3 ноября.

Канон cвященномученику Павлину (Крошечкину), архиепископу, Могилёвскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От ю́ности жела́ние к Бо́гу возложи́в,/ на па́житех мона́шеских упа́слся еси́/ и, мно́гия доброде́тели стяжа́в,/ архипа́стырь слове́сных ове́ц яви́лся еси́,/ и́хже до́бре упа́с,/ мно́гия ско́рби от богобо́рцев претерпе́л еси́/ и, муче́нием путь сконча́в,/ Ца́рствие Небе́сное насле́довал еси́,/ священному́чениче Павли́не,/ моли́ Христа́ Бо́га// спасти́ся душа́м на́шим.

Ин тропа́рь, гла́с 2:

Ве́ры правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Павли́не,/ па́ству твою́ до́бре упа́сл еси́,/ и в хла́дней Сиби́ри му́ченическую смерть прия́л еси́./ Ны́не же в ве́чней сла́ве пребыва́я,// моли́ спасти́ся душа́м на́шим.

Канон свята́го. Гла́с 3.

Пе́снь 1.

Ирмос: Фарао́ни колесни́цы глубино́ю покры́в, Го́споди,/ мо́ре разве́ргл еси́,/ и спасл еси́ пе́сньми пою́щия Тя,// лю́ди изра́ильтеския.

Припев: Священному́чениче Павли́не, моли́ Бо́га о нас.

Сло́ва служи́теля и свиде́теля, Павли́на сла́внаго, жити́я кра́сная исправле́ния и честна́я страда́ния пода́ждь ми, Сло́ве, в пе́снех досто́йно восхвали́ти.

Припев: Священному́чениче Павли́не, моли́ Бо́га о нас.

Твои́ми моли́твами, священному́чениче, напра́ви ум мой, мно́гими по́мыслы расточе́нный, да просла́влю тя, мно́гими скорбьми́ во Ца́рствие Небе́сное вше́дша.

Сла́ва Отцу́ и Сы́ну и Свято́му Ду́ху:

Роди́телей благоче́стивых до́брый и избра́нный плод яви́вся, блаже́нне Павли́не, от ю́ности всем се́рдцем твои́м и помышле́нием Бо́га возлюби́л еси́.

И ны́не и при́сно и во ве́ки веко́в. Ами́нь.

Богородичен: А́нгелов Влады́чице, пресве́тлая похвало́ и де́вственная сла́во! На Тя наде́ющеся, при́сно зове́м: ра́дуйся, Неве́сто Неневе́стная!

Пе́снь 3.

Ирмос: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,/ несть свят, несть пра́веден// па́че Тебе́, Го́споди.

Припев: Священному́чениче Павли́не, моли́ Бо́га о нас.

Жела́нием кра́йним влеко́мь, дом роди́тельский оста́вити потща́лся еси́, боголю́бче, сего́ ра́ди, о́трок сый, в дому́ Бо́жии водвори́лся еси́, при́сно поя́: несть свят, несть пра́веден па́че Тебе́, Го́споди.

Припев: Священному́чениче Павли́не, моли́ Бо́га о нас.

А́нгел земны́й и Небе́сный челове́к яви́лся еси́, богому́дре, те́мже оби́тели Саро́вския дости́г, в служе́ние бра́тии сам себе́ пре́дал еси́, ра́дуяся и воспева́я: несть свят, несть пра́веден па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Лука́ваго ко́зни постиго́ша тя, до́бре послу́шниче, ты же, на гро́бе преподо́бнаго Серафи́ма сле́зы пролия́в, во смире́нии Бо́гу возопи́л еси́: несть свят, несть пра́веден па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен:Честне́йшую Херуви́м и сла́внейшую су́щи Серафи́м, Де́ву Пречи́стую воспои́м и Ро́ждшемуся из Нея́ возопии́м: несть свят, несть пра́веден па́че Тебе́, Го́споди.

Седа́лен, гла́с 8.

