4 ноября.

Канон святым седми отроком, Ефесским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н му́чеников. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святии отроцы Ефесстии, моли́те Бо́га о нас.

Седми́чным число́м честву́еми, святи́и о́троцы се́дмь, све́тлии зве́зды, на тве́рди церко́вней сия́юще, и́же свиде́тельством на небе́сная все́льшеся, помяни́те ве́рою чту́щия ва́с.

Сла́ва Отцу́ и Сы́ну и Свято́му Ду́ху:

Седмосве́тлым сия́нием Ду́ха, вообража́юще златоза́рную свещу́, му́ченицы седмочи́сленнии, мра́к ума́лили есте́ пре́лести и све́том благоче́стия вся́ ны́не седмеросугу́бно просвеща́ете.

И ны́не и при́сно и во ве́ки веко́в. Ами́нь.

Богородичен: На Тя́, Де́во, наде́жду полага́ю спасе́ния моего́, грехо́вныя ти́ны всего́ мя́ омы́й и чи́ста мя́ соде́лай, Сы́ну Твоему́ изя́щне благоугожда́юща и де́юща Того́ всесвяту́ю во́лю.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Святии отроцы Ефесстии, моли́те Бо́га о нас.

Явльшеся на земли́, седмосве́тлии, я́ко свети́льницы доброде́телей и по́двигов заре́ю, и чуде́с блиста́ньми све́тло просвети́вше, све́т богозна́ния всему́ ми́ру просия́сте.

Сла́ва Отцу́ и Сы́ну и Свято́му Ду́ху:

От пеле́н ма́терних возложи́вшеся Творцу́, Того́ ра́ди небрего́сте о сла́ве и че́сти ца́рской, и бога́тстве мимотеку́щем, от Него́же нетле́нных че́стей сла́ву получи́сте.

И ны́не и при́сно и во ве́ки веко́в. Ами́нь.

Богородичен: Умерщвле́нный мо́й у́м, Жи́зни де́йством, я́вльшияся из Тебе́, ми́ру воздви́гни, я́звы и о́бразы потре́бльши грехо́вныя, еди́на Богороди́тельнице, Всенепоро́чная.

Седа́лен, гла́с 4.

Яко столпи́ су́ще Це́ркве Христо́вы, сте́ны разори́сте неве́рствия кре́пко, седмобра́тнии му́ченицы. Те́м пре́жде сме́рти е́ллинскую я́рость и па́ки по сме́рти ерети́ческую бу́рю разруши́сте, моля́щеся о душа́х на́ших.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святии отроцы Ефесстии, моли́те Бо́га о нас.

Бра́тским совокупля́еми сою́зом и боже́ственным жела́нием распала́еми, согла́сием и́стиннаго, му́ченицы Госпо́дни, испове́дания и ве́ры, посрами́сте мучи́телей суему́дренный ра́зум и пре́лести многобо́жное уче́ние.

Сла́ва Отцу́ и Сы́ну и Свято́му Ду́ху:

За Христа́ и со Христо́м гони́ми, в верте́пех, гора́х же и про́пастех земны́х скрыва́еми. Того́ ра́ди сно́м живоно́сным вме́сто сме́рти усну́ли есте́ на ле́та должа́йшая, я́вственно утвержда́юще о́бщее земны́х Воскресе́ние.

И ны́не и при́сно и во ве́ки веко́в. Ами́нь.

Богородичен: Да о́браз, засы́панный страстьми́, обнови́ши бога́тством благосты́ни, в де́вственную всели́лся еси́ утро́бу, из нея́же Му́дрость хра́м Бо́жий созда́л еси́, е́юже с челове́ки пожи́л еси́, Ще́дрый, и спа́сл еси́ ми́ра концы́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии отроцы Ефесстии, моли́те Бо́га о нас.

Умертви́вшеся ми́ру, вся́ жите́йская кра́сная отри́нули есте́, живо́т Держа́щему живо́т сво́й преда́вше, живоно́сный со́н, на до́лга ле́та влеку́ще, о́бщаго воскресе́ния о́браз.

