2 ноября.

Канон второй преподобному Гавриилу Самтаврийскому (Ургебадзе)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Влады́це Христу́, Бо́гу на́шему,/ И́же сла́ву Свою́ ра́биим зра́ком скры,/ в смире́нии и кро́тости подража́я,/ юро́дства вре́тищем благода́ть, ти да́нную, покры́л еси́/ и духо́вный наста́вник мно́гим яви́лся еси́,/ о́тче преподо́бне Гаврии́ле./ Те́мже и нас во благоче́стии укрепи́// и моли́ спасти́ся душа́м на́шим.

Канон иной свята́го. Гла́с 6.

Пе́снь 1.

Ирмос: МЯ́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припев: Преподо́бне о́тче Гаврии́ле, моли́ Бо́га о нас.

Раче́ние пла́менное к ве́ре пра́вей име́я и любо́вию ю́ преумножа́я, святы́й ста́рче Гаврии́ле, укажи́ и нам путь пра́вый, вводя́й в живо́т ве́чный.

Припев: Преподо́бне о́тче Гаврии́ле, моли́ Бо́га о нас.

Избра́нный сосу́д Свята́го Ду́ха я́ви тя Госпо́дь, о́тче Гаврии́ле, те́мже и благоуха́ние твои́х моли́тв, я́ко фимиа́м благово́нный, при́сно восхо́дит к Бо́гу.

Припев: Преподо́бне о́тче Гаврии́ле, моли́ Бо́га о нас.

Я́ко име́яй от Бо́га дерзнове́ние хода́тай бы́ти гре́шников, моли́, преподо́бне, спасти́ ду́ши на́ша от пле́на грехо́внаго.

Сла́ва Отцу́ и Сы́ну и Свято́му Ду́ху:

Бо́жия си́лы преиспо́лненный, невече́рним све́том блиста́еши, о́тче наш, всеблаже́нне чудотво́рче Гаврии́ле, те́мже моле́ния на́ша приими́ и мир да́руй ве́рою и любо́вию чту́щим тя.

И ны́не и при́сно и во ве́ки веко́в. Ами́нь.

Богородичен: Всеблага́я Влады́чице, Я́же Преблага́го Бо́га пло́тию ро́ждши, озло́бленная страстьми́ на́ша сердца́ очи́сти, да ве́рою и любо́вию велича́ем Тя.

Пе́снь 3.

Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Припев: Преподо́бне о́тче Гаврии́ле, моли́ Бо́га о нас.

От младе́нчества смире́нием укра́шен был еси́, в во́зраст же прише́д, всем се́рдцем Бо́гу послужи́ти восхоте́л еси́. Те́мже, плотска́я попече́ния отри́нув, и́ноческий те́сный путь избра́л еси́.

Припев: Преподо́бне о́тче Гаврии́ле, моли́ Бо́га о нас.

Еще́ во о́трочестве ти су́щу, льсти́вный зверь восхоте́ погуби́ти тя и в виде́нии боря́ше; ты же, преподо́бне, свире́пства его́ не устраши́вся, по́мощию Христо́вою возмо́гл еси́ того́ победи́ти. Те́мже и ны́не изба́ви нас от напа́стей льсти́ваго.

Припев: Преподо́бне о́тче Гаврии́ле, моли́ Бо́га о нас.

Христа́ ра́ди о сро́дницех твои́х небре́гл еси́, блаже́нне, и был еси́ им я́ко нищ и чуждь. Оба́че любо́вию Госпо́днею уязвля́емь, усе́рдно Бо́гу и лю́дем послужи́л еси́.

Сла́ва Отцу́ и Сы́ну и Свято́му Ду́ху:

Егда́ страна́ твоя́ богобо́рчеством объя́та бысть, ты, преподо́бне, Го́рним жела́нием распали́вся и наве́тов безбо́жник не убоя́вся, храм Бо́жий воздви́гл еси́, да ве́ра Христо́ва утвержда́ется.

И ны́не и при́сно и во ве́ки веко́в. Ами́нь.

Богородичен: Услы́ша Е́ва прама́ти: в печа́лех роди́ши ча́да. Ты же, Чи́стая Де́во, ра́дованным гла́сом, я́ко Госпо́дь с Тобо́ю, печа́ль прама́тере потреби́ла еси́.

Седа́лен, гла́с 5.

