4 ноября.

Канон святому равноапостольному Аверкию, епископу Иерапольскому, чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й и́стина, сего́ ра́ди стяжа́л еси́ смире́нием высо́кая, нището́ю бога́тая, о́тче Аве́ркие, моли́ Христа́ Бо́га спасти́ся душа́м на́шим.

Кано́н святи́теля. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Равноапостольне отче Аверкие, моли́ Бо́га о нас.

Заре́ю све́тлою Трисо́лнечнаго Божества́ озаре́н бы́в, Аве́ркие, све́т бы́л еси́, су́щия во тме́ просвеща́я и все́ де́монское разруша́я омраче́ние.

Припев: Равноапостольне отче Аверкие, моли́ Бо́га о нас.

Житие́ на земли́ име́л еси́, преблаже́нне, небе́сное, с пло́тию, я́ко безпло́тен, жи́тельствовав и стра́сти умертви́в, и свяще́нства да́р прие́м.

Сла́ва Отцу́ и Сы́ну и Свято́му Ду́ху:

Име́я в тебе́, о́тче, Сло́во веща́ющо, безслове́сия разруши́л еси́ суему́дренных, де́монския хра́мы и куми́ры преле́стныя низложи́в.

И ны́не и при́сно и во ве́ки веко́в. Ами́нь.

Богородичен: Вити́йстии язы́цы глаго́лати недоуме́ют Твоего́ па́че сло́ва зача́тия: Бо́га бо родила́ еси́ пло́тию, Всечи́стая, на́м уподо́бльшася за благосты́ню.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Равноапостольне отче Аверкие, моли́ Бо́га о нас.

И словесы́ свяще́нными и показа́нии чуде́с, Аве́ркие, пресла́вно, пре́лести мо́ре пла́вающия, спасе́ния ко приста́нищу наста́вил еси́.

Припев: Равноапостольне отче Аверкие, моли́ Бо́га о нас.

Цельбы́ содева́я, соверша́я изря́дная, де́монов отгоня́я мечта́ния, спасе́ния все́м вино́вник, бога́тым предста́тель ты́ бы́л еси́.

Сла́ва Отцу́ и Сы́ну и Свято́му Ду́ху:

Сло́во свяще́нное, житие́ боже́ственное, нра́в, чудесы́ сия́ющь, жи́знь твоя́, о́тче, сла́вна и сме́рть честна́ бы́сть.

И ны́не и при́сно и во ве́ки веко́в. Ами́нь.

Богородичен: Сы́й Бо́г, пре́жде неви́димый, ви́димь бы́сть, Де́во, за благоутро́бие из чре́ва Твоего́ воплоща́емь: те́м Тя́ ве́рою ублажа́ем.

Седа́лен святи́теля, гла́с 8.

Иера́рх яви́лся еси́, ма́стию честно́ю обложе́н, о́тче, богоде́тельно и вся́ соверша́я благода́тию свяще́ннейше, даро́в же Боже́ственных и чуде́с све́тлостию украша́емь, Святы́м и Боже́ственным Ду́хом, всехва́льне, неду́ги исцеля́я и де́моны попаля́я, и мно́жества прельща́емых обраща́я, Аве́ркие. Сего́ ра́ди вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Равноапостольне отче Аверкие, моли́ Бо́га о нас.

Вельми́ престо́л, преподо́бне, украси́л еси́, святи́телю, вели́кими бо чудесы́ преле́потствовал еси́ и житие́м све́тлым. Сего́ ра́ди Превели́кий Бо́г на́ш вельми́ тя́ просла́ви.

Припев: Равноапостольне отче Аверкие, моли́ Бо́га о нас.

Ми́лости Воли́теля Го́спода ве́дый, богоно́се, те́пле Его́ умоли́л еси́ на исцеле́ние и спасе́ние мно́гих, те́плых во́д всечу́дное сотвори́ти истече́ние.

Сла́ва Отцу́ и Сы́ну и Свято́му Ду́ху:

Плодови́ты безча́дныя сотвори́л еси́ Бо́жиею благода́тию, соверши́л еси́ помышле́ния, вложи́в бо те́м, Аве́ркие, сло́ва се́мя я́ве, я́ко до́брый се́ятель, пожа́л еси́ кла́сы стори́цею, блаже́нне.