Сла́ва Отцу́ и Сы́ну и Свято́му Ду́ху:

Страда́льцы житие́м яви́стеся, до́лгая гоне́ния претерпе́вше, в гла́де и жа́жди, в ра́зных беда́х и ско́рбех, и злоиму́ществах за Христа́ терпя́ще, и богатя́щеся су́що воспокое́нием.

И ны́не и при́сно и во ве́ки веко́в. Ами́нь.

Богородичен: В Тебе́, стене́, обогаща́емии и предста́тельством Твои́м сохраня́емии, Твое́ю боже́ственною сла́вою хва́лящеся, Тя́ ублажа́ем: Ты́ бо, Пресвята́я, душа́м на́шим источа́еши весе́лие и ра́дость.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии отроцы Ефесстии, моли́те Бо́га о нас.

Любо́вию, я́же к Бо́гу, Ефе́сскаго оте́чества, му́дрии, ро́д све́тлый, бога́тство же пресве́тлое и сла́ву пречестну́ю оста́вили есте́, насле́дие небе́сное произбра́вше.

Сла́ва Отцу́ и Сы́ну и Свято́му Ду́ху:

Седмочи́сленный страда́льцев ли́к, боже́ственне совокупля́емь, низложи́ враго́в мно́жество многочи́сленное и сла́ву прия́ша испове́дания, и венцы́ страда́ния.

И ны́не и при́сно и во ве́ки веко́в. Ами́нь.

Богородичен: Возсия́ от Сио́на Вы́шняго благоле́пие прия́тием пло́ти, по соедине́нию неизрече́нному, из Тебе́, Неискусобра́чная, оде́ян, и ми́р просвети́.

Конда́к отроко́в, гла́с 4.

Просла́вивый на земли́ святы́я Твоя́, пре́жде втора́го и стра́шнаго прише́ствия Твоего́, Христе́, пресла́вным воста́нием отроко́в показа́л еси́ Воскресе́ние неве́дящим е́, нетле́нна одея́ния и телеса́ яви́в, и царя́ уве́рил еси́ вопи́ти: вои́стинну е́сть ме́ртвых воста́ние.

Икос:

Чу́дное и высо́кое отроко́в воскресе́ние ви́дев, иера́рх Ефе́сский иногда́ удиви́вся ра́зумом, пи́шет со тща́нием ве́рнейшему царю́ те́х воста́ние: приити́ сподо́би держа́ве твое́й, влады́ко, зде́ да ви́диши Бо́га твоего́ си́лу, ю́же показа́ тебе́. — Абие воста́в вели́кий победоно́сец, ше́ствие творя́ще ра́дуяся, вторы́й яви́вся Илия́ колесни́чник, вопия́: вои́стинну е́сть ме́ртвых воста́ние.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святии отроцы Ефесстии, моли́те Бо́га о нас.

Бо́гу покаря́ющеся, Боже́ственным зако́ном наказу́еми о́троцы, ра́зумом пра́вым пребеззако́нная повеле́ния мучи́телей злы́х укори́ли есте́, сме́ртию жи́знь приобре́тше и нетле́ние, ме́ртвым обога́щшеся те́лом.

Сла́ва Отцу́ и Сы́ну и Свято́му Ду́ху:

Сме́ртную ча́шу за Творца́ пи́ти жела́юще ве́рно безсме́ртия ра́ди и нетле́ния, погребе́ние претерпе́сте теле́с, изъясня́юще воста́ние пресла́вным воста́нием ва́шим, му́ченицы.

И ны́не и при́сно и во ве́ки веко́в. Ами́нь.

Богородичен: Яко у́тро возсия́ла еси́, пра́вды Со́лнце иму́щи, от тмы́ ми́ра неве́дения изыма́ющаго богове́дением, Ему́же пое́м, Пречи́стая: благослове́н еси́, Бо́же оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии отроцы Ефесстии, моли́те Бо́га о нас.

