5 ноября.
Канон святому апостолу Иакову, брату Господню.
![Святому апостолу Иакову, брату Господню Святому апостолу Иакову, брату Господню](img_i/015.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 2:
Яко Госпо́день учени́к восприя́л еси́, пра́ведне, Ева́нгелие, я́ко му́ченик, и́маши е́же неопи́санное, дерзнове́ние — я́ко бра́т Бо́жий, е́же моли́тися — я́ко иера́рх. Моли́ Христа́ Бо́га спасти́ся душа́м на́шим.
Канон апо́стола. Гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Святый апостоле Иакове, моли́ Бо́га о нас.
Дая́нию благо́му, Иа́кове, и да́ру соверше́нну от Отца́ све́тов челове́ком подая́тися, учи́ши я́ве, Ему́же причасти́тися, апо́столе, тя́ пою́щим помоли́ся.
Припев: Святый апостоле Иакове, моли́ Бо́га о нас.
Све́том просвеще́н, до́блий, Боже́ственнаго Ду́ха и с Ни́м зако́ны изложи́в, Це́ркви управля́еши язы́ков, я́ко Христо́в апо́стол, священнотаи́нниче всеблаже́нне.
Сла́ва Отцу́ и Сы́ну и Свято́му Ду́ху:
Ли́к апо́стольский, всему́дре, я́ве украси́л еси́, я́ко пе́рвый иера́рх бы́в, самоде́йством Сло́ва пома́зан, я́ко учени́к и бра́т Бо́жий, священнопропове́дник свяще́ннейший.
И ны́не и при́сно и во ве́ки веко́в. Ами́нь.
Богородичен: Исто́чник Тя́ исцеле́ний иму́ще, почерпа́ем, я́ко Исто́чник ро́ждшую жи́зни, Богоро́дице Де́во Чи́стая, и ду́ш врачевство́, и теле́с обновле́ние.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Святый апостоле Иакове, моли́ Бо́га о нас.
Весели́тся о тебе́ коле́но Иу́дово дне́сь, Христо́выми светлостьми́ ви́де тя́ све́тло облиста́юща.
Припев: Святый апостоле Иакове, моли́ Бо́га о нас.
Звезду́ богосия́нну Це́рковь язы́чная иму́щи тя́, благосла́внаго пропове́дателя, и Боже́ственным Све́том озаря́ется.
Сла́ва Отцу́ и Сы́ну и Свято́му Ду́ху:
Зако́н ты́ жи́зни Це́ркви Христо́ве положи́л еси́, Жизнода́тельным Ду́хом ты́ законополага́я и веща́я.
И ны́не и при́сно и во ве́ки веко́в. Ами́нь.
Богородичен: Его́же родила́ еси́ пло́тию, о Богома́ти, из Отца́ Возсия́вшаго, Того́, Чи́стая, Иа́ков я́ко Бо́га все́х пропове́да.
Седа́лен, гла́с 8.
Сро́дник по пло́ти Иису́сов бы́л еси́, и от Него́, апо́столе, благода́ть мно́гу прия́л еси́ и все́м препо́дал еси́ просвеще́ние и ра́зум, всему́дре Иа́кове, и и́дольскую ле́сть из ко́рене исто́ргнув. Те́м, и́же тмы́ предста́тели и лестцы́, непра́ведно тя́ убива́ют, Спа́са пропове́дающа. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.
Сла́ва, и ны́не, Богородичен:
Со́лнца о́блаче разу́мнаго, Боже́ственнаго Све́та свети́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́нное мое́ се́рдце омы́й пото́ки умиле́ния, покая́ния же слеза́ми и от тиме́ния мя́ очи́сти де́л мои́х, да любо́вию зову́ Ти: Богоро́дице Присноде́во, моли́ Христа́ Бо́га прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.
Пе́снь 4.
Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.
Припев: Святый апостоле Иакове, моли́ Бо́га о нас.
Вве́л еси́ в мо́ре Твоя́ ко́ни, апо́столы, Спа́се, и просвети́ша язы́ки, к Твоему́ позна́нию привле́кше, Влады́ко.
