8 ноября

Канон святому великомученику Димитрию Мироточцу Солунскому (Фессалоникийскому)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся // дарова́ти нам ве́лию ми́лость.

Стихи́ры, глас 2.

И́мамы тя мно́гих / да́теля дарова́ний, / уго́дниче Госпо́день, / исполня́еши бо проше́ния, // я́же и́мамы всегда́.

Стих: Пра́ведник, я́ко фи́никс, процвете́т, / я́ко кедр, и́же в Лива́не, умно́жится.

Пе́ния сла́дкая, / страсте́й похвале́ния, / благода́тей возда́ния, / предложе́ния, блаже́нне, // приими́, Дими́трие.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Добро́та страда́льцев, / благоле́пие му́чеников, / благове́рных храни́телю, / приими́ ны́не похвалу́ // любо́вию сла́вящих тя.

 Сла́ва, глас 8.

Име́ет у́бо Боже́ственнейшая твоя́ душа́ и непоро́чная, / приснопа́мятне Дими́трие, / Небе́сный Иерусали́м жили́ще, / его́же сте́ны пречи́стыми рука́ма Неви́димаго Бо́га живописа́шася. / И́мать же и всечестно́е, и многострада́льнейшее твое́ те́ло / преизря́дный сей храм на земли́, / сокро́вище некра́домое чуде́с, и неду́гов врачевство́, / иде́же, притека́юще, цельбы́ почерпа́ем. / Соблюди́, всехва́льне, тя велича́ющий град / от проти́вных прираже́ний, // дерзнове́ние я́ко име́я ко Христу́, тя просла́вльшему.

И ны́не, Богоро́дичен, глас то́йже:

Безневе́стная Де́во, / Я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная,  / всем подаю́щи очище́ние прегреше́ний, / ны́не на́ша моле́ния прие́млющи, // моли́ спасти́ся всем нам.

Велича́ние:

Велича́ем тя, / страстоте́рпче святы́й, Дими́трие, / и чтим честна́я страда́ния твоя́, / я́же за Христа́ претерпе́л еси́.

Пе́рвый кано́н свята́го, глас 4.

Песнь 1

Ирмос: Мо́ря чермну́ю пучи́ну / невла́жными стопа́ми, / дре́вний пешеше́ствовав Изра́иль, / крестообра́зными Моисе́овыма рука́ма, // Амали́кову си́лу в пусты́ни победи́л есть.

Припе́в: Святы́й великому́чениче Дими́трие, моли́ Бо́га о нас.

Боже́ственным муче́ния венце́м увязе́н, / при Бо́зе лику́еши, / блиста́нии отону́дными сия́я, и просвеще́ния исполня́емь, / великому́чениче досточу́дне.

Припе́в: Святы́й великому́чениче Дими́трие, моли́ Бо́га о нас.

Я́ко су́ща И́стины свиде́теля, / и да́же до кро́ве подви́гшася, блаже́нне, терпели́вно; / тве́рдо же противле́ние к мучи́телем показа́вша, / тя Влады́ка прия́т.

Сла́ва Отцу́ и Сы́ну и Свято́му Ду́ху:

Зло́бы обрета́теля низложи́л еси́ на зе́млю, Дими́трие, / му́ченическим твои́м копие́м уби́в, / Боже́ственною бла́гостию, па́че ума́ си́лою, на сие́, блаже́нне укрепля́емь.

И ны́не и при́сно и во ве́ки веко́в. Ами́нь.

Богородичен: Безма́терен, я́коже Бог, пе́рвее Сый, / бысть Е́же по нам Безо́тчий из Тебе́, Богоро́дице Всепе́тая, / плоть прие́мь по едине́нию, / е́же па́че сло́ва и ра́зума.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, // и прибе́жище и утвержде́ние.

Припе́в: Святы́й великому́чениче Дими́трие, моли́ Бо́га о нас.

Вмени́ся в ничто́же мучи́телей от тебе́ повеле́ние; / Сло́во бо Бо́жие па́че всех, страстоте́рпче, / предче́ствовал еси́.

Припе́в: Святы́й великому́чениче Дими́трие, моли́ Бо́га о нас.

Све́щник светови́ден муче́ния в ски́нии был еси́, / Боже́ственным све́том сия́ющ, / му́чениче страстоте́рпче Дими́трие.

Сла́ва Отцу́ и Сы́ну и Свято́му Ду́ху:

Врачева́ний тя исто́чник свяще́нный и ди́вный, / град твой, и сокро́вище некра́домо стяжа́в, / вся́ким весе́лием обогати́ся.

И ны́не и при́сно и во ве́ки веко́в. Ами́нь.

Богородичен: Врачу́я о́браз истле́вший земны́х, Пречи́стая, / сим из Тебе́ облачи́тся, / пребы́в, я́коже бе, Человеколю́бец.

Седа́лен му́ченика, глас 4.