Мно́гими доброде́тельми обогати́лся еси́, свя́те Павли́не: кро́тостию, смире́нием и любо́вию, нищелю́бием и долготерпе́нием, си́ми же да́нный тебе́ тала́нт стори́цею умножи́в, Боже́ственных Та́ин непоро́чный служи́тель яви́лся еси́, те́мже врата́ Небе́сная отверзо́шася тебе́, и в ра́дость вшел еси́ Го́спода Твоего́. Его́же моли́ и нас Ца́рствия Небе́снаго сподо́бити.

Сла́ва, и ны́не, Богородичен:

Во гла́сех пе́ний вопие́м Ти, Влады́чице А́нгелов: непреста́нно моли́ся о нас, стихи́ями ми́ра се́го одержи́мых и грехо́м порабо́тившихся; да воста́нем от паде́ния и в покая́нии к Сы́ну Твоему́ припаде́м, вопию́ще: помяни́ нас, Го́споди, во Ца́рствии Твое́м.

Пе́снь 4.

Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.

Припев: Священному́чениче Павли́не, моли́ Бо́га о нас.

Па́жити мона́шеския, я́ко пчела́ трудолю́бная, облете́л еси́, о́тче Павли́не, иде́же мед духо́вный собра́в, со́ты души́ твоея́ ра́зумом просвеще́нным, я́ко некта́ром, испо́лнил еси́, по́я: сла́ва си́ле Твое́й, Го́споди.

Припев: Священному́чениче Павли́не, моли́ Бо́га о нас.

Влады́це Христу́ сам себе́ пре́дал еси́, Павли́не блаже́нне, и, да́нный ти тала́нт трудолю́бно умно́жив, во оби́телех Костромски́х и Яросла́вских до́бре пожи́л еси́, благода́рственно воспева́я: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

И́ноческаго жития́ ревни́телю, свя́те Павли́не! Ты, мал нарече́н быв, ве́рен Бо́гови пребы́л еси́, те́мже и над мно́гими поста́влен, во смире́нии вели́чие яви́л еси́, глаго́ля: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Еди́на Чи́стая и Пречи́стая Ма́ти Де́во! Моли́твы на́ша приими́ и Сы́на Твоего́ умоли́ пода́ти нам прегреше́ний проще́ние, непреста́нно вопию́щим: сла́ва си́ле Твое́й, Го́споди.

Пе́снь 5

Ирмос: К Тебе́ у́тренюю всех Творцу́,/ преиму́щему всяк ум ми́рови,/ зане́ свет повеле́ния Твоя́,// в ни́хже наста́ви мя.

Припев: Священному́чениче Павли́не, моли́ Бо́га о нас.

Новоспа́сская оби́тель вельми́ тобо́ю хва́лится, Павли́не всече́стне, ты бо в той, я́ко свети́льник на све́щнице, посреде́ сто́льнаго гра́да доброде́тельми просия́л еси́.

Припев: Священному́чениче Павли́не, моли́ Бо́га о нас.

Му́дростию украше́н, я́ко седи́ною, во мла́дости твое́й кро́ток и смире́н пребы́л еси́, достохва́льне Павли́не. Те́мже, богосло́вия уче́нию навы́к, Прему́дрости Ипоста́сней служи́тель изря́ден яви́лся еси́.

Сла́ва Отцу́ и Сы́ну и Свято́му Ду́ху:

Че́стен и чист в житии́ твое́м был еси́, свя́те Павли́не, сего́ ра́ди, свяще́нства са́ном по достоя́нию украси́вся, па́стве моско́встей па́стырь до́брый яви́лся еси́ и наста́вник ю́ношам преизя́щен.

И ны́не и при́сно и во ве́ки веко́в. Ами́нь.

Богородичен: Никто́же притека́яй к Тебе́ посра́млен от Тебе́, Де́во, исхо́дит, но про́сит заступле́ния, и благода́ть прие́млет незави́стно.

Пе́снь 6.

