6 ноября.

Канон святому мученику Арефе и иже с ним 4299 святых мученик.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Боле́зньми святы́х, и́миже о Тебе́ пострада́ша, умоле́н бу́ди, Го́споди, и вся́ на́ша боле́зни исцели́, Человеколю́бче, мо́лимся.

Канон му́чеников. Гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, еди́ному Влады́це.

Припев: Святый мучениче Аре́фо, моли́ Бо́га о нас.

Му́чениче, страстоте́рпче Христо́в, Аре́фо всеблаже́нне, моли́твами твои́ми и су́щих с тобо́ю му́чеников у́м мо́й просвети́, я́ко да воспою́ ва́шу светоно́сную и боже́ственную па́мять.

Припев: Святый мучениче Аре́фо, моли́ Бо́га о нас.

Вы́спрь житие́ я́ве на небесе́х стяжа́в, богоблаже́нне, Христо́вым подо́бием, себе́ пре́дал еси́ жела́нием муче́ния беззако́нным евре́ем, богому́дре.

Припев: Святый мучениче Аре́фо, моли́ Бо́га о нас.

Глаго́л преступи́в Бо́жий, евре́ин пребеззако́нный и непра́веднейший богоизбра́нное ста́до Христо́во погуби́, оба́че восприя́ше су́д пра́ведным и Боже́ственным про́мыслом.

Сла́ва Отцу́ и Сы́ну и Свято́му Ду́ху:

Стезю́ ше́ствовав неукло́нно, к небеси́ веду́щую, Христу́ приве́л еси́ му́ченический собо́р, Аре́фо всехва́льне, вся́каго во́зраста и ро́да вся́каго со́бранный.

И ны́не и при́сно и во ве́ки веко́в. Ами́нь.

Богородичен: Пе́сньми Пресвяту́ю, ве́рнии, Мари́ю похва́лим, Богома́терь Обра́дованную, покро́в боже́ственный, ти́хое приста́нище, все́х ве́рных Предста́тельницу.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святый мучениче Аре́фо, моли́ Бо́га о нас.

Утвержде́нну зря́ще Креста́ благода́тию Твою́ Це́рковь, евре́йстии о́троцы пребеззако́ннии, за́вистию та́юще, и ра́нами многообра́зными неща́дно му́чаху, еди́не Человеколю́бче.

Припев: Святый мучениче Аре́фо, моли́ Бо́га о нас.

Ядоме́тный язы́к злове́рнии иму́ще и Тя́ ху́ляще, си́х прароди́тели Изба́вльшаго дре́вняго мучи́тельства, в Тя́ ве́рующия, Спа́се, закла́ша.

Припев: Святый мучениче Аре́фо, моли́ Бо́га о нас.

Созда́вый наедине́ богоде́йственным ма́нием челове́ческая сердца́, кто́ про́мысла Твоего́ глубину́ возмо́жет пости́гнути? Яко ста́до, е́же, Христе́, собра́л еси́, волко́м пре́дал еси́.

Сла́ва Отцу́ и Сы́ну и Свято́му Ду́ху:

Богому́дрое твое́ ста́до, ва́рварскими мечи́ ссека́емо, усе́рдно призыва́ше Тя́: приими́ ду́хи и ду́ши на́ша, Спа́се, и к све́ту наста́ви Ца́рствия Твоего́.

И ны́не и при́сно и во ве́ки веко́в. Ами́нь.

Богородичен: Умерщвле́на мя́ дре́вле, к жи́зни, Пречи́стая, па́ки возвела́ еси́, еди́на Ипоста́сную Жи́знь ро́ждшая, Ейже прирази́вшися, расто́ржеся я́ве вражде́бнейшая сме́рть.

Седа́лен, гла́с 8.

Креста́ си́лою вооружи́вся и ве́рою огради́в гра́д тво́й, де́лы посрами́л еси́ мучи́телево свире́пство, терпе́ния же о́браз боже́ственнаго бы́в, приве́л еси́ Христу́ му́ченики. Те́м, соше́дшеся, по до́лгу почти́м, Аре́фо прехва́льне, всепра́зднственную па́мять твою́, страстоно́сче всесла́вне, моли́ Христа́ Бо́га грехо́в оставле́ние пода́ти честву́ющим любо́вию святу́ю па́мять твою́.

