8 ноября

Канон святому великомученику Димитрию Мироточцу Солунскому (Фессалоникийскому)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся // дарова́ти нам ве́лию ми́лость.

Велича́ние:

Велича́ем тя, / страстоте́рпче святы́й, Дими́трие, / и чтим честна́я страда́ния твоя́, / я́же за Христа́ претерпе́л еси́.

Стихи́ра, глас 6:

Днесь созыва́ет нас страстоте́рпца всеми́рное торжество́. / Прииди́те у́бо, празднолю́бцы, / све́тло пра́зднуим па́мять его́, глаго́люще: / ра́дуйся, ри́зу нече́стия раздра́в ве́рою, / му́жеством же Ду́ха себе́ обложи́в. / Ра́дуйся, упраздни́вый козноде́йства чужда́го, / кре́постию да́нною тебе́ от еди́наго Бо́га. / Ра́дуйся, и́же прободе́нными удесы́ / блаже́нную страсть Христо́ву духо́вне нам возживописа́в. / Его́же моли́ страда́льцев удобре́ние, Дими́трие, / изба́витися нам ви́димых и неви́димых враг, // и спасти́ся душа́м на́шим.

Други́й кано́н, глас 8.

Песнь 1

Ирмос: Колесницегони́теля фарао́ня погрузи́, / чудотворя́й иногда́ / Моисе́йский жезл, крестообра́зно порази́в, / и раздели́в мо́ре, / Изра́иля же беглеца́, пешехо́дца спасе́, // песнь Бо́гови воспева́юща.

Припе́в: Святы́й великому́чениче Дими́трие, моли́ Бо́га о нас.

Ми́ра благово́нна и че́стна, Дими́трие, / отве́рзеный исто́чниче, / страсте́й скве́рны се́рдце мое́ омы́й, / и, доброде́телей дея́нием благово́ние мя показа́в Христо́во, / ум мой облагода́тстви, / благода́ти твоя́ Боже́ственныя пе́ти.

Припе́в: Святы́й великому́чениче Дими́трие, моли́ Бо́га о нас.

Воды́ живы́я ре́ки / истека́ти от чре́ва ве́рных, / Сло́во Бо́жие глаго́лет. / Те́мже твоего́ пролива́ются ми́ра исто́чницы приснотеку́щии, / и́хже струи́ веселя́т Бо́жий град, / сла́вящий му́ченическое дерзнове́ние твое́.

Припе́в: Святы́й великому́чениче Дими́трие, моли́ Бо́га о нас.

Жезл у́бо дре́вле Моисе́ев, / уда́рив ка́мень в земли́   пусты́нней, / отве́рзе струи́ рек многоте́чныя; / те́ло же твое́, Дими́трие, прободе́нное копие́м, / ми́ра исто́чник показа́, / но́ваго Изра́иля прохлажда́юще.

Сла́ва Отцу́ и Сы́ну и Свято́му Ду́ху:

Я́же у́бо и́маши воздая́ния, Дими́трие, / му́ченических твои́х язв, / ниже́ о́ко ви́де, ниже́ у́хо слы́ша; / ны́не же ми́ра мо́ре, воздая́ния чистоты́ пролива́еши ми́ра конце́м, / стра́сти душ очища́ющее.

И ны́не и при́сно и во ве́ки веко́в. Ами́нь.

Богородичен: Пренескве́рно прия́телище, Всечи́стая, / Сло́во обре́т Тя Бо́жие, / в Твоя́ всели́ся ложесна́: / и е́же из Тебе́ прия́тие пома́зав Свои́м Божество́м, / Еди́н про́йде от двою́, / и истоще́нное ми́ро нарече́ся, / Христо́с бо Бог же и Челове́к.

Песнь 3

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, // Еди́не Человеколю́бче.

Припе́в: Святы́й великому́чениче Дими́трие, моли́ Бо́га о нас.

Роди́вся с Небе́с от Бо́га, / был еси́ Боже́ственных благ насле́дник, / сын нарица́емь, снасле́дник Христо́в, / ца́рствуеши же с Ним, / ми́ро бо о́браз сего́, Дими́трие.

