Шрифт

30 ноября.

Канон Святителю Григорию епископу, Неокесарийскому чудотворцу.

Святителю Григорию епископу, Неокесарийскому

Тропа́рь, гла́с 8:

В моли́твах бо́дрствуя, чуде́с де́ланьми претерпева́я, тезоиме́ние стяжа́л еси́ исправле́ния; но моли́ся Христу́ Бо́гу, о́тче Григо́рие, просвети́ти ду́ши на́ша, да не когда́ у́снем в сме́рть.

Канон свята́го. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святителю отче Григорие, моли́ Бо́га о нас.

Твои́х чуде́с во мне́, Григо́рие, боже́ственное де́йство све́тло, о́тче, и ны́не покажи́, из глубины́ избавля́я мя́ прегреше́ний, блаже́нне, и твое́ю просвеща́я све́тлостию, да досто́йно воспою́ тя.

Припев: Святителю отче Григорие, моли́ Бо́га о нас.

Яко опа́сный, и умоиме́телен, и му́др души́ благоро́дное плотски́х сласте́й, блаже́нне, предсуди́л еси́, му́дрости догма́ты трудолю́бно собира́я, и́миже она́ пита́ется, Григо́рие, Бо́гу приближа́ющися.

Припев: Святителю отче Григорие, моли́ Бо́га о нас.

Целому́дрие сестру́ стяжа́в, я́ко споспе́шницу благу́ю, тя́ ви́дев, лю́тый зми́й, Григо́рие, на тя́ за́висть воздви́же, его́же посрами́л еси́, о́тче, долготерпе́нием, жену́, стра́стию объя́ту, исцели́в.

Сла́ва Отцу́ и Сы́ну и Свято́му Ду́ху:

На чужде́й стране́ жи́тельствуя, преподо́бне, все́м че́стен ра́ди доброде́тели яви́лся еси́, благочести́в и боголюби́в, чудоде́йства да́р от Бо́га прие́м, и́мже позна́н бы́л еси́, богоглаго́ливе, просия́ в ми́ре, я́ко со́лнце.

И ны́не и при́сно и во ве́ки веко́в. Ами́нь.

Богородичен: Из ко́рене, Чи́стая, ца́рскаго прозябла́ еси́ и Царя́ Христа́, Бо́жие Сло́во, па́че ума́ и мы́сли воплоще́нно родила́ еси́ из чи́стых Твои́х крове́й, сугу́ба естество́м су́ща и еди́нственна Ипоста́сию.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Святителю отче Григорие, моли́ Бо́га о нас.

Очи́стив тво́й у́м стра́стнаго треволне́ния и любому́драго виде́ния испо́лнен, яви́лся еси́ благоле́пен, му́дрости оби́телище, и проро́чества да́ром обогати́лся еси́, Григо́рие.

Припев: Святителю отче Григорие, моли́ Бо́га о нас.

Богодохнове́нному списа́нию прибесе́довав, всеблаже́нне, и разли́чнаго жития́ ви́ды избра́в я́ве, еди́н доброде́тели о́браз в себе́, богому́дре, утверди́л еси́, Григо́рие.

Припев: Святителю отче Григорие, моли́ Бо́га о нас.

Богоявле́нне навы́к боже́ственным тайново́дством та́инство богосло́вия, просвети́ на́с Тро́ицу Единосу́щную, Единоесте́ственну же почита́ти, Несозда́нну и Соприсносу́щну.

Сла́ва Отцу́ и Сы́ну и Свято́му Ду́ху:

Бо́гом наста́влен, я́ко любо́вию Того́ взыска́в, Чи́стую и Богоро́дицу Мари́ю и сы́на Гро́мова тайноучи́тели име́л еси́, Тро́ицы Све́ту тя́, богоглаго́ливе, науча́ющия.

И ны́не и при́сно и во ве́ки веко́в. Ами́нь.

Богородичен: Же́зл, прозя́бший Христа́, цве́т нетле́ния и злату́ю кади́льницу, вси́ Тя́ ве́мы, Чи́стая, Боже́ственнаго существа́ нося́щу на объя́тиих, Отрокови́це, Угль, Богоблаже́нная.