Припев: Святый апостоле Иакове, моли́ Бо́га о нас.
Нескве́рно, я́ко зерца́ло, я́влься, и перводе́тельныя лучи́ Несозда́нныя Тро́ицы изве́стно прие́м, все́м возсия́л еси́.
Сла́ва Отцу́ и Сы́ну и Свято́му Ду́ху:
Валя́емаго тя́ ка́меня проро́чество освяще́нное зри́т и сокруша́юща пре́лести гнило́е су́етство си́лою Ду́ха.
И ны́не и при́сно и во ве́ки веко́в. Ами́нь.
Богородичен: Вше́д, о Богома́ти, во чре́во Твое́ Преве́чное Сло́во, роди́выйся из Отца́ неизрече́нно, Иа́кова апо́стола явля́ет.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Святый апостоле Иакове, моли́ Бо́га о нас.
Ты́, Го́споди, Све́т, блиста́ние Иа́кова яви́л еси́ светя́ща, и земны́я неве́дения и тмы́ изменя́юща.
Припев: Святый апостоле Иакове, моли́ Бо́га о нас.
Тя́, Го́споди, гла́сом свобо́дным пропове́да пра́ведный бра́т Тво́й, подража́тель же Стра́сти бы́сть, убива́емь.
Сла́ва Отцу́ и Сы́ну и Свято́му Ду́ху:
Ки́й земны́й у́м похва́л пе́ния тебе́ принести́ мо́жет, доброде́телей просвеще́нному благода́тьми, Иа́кове?
И ны́не и при́сно и во ве́ки веко́в. Ами́нь.
Богородичен: Тя́ и́стинно Боже́ственное обре́т жили́ще, всели́ся, о Де́во, на́ше спасе́ние, Сло́во, промышля́я.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Святый апостоле Иакове, моли́ Бо́га о нас.
Оде́ждею зако́нною облече́ тя́ лу́чшею, и иера́рха явля́ет, Ааро́на дре́вняго честне́йша, и́же ми́лости ра́ди в бра́тство прие́мый тя́.
Припев: Святый апостоле Иакове, моли́ Бо́га о нас.
Орга́н, де́йствы ударя́емь Ду́ха, все́ помышле́ние наслажда́я и Бо́гу приве́д спаса́емыя от рабо́ты люте́йшия, бы́л еси́ изря́днейший.
Сла́ва Отцу́ и Сы́ну и Свято́му Ду́ху:
Возжажда́в, жи́зненныя испи́л еси́ воды́, и ре́ки источа́еши богоглаго́ливаго твоего́ чре́ва, теку́щия вселе́нней Боже́ственным Ду́хом.
И ны́не и при́сно и во ве́ки веко́в. Ами́нь.
Богородичен: Ева у́бо преслуша́нием сме́рть роди́, Богоро́дица же, Жи́знь заче́нши, роди́ Нестаре́ющуюся и дре́вний за все́х отдаде́ до́лг.
Конда́к, гла́с 4.
Отчее Единоро́дное Бо́г Сло́во, прише́дшее к на́м в после́дния дни́, Иа́кове боже́ственне, пе́рваго тя́ показа́ Иерусали́млян па́стыря и учи́теля, и ве́рнаго строи́теля та́инств духо́вных: те́мже тя́ вси́ чти́м, апо́столе.
Икос:
Рожде́ние тя́ Ио́сифово, Иерусали́мов пе́рваго иера́рха, Иа́кове богови́дче, и Госпо́дня бра́та пе́сньми похва́льными воспое́м ве́рно, и к тебе́ возопие́м: да́руй на́м да́р соверше́н от Отца́ све́тов и отжени́ ско́рбь, настоя́щую от мно́жества прегреше́ний, поднесо́ша бо врази́ на ны́ пя́ту и обступи́ша на́с исма́ильтяне, и́хже сокруши́ вско́ре лу́ки, священноявле́нне, я́ко да тя́ вси́ почита́ем, апо́столе.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Святый апостоле Иакове, моли́ Бо́га о нас.
