притека́ющим.
Молитва первая благоверному князю Андрею Смоленскому, Переяславскому
О, преизря́дный и ди́вный в чудесе́х, прославля́емый от Бо́га в Небеси́, де́лателю Христо́ва виногра́да, жи́телю вы́шняго Сио́на, предустро́еннаго гра́да Иерусали́ма! Святы́х А́нгел при́сная ра́дость и челове́ком ди́вная бла́гость, пречу́дных и ди́вных Небе́сных селе́ний быв жела́тель, а ны́не со все́ми святы́ми тех еси́ совосприя́тель. А́ще естество́м ты, свя́те кня́же Андре́е, и был еси́ челове́к, но усе́рдно в по́двизех потща́вся и получи́л несконча́емый бу́дущий век. Стра́нен и прише́лец на земли́ был еси́, того́ ра́ди получи́л житие́ в Небеси́. Оста́вив оте́чество земно́е и тле́нное, восприя́л еси́ нетле́нное и ве́чное. Сугу́бо тя Госпо́дь Бог увенча́ и чуде́с тебе́ дар дарова́, е́же на земли́ неду́ги исцеля́ти и приходя́щим к тебе́ с ве́рою ми́лостивно присеща́ти; прояви́ бо тя нам Госпо́дь Бог милосе́рдый, я́ко оте́ц к боля́щим ча́дом благосе́рдый. Сего́ ра́ди ми́лися де́ем, предстоя́ще пред твои́м многоцеле́бным гро́бом, проси́ти и моли́ти тя недоуме́ем, да покры́еши нас гре́шных твои́м преди́вным покро́вом, не от зла́та и серебра́ истка́нным, но от Бо́га ти в благода́ти пода́нным. Предстои́м уми́льно пред твои́м гро́бом со стра́хом, оскверни́вшиися во гресе́ вся́ком; сего́ ра́ди сле́зы пролива́ем и уми́льно к тебе́ взыва́ем: поми́луй нас, о святы́й и ди́вный благове́рный вели́кий кня́же Андре́е, пода́ждь нам ру́ку по́мощи и Бо́жия ми́лости. Хода́тая тя к Бо́гу предлага́ем, от Него́же нам по́мощи жела́ем; ве́мы бо тя нело́жна раба́ Бо́жия, изба́ви нас от вся́каго наве́та вра́жия. Бу́ди о нас ми́лостивый защи́титель и от боле́зней на́ших скор исцели́тель. Свободи́ от руки́ чужда́го и от вся́каго прило́га зла́го. Мно́гими беда́ми есмы́ обстои́ми, все́ми злы́ми скорбьми́ сокруше́нши, к двере́м сме́ртным от ско́рби снидо́хом, и Бо́га греха́ми прогне́вахом, и от себе́ Его́ удали́хом. Сего́ ра́ди бу́ди нам вождь и засту́пник, хода́тай и защи́тниче, ко Го́споду на́шему Иису́су Христу́ и к Его́ милосе́рдому Отцу́ и Свято́му Ду́ху, в трие́х ипоста́сех еди́ному Бо́гу, да получи́м мы гре́шнии грехо́в проще́ние и от Него́ ми́лость мно́гу. Бу́ди, о свя́тче Бо́жий, спобо́рник и засту́пник всему́ Христолюби́вому во́инству на вся неправосла́вныя и крестоненави́стныя злочести́выя и иноплеме́нныя враги́ и супоста́ты, па́мять их злочести́выя ве́ры да потреби́тся, хра́брость же и си́ла и гра́ды да разру́шатся, Ру́сскую же на́шу страну́ не забу́ди, но при́сно на ню призира́й, и вся́каго изоби́лие плодо́в земны́х пода́ти Бо́га умоля́й, и всем призыва́ющим тя с ве́рою во вся́ких ско́рбех, боле́знех и напа́стех бу́ди вспомога́тель и скор исцели́тель. Да́руй же нам здра́вие неоску́дно и моля́щимся тебе́ по́мощь неосла́бну, благода́тию и щедро́тами и человеколю́бием Го́спода Бо́га и Спа́са на́шего Иису́са Христа́, Ему́же от нас бу́ди сла́ва и держа́ва, ны́не и во вся ве́ки несконча́емых веко́в. Ами́нь.
Молитва вторая благоверному князю Андрею Смоленскому, Переяславскому
О, святы́й благове́рный кня́же Андре́е, пода́ждь нам, раба́м Бо́жиим (имена), ру́ку по́мощи и изба́ви нас от вся́каго наве́та вра́жия: бу́ди нам ми́лостивый защи́титель и от боле́зней на́ших ско́рый цели́тель: свободи́ нас от руки́ чужда́го, и от вся́каго прило́га зла́го. Се бо мно́гими бедами есмы́ обстои́ми, все́ми злы́ми скорбьми́ сокруше́ннии, ко две́рем сме́ртным, от ско́рби снидо́хом и Бо́га грехми́ прогне́вахом и от себе́ Его́ удали́хом. Те́мже бу́ди нам вождь и засту́пник пред Го́сподем на́шим Иису́сом Христо́м, Ему́же сла́ву возсыла́ем со Безнача́льным Его́ Отце́м и Святы́м Ду́хом во ве́ки. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому благоверному князю Андрею Смоленскому, Переяславскому Святому благоверному князю Андрею Смоленскому, Переяславскому](img_b/023.jpg)