5 ноября.

Канон священномученику Владимиру, пресвитеру Московскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 3:

От ю́ности Бо́га усе́рдно взыска́вый,/ и́стину в Це́ркви Правосла́вней обре́л еси́/ и, крест па́стырскаго служе́ния ре́вностно подъе́мый,/ ве́рныя во дни гоне́ний до́бре окормля́л еси́./ Те́мже и преще́ний безбо́жных не убоя́вся,/ да́же до кро́ве пострада́л еси́,/ о́тче священному́чениче Влади́мире,// моли́ Ми́лостиваго Бо́га спасти́ся душа́м на́шим.

Стихи́ра, глас 6:

Ве́рою жив, пра́ведниче, был еси́,/ де́лы любве́ и милосе́рдия сию́ укрепля́я,/ священному́чениче Влади́мире,/ а́лчущим бо и кро́ва лише́нным потре́бная подава́л еси́/ и в гоне́нии непрекло́нен пребы́л еси́./ Сего́ ра́ди бесо́в полки́ победи́л еси́/ и уста́ безбо́жных загради́л еси́, я́коже не́когда Дании́л уста́ льво́в:// моли́ спасти́ся душа́м на́шим.

Кано́н священному́ченику, глас 2.

Песнь 1

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Припев: Священномучениче Владимире, моли Бога о нас.

Гряди́те, лю́дие,/ пои́м песнь Христу́ Бо́гу,/ разде́льшему неве́дения на́шего мо́ре/ и наста́вльшему ны пе́ти свята́го му́ченика Своего́ Влади́мира,/ в не́мже просла́вися.

Припев: Священномучениче Владимире, моли Бога о нас.

Ре́вности Моисе́овы/ испо́лнен быв, о́тче Влади́мире,/ в пусты́ни безбо́жия ве́ру умно́жил еси́/ и дости́гл еси́ обетова́нныя земли́,/ Правосла́вныя Це́ркве.

Сла́ва Отцу́ и Сы́ну и Свято́му Ду́ху:

Тя, священному́чениче Влади́мире, за́поведи Госпо́дни при́сно храня́ща,/ по́лчища супоста́т не устраши́ша,/ те́мже во огра́ду Це́ркве Правосла́вныя вшед,/ дости́гл еси́ Земли́ Обетова́нныя.

И ны́не и при́сно и во ве́ки веко́в. Ами́нь.

Богородичен: Ковче́же святы́й и Ски́ние Боже́ственная,/ путево́ждствуй и нас ны́не в Го́рний Иерусали́м,/ при́сно от Бо́га отпа́дающия,/ да насле́дницы бу́дем Земли́ Обетова́нныя.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́./ Возвесели́ бо ся дух мой, внегда́ пе́ти:/ несть свят, я́коже Бог наш// и несть пра́веден па́че Тебе́, Го́споди.

Припев: Священномучениче Владимире, моли Бога о нас.

Ве́рою укрепля́емь, пра́ведне,/ не затвори́л еси́ уста́ твоя́, прише́дшей годи́не безбо́жия,/ но па́че разшири́л еси́ я, пропове́дуя Христ́а,/ и, я́коже Ной пра́ведный, ве́рою обличи́л еси́ нечести́выя.

Припев: Священномучениче Владимире, моли Бога о нас.

Темни́цы и враче́бницы посеща́я,/ Христа́ Авраа́млим страннолю́бием прия́л еси́,/ и я́коже о́наго, изведе́ тя Госпо́дь в Зе́млю Обетова́нную, во е́же пе́ти:/ несть пра́веден па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Про́поведь твоя́ возсия́ во оте́честве на́шем,/ егда́ мно́зи зако́ннии Це́ркве сы́нове впадо́ша в нече́стие,/ ты же благослове́ние Иа́ковле ве́ры ра́ди насле́довал еси́,/ те́мже с новому́ченики взыва́еши:/ несть свят, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: При́зри на ны, окамене́нныя се́рдцем и умо́м, Пресвята́я Де́во,/ и моли́ Сы́на Твоего́,/ да и мы ча́да Авраа́мля бу́дем/ и в ве́ре утверди́мся предста́тельством Твои́м, взыва́юще:/ несть пра́веден па́че Тебе́, Го́споди.