Яко в пещи́, на го́рнице просвеща́емь, Боже́ственным прише́ствием Ду́ха, та́инственно, богоглаго́ливе, возопи́л еси́: благослове́н еси́ в хра́ме сла́вы Твоея́, Го́споди.
Припев: Святый апостоле Иакове, моли́ Бо́га о нас.
Свы́ше дыха́ние зе́льное апо́стола язы́ком огнеобра́зным веща́ти Бо́жия вели́чествия устро́и: благослове́н еси́ в хра́ме сла́вы Твоея́, Го́споди.
Сла́ва Отцу́ и Сы́ну и Свято́му Ду́ху:
Виде́ния де́ятельнаго излага́я дщи́цу, от скрижа́ли же, я́ко духо́вныя, челове́ки научи́л еси́: благослове́н еси́, Бо́же мо́й, зовы́й, Го́споди.
И ны́не и при́сно и во ве́ки веко́в. Ами́нь.
Богородичен: Возсозда́вый ми́р, во утро́бе Твое́й, Богоневе́сто, Боже́ственнаго служе́ния показу́ет соверши́теля Иа́кова, взыва́юща: благослове́на Ты́ в жена́х Всенепоро́чная Влады́чице.
Пе́снь 8.
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припев: Святый апостоле Иакове, моли́ Бо́га о нас.
Ру́ки распросте́р кре́пкия, апо́столы Твоя́, Спа́се, благослови́л еси́, восходя́, Влады́ко, к Безнача́льному Отцу́ Твоему́, и устро́ил еси́ ты́я с весе́лием вопи́ти: благослови́те вся́ дела́ Госпо́дня Го́спода.
Припев: Святый апостоле Иакове, моли́ Бо́га о нас.
Якоже обеща́лся еси́, нело́жно апо́столом Твои́м, Ду́ха посла́л еси́. Сего́ Иа́ков, Влады́ко, све́тлостию просвеща́емь, вселе́нную мо́лниями просвеща́ет я́ве и вопие́т Тебе́: благослови́те вся́ дела́ Госпо́дня Го́спода.
Сла́ва Отцу́ и Сы́ну и Свято́му Ду́ху:
Му́дрость, Иа́кове му́дре, Ипоста́сную име́л еси́ Учи́теля, уча́щу тя́ неизрече́нным и неизглаго́ланным та́йнам, и к благоче́стию лю́ди зва́ти воздви́гл еси́: благослови́те вся́ дела́ Госпо́дня Го́спода.
И ны́не и при́сно и во ве́ки веко́в. Ами́нь.
Богородичен: Го́ру явле́нну мы́сленную, Де́во Чи́стая, проро́к ви́де Тя́, из Тебе́ бо пречестны́й Ка́мень отсече́ся, спаса́я вселе́нную вои́стинну, Боже́ственно пою́щую: благослови́те вся́ дела́ Госпо́дня Го́спода.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Святый апостоле Иакове, моли́ Бо́га о нас.
Прииди́те, первопресто́льника вси́, Це́ркве свети́льника, свяще́нными, Иа́кова, пе́сньми, я́ко иера́рха и христопропове́дника, тезоиме́нне пра́веднаго именова́нна, велича́ем.
Припев: Святый апостоле Иакове, моли́ Бо́га о нас.
Боже́ственнаго о́бщника, я́ко я́вльшася безконе́чнаго Ца́рствия, и Бо́жия нарече́нна бра́та, и житие́м и́стинствующа, именова́ние прие́мша, священнотаи́нника, тя́ велича́ем, Иа́кове.
Сла́ва Отцу́ и Сы́ну и Свято́му Ду́ху:
Престо́лу предстоя́, блаже́нне, венцено́сец Тро́ицы, ве́рою почита́ющих твою́ па́мять, нетле́ющих наслади́тися че́стей, я́ко иера́рх, Иа́кове, благоприя́тен, твоего́ Влады́ку умоли́.
И ны́не и при́сно и во ве́ки веко́в. Ами́нь.
Богородичен: Ты́, от Де́вы Рожде́ннаго неискусобра́чно, богоявле́нне, уче́нии твои́ми я́ве чести́ Бо́га науча́еши, Воплоще́нное Сло́во, в Него́же мы́ ве́рующе ны́не, досто́йно велича́ем.
