8 ноября.

Канон Воспоминанию великого и страшного трясения (землетрясения), бывшего в Царьграде в 740 году.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Вели́ка обре́те в беда́х тя́ побо́рника вселе́нная, страстоте́рпче, язы́ки побежда́юща. Якоже у́бо Ли́еву низложи́л еси́ горды́ню, и на по́двиг дерзнове́нна сотвори́в Не́стора, та́ко, свя́те Дими́трие, Христу́ Бо́гу моли́ся дарова́ти на́м ве́лию ми́лость.

Стихи́ра, гла́с 6:

Дне́сь созыва́ет на́с страстоте́рпца всеми́рное торжество́. Прииди́те у́бо, празднолю́бцы, све́тло пра́зднуим па́мять его́, глаго́люще: ра́дуйся, ри́зу нече́стия раздра́в ве́рою, му́жеством же Ду́ха себе́ обложи́в; ра́дуйся, упраздни́вый козноде́йства чужда́го, кре́постию да́нною тебе́ от Еди́наго Бо́га; ра́дуйся, и́же прободе́нными удесы́ блаже́нную стра́сть Христо́ву духо́вне на́м возживописа́в. Его́же моли́, страда́льцев удобре́ние Дими́трие, изба́витися на́м ви́димых и неви́димых вра́г и спасти́ся душа́м на́шим.

Кано́н трясе́ния, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Слава Тебе, Боже наш, слава Тебе.

Яко стра́шен гне́в Тво́й, от него́же на́с изба́вил еси́, Го́споди, не погре́б в земли́ все́ движе́ние на́ше, те́м благода́рственно Тя́ при́сно сла́вим.

Припев: Слава Тебе, Боже наш, слава Тебе.

Ра́дуяся на́шему всегда́ всеконе́чному исправле́нию, Влады́ко, я́коже ли́ст ху́д, коле́блеши всю́ зе́млю, в стра́х Тво́й ве́рныя утвержда́я, Го́споди.

Сла́ва Отцу́ и Сы́ну и Свято́му Ду́ху:

Изба́ви тру́са тяжча́йшаго вся́ ны́ и не да́ждь, Го́споди, поги́бнути всеконе́чно насле́дию Твоему́, мно́гими прогне́вавшему злы́ми Твое́ долготерпе́ние.

И ны́не и при́сно и во ве́ки веко́в. Ами́нь.

Богородичен: Ра́бски Тебе́ вопие́м, Ма́ти Бо́жия, обы́чныя ми́лости Твоя́ на гра́д и лю́ди ми́лостивно показу́ющи, тру́са тяжча́йшаго и тли́ на́с измени́.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Слава Тебе, Боже наш, слава Тебе.

Земля́ уязвля́ется, на́м зле́ залежа́щим, и при́сно гне́в Тво́й сподвиза́ющим на ны́, Ще́дре Всецарю́, но пощади́, Влады́ко, рабы́ Твоя́.

Припев: Слава Тебе, Боже наш, слава Тебе.

Стря́с, Го́споди, зе́млю, утверди́л еси́ па́ки, наказу́я и обраща́я не́мощь на́шу, утвержда́тися Твои́м Боже́ственным стра́хом хотя́, Преблаги́й.

Сла́ва Отцу́ и Сы́ну и Свято́му Ду́ху:

Ро́ждшаго сме́рть го́рькую, и тру́сы тяжча́йшия, и я́звы нестерпи́мыя, греха́, бра́тие, убежи́м и Бо́гу покая́ния о́бразы угоди́м.

И ны́не и при́сно и во ве́ки веко́в. Ами́нь.

Богородичен: Еди́на су́щи Блага́я, Преблаго́е Сло́во умоли́ приле́жно, настоя́щаго тру́са все́м изба́витися и гне́ва, Богоро́дице Чи́стая, мо́лимся.

Седа́лен трясе́ния, гла́с 4.

Согреши́вшия Тебе́ мно́го не презре́л еси́, но, наказа́в, ми́лостивно испра́вил еси́: Боже́ственным призира́нием Твои́м потря́с зе́млю, Влады́ко долготерпели́ве, ника́коже повреди́в вся́ рабы́ Твоя́ за милосе́рдие мно́гое. Те́м благода́рственными Тя́ гла́сы славосло́вим и со стра́хом сла́вим.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Слава Тебе, Боже наш, слава Тебе.

Коле́блеши, Го́споди, зе́млю, хотя́й стра́хом и́стинным все́м на́м, Влады́ко, утвержда́тися, коле́блемым прило́ги льсти́ваго борца́.

Припев: Слава Тебе, Боже наш, слава Тебе.

Боже́ственным манове́нием Твои́м коле́блеши вся́ческая и ужаса́еши сердца́ на земли́ живу́щих, Влады́ко; пра́веднаго у́бо Твоего́ гне́ва осла́би, Го́споди, во́лны.

Сла́ва Отцу́ и Сы́ну и Свято́му Ду́ху:

Ника́коже иму́щия во уме́ стра́ха Твоего́, устраша́еши двиза́нием всея́ земли́, еди́не Ми́лостиве, но обы́чно на на́с ми́лости Твоя́ удиви́.

