7 ноября.

Канон святым мученикам Маркиану и Мартирию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Канон святы́х. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святии мученицы, моли́те Бо́га о нас.

Превесьма́ све́том Святы́я Тро́ицы осия́еми при́сно, свети́льницы непреле́стнии быва́ете, святи́и, те́м, ве́рою светоно́сный пра́здник ва́ш дне́сь соверша́юще, све́тло весели́мся.

Припев: Святии мученицы, моли́те Бо́га о нас.

Ви́дети, на земли́ возсия́вшее Сло́во, из Де́вы на́с ра́ди жела́юще, страда́льцы, Отцу́ Единосу́щна Сего́ испове́дающе, ну́жднейшую сме́рть, по́мыслом крепча́йшим, пострада́сте.

Сла́ва Отцу́ и Сы́ну и Свято́му Ду́ху:

Па́вла му́драго, богоглаго́льницы, я́вльшеся после́дователе и ученицы́, единоче́стна Отцу́ Сы́на пропове́дасте, те́м, мечи́ ссече́ни бы́вше, излия́нием кро́ве, страстоте́рпцы, зе́млю освяти́сте.

И ны́не и при́сно и во ве́ки веко́в. Ами́нь.

Богородичен: Безнача́льнаго Сы́на Бо́жия заче́нши, воплоти́ла еси́, Чи́стая, быва́ема Челове́ка за ми́лость неизглаго́ланную, те́м, Тому́ покланя́ющеся, благоче́стно Тя́ сла́вим, вину́ все́х обоже́ния.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Святии мученицы, моли́те Бо́га о нас.

Правосла́вия просвеща́еми Боже́ственным Ду́хом, Ариево омраче́ние отню́д прогна́сте, свиде́тели бы́вше Вседержи́теля.

Припев: Святии мученицы, моли́те Бо́га о нас.

Ра́вно Сло́во Отцу́ догма́тствующе, святи́и, разсуди́сте умре́ти, Маркиа́не и Марти́рие, и к безконе́чней Жи́зни преидо́сте.

Сла́ва Отцу́ и Сы́ну и Свято́му Ду́ху:

Воинствосло́вием свяще́нным Ангелом сочисли́стеся и му́ченик лико́м пресве́тло совокупи́стеся, те́м честну́ю ва́шу па́мять похваля́ем.

И ны́не и при́сно и во ве́ки веко́в. Ами́нь.

Богородичен: Упещре́на ря́сны златы́ми я́ко Цари́ца, Царя́ и Бо́га одесну́ю ны́не предстои́ши, Влады́чице, моля́щи о рабе́х Твои́х.

Седа́лен, гла́с 3.

Повеле́ние Боже́ственное испове́дающе да́же до кро́ве, е́же о Не́м прия́сте, му́ченицы сла́внии, злове́рных пре́лесть обличи́вше и правосла́вную ве́ру соблю́дше, но моли́теся Христу́ Бо́гу непреста́нно дарова́ти на́м ве́лию ми́лость.

Сла́ва, и ны́не, Богородичен:

Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, Иже по рождестве́, Ма́терь, Тя́ Де́ву, я́ко пре́жде рождества́, сохрани́в Всенепоро́чну еди́н Госпо́дь. Того́ приле́жно моли́ дарова́ти на́м ве́лию ми́лость.

КрестоБогородичен:

Нескве́рная Агница Сло́ва, Нетле́нная Де́ва Ма́ти, на Кресте́ зря́щи пове́шена из Нея́ без боле́зни Прозя́бшаго, ма́терски подо́бно, рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Святии мученицы, моли́те Бо́га о нас.

До́блим по́мыслом и соверше́нною му́дростию правосла́вия, му́ченицы Госпо́дни, утверди́вшеся, му́ченически по́двиг соверши́сте, ерети́ческую тму́ отгна́ли есте́.

Припев: Святии мученицы, моли́те Бо́га о нас.

Иже Сло́ва не пропове́дав Отцу́ Единосу́щна, разгне́вався несмы́сленно на му́ченики, удави́ся жи́лами свяще́нных ва́ших по́двиг и погрузи́ся кро́вными тече́ньми, Бо́жиею благода́тию.

Припев: Святии мученицы, моли́те Бо́га о нас.

Во́инствовавше Го́споду ве́рою, святи́и, и пострада́вше, небе́сным во́инством сочисли́стеся, те́м ублажа́етеся, укрепле́ние на́ше и просвеще́ние быва́юще.

Сла́ва Отцу́ и Сы́ну и Свято́му Ду́ху:

Сосцы́ церко́внии, млеко́ источа́ющии правосла́вия, и благочести́выя пита́ющии, Маркиа́н до́блий и Марти́рий, да похва́лятся ра́достными песнопе́нии.