Седа́лен, глас 1:

Не доста́нет нам вре́мене, повеству́ющим о ве́ре твое́й,/ ю́же яви́л еси́ кроме́ Це́ркве, о́тче Влади́мире,/ но послу́шествован се́ю быв,/ дости́гл еси́ Небе́снаго Иерусали́ма,/ на Нача́льника ве́ры Иису́са взира́я,/ и кре́стным по́двигом, я́коже ле́ствицею,/ возше́л еси́ к Це́ркви напи́санных на Небесе́х,/ иде́же мо́лишися,/ да и мы с тобо́ю соверше́нство прии́мем.

Сла́ва, и ны́не, Богородичен:

Не доста́нет нам вре́мене воспе́ти чудеса́ Твоя́, Влады́чице,/ не доста́нет слове́с просла́вити та́инства, бы́вшая на Тебе́,/ па́че же дерзнове́ния не и́мамы, во гресе́х су́ще/ и во осужде́ние уста́ своя́ отверза́юще,/ но Ты сия́ очи́сти, Чисте́йшая А́нгел.

Песнь 4

Ирмос: Услы́шах, Го́споди, слух Твой, и убоя́хся,/ разуме́х дела́ Твоя́, и диви́хся, и возопи́х:// сла́ва си́ле Твое́й, Го́споди.

Припев: Священномучениче Владимире, моли Бога о нас.

Услы́шав Го́спода, призыва́ющаго тя,/ по сло́ву Его́ вся су́щая в ми́ре оста́вив,/ на крест возше́л еси́.

Припев: Священномучениче Владимире, моли Бога о нас.

Но́зе во благовествова́ние ве́ры обу́в/ и от си́лы в си́лу восходя́,/ свяще́нства благода́тию обле́клся еси́,/ та́же и му́ченическим венце́м увенча́лся еси́.

Сла́ва Отцу́ и Сы́ну и Свято́му Ду́ху:

Моли́твы де́лание возлюби́вшаго,/ слу́жбы святы́я соверши́теля тя поста́ви Госпо́дь,/ Ему́же, и в темни́цу вве́ржен, при́сно воспева́л еси́:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Слух Госпо́день услы́шавшия/ и дела́ Госпо́дня уразуме́вшия укрепи́, Пресвята́я Де́во,/ и сподо́би си́лою Сы́на Твоего́/ дела́ Бо́жия твори́ти.

Пе́снь 5

Ирмос: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го Бо́га не зна́ем.

Припев: Священномучениче Владимире, моли Бога о нас.

Све́та испо́лнено бысть/ свяще́нное служе́ние твое́,/ те́мже во све́те за́поведей Христо́вых/ ве́рныя лю́ди ходи́ти поуча́л еси́,/ му́дрыми словесы́ вразумля́я.

Припев: Священномучениче Владимире, моли Бога о нас.

Любо́вию о́трока сиро́тствующа всынови́в, свя́те,/ и духо́вная ча́да, я́коже родна́я прие́м,/ ны́не му́ченическим дерзнове́нием/ и нас духо́вныя сро́дники своя́ соде́лай.

Сла́ва Отцу́ и Сы́ну и Свято́му Ду́ху:

Повеле́нием Госпо́дним усе́рдно после́дуя,/ ча́дом твои́м ми́лостивый оте́ц яви́лся еси́/ и, я́ко до́брый па́стырь, тех, любо́вию назида́я,/ Христу́ приве́л еси́.

И ны́не и при́сно и во ве́ки веко́в. Ами́нь.

Богородичен: Угаси́ раздо́ры церко́вныя, Христе́,/ моли́твами Ма́тере Твоея́/ и наста́ви ны, не челове́ком угожда́ти, но Тебе́, Влады́ко,/ ра́зве бо Тебе́ ина́го Бо́га не зна́ем.

Песнь 6

Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,// и́стины же ду́хом пожру́ Тебе́.

Припев: Священномучениче Владимире, моли Бога о нас.

Благоче́стное погребе́ние жены́ твоея́/ челове́ка не́коего к ве́ре приве́де,/ му́ченическая же смерть твоя́/ мно́гия из глубины́ ме́ртвых дел возставля́ет.

Припев: Священномучениче Владимире, моли Бога о нас.

Во единонадеся́том часе́ при́зван,/ труды́ ре́вностныя и кончи́ну му́ченическую Христу́ прине́сл еси́,/ те́мже полу́ченный дина́рий пода́ждь нам, мо́лимся,/ я́коже всегда́ тре́бующим твори́л еси́.