И ны́не и при́сно и во ве́ки веко́в. Ами́нь.

Богородичен: Хра́м Тя́, Влады́чице, Бо́жий ве́дяще, во святе́м хра́ме Твое́м ру́ки уми́льныя подно́сим на моле́ние: ви́ждь озлобле́ние на́ше и пода́ждь по́мощь.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Слава Тебе, Боже наш, слава Тебе.

И ты́, се́рдце, поколе́блися ны́не, ви́дя Бо́жие преще́ние належа́щее, и возопи́й: пощади́ лю́ди Твоя́, Влады́ко Го́споди, и уста́ви пра́ведный гне́в Тво́й, Благоутро́бне.

Припев: Слава Тебе, Боже наш, слава Тебе.

Лю́ди и гра́д, я́же Твое́ю кро́вию стяжа́л еси́, Иису́се, не преда́ждь в поги́бель, во е́же смуща́тися земли́ тру́сом стра́шным: ли́к апо́стол мо́лит Тя́.

Сла́ва Отцу́ и Сы́ну и Свято́му Ду́ху:

От путе́й Твои́х, Влады́ко, пра́вых нра́вом укло́ншеся развраще́нным, в негодова́ние преложи́хом Тя́, ми́лостиваго и непамятозло́бнаго, но ми́лостив и ще́др бу́ди Твои́м рабо́м.

И ны́не и при́сно и во ве́ки веко́в. Ами́нь.

Богородичен: Ны́не по́мощи прии́де вре́мя, ны́не премене́нию потре́ба, Чи́стая, к Сы́ну Твоему́ и Го́споду, я́ко да уще́дрит согре́шшия ны́ и належа́щаго гне́ва изба́вит.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Слава Тебе, Боже наш, слава Тебе.

Не иму́ще, Влады́ко, дерзнове́ния моли́тися, смире́ннии, высоте́ Твое́й, избра́нныя Ангелы Твоя́ в те́плую подвиза́ем моли́тву; те́х ра́ди гне́ва Твоего́ изми́ ны.

Припев: Слава Тебе, Боже наш, слава Тебе.

Ны́не позна́хом, Го́споди, я́ко восхоте́л еси́ на́с, и ника́коже покры́л еси́ под зе́млю с согреше́нии лю́тыми многосогреши́вшия; те́м Тя́ благода́рно сла́вим.

Сла́ва Отцу́ и Сы́ну и Свято́му Ду́ху:

Повелева́еши колеба́тися основа́нием земли́, я́ко да мы́ преста́нем, смире́ннии, колеба́тися доброде́телей лу́чшаго стоя́ния и стра́хом Твои́м, Сло́ве, утверди́мся.

И ны́не и при́сно и во ве́ки веко́в. Ами́нь.

Богородичен: Свята́я Богоневе́сто, недоуме́нныя ны́не лю́ди уще́дри и ма́терними Твои́ми моли́твами, е́же на ны́ Бо́жие негодова́ние претвори́ вско́ре, мо́лим Тя́.

Конда́к трясе́ния, гла́с 6.

Изба́ви тру́са тя́жкаго все́х на́с, Го́споди, и я́звы нестерпи́мыя гре́х ра́ди на́ших. Пощади́, Го́споди,  лю́ди Твоя́, я́же стяжа́л еси́ Твое́ю Кро́вию, Влады́ко; и гра́д не преда́ждь в поги́бель тру́сом стра́шным, ино́го бо, ра́зве Тебе́, Бо́га не ве́мы. И воззови́ пою́щим: Аз е́смь с ва́ми, и никто́же на вы́.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Слава Тебе, Боже наш, слава Тебе.

Препе́т еси́, Го́споди долготерпели́ве, я́ко не умори́л еси́ рабо́в Твои́х тру́сом и колеба́нием стра́шным земли́, но устраши́л еси́, ища́й обрати́тися от зо́л, и жи́ти все́м на́м.

Припев: Слава Тебе, Боже наш, слава Тебе.

Стена́ние от се́рдца воспу́стим и сле́зы пролие́м, я́ко да ми́лостива Влады́ку обря́щем Христа́, сокруши́ти тру́сом вся́ ны́, за умноже́ние грехо́в претя́ща на́м.

Сла́ва Отцу́ и Сы́ну и Свято́му Ду́ху:

Увы́, воззове́м, и ру́це воспростре́м к Бо́гу Высоча́йшему, и преста́нем про́чее твори́ти зло́е: се́ Спа́с, негоду́я, коле́блет всю́ зе́млю, утверди́ти хотя́ ны́.

И ны́не и при́сно и во ве́ки веко́в. Ами́нь.

Богородичен: При́зри, Чи́стая, и спаси́ вся́ пою́щия Тя́, потреби́тися иму́щия во гне́ве Бо́жии, и я́ростию вели́кою и стра́шною ны́не наше́дшаго преще́ния, за мно́жества мно́гих грехо́в на́ших.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Слава Тебе, Боже наш, слава Тебе.