Свети́лен.
Яко Госпо́дня бра́та бы́вша, блаже́нне Иа́кове богодохнове́нне, ве́рнии по до́лгу хва́лим тя́, сла́вяще све́тлую и всечестну́ю, и светоно́сную твою́ па́мять, моли́ся приле́жно за чту́щих тя́.
Сла́ва, и ны́не, Богородичен:
Моли́твенницу Тебе́ приво́дим и те́плую предста́тельницу, Чи́стую Ма́терь Твою́, ве́рнии, по до́лгу: сподо́би рабы́ Твоя́ причасти́тися сла́вы Твоея́, и пра́ведных ча́сти, и сла́дости ра́йския, и улучи́ти на́м небе́сное Ца́рствие.
Стихи́ры, гла́с 8.
Го́споди, / а́ще и на криле́ предста́ / святи́лища Иа́ков, / но, дерзнове́нием возопи́в, / Бо́га Сло́ва Тя́ пропове́да, / Соде́теля все́х, / в ми́р прише́дшаго: / его́же моли́твами и ны́не пода́ждь / просвеще́ние душа́м на́шим.
Го́споди, / а́ще и дре́вом глава́ / апо́столова сокруше́на бы́сть, / но в раи́ дре́во жи́зненное ему́ даде́ся, / и от привре́менных отреши́вся, / ве́чно весели́тся: / его́же моли́твами / Це́рквам ми́р Тво́й низпосли́.
Го́споди, / Тя́ испове́дав на земли́ до́блественне, / бра́т Бо́жий, / Сы́на Бо́га Вы́шняго, / и́скренно приснопа́мятный, / злосла́вныя враги́ / посрами́ и укроти́: / сего́ ра́ди и пострада́в, / Тебе́ предстои́т, ра́дуяся.
Го́споди, / а́ще и сверго́ша иуде́и / с высоты́ пра́веднаго, / но небе́сных черто́гов / с весе́лием сподо́бися, / и в пи́щи наслажде́ния / досто́йно весели́тся: / те́м у́бо подае́ши / ми́р душа́м на́шим.
Сла́ва И ны́не, гла́с 1.
Во о́гненней зари́ Боже́ственнаго Ду́ха просвети́вся, благоче́стия яви́лся еси́ боже́ственный ревни́тель, бра́те Бо́жий Иа́кове. Те́м и оде́ждею тя́ зако́ннаго свяще́нства, я́ко Ааро́на дре́вняго, честне́йшею оде́я, и́же милосе́рдия ра́ди в бра́тство тя́ прие́мый. Того́ моли́, апо́столов похвало́, спасти́ся душа́м на́шим.
Молитва апостолу Иакову, брату Господню по плоти
О, вели́кий богоизбра́нный и богопросла́вленный Апо́столе Иа́кове, бра́те Госпо́день! Ты́ еси́ вели́кий архиере́й Гра́да Свята́го, те́плый на́ш засту́пник и хода́тай, предстоя́щий Престо́лу Пресвяты́я Тро́ицы. Не отри́ни на́с от твоего́ заступле́ния, но воздви́гни на́с, низве́рженных грехи́ мно́гими. Име́яй вла́сть реши́ти и вяза́ти, разреши́ зо́л на́ших соу́зы, любве́ Бо́жией причти́ на́с и Ца́рствия Небе́снаго прича́стники, блаже́нне, соде́лай моли́твами твои́ми. Моли́ Христа́ Спа́са, да сподо́бит непреткнове́нно соверша́ти стра́нствие на́ше земно́е, да ве́чныя и блаже́нныя жи́зни на небеси́ сподо́бившеся, с тобо́ю вку́пе возмо́жем вы́ну восхваля́ти Тро́ицу Неразде́льную и воспева́ти Еди́но Божество́ Отца́ и Сы́на и Ду́ха Всесвята́го во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому апостолу Иакову, брату Господню Святому апостолу Иакову, брату Господню](img_b/015.jpg)