Сла́ва и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и, я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно, моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

КрестоБогородичен:

Агнца и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя стра́сти Твоя́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святый мучениче Аре́фо, моли́ Бо́га о нас.

Собо́р, укрепля́емь благода́тию, и ли́к боже́ственный и пресве́тлый, му́ченически мно́жество стражда́, во́инство победоно́сное, Аре́фу иму́ще чинонача́льника, да пое́тся любо́вию че́стно песнопою́щими: си́ле Твое́й сла́ва, Человеколю́бче.

Припев: Святый мучениче Аре́фо, моли́ Бо́га о нас.

Твои́м содержа́щся ра́зумом богому́дрый гра́д тво́й, пребога́те, седи́ною светя́щася честно́ю, к пребеззако́нным му́жески подвиза́ся, и, побе́ду взе́м, песнопое́т Спа́су: си́ле Твое́й сла́ва, Человеколю́бче.

Припев: Святый мучениче Аре́фо, моли́ Бо́га о нас.

Зако́ном но́вым Животворя́щаго Ду́ха огражда́емь, зако́н пи́смене попира́я, благоче́стный гра́д преодоле́ душе́вною чистото́ю и нра́вом благоро́дия, Христу́ песнопоя́: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Вои́стинну гра́д Бо́жий яви́лся еси́ пречестны́й и му́чеников боже́ственное жили́ще, и о тебе́ пою́тся све́тло ны́не пресла́вная, ве́лия же и ди́вная, ли́к бо пою́щих Влады́це приво́диши: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Из Дави́дова ца́рскаго прозя́бши сро́дства, Всеца́рствующаго пре́жде ве́к, из Отца́ Сло́ва неизрече́нно и па́че ума́ возсия́вшаго, родила́ еси́, Де́во. Те́м Тя́, Богоро́дицу, богому́дренно ве́рнии ублажа́ем.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святый мучениче Аре́фо, моли́ Бо́га о нас.

Богозва́нный собо́р и богоблаже́нный, подвиза́яся, и те́пле дру́г дру́га укрепля́юще, и спосо́бствующе, от беззако́нных Христа́ ра́ди закла́тися, благосла́вно, добропобе́днии, изво́лиша.

Припев: Святый мучениче Аре́фо, моли́ Бо́га о нас.

Укре́пльшеся ве́рою и благоче́стия ре́вностию распаля́еми, уго́дницы Твои́, Христе́, пребеззако́нных стра́ха не убоя́шася, и, Твое́ю любо́вию целому́дренно свя́зани, са́ми во́лею преда́шася.

Припев: Святый мучениче Аре́фо, моли́ Бо́га о нас.

Бо́га Боже́ственным промышле́нием и неизбе́жным про́мысла судьба́м всю́ жи́знь свою́ возложи́вше, собо́р боже́ственный, к пребеззако́нным евре́йским скверноуби́йством благоде́рзостно, до́блии, устреми́шася.

Сла́ва Отцу́ и Сы́ну и Свято́му Ду́ху:

На Тя́ наде́ющеся и ве́ровавше ны́не Воскресе́нию Твоему́, Твои́, Спа́се, му́ченицы, не ретя́щеся, ниже́ во́пляще, беззако́нными за Твое́ испове́дание убие́ни бы́ша, до́блественнейшии.

И ны́не и при́сно и во ве́ки веко́в. Ами́нь.

Богородичен: Бо́жие Бо́г Сло́во, пре́жде ве́к Отцу́ Соприсносу́щный, благоутро́бия бога́тством во утро́бу Твою́ всели́вся, обнища́, и Челове́к яви́ся на земли́, пло́ть бы́в, Де́во Богоро́дице Всепе́тая.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святый мучениче Аре́фо, моли́ Бо́га о нас.