Седмери́чно облиста́ па́мять ва́ша дне́сь, со́лнечных лу́чь обра́зно просвеща́ющи, му́дрии, подсо́лнечную страда́льческими све́тлостьми, чудоде́йственными же блиста́ньми и Боже́ственных догма́тов заря́ми, и́миже уверя́ете все́м воста́ние теле́с и ме́ртвых нетле́ние.

Сла́ва Отцу́ и Сы́ну и Свято́му Ду́ху:

Авимеле́хово пре́жде на селе́ сохране́ние положи́ Бо́г, я́ко не ви́дети гра́да иногда́ запусте́ния. Ва́с же соблюде́ ле́ты множа́йшими в верте́пе спя́щия на увере́ние все́х воскресе́ния, о́троцы, веко́в седмочи́сленных равночи́сленнии свети́льницы.

И ны́не и при́сно и во ве́ки веко́в. Ами́нь.

Богородичен: Освяти́вшися Ду́хом, Богоро́дице Всенепоро́чная, и́стинно прия́ла еси́ во чре́ве Безнача́льнаго Сы́на и Присносу́щнаго, в Тебе́, Чи́стая, воплоще́ннаго на благодея́ние ве́рою вопию́щих: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святии отроцы Ефесстии, моли́те Бо́га о нас.

Удиви́ся о се́м вся́к земноро́дный, почуди́ся же и вся́к у́м, я́ко ме́ртвии, по многовре́меннем погребе́нии, в верте́пе лежа́ще, а́ки в ве́чер усну́вше и у́тре обы́чно востаю́ще, яви́шася, уверя́юще ме́ртвых о́бщее воста́ние.

Сла́ва Отцу́ и Сы́ну и Свято́му Ду́ху:

Седмочи́сленнии му́чеников све́тлии свети́льницы, ефе́сская свети́ла присносве́тлая, ми́ра всего́ моли́твенницы и предста́теле те́плии, о́бщаго воскресе́ния пропове́дницы и храни́телие ве́рных, испроси́те тишину́ на́м, и спасе́ние, и ми́р все́м конце́м.

И ны́не и при́сно и во ве́ки веко́в. Ами́нь.

Богородичен: Яко Ма́ти Пострада́вшаго о на́с, душетле́нных мя́ страсте́й изба́ви; я́ко Милосе́рдая, разреши́ прегреше́ний у́зы; я́ко Блага́я, ублажи́ ны́не озло́бленную мою́ ду́шу де́монскими прило́ги, Де́во Богоро́дице, да пою́ Тя́, Всепе́тую.

Свети́лен.

Ору́жием Честна́го Твоего́ Креста́ огра́ждшеся, страстоте́рпцы Твои́, Сло́ве, проти́вныя си́лы кре́пко победи́ша и мучи́телей посрами́ша, и о Тебе́ пострада́ша, и Тебе́, Христе́ мо́й, Всецарю́, сца́рствуют ку́пно.

Молитва семи отрокам Ефесским

О, пречу́днии святи́и седмочи́сленнии о́троцы, Ефе́са гра́да похвало́ и всея́ вселе́нныя упова́ние! Воззри́те с высоты́ Небе́сныя сла́вы на нас, любо́вию па́мять ва́шу чту́щих, наипа́че же на младе́нцы христиа́нския, ва́шему заступле́нию от роди́телей свои́х препоруче́нныя. Низведи́те на ня благослове́ние Христа́ Бо́га, ре́кшаго: оста́вите дете́й приходи́ти ко Мне. Боля́щия у́бо в них исцели́те, скорбя́щия уте́шите; сердца́ их в чистоте́ соблюди́те, кро́тостию испо́лните я́, и в земли́ серде́ц их зерно́ испове́дания Бо́жия насади́те и укрепи́те, во е́же от си́лы в си́лу им возраста́ти. И всех нас, святе́й ико́не ва́шей предстоя́щих, мо́щи же ва́ша с ве́рою лобыза́ющих и те́пле вам моля́щихся, сподо́бите Ца́рствие Небе́сное улучи́ти и немо́лчными гла́сы ра́дования та́мо прославля́ти великоле́пое и́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.