Седа́лен, гла́с 3.

Но́в бы́л еси́ Моисе́й де́лы, скрижа́ли ве́ры на горе́ та́инственнаго богоявле́ния прии́м, законоположи́в лю́дем благоче́стие Тро́ичныя та́йны, Григо́рие. Те́мже, вси́ ве́рнии, чти́м па́мять твою́, прося́ще тобо́ю ве́лию ми́лость.

Сла́ва, и ны́не, Богородичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю Ангелы превозше́дшая; па́че все́х мене́, пе́рсть бы́вша, оскверне́нна плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

КрестоБогородичен:

Нескве́рная Агница, Сло́ва нетле́нная Де́во-Ма́ти, на Кресте́ зря́щи пове́шена из Нея́ безболе́зненно Прозя́бшаго, матероле́пно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святителю отче Григорие, моли́ Бо́га о нас.

Зе́млю до́брую, о́тче богому́дре, взора́в, сло́ва се́мя прие́м, во сто́ ева́нгельски многосугу́биши, еще́ и ны́не, Григо́рие, приводя́ уче́нии твои́ми Бо́гу песнопою́щия: си́ле Твое́й сла́ва, Человеколю́бче.

Припев: Святителю отче Григорие, моли́ Бо́га о нас.

Яко мо́лния, о́тче, возсия́в, житие́ твое́ де́монскую ле́сть отгна́, све́ту бо твоея́ доброде́тели о́ных тма́ прикосну́тися не возмо́же. Те́мже неоко́рос душетле́нная льсти́, валя́вся, я́коже ка́мень, све́тится.

Припев: Святителю отче Григорие, моли́ Бо́га о нас.

Мра́к све́та Боже́ственнейшаго ви́дети сподо́бился еси́, зако́н же богопи́санный, я́ко Моисе́й, о́тче, прие́м, богосло́вия изве́стное навы́кл еси́: отсю́ду законополо́жник Христо́вы Це́ркве показа́лся еси́, богому́дре Григо́рие.

Сла́ва Отцу́ и Сы́ну и Свято́му Ду́ху:

Ри́торскаго буесло́вия уклони́вся и сло́вом, о́тче, благода́ти озари́вся, апо́стольскую и́стинно вла́сть на де́моны прия́т, твоея́ бо отбега́ет светя́щияся зари́ тмы́ предста́тель, Григо́рие.

И ны́не и при́сно и во ве́ки веко́в. Ами́нь.

Богородичен: Киво́т Тя́ издале́ча прообрази́, прие́мши зако́н богопи́санный, во чре́ве Живонача́льное Сло́во заче́ншую несказа́нно, Всенепоро́чная, пита́ющаго бога́тно ду́ши вопию́щих: си́ле Твое́й сла́ва, Человеколю́бче.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святителю отче Григорие, моли́ Бо́га о нас.

Де́ланием твои́х слове́с олядене́вшая сердца́ угла́див, и боже́ственное се́мя в ня́, иера́рше, вве́ргл еси́, и пло́д многокла́сный Изба́вителю, спасе́ние ве́рных, богоглаго́ливе, прине́сл еси́.

Припев: Святителю отче Григорие, моли́ Бо́га о нас.

Бо́жий предста́тель, ре́вностию распала́емь, пома́за тя Фе́дим не прише́дша, о́тче, Бо́гу вся́ческая ве́дящему благоче́стно упова́в и честно́му твоему́ житию́ наде́явся, богоглаго́ливе Григо́рие.

Припев: Святителю отче Григорие, моли́ Бо́га о нас.

Струя́ми твои́х повеле́ний и́дольская разжже́ния угаси́л еси́ и уче́ньми твои́ми ве́рныя утверди́л еси́, всему́дре, возше́д на го́ру, я́ко Самуи́л, виде́нии и, я́ко ду́б, бы́в тве́рдостию.

Сла́ва Отцу́ и Сы́ну и Свято́му Ду́ху:

Святи́телю богому́дре, твои́ми моли́твами лю́тых мя́ избавля́й, мои́х прегреше́ний рукописа́ние, о́тче, расто́ргни, я́ко свяще́нник сы́й, от Бо́га вла́сть прии́м оставля́ти прегреше́ния.