И ны́не и при́сно и во ве́ки веко́в. Ами́нь.

Богородичен: Свяще́нный дре́вле проро́к го́ру Боже́ственную нарече́, доброде́тельми, Де́во Пречи́стая, весьма́ осене́ну: из Нея́же Сло́во Спаси́тельное яви́ся, на обновле́ние и просвеще́ние душа́м на́шим.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Святии мученицы, моли́те Бо́га о нас.

Прему́дрых яви́стеся догма́тов после́дователи Па́вла, священноде́теля боже́ственнаго, его́же нра́вы, му́ченицы, подража́вше, терпели́вно пострада́сте и зако́нно венча́стеся.

Припев: Святии мученицы, моли́те Бо́га о нас.

Яко зве́зды сия́ете на высоте́ честны́я Це́ркве све́тло, тму́ глубоча́йшую отгоня́юще Ариевы е́реси, му́ченицы до́блественнейшии.

Сла́ва Отцу́ и Сы́ну и Свято́му Ду́ху:

Удали́вшеся, святи́и, жития́ красо́т, прибли́жистеся Христу́, мале́йшею же кро́вию недви́жимое Ца́рство, сла́внии страстоте́рпцы, насле́довасте.

И ны́не и при́сно и во ве́ки веко́в. Ами́нь.

Богородичен: Истинна родила́ еси́ Сы́на на земли́, единосу́щна Отцу́ и Боже́ственному Ду́ху, Богороди́тельнице, Его́же непреста́нно моли́ уще́дрити ду́ши на́ша.

Пе́снь 6.

Ирмос: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Припев: Святии мученицы, моли́те Бо́га о нас.

Глаго́лом после́дующе па́стыря, прему́драго Па́вла, правосла́вную ве́ру соблюдо́сте, и я́ко а́гнцы, кровопи́иц мечи́ закала́етеся, ра́дующеся.

Припев: Святии мученицы, моли́те Бо́га о нас.

Честна́ пред Го́сподем, благосла́внии, ва́ша сме́рть яви́ся, му́дрии ору́жницы, те́м почестьми́ ле́тними, святи́и, от все́х ублажа́етеся.

Сла́ва Отцу́ и Сы́ну и Свято́му Ду́ху:

Ва́с, до́блия страстоте́рпцы, Маркиа́не всеблаже́нне и Марти́рие, исто́чник чуде́с Христо́ва Це́рковь иму́щи, ве́чно весели́тся.

И ны́не и при́сно и во ве́ки веко́в. Ами́нь.

Богородичен: Усты́ и язы́ком Ма́терь Тя́ всеи́стинно, Де́во, Бо́га на́шего испове́дуем, Того́, Чи́стая, приле́жно моли́ спасти́ся душа́м на́шим.

Конда́к, гла́с 4.

Подви́гшеся до́бре от младе́нства, Маркиа́не с му́дрым Марти́рием, отсту́пника Ария низложи́сте, невре́дно сохра́нше правосла́вную ве́ру, Па́влу после́дующе, му́дрому учи́телю, те́мже с ни́м обрето́сте живо́т, я́ко Тро́ицы побо́рницы изря́днейшии.

Икос:

Яко служи́телие благоче́стия Бо́га Человеколю́бца, дво́ице благослове́нная, предвари́те мя́ ско́ро и лю́тых изба́вите, сло́во ми́ му́дрости подаю́ще, ва́ше похвали́ти страда́ние, е́же за ве́ру, святи́и, нра́вом несомне́нным пострада́вшие, венцы́ прия́сте небе́сныя. Лико́м страда́льцев, и апо́столов, и учи́телей, и честны́х архиере́ев свесели́теся, я́ко пропове́дницы Бо́жия Сло́ва и Тро́ицы побо́рницы изря́днейшии.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святии мученицы, моли́те Бо́га о нас.

После́дующе до́бре свяще́ннаго па́стыря, правосла́вием удобря́еми, рука́ми закла́ни бы́сте злосла́вных всу́е, пресла́внии ору́жницы.

Припев: Святии мученицы, моли́те Бо́га о нас.

Законоположе́ние Бо́жие невреди́мо ве́рно сохра́нше, му́ченицы боже́ственнии, зако́нно пострада́сте, от ру́к беззако́нных ку́пно закла́ни бы́вше.

Припев: Святии мученицы, моли́те Бо́га о нас.

По погребе́нии свяще́ннем, приходя́щим с ве́рою ко гро́бу ва́шему, неду́ги погреба́ете, святи́и, е́же к Жизнода́телю, святы́м хода́тайством ва́шим.