И ны́не и при́сно и во ве́ки веко́в. Ами́нь.

Богородичен: Исцели́ла еси́ сокруше́ние, Всенепоро́чная, и дре́внее окая́нство земноро́дных, ро́ждши Го́спода и Царя́ Христа́, поне́сшаго неду́ги на́ша за благоутро́бие неизглаго́ланное, Богоневе́сто.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Равноапостольне отче Аверкие, моли́ Бо́га о нас.

Поста́вив твоя́ но́ги на ка́мени се́рдца, богому́дре, па́дшия поги́белию и че́сти ка́мению подаю́щия, блаже́нне, боже́ственными словесы́ чествова́ти научи́л еси́ Ка́мень — Иису́са Христа́ и Бо́га на́шего.

Припев: Равноапостольне отче Аверкие, моли́ Бо́га о нас.

Врача́ разли́чно неду́гующих, путевожда́ все́х, прельще́нных злосове́тием, мирополо́жницу честны́х дарова́ний, прия́телище Боже́ственнаго Ду́ха, священноучи́теля почти́м Аве́ркия.

Сла́ва Отцу́ и Сы́ну и Свято́му Ду́ху:

Вино́ повеле́нием твои́м в еди́ном сосу́де со еле́ем, ви́ды же други́я вложе́нныя, во вре́мя свое́ несме́сно пресла́вно излива́ются, преизоби́лующую благода́ть твою́ явля́юще я́ве, свяще́нне.

И ны́не и при́сно и во ве́ки веко́в. Ами́нь.

Богородичен: Зако́ни в Тебе́ пресла́вно, Де́во, обновля́ются, ражда́еши бо безсе́менно Бо́га Спа́са и пребыва́еши де́вствующи па́ки, — стра́нно чу́до! Те́м Тя́, Ма́терь Емману́илеву, благоче́стно возвеща́ем.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Равноапостольне отче Аверкие, моли́ Бо́га о нас.

От восто́ка к за́паду прише́л еси́, де́монския и лю́тыя стра́сти цари́цу, преподо́бне, отреша́я си́лою Ду́ха.

Припев: Равноапостольне отче Аверкие, моли́ Бо́га о нас.

Стра́нен ми́ра яви́лся еси́, свяще́ннейше, стра́нная и стра́шная соверша́я чудеса́, и ходя́ в телеси́, и отсю́ду отше́д, Аве́ркие.

Сла́ва Отцу́ и Сы́ну и Свято́му Ду́ху:

Молниезра́чен, о́тче, ви́димь, де́монския победи́л еси́ полки́, терпе́ти не могу́щия твоего́, Аве́ркие, преще́ния, богодухнове́нне.

И ны́не и при́сно и во ве́ки веко́в. Ами́нь.

Богородичен: Тобо́ю, Всесвята́я Богоневе́сто, умерщвле́ннии, жи́зни сподо́бихомся и, тле́нию рабо́тающии, нетле́нием я́ве обогати́хомся.

Конда́к, гла́с 8.

Яко свяще́нника превели́каго и апо́столов совсе́льника, Це́рковь почита́ет тя́, вся́ ве́рных, Аве́ркие: ю́же твои́ми моли́твами соблюда́й, блаже́нне, непобеди́му и необурева́ему от вся́кия е́реси, и нескве́рну, я́ко приснопа́мятный.

Икос:

Ми́ра всего́ суету́ помышля́я, ми́ра учуже́нный и, стра́сти Христо́вы подража́я, плотски́я стра́сти умертви́л еси́ и, кре́ст тво́й взе́м, после́довал еси́, блаже́нне, Творцу́ твоему́, и, пребыва́я с Ни́м, ны́не моли́ся за чту́щия тя́ и́стинно, я́ко приснопа́мятный.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Равноапостольне отче Аверкие, моли́ Бо́га о нас.

Яко боже́ственный па́стырь, я́ко чуде́с самотво́рец, слепы́м е́же зре́ти моли́твою, о́тче, пода́л еси́, и слы́шати глухи́м, очище́ние же прокаже́нным, и благотече́ние хромы́м, воспева́ющим: благослове́н еси́, Бо́же оте́ц на́ших.

Припев: Равноапостольне отче Аверкие, моли́ Бо́га о нас.