И ны́не и при́сно и во ве́ки веко́в. Ами́нь.

Богородичен: Украси́лася еси́, Де́во, де́вственными Твои́ми пречи́стыми добро́тами, и пе́рвыя Евы покры́ла еси́ сту́д злообра́зный, Христа́ ро́ждши, одея́ние безсме́ртия да́рующаго Тебе́ чту́щим.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святителю отче Григорие, моли́ Бо́га о нас.

Езеро, чудоде́йствуя, братоуби́йственное изсуши́л еси́, и реки́ стремле́ния уста́вил еси́, всему́дре, же́зл водрузи́в, и́же вскорени́ся а́бие и возрасте́ Боже́ственным манове́нием, Григо́рие.

Припев: Святителю отче Григорие, моли́ Бо́га о нас.

Ре́вность Бо́жия пояда́ше тя́, всебога́те, не терпя́ бо зре́ти Бо́га досажда́ема, лю́ди суему́дренныя твои́ми моли́твами, богоглаго́ливе, погуби́л еси́.

Сла́ва Отцу́ и Сы́ну и Свято́му Ду́ху:

Умертви́ся, восхоте́вый уничижи́ти тя́ окая́нный евре́ин злочести́вый, Бо́гу тя́ прославля́ющему, богому́дре Григо́рие, Того́ догма́тов испо́лнителя показу́я.

И ны́не и при́сно и во ве́ки веко́в. Ами́нь.

Богородичен: На́йде Вседе́тельный на Тя́ Ду́х, Всенепоро́чная, и Сло́во Бо́жие в Тя́ всели́ся и пло́ть бы́сть неизрече́нно, пребы́в неизме́нен.

Конда́к, гла́с 2.

Чуде́с мно́гих прие́м де́йство, зна́меньми ужа́сными де́моны устраши́л еси́ и неду́ги отгна́л еси́ челове́ческия, всему́дре Григо́рие, чудотво́рец же имену́ешися, зва́ние от де́л прие́м.

Икос:

Отку́ду начну́ похвалы́ тка́ти, окая́нный, зря́ мно́гия и пречу́дныя ве́щи? Аще от жития́ преподо́бнаго начну́, отню́д не возмогу́, вся́каго бо ума́ превосхо́дит житие́ его́ боже́ственное. Аще от чуде́с, и в се́м про́чее постыжду́ся, па́че песка́ бо су́ще, сего́ ра́ди нарече́ся чудотво́рец, зва́ние от де́л прие́м.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святителю отче Григорие, моли́ Бо́га о нас.

Отце́в похвала́ и учи́телей честносло́вие, свети́льник Це́ркве, благоче́стия сто́лп неколе́бленный ты́ яви́лся еси́, Григо́рие, зовы́й: благослове́н Бо́г оте́ц на́ших.

Припев: Святителю отче Григорие, моли́ Бо́га о нас.

Возсия́в чудесы́, вселе́нную просвети́л еси́, сего́ ра́ди, богому́дре, совоку́пльшеся, тебе́ блажи́м, твои́ми словесы́ пита́ющеся, Григо́рие, и пою́ще: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Врачева́ния, всему́дре, немощны́м все́м источи́л еси́, излия́ся бо благода́ть оби́льнейшая во устна́х твои́х чудоде́йственная, е́юже взыва́л еси́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Ны́не вся́ испо́лнишася све́та Боже́ственнаго Тобо́ю, Пречи́стая, Ты́ бо две́рь яви́лася еси́, е́юже ми́ру Бо́г приобщи́ся, просвеща́я ве́рою зову́щия: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святителю отче Григорие, моли́ Бо́га о нас.

Тобо́ю обогати́вшеся Тро́ицы сия́нием, Единосу́щныя и Честны́я, Григо́рие, твое́ ны́не торжество́ соверша́юще, благода́тию чудоде́йственною озари́тися про́сим, вопию́ще Влады́це: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святителю отче Григорие, моли́ Бо́га о нас.