Ирмос: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол,// и к Све́ту Твоему́, молю́ся, наста́ви.

Припев: Священному́чениче Павли́не, моли́ Бо́га о нас.

Челове́че Бо́жий и служи́телю ве́рный, свя́те Павли́не! Ты, я́ко преподо́бен, незло́бив и безскве́рнен, во́лею Бо́жиею гра́ду Ку́рску архипа́стырь посыла́ешися, да упасе́ши о́вцы слове́сныя па́жити Христо́вы.

Припев: Священному́чениче Павли́не, моли́ Бо́га о нас.

Вменя́я вся уме́ты бы́ти, да Христа́ приобря́щеши, наипа́че же па́ству твою́ усво́иши Христу́, трудолю́бен де́латель, о́тче Павли́не, яви́лся еси́, Боже́ственная соверша́я, и пропове́дуя, и моля́ся на всяк час Бо́гу.

Сла́ва Отцу́ и Сы́ну и Свято́му Ду́ху:

Жажда́ти пра́вды Бо́жия не преста́л еси́, блаже́нне Павли́не, те́мже, а́ки еле́нь на исто́чники водны́я, во святы́я оби́тели гра́да Пути́вля прите́кл еси́, и́ноческаго жития́ и́стинный люби́телю.

И ны́не и при́сно и во ве́ки веко́в. Ами́нь.

Богородичен: О Ма́ти Преблага́я, сла́вныя оби́тели Гли́нския похвало́! Моли́твами Твои́ми не преста́й покрыва́ти вся ве́рныя от вра́жия наве́та и озлобле́ния.

Конда́к, гла́с 3.

Апо́столов насле́дниче/ и святи́телей украше́ние,/ Павли́не досточу́дне,/ ны́не Це́рковь Ру́сская тя досто́йно воспева́ет,/ ты бо глаго́лы жи́зни ве́чныя небоя́зненно возвеща́л еси́/ и, Христа́ пред отсту́пники че́стне испове́дав,/ кро́вию твое́ю во Свята́я Святы́х вшел еси́.// Моли́ спасти́ся душа́м на́шим.

Икос:

Многообра́зни по́двизи и приско́рбно житие́ твое́ бысть, священному́чениче: от ю́ности бо крест на ра́мена взем, Христу́ после́довал еси́, И́же, ви́дев твое́ благо́е изволе́ние, па́стыря слове́сным овца́м тя поста́ви. Егда́ же прии́де о́гненнаго испыта́ния час и во́лцы лю́тии ста́до Христо́во обступи́ша, ты, преще́ний мучи́телей не убоя́вся, я́ко па́стырь до́брый ду́шу за па́ству положи́л еси́. Сего́ ра́ди воспева́ем тя си́це: ра́дуйся, от ю́ности всего́ себе́ Го́сподеви всеце́ло возложи́вый; ра́дуйся, благослове́ние ма́тере твоея́ восприе́мый. Ра́дуйся, мона́шества ру́сскаго розго́ добропло́дная; ра́дуйся, послуша́ния цве́те неувяда́емый. Ра́дуйся, прему́дрости боже́ственныя стяжа́телю; ра́дуйся, просвеще́ния духо́внаго насади́телю. Ра́дуйся, ста́да Христо́ва па́стырю до́брый; ра́дуйся, архиере́ю всечестны́й. Ра́дуйся, Це́ркви Ру́сстей в гоне́ниих послужи́вый; ра́дуйся, за ве́ру Христо́ву да́же до кро́ве пострада́вый. Ра́дуйся, вдов и сиро́т пита́телю; ра́дуйся, благоче́стия ревни́телю. Ра́дуйся, Павли́не, па́стырю до́брый и му́чениче пресла́вный.

Пе́снь 7.

Ирмос: Тебе́ во огни́ ороси́вшаго о́троки богосло́вившия,/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:// благослове́н Бог оте́ц на́ших.

Припев: Священному́чениче Павли́не, моли́ Бо́га о нас.