Сла́ва Отцу́ и Сы́ну и Свято́му Ду́ху:

Прови́дящи жена́ твоя́ гоне́ния, возвести́ тебе́ смерть за Христа́, священному́чениче,/ ты же, словесы́ си́ми укрепле́н,/ му́ченический вене́ц му́жественне восприя́л еси́.

И ны́не и при́сно и во ве́ки веко́в. Ами́нь.

Богородичен: Ду́хом и и́стиною Бо́гу покланя́ющеся,/ воспева́ем Тя, Ма́ти Бо́жия,/ я́ко и́стинно Сло́во О́тчее ро́ждшую/ и моля́щуюся о спасе́нии ро́да христиа́нскаго.

Конда́к, глас 7:

Ору́жием пра́вды облече́нный,/ страда́ния за ве́ру му́жески прия́л еси́/ и, я́ко и́стинный во́ин Христо́в,/ мучи́телем противоста́л еси́, глаго́ля:/ привре́менно есть госпо́дство ва́ше./ Мы же вопие́м ти:/ ра́дуйся, священному́чениче Влади́мире,// во Ца́рствии Небе́снем венце́м нетле́нным от Бо́га увенча́нный.

И́кос:

Ве́рою стра́нствия на земли́ прия́л еси́,/ Оте́чествия и́стиннаго взыску́я,/ те́мже Бог угото́ва ти Небе́сный град;/ ве́рою поноше́ние Христо́во в бога́тство вмени́в,/ еги́пет мы́сленный оста́вил еси́,/ те́мже Бог на го́ру Богови́дения тя возведе́;/ ве́рою кровь свою́ пролия́л еси́,/ на мздовоздая́ние взира́я,/ те́мже па́льмовыя ве́тви в ру́це прие́м./ Мы же ны́не вопие́м ти:/ ра́дуйся, священному́чениче Влади́мире,/ во Ца́рствии Небе́снем венце́м нетле́нным от Бо́га увенча́нный.

Песнь 7

Ирмос: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Припев: Священномучениче Владимире, моли Бога о нас.

Безве́стно, я́ко а́гня незло́бивое пострада́в, священному́чениче Влади́мире,/ ны́не, в бе́лых оде́ждах на Небесе́х А́гнцу предстоя́, пое́ши:/ благослове́ние и честь и сла́ва Тебе́ во ве́ки.

Припев: Священномучениче Владимире, моли Бога о нас.

Небре́гл еси́ безбо́жных веле́ния, я́ко о́троцы в Вавило́не,/ те́мже по сме́рти А́нгел вознесе́ ду́шу твою́ в Небе́сныя оби́тели,/ иде́же со ста́рцы и А́нгелы покланя́ешися Престо́лу Влады́чню.

Сла́ва Отцу́ и Сы́ну и Свято́му Ду́ху:

В ро́ве земне́м скры́ти беззако́ние свое́ мня́ху уби́йцы,/ а́нгели же ду́шу твою́ к же́ртвеннику Бо́жию вознесо́ша,/ отону́дуже тщету́ мучи́телей свиде́тельствуеши, вопия́:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: О́бразу злато́му не покланя́ющихся/ ороси́ ми́лостию Твое́ю, Богоро́дице,/ Ни́ва бо Ты еси́ неора́нная,/ ороше́нная же Ду́хом Святы́м/ и прозя́бшая Еди́наго от Тро́ицы, Бо́га оте́ц на́ших.

Песнь 8

Ирмос: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га,/ по́йте, дела́, я́ко Го́спода,// и превозноси́те во вся ве́ки.

Припев: Священномучениче Владимире, моли Бога о нас.

Власть мучи́телеву, я́ко вре́менную обличи́в,/ в темни́цу вве́ржен был еси́,/ ю́же ти Госпо́дь росо́ю Ду́ха в храм претвори́./ Ны́не же пред Престо́лом Бо́жиим слу́жиши Ему́ во ве́ки.

Припев: Священномучениче Владимире, моли Бога о нас.

Доброму́др быв, егда́ разделе́ния церко́вная прилучи́шася,/ Христу́ Еди́ному ве́рно послужи́л еси́/ и ча́да своя́ в послуша́нии Тому́ сохрани́л еси́./ Те́мже Седя́щий на Престо́ле обита́ет в тебе́ во ве́ки.