Припе́в: Святы́й великому́чениче Дими́трие, моли́ Бо́га о нас.

Вкорени́вся, я́коже дре́во Дави́дски, сла́вне, / при исхо́дищих вод, / вели́к возда́л еси́ муче́ния плод, и ны́не исто́чник показа́лся еси́ ми́ра, / проходя́щ земли́ концы́.

Сла́ва Отцу́ и Сы́ну и Свято́му Ду́ху:

Поче́рп благода́ть Христо́ву, / ребра́ с Кро́вию источи́вшаго во́ду, / кровь излия́л еси́ твою́, Его́ ра́ди пробо́дся; / и ны́не, я́ко во́ду, пролива́еши сердца́м благово́нное ми́ро, Дими́трие.

И ны́не и при́сно и во ве́ки веко́в. Ами́нь.

Богородичен: Свяще́ннии твои́ сосу́ди душе́внии, Пречи́стая, / по́лны арома́т, и ми́ра Боже́ственнаго Ду́ха, наше́дшаго  на Тя, / и́бо Бо́га ро́ждши, ве́рныя измени́ла еси́ от злово́ния страсте́й.

Седа́лен му́ченика, глас 4.

Я́ко до́блему страда́льцу, / и во́ину кре́пку Всецарю́ющаго Христа́, / взыва́ем псало́мски: / ра́дуйся, му́чеников украше́ние и ле́пота; / ра́дуйся, све́тлая Це́ркве звездо́, / и стено́, и приста́нище прибега́ющих к тебе́, / великому́чениче сла́вне Дими́трие, / тя пою́щия спаса́й / от вся́каго вре́да чужда́го и озлобле́ния вся.

Песнь 4

Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча, / и на́шу нищету́ посети́в. / Тем с проро́ком Авваку́мом зову́ Ти: // си́ле Твое́й сла́ва, Человеколю́бче.

Припе́в: Святы́й великому́чениче Дими́трие, моли́ Бо́га о нас.

Скве́рну вся́ку отве́рг рожде́ния, ба́нею порожде́ния, / чистоту́, яви́лся еси́, соблюда́я да́же до кончи́ны. / Те́мже Христо́с тебе́, Дими́трие, / есте́ственную вла́гу претворя́ет в ми́ро, / я́коже и во́ду в вино́ преложи́.

Припе́в: Святы́й великому́чениче Дими́трие, моли́ Бо́га о нас.

Я́коже огня́ естество́ всему́ преподае́тся, / це́лу спаса́ющ си́лу; / та́ко твое́ ми́ро, страда́льче, все́ми у́бо почерпа́ется, / оба́че же пребыва́ет неума́лено. / Те́мже ны́не благоче́ствующии, покланя́ющеся, пое́м Бо́га, / И́же благода́ть тебе́ даде́.

Припе́в: Святы́й великому́чениче Дими́трие, моли́ Бо́га о нас.

Кто слы́шаны Твоя́ хвалы́ сотвори́т, Христе́ Сло́ве, / ви́дя Твоя́ благода́ти, я́же страда́льцем Твои́м по́дал еси́? / Дими́трия бо се ми́ро му́ченика, / я́ко исто́чник, у́бо истека́ет, / благово́ние же ды́шет, и разоря́ет зол омраче́ние.

Сла́ва Отцу́ и Сы́ну и Свято́му Ду́ху:

Напая́ше у́бо исто́чник, от земли́ восходя́щий, / пе́рвее, не́же одожди́ти все сея́ лице́, / ты же сокры́вся, му́чениче, под зе́млю, / исто́чник яви́лся еси́ благово́нна ми́ра, Дими́трие; / ко́пий бо мно́жество отверзо́ша жи́лы, / и ны́не ми́ра напоя́еши концы́.

И ны́не и при́сно и во ве́ки веко́в. Ами́нь.