Преще́ний богобо́рцев не убоя́вся, непрекло́нен пребы́л еси́, о́тче Павли́не, те́мже во узи́лище непра́ведно влеко́мь и заключа́емь, се́рдцем умиле́нным вопия́л еси́: благослове́н Бог оте́ц на́ших.

Припев: Священному́чениче Павли́не, моли́ Бо́га о нас.

Утверди́л еси́ но́зе твои́, терпеливоду́шне Павли́не, на ка́мени за́поведей Христо́вых, сего́ ра́ди не убоя́лся еси́, егда́ власти́телие нечести́вии ополчи́шася на тя, оба́че глаго́лал еси́: благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Моли́твою, покая́нием и посто́м укрепля́емь, в темни́це а́ки в затво́ре пребы́л еси́, и сию́ духо́вную наста́вницу наре́кл еси́; крест же из хле́ба себе́ сотвори́в, со упова́нием на него́ взира́л еси́, вопия́: благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́ву Пренепоро́чную, всечестны́й Крест слеза́ми омочи́вшую, во страда́ниих твои́х за Христа́ призва́в, свя́те Павли́не, взыва́л еси́: благослове́нна Ты в жена́х, Всенепоро́чная Влады́чице.

Пе́снь 8.

Ирмос: На престо́ле Херуви́мсте Носи́маго,/ свяще́нницы, по́йте,// лю́дие, превозноси́те во вся ве́ки.

Припев: Священному́чениче Павли́не, моли́ Бо́га о нас.

Любве́ твоея́, я́же ко Христу́, ни скорбь, ни теснота́, ни гоне́ние, ни глад, ни са́мая смерть, свя́те Павли́не, угаси́ша. Сего́ ра́ди возглаша́л еси́: свяще́нницы, по́йте Го́сподеви, лю́дие, превозноси́те Его́ во вся ве́ки.

Припев: Священному́чениче Павли́не, моли́ Бо́га о нас.

Испове́данием и́стинным, о́тче Павли́не, украси́л еси́ престо́л святи́тельский Пе́рмския земли́, иде́же безбо́жною руко́ю убие́н бысть пламенноре́вностный святи́тель Андрони́к, небоя́зненно глаго́лавый: свяще́нницы, по́йте Го́сподеви, лю́дие, превозноси́те Его́ во вся ве́ки.

Сла́ва Отцу́ и Сы́ну и Свято́му Ду́ху:

Вся подаде́ тебе́ Дух Святы́й, Его́же де́йствие бога́тно во свяще́нней хирото́нии прия́л еси́, о́тче Павли́не, те́мже гра́ду Калу́зе я́ко ми́рный а́нгел в лю́тая времена́ яви́лся еси́, ве́рных воздвиза́я пе́ти: превозноси́те Го́спода во вся ве́ки.

И ны́не и при́сно и во ве́ки веко́в. Ами́нь.

Богородичен: Вели́чия Твоя́, Де́во, кто испове́сть? Кий язы́к изочте́т мно́жество щедро́т Твои́х? Оба́че дерза́юще, во смире́нии глаго́лем: Богоро́дицу по́йте, и превозноси́те во вся ве́ки.

Песнь 9

Ирмос: Тя Неискусобра́чную Богоро́дицу/ в па́мяти святы́х велича́ем,// я́ко ро́ждшую Спасе́ние душ на́ших.

Припев: Священному́чениче Павли́не, моли́ Бо́га о нас.

Па́влу апо́столу подо́бяся, кова́рствия беззако́ннующих претерпе́л еси́, свя́те Павли́не, и от Ура́льских гор да́же до Бе́лыя Руси́ проше́л еси́, иде́же нечести́вых сове́том па́ки во у́зы заключе́н бысть, за е́же зва́ти тебе́: Христе́, Ты еси́ спасе́ние душ на́ших.

Припев: Священному́чениче Павли́не, моли́ Бо́га о нас.