Пропове́дает твое́ чудодея́ние, му́дре, во ве́к те́плых во́д искипе́ние и сто́лп, у гро́ба твоего́ лежа́щий, его́же от Ри́ма, вели́каго гра́да, принесе́ лука́вый ду́х, изгна́нный тобо́ю, о́тче Аве́ркие.

Сла́ва Отцу́ и Сы́ну и Свято́му Ду́ху:

Лю́дем смире́нным во́ждь бы́л еси́, высо́к в виде́ниих, и де́йствиях же, и си́лах яви́вся, свяще́ннейше, и Высоча́йшаго Царя́ уго́дник, Ему́же взыва́ем: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Роди́ся из Тебе́, Его́же роди́ Оте́ц пре́жде денни́цы, во двою́ существу́ и хоте́нию, я́ко Бо́г же и Челове́к, Отрокови́це, зна́емь все́м, ве́рою зову́щим: Благослове́нная, Бо́га пло́тию ро́ждшая.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Равноапостольне отче Аверкие, моли́ Бо́га о нас.

Пресла́вный па́стырь, неистощи́мый исто́чник исцеле́ний, Це́ркве сто́лп, ве́рных утвержде́ние, вели́кий свети́льник, многосве́тлый священноучи́тель да почти́тся Аве́ркий.

Припев: Равноапостольне отче Аверкие, моли́ Бо́га о нас.

Ты́, я́коже фи́никс, псало́мски процве́л еси́ во дво́рех Бо́га Жива́го; умно́жился еси́, я́ко ке́др и я́ко ма́слина, му́дре, показа́лся еси́, ма́стию де́л твои́х все́х умаща́я ли́ца ве́рою.

Сла́ва Отцу́ и Сы́ну и Свято́му Ду́ху:

Горы́ верху́ действи́тельным жи́тельством я́вственне, я́коже гра́д позна́лся еси́ стоя́щь, и погру́жшийся дре́вле пре́лестию гра́д тво́й, преподо́бне, Гра́да Вы́шняго явля́еши насле́дника.

И ны́не и при́сно и во ве́ки веко́в. Ами́нь.

Богородичен: Се́ о́др Соломо́нов, его́же обстоя́т си́льнии, Богодухнове́ннаго Писа́ния ны́не прорица́ния, на не́мже Христо́с Бо́г воплоще́нием Боже́ственным почи́л е́сть, Благослове́нная и Обра́дованная.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Равноапостольне отче Аверкие, моли́ Бо́га о нас.

Яко светоза́рно твое́ житие́, я́ко красны́ но́ги, я́ко зело́ чу́дно е́же к Бо́гу маа́ние же вку́пе и бли́жность, я́ко велича́йшая благода́ть, свы́ше да́нная тебе́, му́дре. Сего́ ра́ди ве́рою почита́ем тя́, Аве́ркие.

Припев: Равноапостольне отче Аверкие, моли́ Бо́га о нас.

Тя́, сожи́тельника все́х святы́х му́ченик и ревни́теля боже́ственных учени́к, патриа́рхов равноче́стна, проро́ков и преподо́бных, и небе́сных слу́г собесе́дника ве́рою сла́вим, Аве́ркие.

Сла́ва Отцу́ и Сы́ну и Свято́му Ду́ху:

Пресвята́я твоя́ па́мять, простира́ющися в ми́ре, просвеща́ет челове́к ду́ши све́том, бога́тым в благода́ти, ю́же соверша́юще любо́вию, страсте́й на́с и тмы́ напа́стныя моли́твами твои́ми изба́ви, мо́лимся, Аве́ркие.

И ны́не и при́сно и во ве́ки веко́в. Ами́нь.

Богородичен: Све́тла Тя́ свети́льника проро́к прови́де, свещу́ боже́ственную и́стинно в Себе́ нося́щую, Всесвята́я Де́во, Еди́наго Пресу́щнаго Бо́га, за благоутро́бие ми́лости из Тебе́ вочелове́чшася.

Свети́лен.

Потещи́ тя пону́ди блазноде́латель де́мон к Ри́му гра́ду, вше́дый в царе́ву дще́рь лука́вно, из нея́же изгна́в пса́, обремене́нна посла́л еси́ и сто́лп нося́ща во Иерапо́ль, Аве́ркие богогла́се.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, равноапостольне Аверкие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.