Богородичен: Неве́сту Бо́жию Тя и Ма́терь ве́мы, Богоро́дице, / Тебе́ бо, я́ко миродохнове́нный ши́пок, обре́т Сло́во Бо́жие, цвету́щ во удо́ле смире́ннем челове́честве, / возжеле́ Твоея́ добро́ты, / из Тебе́ Плотоно́сец проше́д, ве́рныя облагово́нствоваше.

Пе́снь 5

Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго, / но обрати́ мя, и к све́ту за́поведей Твои́х / пути́ моя́ напра́ви, молю́ся.

Припе́в: Святы́й великому́чениче Дими́трие, моли́ Бо́га о нас.

Был еси́ прия́телище с Небе́с Снизше́дшаго за ми́лость, / я́коже дождя́, или́ ка́пли, ка́плющия кро́тко, / упои́л еси́ та́инственными дарова́нии, / и ны́не из гро́ба ми́ра исто́чник то́чиши, Дими́трие.

Припе́в: Святы́й великому́чениче Дими́трие, моли́ Бо́га о нас.

Страда́льцем, я́коже зако́н, вся́кия мирски́я обнажи́вся любве́, / упита́лся еси́, му́чениче, еле́ем благода́тей Ду́ха. / Победи́в же тьмы нача́ла, / мзду прия́л еси́ точи́ти ми́ро сладково́нное, Дими́трие.

Припе́в: Святы́й великому́чениче Дими́трие, моли́ Бо́га о нас.

Ши́пок яви́лся еси́, процветы́й внутрь злачника́ Госпо́дня, Дими́трие, / обагре́н кро́вию муче́ния и ра́нами сече́ний, / и боле́зньми страда́льческими, и разжже́нием пе́щи, / и ны́не ми́ро источа́еши приснотеку́щее.

Припе́в: Святы́й великому́чениче Дими́трие, моли́ Бо́га о нас.

Се па́ки зри́тся Боже́ственный ковче́г храм му́ченика, / иде́же све́щник внутрь, гроб, нося́й ми́ро и еле́й, / его́же о́крест взыгра́им духо́вно, / и, лику́юще, восхва́лим вели́каго Дими́трия.

Сла́ва Отцу́ и Сы́ну и Свято́му Ду́ху:

Но́вый я́коже Илия́, ре́вностию уя́звлен Христо́вы любве́, / царя́ облича́еши, и тебе́ сама́го предае́ши на смерть. / Оба́че живе́ши, и еще́ ми́ра исто́чник показа́в гроб, / я́коже скуде́льник еле́я неистоще́н.

И ны́не и при́сно и во ве́ки веко́в. Ами́нь.

Богородичен: Напису́ет Твое́, Де́во, дре́вле та́инство, / поя́ пра́отец Твой, / Царе́ви Дще́ре сла́ва вся внутрьу́ду, / и́же и Тя просла́вив, я́ко Блаже́нную челове́ком. / Ра́дуйся, ми́ра всего́ воззва́ние.

Песнь 6

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ши мя, / Бо́же спасе́ния моего́.

Припе́в: Святы́й великому́чениче Дими́трие, моли́ Бо́га о нас.

Процве́л еси́ духо́вно, я́коже ма́слина плодови́тая, / и копиено́сными рука́ми ну́ждно изгнете́ся. / Ве́рных же утеша́еши, / ми́ро ны́не точа́ из Боже́ственнаго гро́ба твоего́, Дими́трие.

Припе́в: Святы́й великому́чениче Дими́трие, моли́ Бо́га о нас.

Пчелы́ о́бразом тебе́ сама́го / де́лателя вся́кия показа́л еси́ Боготво́рныя доброде́тели, / ду́шу, блаже́нне, непоро́чну, я́ко со́тову телеси́ соблюда́я, / и ми́ро ны́не источа́еши, услажда́ющее ду́ши.

Припе́в: Святы́й великому́чениче Дими́трие, моли́ Бо́га о нас.