Я́ко до́блему страда́льцу, / и во́ину  кре́пку Всецарю́ющаго Христа́, / взыва́ем псало́мски: / ра́дуйся, му́чеников украше́ние и ле́пота; / ра́дуйся, све́тлая Це́ркве звездо́, / и стено́, и приста́нище прибега́ющих к тебе́, / великому́чениче сла́вне Дими́трие, / тя пою́щия спаса́й / от вся́каго вре́да чужда́го и озлобле́ния вся.

Песнь 4

Ирмос: Вознесе́на Тя ви́девши, Це́рковь, на Кресте́, / Со́лнце пра́ведное, / ста в чи́не свое́м, / досто́йно взыва́ющи: // сла́ва си́ле Твое́й, Го́споди.

Припе́в: Святы́й великому́чениче Дими́трие, моли́ Бо́га о нас.

Победи́вшаго лжу нече́стия, / Бо́жия Всевысоча́йшее ви́дев Сло́во, / сла́вою венча́ тя, Дими́трие, пою́ща: / сла́ва си́ле Твое́й, Го́споди.

Припе́в: Святы́й великому́чениче Дими́трие, моли́ Бо́га о нас.

На лесть побе́ду возста́вив, / победи́тельный вене́ц пра́вды прия́л еси́, Дими́трие, / зовя́ Зижди́телю твоему́: / сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Направля́емь дла́нию жизноно́сною, / к приста́нищем дости́гл еси́ тиша́йшим, / иде́же ны́не, ра́дуяся, зове́ши, Дими́трие: / сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Я́ко тва́рей всех свяще́ннейшая, / Ма́ти Бо́га бы́ти Еди́на сподо́билася еси́, / Сего́ бо ро́ждши, / мир благода́тию Богозна́ния просвети́ла еси́.

Пе́снь 5

Ирмос: Ты, Го́споди мой, Свет / в мир прише́л еси́, / Свет святы́й, обраща́яй из мра́чна неве́дения // ве́рою воспева́ющия Тя.

Припе́в: Святы́й великому́чениче Дими́трие, моли́ Бо́га о нас.

Огнь любве́ Боже́ственныя в се́рдцы прие́м, / огнь угаси́л еси́ безбо́жнаго идолонеи́стовства, / сла́вне Дими́трие.

Припе́в: Святы́й великому́чениче Дими́трие, моли́ Бо́га о нас.

Избавля́я ны от бед, яви́ся, Дими́трие, / моли́твами твои́ми покрыва́я / ве́рою и любо́вию восхваля́ющия тя.

Сла́ва Отцу́ и Сы́ну и Свято́му Ду́ху:

И́же ве́рою к твоему́ усе́рдно притека́юще хра́му, Дими́трие, / неду́гов и страсте́й душетле́нных / вско́ре избавля́ются.

И ны́не и при́сно и во ве́ки веко́в. Ами́нь.

Богородичен: Сло́во Бо́жие, Отцу́ Единосу́щное, / Твой быва́ет, Богома́ти, па́че ума́ же и сло́ва, Сын, / Тебе́ Единосу́щен.

Песнь 6

Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х // исте́кшею кро́вию.

Припе́в: Святы́й великому́чениче Дими́трие, моли́ Бо́га о нас.

Согла́сно соше́дшеся, пое́м сла́вную и светоно́сную твою́ па́мять, / и чуде́с по́лную / и дарова́ний Свята́го и Честна́го, всеблаже́нне, Ду́ха.

Сла́ва Отцу́ и Сы́ну и Свято́му Ду́ху:

Разреши́ моя́ плени́цы согреше́ний моли́твами твои́ми, / я́ко бо непобеди́мь му́ченик дерзнове́ние и́маши ко Влады́це, / и бу́ди ми прибе́жище и покро́в, Дими́трие.

И ны́не и при́сно и во ве́ки веко́в. Ами́нь.

Богородичен: Чи́сту Тя посреде́ те́рния обре́т, я́ко чисте́йший крин / и удо́льный цвет, о, Богома́ти! Жени́х, / во утро́бу Твою́ Сло́во всели́ся.

Конда́к му́ченика, глас 2:

Крове́й твои́х струя́ми, Дими́трие, / Це́рковь Бог обагри́, / да́вый тебе́ кре́пость непобеди́мую, / и соблюда́я град твой невреди́мь; / того́ бо еси́ утвержде́ние.

И́кос:

Сего́ вели́каго вси  воспои́м, соше́дшеся ве́рою, / я́ко ору́жника Христо́ва и му́ченика, Дими́трия, / в пе́снех и пе́ниих совзыва́юще Влады́це и Зижди́телю вселе́нныя: / изба́ви ны тру́са и ну́жды, Человеколю́бче, / моли́твами Богоро́дицы, и всех святы́х му́чеников Твои́х. / На Тя бо вси наде́емся, изба́витися бед и скорбе́й, / Ты бо еси́ на́ше утвержде́ние.