Кро́вию Христо́вою зна́менавшеся, святи́и, кро́ви своя́ усе́рдно излия́ша, сла́внии му́ченицы, и ны́не ца́рствовати с Ни́м сподо́бишася.

Припев: Святый мучениче Аре́фо, моли́ Бо́га о нас.

Ми́р проро́чески глаго́лаху язы́цы немотству́ющии, пропове́даху Христа́ младе́нцев немова́ния, де́вы богому́дрыя за благоче́стие са́ми себе́ Бо́гу принесо́ша.

Припев: Святый мучениче Аре́фо, моли́ Бо́га о нас.

Отдели́ся тебе́ све́т, возсия́ющь исцеле́ния бога́тно от Христа́, Аре́фо богоглаго́ливе, к Нему́же изше́л еси́, еще́ иска́пая по́ты страда́ния.

Сла́ва Отцу́ и Сы́ну и Свято́му Ду́ху:

Мно́жество Тебе́ му́ченическое боже́ственно, Спа́се, приведе́ся: о́крест Тебе́ ли́цы святы́х, лику́юще, про́сят оставле́ния грехо́в те́х при́сно прославля́ющим.

И ны́не и при́сно и во ве́ки веко́в. Ами́нь.

Богородичен: Возсия́ от Сио́на высоча́йшаго благоле́пие прия́тием пло́ти по соедине́нию неизрече́нно из Тебе́, Неискусобра́чная, оде́ян, и ми́р просвети́.

Конда́к, гла́с 4.

Весе́лия хода́тай на́м наста́ светоно́сный дне́сь страстоте́рпец пра́здник, его́же соверша́юще, сла́вим в вы́шних су́щаго Го́спода.

Икос:

Ум мо́й просвети́, Христе́, заре́ю по́двигов Аре́фы до́бляго и все́х святых́х, с ни́м пострада́вших: пе́рвый бо все́х яви́ся ве́рный, му́жески ополчи́вся на отме́щущих воплоще́ние, Тебе́, па́че естества́ вопло́щшагося и ро́ждшагося, да на́с изба́виши от ле́сти и пока́жеши небла́зненно хотя́щим ше́ствовати пу́ть свиде́тельства, и́мже страда́льцы ходи́ша, Тя́ пою́ще в вы́шних су́щаго Го́спода.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святый мучениче Аре́фо, моли́ Бо́га о нас.

Крове́й пото́цы страда́лец Твои́х источа́ют исцеле́ния, ве́рою те́х па́мять похваля́ющим, и Тебе́, Творцу́, усе́рдно зову́щим: благослове́н еси́, Бо́же оте́ц на́ших.

Припев: Святый мучениче Аре́фо, моли́ Бо́га о нас.

Посрами́ша ве́сь, победоно́сцы, беззако́нных сове́т, я́ко боже́ственным ра́зумом и остроу́мием украша́еми, и, веселя́щеся, закала́еми поя́ху: благослове́н еси́, Бо́же оте́ц на́ших.

Припев: Святый мучениче Аре́фо, моли́ Бо́га о нас.

Ма́тери ще́дрыя, я́ко уя́звлени Твое́ю любо́вию, Христе́, не пощаде́ша дете́й, но в пещи́ попаля́емыя, Тебе́, Влады́це, взыва́юще поя́ху: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Свещи́ страда́ния де́вства све́тло вже́гше, в Бо́жии черто́зе, богоно́снии, веселя́щеся с му́дрыми де́вами, зову́т: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Ду́ш очище́ние и спасе́ния Хода́таица еси́, ве́рою Тя́ и любо́вию, Бо́жию Ма́терь, возвеща́ющим и Сы́ну Твоему́ согла́сно зову́щим: благослове́н еси́, Бо́же оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Аре́фо, моли́ Бо́га о нас.

Не в зако́не бы́сть я́ве соверше́ние, но в Христе́ спасе́ние даде́ся, — вопия́ху му́ченицы, богоуби́йцам глаго́люще. — Те́м, ра́дующеся, закала́емся вси́ и умира́ем усе́рдно, Тому́ песнопою́ще: лю́дие, превозноси́те Христа́ во ве́ки.