Возлюби́л еси́ от души́ Христа́, / и Сему́ после́довал еси́ к ми́ру благово́ния, / и Сего́ причасти́лся еси́   срастворе́нием лу́чшим. / И ны́не ми́ра струи́ то́чиши непреста́нныя, Дими́трие.

Припе́в: Святы́й великому́чениче Дими́трие, моли́ Бо́га о нас.

Ка́пли страда́льческих на зе́млю крове́й твои́х ка́плюще, / благово́ния исто́чник ми́ра ту́ю соде́лаша. / И ны́не сие́ непреста́нно / почерпа́ющим источа́еши, Дими́трие.

Сла́ва Отцу́ и Сы́ну и Свято́му Ду́ху:

По́том твои́х, му́дре, крове́й облия́н, / я́коже ин но́вый исто́чник ре́чно, / тре́бующим бога́тно подае́ши во исцеле́ние твое́ ми́ро, / блаже́нне, усе́рдно приходя́щим.

И ны́не и при́сно и во ве́ки веко́в. Ами́нь.

Богородичен: Зря́ще златови́дный све́та Све́щник неугаси́мый, / мно́жеством грехо́в ду́ши омрачи́вшии, присту́пим; / дае́т бо просвеще́ние / и вся́кое отгоня́ет омраче́ние.

Конда́к му́ченика, глас 2:

Крове́й твои́х струя́ми, Дими́трие, / Це́рковь Бог обагри́, / да́вый тебе́ кре́пость непобеди́мую, / и соблюда́я град твой невреди́мь; / того́ бо еси́ утвержде́ние.

И́кос:

Сего́ вели́каго вси воспои́м, соше́дшеся ве́рою, / я́ко ору́жника Христо́ва и му́ченика, Дими́трия, / в пе́снех и пе́ниих совзыва́юще Влады́це и Зижди́телю вселе́нныя: / изба́ви ны тру́са и ну́жды, Человеколю́бче, / моли́твами Богоро́дицы, и всех святы́х му́чеников Твои́х. / На Тя бо вси наде́емся, изба́витися бед и скорбе́й, / Ты бо еси́ на́ше утвержде́ние.

Песнь 7

Ирмос: О́троцы евре́йстии в пещи́ / попра́ша пла́мень дерзнове́нно, / и на ро́су огнь преложи́ша, вопию́ще: // благослове́н еси́, Го́споди Бо́же, во ве́ки.

Припе́в: Святы́й великому́чениче Дими́трие, моли́ Бо́га о нас.

Во́ду почерпсти́ Иса́ия жа́ждущим, Дими́трие, предповелева́ет. / А́ще бы ви́дел твой гроб, возопи́л бы вся́ко: / ми́ра исто́чнику приходи́те, и почерпи́те спасе́ние.

Припе́в: Святы́й великому́чениче Дими́трие, моли́ Бо́га о нас.

Земли́ у́бо   поро́д бы́л еси́, / всели́лся же еси́ в земли́ кро́тких, / иде́же вода́ сла́дости; / ея́же напи́вся в сы́тость, / ми́ра исто́чник при́сный ны́не, Дими́трие, пролива́еши.

Припе́в: Святы́й великому́чениче Дими́трие, моли́ Бо́га о нас.

Возра́сл еси́, я́ко розга́ в виногра́де, / пребыва́я неотсе́чен Бо́гу, и совокупле́н; / и Сего́ испо́лнився ту́ка неизрече́ннаго, / ми́ро, я́ко струи́, всем ны́не, Дими́трие, то́чиши.

Припе́в: Святы́й великому́чениче Дими́трие, моли́ Бо́га о нас.

О, но́вых твои́х боре́ний! О, стра́нных   му́ченических страда́ний! / Твоя́ бо по́ты, за Него́ пролия́нныя, блаже́нне, / Христо́с прии́м, исто́чник ми́ра тя показу́ет.

Сла́ва Отцу́ и Сы́ну и Свято́му Ду́ху:

Струю́ ми́ра твоего́ пролива́я, / ве́лию пучи́ну просте́рл еси́ чуде́с, / и душ и теле́с неду́ги потопля́еши, / и напа́стей, Дими́трие, вся́ку бу́рю успову́я.