Пра́ведному Твоему́ сему́ гне́ву, Человеколю́бче, наше́дшу внеза́пно, смути́хомся и отча́янием всеконе́чным объя́хомся, негодова́вша на ны́ зря́ще Тебе́.

Припев: Слава Тебе, Боже наш, слава Тебе.

Возпростре́м ру́ки, ве́рнии, и о́чи к еди́ному Влады́це, спаса́ти могу́щему, зову́ще: Христе́, я́рость Твою́ отврати́ от на́с вско́ре, Человеколю́бец сы́й.

Припев: Слава Тебе, Боже наш, слава Тебе.

Ты́сящи Ангел, му́чеников сосло́вие, проро́к и апо́столов, преподо́бных, иера́рхов святы́й ли́к мо́лит Тя́, Влады́ко: пощади́ лю́ди Твоя́ смире́нныя.

Сла́ва Отцу́ и Сы́ну и Свято́му Ду́ху:

Ве́дый, Ще́дре, не́мощь на́шу, и удобопоползнове́нное все́х и неиспра́вленное, о́слаби гне́в, и смуще́ние ути́ши, Твое́ю ми́лостию уще́дри ми́р.

И ны́не и при́сно и во ве́ки веко́в. Ами́нь.

Богородичен: Ми́лостивая Богоро́дице, Ми́лостиваго ро́ждшая Спа́са, ви́ждь озлобле́ние и стена́ние люде́й Твои́х, и ускори́ умоли́ти, е́же уще́дрити ны́.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Слава Тебе, Боже наш, слава Тебе.

Се́ вси́ мы́ согреши́хом, и стра́шно у́бо земля́, не согре́шши, му́чится: наказу́я бо на́с, Человеколю́бец всю́ ту́ю коле́блет; прии́мем чу́вство и о спасе́нии свое́м попеце́мся.

Припев: Слава Тебе, Боже наш, слава Тебе.

Часо́в и ле́т сы́й Госпо́дь, в еди́ном мгнове́нии о́ка восхоте́в сте́рти рабы́ Твоя́, от мно́гаго же благоутро́бия Твоего́, Влады́ко, возбрани́лся еси́. Благодари́м Тебе́, безотве́тнии мы́, еди́не Человеколю́бче.

Припев: Слава Тебе, Боже наш, слава Тебе.

Тру́са, меча́, го́рькаго плене́ния, и язы́ческаго, Христе́, наше́ствия, паде́ния, и гла́да, па́губы, и озлобле́ния вся́каго ина́го, Ще́дре, изба́ви гра́д Тво́й и вся́ку страну́, ве́рно песносло́вящую Тя́.

Сла́ва Отцу́ и Сы́ну и Свято́му Ду́ху:

Земля́ безъязы́чне вопие́т, стеня́щи: почто́ мя злы́ми оскверня́ете мно́гими, вси́ челове́цы? ва́с бо Влады́ка щадя́, еди́ну мене́ уязвля́ет. Приими́те чу́вство и покая́нием Бо́га уми́лостивите.

И ны́не и при́сно и во ве́ки веко́в. Ами́нь.

Богородичен: Тли́ в рождестве́ не прии́мши, тле́ния, Де́во, измени́ вся́ ны́, и тру́са тяжча́йшаго, и ско́рби, утоля́ющи Влады́чнее негодова́ние Твои́м ма́терним премене́нием, Богора́дованная.

Свети́лен.

Го́споди, призира́яй на зе́млю с небесе́ и творя́й всю́ трясти́ся, изба́ви ны́ от тру́са, Богоро́дицы моли́твами, Юже дарова́л еси́ христиа́ном предста́тельницу.

Молитва

Благодари́м Тя, Го́споди Бо́же наш, о всех благодея́ниих Твои́х, я́же от пе́рваго во́зраста до настоя́щаго в нас, недосто́йных, бы́вших, о и́хже ве́мы и не ве́мы, о явле́нных и неявле́нных, я́же де́лом бы́вших, и сло́вом: возлюби́вый нас, я́коже и Единоро́днаго Твоего́ Сы́на о нас да́ти изво́ливый. Сподо́би и нас досто́йны бы́ти Твоея́ любве́. Даждь сло́вом Твои́м му́дрость и стра́хом Твои́м вдохни́ кре́пость от Твоея́ си́лы, и а́ще что хотя́ще или́ не хотя́ще согреши́хом, прости́, и не вмени́ и сохрани́ ду́шу на́шу свя́ту, и предста́ви ю́ Твоему́ престо́лу, со́весть иму́щу чи́сту, и коне́ц досто́ин человеколю́бия Твоего́. И помяни́, Го́споди, всех призыва́ющих и́мя Твое́ во и́стине: помяни́ всех, бла́га или́ сопроти́вная нам хотя́щих: вси бо челове́цы есмы́, и всу́е всяк челове́к. Те́мже мо́лимся Тебе́, Го́споди: пода́ждь нам Твоего́ благоутро́бия ве́лию ми́лость.