Преподо́бне о́тче Гаврии́ле! Ты, плотски́я стра́сти умертви́в и де́вство возлюби́в, чистото́ю А́нгелом уподо́бился еси́, смире́нием же ра́зум Христу́ подчини́в, духо́вную му́дрость стяжа́л еси́ и, любо́вию нелицеме́рною всех приходя́щих к тебе́ услади́в, на пра́вый путь наста́вил еси́. Те́мже вопие́м ти: ра́дуйся, Гаврии́ле, Небе́сный челове́че и земны́й а́нгеле!

Сла́ва, и ны́не, Богородичен:

Напои́тися бога́тно слеза́ми да́ждь, бразда́м стра́стныя моея́ души́, и плод принести́ ми стори́чный, Влады́чице, сподо́би, и се́рдце мое́ вся́каго весе́лия испо́лни, да сла́влю Тя.

Пе́снь 4.

Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Припев: Преподо́бне о́тче Гаврии́ле, моли́ Бо́га о нас.

Егда́ богобо́рцы нечести́вии святы́я хра́мы разори́ша и лю́ди на муче́ния обреко́ша, тогда́ мно́зи от ве́ры и́стинныя отступи́ша и обе́ты и́ноческия попра́ша. Ты же, о́тче, у́зким и те́сным путе́м ше́ствуя, ве́ру пра́вую испове́дати не устраши́лся еси́.

Припев: Преподо́бне о́тче Гаврии́ле, моли́ Бо́га о нас.

Егда́ беззако́ние умно́жися и оскуде́ние любве́ приспе́, тогда́ вся веледу́шно претерпева́л еси́, преподо́бне, и а́ще юн ле́ты был еси́, муж прему́др ра́зумом обре́лся еси́, смире́нием враги́ побежда́я.

Припев: Преподо́бне о́тче Гаврии́ле, моли́ Бо́га о нас.

Свяще́нства са́ном обле́кся, блаже́нне Гаврии́ле, наро́ду твоему́, в суеве́рии косня́щу, ве́ру Христо́ву пропове́дал еси́, науча́я чи́сто ю́ содержа́ти и за́поведи боже́ственныя стро́го исполня́ти.

Сла́ва Отцу́ и Сы́ну и Свято́му Ду́ху:

Благи́й ра́бе и ве́рный, и иску́сный де́лателю виногра́да Христо́ва! Ты, бо́дренне тяготу́ дне претерпе́в и тала́нт свой умно́жив, юро́дом Христа́ ра́ди на земли́ пожи́л еси́ и к ли́ку блаже́нных причте́н еси́.

И ны́не и при́сно и во ве́ки веко́в. Ами́нь.

Богородичен: Ты еси́ прибе́жище на́ше и утвержде́ние, Пречи́стая Богоро́дице, моли́ Сы́на Твоего́ и Бо́га на́шего пода́ти нам спасе́ние и грехо́в оставле́ние.

Пе́снь 5

Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Припев: Преподо́бне о́тче Гаврии́ле, моли́ Бо́га о нас.

Христа́ всем се́рдцем возлюби́в и по и́мени Его́ побора́я, на богобо́рцев небоя́зненно возста́л еси́, достохва́льне, и, я́ко еди́н от дре́вних, о́браз и́дольский богоненави́стника соже́гл еси́.

Припев: Преподо́бне о́тче Гаврии́ле, моли́ Бо́га о нас.

Ни муче́ния, ни страх сме́ртный возмо́же тя разлучи́ти от любве́ Бо́жия, преподо́бне, те́мже, изъязвле́ние пло́ти претерпе́в, я́ко зла́то в горни́ле, ду́шу твою́ очи́стил еси́.

Сла́ва Отцу́ и Сы́ну и Свято́му Ду́ху:

Све́том Христо́вым в житии́ твое́м просия́л еси́, блаже́нне о́тче Гаврии́ле, и словесы́ богому́дрыми мно́гия к Со́лнцу Пра́вды обрати́л еси́, дела́ тьмы началозло́бнаго врага́ разруша́я.

И ны́не и при́сно и во ве́ки веко́в. Ами́нь.

Богородичен: Бо́га, Его́же родила́ еси́, Пречи́стая Мари́е, моли́, рабо́м Твои́м пода́ти прегреше́ний оставле́ние.

Пе́снь 6.

Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Припев: Преподо́бне о́тче Гаврии́ле, моли́ Бо́га о нас.