Сла́ва Отцу́ и Сы́ну и Свято́му Ду́ху:

От исто́чников та́инственно свяще́нных почерпа́юще Боже́ственную благода́ть целе́ний, ве́рныя напоя́ете, неду́г вся́кое изсуша́юще умноже́ние.

И ны́не и при́сно и во ве́ки веко́в. Ами́нь.

Богородичен: Изба́вленнии Твои́м Рождество́м, Богома́ти, ве́чнаго осужде́ния, — ра́дуйся, — зове́м Ти́, при́сно Благослове́нная и Обра́дованная.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святии мученицы, моли́те Бо́га о нас.

Якоже два́ а́гнца, закала́етеся, Агнца Бо́жия, единосу́щна Отцу́ пропове́дающе, и трапе́зе вы́шней принесе́ни бы́вше, страда́льцев собо́ру сочетава́етеся.

Припев: Святии мученицы, моли́те Бо́га о нас.

Укрепля́еми си́лою Ду́ха, искорени́сте пре́лести свере́пство, и кре́пко пострада́вше, лю́те осла́бленныя немощьми́, му́дрии исцеля́ете му́ченицы.

Припев: Святии мученицы, моли́те Бо́га о нас.

Вра́чеве страсте́й бы́вше ду́ш на́ших, святи́и му́ченицы, лю́тыя неду́ги и привоста́ния проти́вная разреши́те боже́ственными моли́твами.

Сла́ва Отцу́ и Сы́ну и Свято́му Ду́ху:

Воспева́ем Отца́ нерожде́ннаго, и Сы́на, и Ду́ха Свята́го, еди́но существо́ несозда́нно и Божество́ еди́но, и вопие́м согла́сно: вся́ дела́ благослови́те Госпо́дня Го́спода.

И ны́не и при́сно и во ве́ки веко́в. Ами́нь.

Богородичен: Умерщвле́нныя ны́ оживи́ла еси́, Жи́знь все́х ро́ждшая, Богороди́тельнице Влады́чице, му́чеников сла́ва и пра́ведных, и прегреше́ний те́плое очисти́лище.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святии мученицы, моли́те Бо́га о нас.

Кре́постию вжиля́еми Боже́ственною, сме́рти, страстоте́рпцы, не убоя́стеся, но, усе́рдно подло́жше мече́м вы́и, испо́лнисте до́блественно по́двиг боже́ственный, те́м досто́йно блажите́ся.

Припев: Святии мученицы, моли́те Бо́га о нас.

Яко два́ свети́льника све́тла, просвеща́ете вселе́нныя исполне́ния Боже́ственными страда́ний светлостьми́, Маркиа́не му́дре и Марти́рие, тму́ мра́чныя е́реси Ариевы отгоня́ще.

Припев: Святии мученицы, моли́те Бо́га о нас.

Венцы́ сла́вы от Бо́га, победи́вше слепоу́мнаго Македо́ния, прия́сте досто́йно; и престо́лу Влады́чню предстоя́ще, прегреше́ний на́м проси́те разреше́ние соверше́нно, достосла́внии.

Сла́ва Отцу́ и Сы́ну и Свято́му Ду́ху:

Па́мять боже́ственная ва́ша возсия́ со́лнца светле́йши, все́х просвеща́ющи сердца́ сию́ соверша́ющих, блаже́ннии, в не́йже умоли́те Го́спода, тмы́ согреше́ний на́с изба́вити.

И ны́не и при́сно и во ве́ки веко́в. Ами́нь.

Богородичен: Све́та жили́ще, Чи́стая, су́щи, души́ моея́ зе́ницы просвети́, очерне́вшия небреже́нием и тмо́ю неве́дения глубоча́йшею всегда́ одержи́мыя, Всенепоро́чная, я́ко да ве́рою ублажа́ю Тя́.

Свети́лен.

Па́вла всеблаже́ннаго после́дователи бы́вше, тече́ние соверши́сте, Христо́ва Ца́рствия и Сла́вы безсме́ртныя с ни́м получи́сте со все́ми святы́ми, и предстоите́ ку́пно Тро́ице Честне́й, славосло́вяще Ю досто́йно.

Сла́ва, и ны́не, Богородичен:

Похваля́ют Рождество́ Твое́ безпло́тных чи́ни, ра́дости бо су́щия на земли́ Ты́ испо́лнила еси́ еди́на, те́м Тя́, Пренепоро́чную, ве́рнии сла́вим, пе́сньми славосло́вяще: Све́т бо су́щим во тме́ возсия́ла еси́, я́ко у́тро возсиява́ющее де́нь.

Молитва

Святи́и му́ченицы Маркиа́не и Марти́рие! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.