И ны́не и при́сно и во ве́ки веко́в. Ами́нь.

Богородичен: Млеко́м пита́ла еси́, Де́во, / Плотоно́сца, Твоего́ Бо́га рожде́ннаго, / я́ко да боле́знь Ада́мову, су́щую во а́де, облегчи́т, / от дре́ва сне́дша зна́ния, и за́поведи преслу́шавша.

Песнь 8

Ирмос: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, // лю́дие, превозноси́те во вся ве́ки.

Припе́в: Святы́й великому́чениче Дими́трие, моли́ Бо́га о нас.

Да Бог явле́нна / сотвори́т тя су́щим в ми́ре, Дими́трие, / негаси́му свещу́ душе́вную сохра́нша, / еле́ем дея́ний умаще́ну всегда́, / и, я́ко черто́га, тебе́ отверзо́шася две́ри, / приснотеку́щ исто́чник тя ми́ра Боже́ственнаго  показу́ет, / возме́здие чистоты́ сию́ дая́ благода́ть.

Припе́в: Святы́й великому́чениче Дими́трие, моли́ Бо́га о нас.

Не из крове́й, я́коже рече́ честно́е Ева́нгелие, / ниже́ из по́хоти пло́ти, Дими́трие, / Богом же роди́лся еси́, / Воплоще́ннаго почита́я Бо́га; / кровь же усе́рдно Того́ ра́ди твою́ истощи́в, / восприя́л еси́ свы́ше чуде́сную благода́ть, / источа́еши Боже́ственное ми́ро, ду́ши благоуха́яй.

Припе́в: Святы́й великому́чениче Дими́трие, моли́ Бо́га о нас.

Ты ле́ствица яви́лся еси́ одушевле́нная, / на земли́ у́бо утвержде́нная стопа́ми пло́ти, / до Небе́с же дося́жущая: / Богом бо обогати́лся еси́, утвержде́нным, му́чениче, в тебе́. / Столп же яви́вся, / пома́зан еле́ем по́двигов муче́ния, / и ны́не источа́еши / ве́рою приступа́ющим исто́чник Боже́ственнаго ми́ра.

Припе́в: Святы́й великому́чениче Дими́трие, моли́ Бо́га о нас.

Тя реку́ прописа́ Бо́жию наводне́ну, / поя́ Дави́д проро́чески, Дими́трие; / се бо неистоща́емо прихожде́ние ми́ра твоего́. / Тем и мно́жество рек, наводня́ющеся, / гла́сы своя́ возвыша́ют, / рука́ми же пле́щут / в сла́ву си́ми все́ми просла́вльшаго тя Бо́га.

Припе́в: Благослови́м Отца́ и Сы́на и Свята́го Ду́ха, Го́спода.

Госпо́дь Еди́н Трисвяты́й, / Ты, Бо́же Всемо́щнейше, / Его́же Богосло́вствуяй страда́лец Дими́трий в темни́це заключа́ется, / и с скорпи́ею чу́вственною зми́я умори́в мы́сленнаго, / и  горды́ню Ли́еву низложи́в чрез Не́стора Боже́ственнаго, / копие́м пробода́ется, / и ми́ро ны́не из гро́ба то́чит.

И ны́не и при́сно и во ве́ки веко́в. Ами́нь.

Богородичен: За Ада́ма — Госпо́дь, за Е́ву — Ты, Всечи́стая, / Гаврии́л же — за льсти́внаго зми́я, / Крест же — за дре́во, вертогра́д   гро́ба — вме́сто Еде́ма, / ра́дуйся — вме́сто печа́ли, / копие́ — вме́сто пла́меннаго ору́жия, / и багряни́ца — вме́сто смоко́внаго ли́ствия. / Тя у́бо пое́м, Отрокови́це, я́ко всех вино́вну.