Яко новоявле́нно зерца́ло, прие́м, всебога́те, сия́ния нача́льнаго Божества́, ми́р просвети́л еси́, лучи́ посыла́я све́та песнопе́сненно правосла́вие пою́щим: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Бо́гом покрыва́емь, благоче́стия вина́, богочести́вым соблю́лся еси́, всему́дре, в горе́ сокрыва́емь, я́ко законополо́жник ины́й Моисе́й, Соде́теля и Изба́вителя пе́ти науча́я: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Све́та Незаходи́маго была́ еси́ оби́тель, Пречи́стая, де́вства добро́тами светя́щи и вся́ озаря́ющи, Богоро́дицу Тя́ и́стинную испове́дающия от души́ и вопию́щия: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святителю отче Григорие, моли́ Бо́га о нас.

Изя́щнейшаго жи́тельства сия́я све́том, ны́не Све́ту вели́кому предстои́ши богоде́ятельными чудоде́йствы, я́ко победи́тель венча́емь, преподо́бне, о́тче иера́рше, чудотво́рче Григо́рие богому́дре, свети́ло Це́ркве, правосла́вных удобре́ние.

Припев: Святителю отче Григорие, моли́ Бо́га о нас.

Напра́вити моли́ твои́ми моли́твами церко́вное ны́не свяще́нство, избра́нное и освяще́нное, чудоде́лателю, и ве́рно ны́не па́мять твою́ соверша́ющим получи́ти го́рняго Ца́рства и боже́ственнаго весе́лия сподо́битися умоли́.

Сла́ва Отцу́ и Сы́ну и Свято́му Ду́ху:

Победи́в де́монския прило́ги, и плотско́е покори́в мудрова́ние, и архиере́й незло́бив и преподо́бен бы́в, пра́вды одея́нием облече́н, чудотво́рче, предстои́ши престо́лу все́х Царя́ со дерзнове́нием, всеблаже́нне.

И ны́не и при́сно и во ве́ки веко́в. Ами́нь.

Богородичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Благо́е Сло́во, Его́же Оте́ц от се́рдца Своего́ отры́гну, пре́жде все́х ве́к я́ко Бла́г, Его́же ны́не и теле́с вы́шша разумева́ем, а́ще и в те́ло облече́ся.

Свети́лен.

Чудесы́ возсия́л еси́, чудотво́рче Григо́рие, служи́теля и́дольскаго изба́вил еси́ от тли́ и пре́лести де́монския, ка́мень подви́гнув повеле́нием, е́зеро же изсуши́в, и реку́ уста́вил еси́. Те́мже тя́ вси́ согла́сно похваля́ем, треблаже́нне.

Богоро́дичен.

Ра́дуйся, ве́рных похвало́; ра́дуйся, преподо́бных утвержде́ние; ра́дуйся, пра́ведных сла́во; ра́дуйся, све́те су́щих во тме́; ра́дуйся, хра́ме пресвяты́й; ра́дуйся, Бо́жий раю́; ра́дуйся, кля́твы разреше́ние, Благослове́нная Мари́е.

Молитва святителю Григорию Чудотворцу, епископу Неокесарийскому

О, пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Григо́рие! Предстоя́ у Престо́ла всех Царя́ и наслажда́яся све́том единосу́щныя Тро́ицы и херуви́мски со а́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, помози́ во бране́х оте́честву на́шему, и покори́ вся проти́вныя нам враги́, ми́рное и безмяте́жное жи́тельство на́ше устро́й: благостоя́ние святы́х церкве́й утверди́: архиере́и благоле́пием святи́тельства украси́: мона́шествующия к по́двигом до́браго тече́ния укрепи́: град сей и вся гра́ды на́ши и страны́ до́бре сохрани́, и ве́ру святу́ю непоро́чну соблюсти́ нам умоли́: мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, плене́нныя возврати́, немощству́ющия исцели́, и везде́ те́пле призыва́ющия тя и с ве́рою притека́ющия к тебе́ и усе́рдно припа́дающия и моля́щияся тебе́ от вся́ких напа́стей и бед хода́тайством твои́м свободи́. Моли́ о нас всеще́драго и человеколюби́ваго Христа́ Бо́га на́шего, да и в день стра́шнаго прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.

Святителю Григорию епископу, Неокесарийскому