Песнь 7

Ирмос: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем, опаля́еми,  взыва́ху: // благослове́н еси́ в хра́ме сла́вы Твоея́, Го́споди.

Припе́в: Святы́й великому́чениче Дими́трие, моли́ Бо́га о нас.

Преукра́шен Боже́ственною сла́вою и благода́тию, / му́чениче страстоте́рпче, сия́еши светови́дно, и просвеща́еши зову́щия: / благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Я́ко багряни́цею, укра́шен твое́ю кро́вию, име́я вме́сто ски́птра, сла́вне, крест; / со Христо́м ца́рствуеши   ны́не, му́чениче Дими́трие, / благослове́н еси́, зовы́й, в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Препросла́вленная, Просвеще́нная, Ма́ти Де́во, / вся, чту́щия Тя Всеи́стинную Богоро́дицу, огради́; / благослове́на Ты в жена́х, Всенепоро́чная Влады́чице.

Песнь 8

Ирмос: Ру́це распросте́р,   Дании́л / львов зия́ния в ро́ве затче́: / о́гненную же си́лу угаси́ша, / доброде́телию   препоя́савшеся, / благоче́стия рачи́тели о́троцы, взыва́юще: // благослови́те, вся дела́ Госпо́дня, Го́спода.

Припе́в: Святы́й великому́чениче Дими́трие, моли́ Бо́га о нас.

Омрачи́л еси́ весь вра́жий гнев, сла́вне, / и, боре́ния неотъе́млемою си́лою Христа́ облече́н, / и, победоно́сец быв, му́чениче Дими́трие, вопия́л еси́: / благослови́те, вся дела́ Госпо́дня, Го́спода.

Припе́в: Святы́й великому́чениче Дими́трие, моли́ Бо́га о нас.

Му́чеников благостоя́ние показа́в, / му́чеников благозва́ние, му́чениче, насле́довал еси́; / ба́нею омы́вся свято́ю, / я́же вторы́ми не оскверня́ется грехо́вными прило́ги, / копие́м пробода́емь, и зовы́й: / благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Чуде́с твои́х мно́жество, па́че ума́ дарова́ний, / и́хже тебе́ подаде́ Христо́с, всем показу́ет,  сла́вне, / и благода́ть исцеле́ний, я́же па́че сло́ва, / я́ве твою́ благода́ть пропове́дает нам, вопию́щим: / благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Еди́ну во всех роде́х Де́ву Ма́терь и Богоро́дицу Чи́стую песносло́вим: / Та бо спасе́ния на́шего Хода́таица, / я́ко ми́ра Изба́вителя, Сло́во ро́ждшая, Ему́же вопие́м: / благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный / от несеко́мыя горы́, Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́; // тем, веселя́щеся, Тя, Богоро́дице, велича́ем.

Припе́в: Святы́й великому́чениче Дими́трие, моли́ Бо́га о нас.

Раздери́ у́зы прегреше́ний тя пою́щих, страстоте́рпче, / уста́ви страсте́й прило́ги, / молву́ разори́ ересе́й / и напа́стей утиши́ бу́рю моли́твами твои́ми.

Припе́в: Святы́й великому́чениче Дими́трие, моли́ Бо́га о нас.

Напра́ви к стезя́м пра́вым Небе́снаго Ца́рствия / свяще́ннейшую твою́ па́ству, венцено́сче му́чениче Дими́трие, / на па́жить спаси́тельную, на ме́сто ве́чное.

Сла́ва Отцу́ и Сы́ну и Свято́му Ду́ху:

Да венце́в сла́вы и Небе́снаго Ца́рствия получе́ния / пою́щим тя сего́ улучи́ти моли́, му́чениче Дими́трие, / Жизнода́вца Го́спода и Царя́ Сил.

И ны́не и при́сно и во ве́ки веко́в. Ами́нь.

Богородичен: Я́ко ко́рень, исто́чник и вину́   нетле́ния Тя, Де́во, / вси ве́рнии, наде́ющеся, хвала́ми почита́ем; / Ты бо Ипоста́сное нам Безсме́ртие источи́ла еси́.

Свети́лен.

Кресто́м вооружи́л еси́ Не́стора, / чрез о́наго Ли́еву разори́в горды́ню, Дими́трие, / на три́знищи, я́коже Христо́с, отверза́еши копие́м ре́бра твоя́, / и́миже ста́до твое́ храни́.

Молитва великомученику Димитрию Солунскому

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя с дерзновением Небесному Царю, испроси у Него прощение согрешений наших и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, обитель сию и всякую страну христианскую. Исходатайствуй у Царя Царствующих на враги победу и одоление православным христианам, всей державе православной мир, тишину, твердость в вере и преспеяние во благочестии; нам же, чтущим честную память твою, испроси благодатное укрепление на дела благая, да благоутробное Владыце нашему Христу Богу зде творяще, сподобимся молитвами твоими наследовати Царствие Небесное для вечнаго прославления Его со Отцем и Святым Духом. Аминь.