Припев: Святый мучениче Аре́фо, моли́ Бо́га о нас.

Тайнонауча́ет младе́нец и учи́т безу́мныя к Твоему́ о́бразу зре́ти пречи́стому, Христе́, и ве́ру прия́ти прише́ствия Твоего́ на земли́, и утаи́вся пребеззако́нных ру́к, в пла́мень вни́де с ро́ждшею, поя́: лю́дие, превозноси́те Его́ во ве́ки.

Припев: Святый мучениче Аре́фо, моли́ Бо́га о нас.

На земли́ му́ченицы благоче́стно подвиза́вшеся, на небесе́х от Христа́ венцы́ досто́йно прия́ша, ра́достно отше́дше, иде́же веселя́щихся жили́ще, ве́рою песнопою́щих и вопию́щих непреста́нно: лю́дие, превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Победи́вше, святи́и, лю́таго мироде́ржца и служа́щия того́ хоте́нием, ко Вседержи́телю и все́х Го́споду со дерзнове́нием и ра́достию неизрече́нною преидо́сте, вопию́ще: свяще́нницы, воспо́йте, лю́дие, превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: За ны́ моли́ся Сы́ну Твоему́ и Го́споду, чи́сто и и́стинно пою́щия Тя́ и Тя́, Богома́терь, испове́дающия, Пречи́стая, грехо́в прося́щи разреше́ния, получи́ти же спасе́ния ве́рно пою́щим: свяще́нницы, благослови́те, лю́дие, превозноси́те Его́ во ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святый мучениче Аре́фо, моли́ Бо́га о нас.

Прича́стницы сла́вы Христо́вы, общева́вшеся сме́рти бы́сте, святи́и му́ченицы, и Ца́рствия диади́мою украси́стеся све́тло. Бо́гу же предстоите́, на́м прося́ще спасе́ния душе́внаго, достосла́внии.

Припев: Святый мучениче Аре́фо, моли́ Бо́га о нас.

Зако́ннии яви́стеся Христо́ви во́ини и непобеди́мии му́ченицы, Аре́фо всему́дре и со страда́вшими с тобо́ю усе́рдно, со страстоте́рпицами жена́ми, де́вы отрокови́цы, те́мже мо́лим приле́жно, о на́с моли́теся.

Сла́ва Отцу́ и Сы́ну и Свято́му Ду́ху:

Упра́ви, Сло́ве Бо́жий, жи́знь мою́ и окорми́, Влады́ко, уго́дников Твои́х моле́ньми лю́бящих Тя́, и сподо́би те́х соприча́стнику бы́ти, грехи́ моя́ презира́я я́ко Бла́г и Человеколю́бец.

И ны́не и при́сно и во ве́ки веко́в. Ами́нь.

Богородичен: Селе́ние была́ еси́ Бо́жие, Невмести́маго во чре́ве вме́щшая и, пре́жде Безпло́тнаго, воплоще́нна на́м поро́ждшая. Его́же ны́не умоли́, Чи́стая, прегреше́ний оставле́ние все́м дарова́ти, ве́рою Тя́ при́сно велича́ющим.

Свети́лен.

Аре́фина проро́чества Бо́г Испо́лнитель бы́сть, возста́вив на паде́ние нечести́ваго Омири́та Елесвана́ му́жественнаго, гоня́ща и убива́юща нечести́вых полки́, Негра́н же вознося́ща и весе́лия исполня́юща.

Сла́ва, и ны́не, Богородичен:

Су́щую Богоро́дицу Тя́ испове́даем, Влады́чице, спа́сшиися Тобо́ю: Бо́га бо неизрече́нно родила́ еси́, разруши́вшаго Кресто́м сме́рть, к Себе́ же привле́кша му́чеников мно́жества, с ни́миже Тя́ восхваля́ем, Де́во.

Молитва

Святи́и му́ченицы Аре́фо и страда́вшие с тобо́ю! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.