Безве́стную свою́ кончи́ну прови́дел еси́, священному́чениче Павли́не, и гроб твой неве́домь досе́ле пребы́сть. Оба́че Бо́гу пути́ твоя́ и сконча́ние ве́доми, Ему́же Еди́ному от ю́ности твоея́ служи́л еси́, взыва́я: Христе́, Ты еси́ спасе́ние душ на́ших.

Сла́ва Отцу́ и Сы́ну и Свято́му Ду́ху:

Стра́нен быв на земли́, и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаже́нне Павли́не, иде́же ве́чную сла́ву восприи́м, при́сно глаго́леши: Христе́, Ты еси́ спасе́ние душ на́ших.

И ны́не и при́сно и во ве́ки веко́в. Ами́нь.

Богородичен: Стра́нен быв на земли́, и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаже́нне Павли́не, иде́же ве́чную сла́ву восприи́м, при́сно глаго́леши: Христе́, Ты еси́ спасе́ние душ на́ших.

Свети́лен.

Егда́ над оте́чеством на́шим тьма огусте́ и о́блацы безбо́жия скры́ша Со́лнце пра́вды, ты, святи́телю Павли́не, лю́ди ру́сския небоя́зненно сло́вом и́стины просвеща́л еси́ и, страда́ния подъе́м, Све́та невече́рняго дости́гл еси́. Низпосли́ лучи́ благода́ти твоея́ и нам, во тьме страсте́й седя́щим.

Сла́ва, и ны́не, Богоро́дичен:

Све́тлая и пресве́тлая Присноде́во Влады́чице! Осия́й нас све́том от светле́йшаго ли́ка Твоего́, да исцели́мся от неду́гов на́ших и страсте́й, и сла́вим Тя, я́ко всея́ тва́ри Превы́шшую.

Молитва

О священному́чениче Христо́в Павли́не! Услы́ши сле́зныя моли́твы и воздыха́ния наша, в сокруше́нии се́рдца и смире́нии ду́ха тебе́ приноси́мыя. Се бо беззако́нии омрачи́хомся, и сего́ ра́ди беда́ми, я́ко ту́чами, обложи́хомся. Ты же, я́ко си́льный, понеси́ не́мощи на́ша, не отлуча́йся от нас ду́хом, да не разлучи́мся и мы от любве́ Бо́жия, я́же при́сно в се́рдце твое́м живя́ше. При́зри ми́лостиво на лю́ди, предстоя́щия и моля́щияся пред свято́ю ико́ною твое́ю, и проше́ния коего́ждо, я́же ко спасе́нию, испо́лни. Ве́руем бо, я́ко ты, за Це́рковь Христо́ву во оте́честве на́шем пострада́вый, ве́лие дерзнове́ние и́маши ко Го́споду. Умоли́ бла́гость Его́, да укрепи́т ны в единомы́слии, наипа́че же в непоколеби́мом испове́дании Христа́ Иису́са, Сы́на Бо́жия, во пло́ти прише́дшаго, распя́тие и смерть претерпе́вшаго, погребе́ннаго и воскре́сшаго, ко Отцу́ возше́дшаго и па́ки гряду́щаго со сла́вою суди́ти живы́м и ме́ртвым. Мо́лим тя, свя́те: предста́тельствуй пред Бо́гом за ны и за вся правосла́вныя христиа́ны, да соблюде́т Госпо́дь зе́млю Ру́сскую в ми́ре и благоде́нствии, архипа́стырем и па́стырем пода́ст духо́вное трезве́ние и ре́вность о спасе́нии вруче́нныя им па́ствы, прави́телем суд и пра́вду, и всем нам братолю́бие и любо́вь. О ми́лостиве страда́льче! Испроси́ у Бо́га Ми́лостиваго боля́щим исцеле́ние, скорбя́щим утеше́ние, оби́димым заступле́ние, оби́дящим ми́рное устрое́ние. Да, твое́ю по́мощию спаса́еми, восхва́лим вси Подвигополо́жника Христа́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и Всесвяты́м, Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.