Сла́ва Отцу́ и Сы́ну и Свято́му Ду́ху:

Бо́жие промышле́ние безро́потно прия́л еси́/ и, скита́яся и лише́ния терпя́,/ бли́жним служе́ния не оста́вил еси́, о́тче Влади́мире./ Те́мже по сло́ву Госпо́дню ра́дости неизрече́нныя насыща́ешися.

И ны́не и при́сно и во ве́ки веко́в. Ами́нь.

Богородичен: О́гненныя пе́щи и тьмы гее́нския изба́ви нас, Влады́чице,/ но ми́лостива к нам бу́ди,/ да Тя, я́ко Богоро́дицу и Ма́терь Све́та, в пе́снех возвели́чим.

Песнь 9

Ирмос: Безнача́льна Роди́теля Сын, Бог и Госпо́дь,/ вопло́щься от Де́вы нам яви́ся,/ омраче́нная просвети́ти, собра́ти расточе́нная,// Тем Всепе́тую Богоро́дицу велича́ем.

Припев: Священномучениче Владимире, моли Бога о нас.

Земны́м отце́м Свяще́нному Писа́нию науче́н,/ от Отца́ Небе́снаго печа́ть Ду́ха Свята́го прия́л еси́/ и, Сы́ну Бо́жию после́довав,/ да́ры Небе́сныя по́двигом му́ченическим оправда́л еси́.

Припев: Священномучениче Владимире, моли Бога о нас.

Гоне́ния, предрече́нная ти, прия́л еси́ от безбо́жных/ и, сло́ву ева́нгельскому после́дуя,/ мно́гия ско́рби и муче́ния претерпе́л еси́,/ сего́ ра́ди ны́не лику́еши во оби́телех О́тчих.

Сла́ва Отцу́ и Сы́ну и Свято́му Ду́ху:

Бо́гу ны́не предстоя́,/ просвети́ ны, грехми́ мно́гими омраче́нныя,/ воздви́гни от сна грехо́внаго/ и научи́ ны воспева́ти Тро́ицу Единосу́щную и Неразде́льную.

И ны́не и при́сно и во ве́ки веко́в. Ами́нь.

Богородичен: И́мамы в бе́здне му́читися, омраче́ннии страстьми́,/ а́ще не Ты, Де́во, умо́лиши Сы́на Твоего́,/ да поми́лует нас,/ тем Всепе́тую Богоро́дицу, Тя велича́ем.

Свети́лен:

Днесь све́тлый о́блак свиде́телей Бо́жиих призва́вше,/ вся новому́ченики Це́ркве Ру́сския просла́вим,/ да облиста́ет нас Со́лнце Пра́вды, Христо́с Бог наш,/ моли́твами священному́ченика Влади́мира,/ и́же ку́пно с ни́ми Престо́лу Бо́жию предстои́т/ и Све́та Невече́рняго наслажда́ется.

Сла́ва, и ны́не, Богородичен:

Днесь, Богома́ти,/ сия́нием Твои́х образо́в огражда́еши и осеня́еши нас./ Мы же благода́рне вопие́м Ти:/ ра́дуйся, Засту́пнице усе́рдная,/ гре́шных Спору́чнице и всех скорбя́щих Ра́досте.

Моли́тва

О священному́чениче Влади́мире, избра́нный учениче́ и после́дователю Христо́в! От ю́ности твоея́ Бо́га усе́рдно взыска́в, ве́ру и́стинную обре́л еси́ и, сло́вом ева́нгельским, я́ко свети́льником, весь путь жития́ твоего́ озари́в, в те́мную годи́ну гоне́ний крест па́стырский небоя́зненно подъя́л еси́ и, ве́рным наста́вник, окорми́тель и уте́шитель быв, смерть за ве́ру претерпе́л еси́. Те́мже моли́ся и ны́не Влады́це Христу́, правосла́вныя христиа́ны от разделе́ний соблюсти́, свяще́нники и мона́шествующия в по́двизе укрепи́ти, о́троки от па́губных и бесо́вских наве́тов сохрани́ти и вся ве́рныя в Правосла́вии утверди́ти и сию́ ве́ру святу́ю непрело́жну нам соблюсти́, да просла́вим ку́пно с тобо́ю на Небесе́х Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.