Песнь 9

Ирмос: Ужасе́ся о  сем Не́бо, / и земли́ удиви́шася концы́, / я́ко Бог яви́ся челове́ком пло́тски, / и чре́во Твое́ бысть простра́ннейшее Небе́с. / Тем Тя, Богоро́дицу, // А́нгелов и челове́к чинонача́лия велича́ют.

Припе́в: Святы́й великому́чениче Дими́трие, моли́ Бо́га о нас.

Прие́м твой алава́стр душе́вный, доброде́телей Боже́ственнаго ми́ра испо́лнен, / име́я же Христа́, прекло́нша тебе́, му́чениче, главу́, / я́ко упоко́ившася жития́ твоего́ све́тлостию чистоты́. / Тем ублажи́лся еси́ и благода́ти испо́лнился еси́ мироточи́ти ми́ра конце́м.

Припе́в: Святы́й великому́чениче Дими́трие, моли́ Бо́га о нас.

Се ожида́ющих тя воздая́ний неизрече́нных све́тлая проображе́ния, / се исто́чник ми́ра приснотеку́щаго, о, страда́льче! / Бо́гу у́бо предстоя́ со дерзнове́нием му́ченическим, / во́инству на́шему испроси́ на враги́ побе́ду, / и мир стране́ неотъе́млемь.

Припе́в: Святы́й великому́чениче Дими́трие, моли́ Бо́га о нас.

О́бразом Креста́ Победотво́рца / победи́л еси́ Ли́ево суровство́, / и победи́теля Не́стора, и сострада́льца поста́вив; / и ны́не всяк язы́к ва́рварский рабо́тен покори́ правосла́вным, / соде́йствуя, сво́инствуя, укрепля́я, / велича́яй земны́я концы́, Дими́трие.

Припе́в: Святы́й великому́чениче Дими́трие, моли́ Бо́га о нас.

Те́плою от се́рдца любо́вию / к твоему́ честно́му ковче́гу прибега́ющия, му́чениче Христо́в, / ми́ро пролива́ющему река́ми, / твои́ми моли́твами изба́ви дел душетле́нных, / и пото́па страсте́й злосмра́дия; / обоня́ния же покажи́ сия́ Го́споду благово́ннейша.

Сла́ва Отцу́ и Сы́ну и Свято́му Ду́ху:

День ра́дости духо́вныя соверша́ем, Дими́трие, / ви́дяще ми́ра твоего́ непреста́нно точа́щ исто́чник. / Ты же страсте́й омраче́ние разоря́я, / я́ко Боже́ственнаго испо́лнен све́та, / я́ко во дни дава́й ходи́ти благообра́зно, / Бо́жий же ви́дети Свет непристу́пный.

И ны́не и при́сно и во ве́ки веко́в. Ами́нь.

Богородичен: Ты, Всечи́стая, злата́я голуби́ца еси́, / я́ко суче́ц ма́сличный, нося́щая Сло́во Бо́жие, / пома́завше плоть Свою́ еле́ем Божества́. / Его́же в се́рдцы, я́ко ковче́г, прие́м страда́лец, / из гро́ба ми́ро то́чит, и умаща́ет ве́рных ли́ца.

Свети́лен.

Кресто́м вооружи́л еси́ Не́стора, / чрез о́наго Ли́еву разори́в горды́ню, Дими́трие, / на три́знищи, я́коже Христо́с, отверза́еши копие́м ре́бра твоя́, / и́миже ста́до твое́ храни́.

Молитва великомученику Димитрию Солунскому

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя с дерзновением Небесному Царю, испроси у Него прощение согрешений наших и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, обитель сию и всякую страну христианскую. Исходатайствуй у Царя Царствующих на враги победу и одоление православным христианам, всей державе православной мир, тишину, твердость в вере и преспеяние во благочестии; нам же, чтущим честную память твою, испроси благодатное укрепление на дела благая, да благоутробное Владыце нашему Христу Богу зде творяще, сподобимся молитвами твоими наследовати Царствие Небесное для вечнаго прославления Его со Отцем и Святым Духом. Аминь.