И́же тя безу́мно хотя́ху погуби́ти, ничесо́же успе́ша, Госпо́дь бо стена́ лю́бящим Его́ и побора́ше за тя. Те́мже и поруга́ния безбо́жных, о́тче Гаврии́ле, ни во что вмени́л еси́ и па́че во Христе́ утверди́лся еси́.

Припев: Преподо́бне о́тче Гаврии́ле, моли́ Бо́га о нас.

Ки́ими словесы́ восхва́лим по́двиги твоя́, о́тче Гаврии́ле, егда́, от служе́ния Бо́гу во́лею власти́телей безбо́жных отто́ржен, без приста́нища мно́гая ле́та пребы́л еси́, зной дневны́й и мраз нощны́й претерпева́я.

Сла́ва Отцу́ и Сы́ну и Свято́му Ду́ху:

Просла́вим ве́рою и любо́вию преподо́бнаго Гаврии́ла, засту́пника те́плаго наро́да И́верскаго, и с кро́тостию припаде́м к нему́, моля́ще дарова́ти нам покая́ние и исправле́ние.

И ны́не и при́сно и во ве́ки веко́в. Ами́нь.

Богородичен: Ны́не к Тебе́ прибега́ем, Пречи́стая, спаси́ нас моли́твами Твои́ми и соблюди́: ели́ка бо хо́щеши, мо́жеши, я́ко Ма́ти Бо́га Всемогу́щаго.

Конда́к, гла́с 4.

Непостижи́ма есть ми́лость Го́спода,/ Его́же благода́тию естество́ на́ше обоже́но бысть,/ ты же, блаже́нне о́тче, во смире́нии глубо́це жи́тельствуя,/ пра́вду Бо́жию пропове́дал еси́/ и, ли́рою му́дрости звяца́я,/ любо́вию к бли́жним пламене́л еси́/ и та́ко, о́браз Творца́ в себе́ нося́,/ доброде́тельми подо́бие Бо́жие в себе́ уясни́л еси́./ Мы же, прославля́юще тя похвала́ми досто́йными,/ я́ко хода́таю Бо́жия благода́ти, си́це вопие́м:// ра́дуйся, преподо́бне Гаврии́ле, Иве́рии похвало́ и ра́дование.

Икос:

Ки́я пе́сни принесе́м ти от недосто́йных усте́н, преподо́бне Гаврии́ле? Ка́ко воспое́м жесто́кое твое́ житие́, и́мже, я́ко зла́то в горни́ле, просия́л еси́ и мно́гим лю́дем путево́ждь ко спасе́нию яви́лся еси́? Сего́ ра́ди, прославля́юще по́двиги твоя́, си́це тебе́ вопие́м: ра́дуйся, душ немощны́х цели́телю; ра́дуйся, моли́твы непреста́нныя учи́телю. Ра́дуйся, му́чеником за Христа́ подо́бниче; ра́дуйся, юро́дивым Христа́ ра́ди слико́вниче. Ра́дуйся, преподо́бне Гаврии́ле, Иве́рии похвало́ и ра́дование.

Пе́снь 7.

Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Припев: Преподо́бне о́тче Гаврии́ле, моли́ Бо́га о нас.

Ви́дя Госпо́дь твою́ святу́ю ре́вность и любо́вь, во оби́тель Самтавро́ посла́ тя, иде́же ты в ма́лей ке́лии водвори́вся, со стра́хом и тре́петом Безкро́вную Же́ртву приноси́л еси́ и Ева́нгелие Христо́во благовествова́л еси́.

Припев: Преподо́бне о́тче Гаврии́ле, моли́ Бо́га о нас.

В столп царя́ Мириа́на всели́вся и той кресты́ со о́бразы святы́х благоукраси́в, чудесы́ мно́гими и́нокини и приходя́щия к тебе́ вразумля́л еси́ и непреста́нней моли́тве науча́л еси́.

Сла́ва Отцу́ и Сы́ну и Свято́му Ду́ху:

По́двиг юро́дства Христа́ ра́ди на ра́мо взем, Гаврии́ле прему́дре, я́ко безу́мен пред людьми́ яви́лся еси́ и от них поруга́ния, ско́рби и беды́ мно́гия му́жественно претерпева́л еси́. Ны́не же прославля́ешися все́ми, я́ко друг Бо́жий.

И ны́не и при́сно и во ве́ки веко́в. Ами́нь.

Богородичен: Богоро́дице Де́во, ро́ждшая Сло́во па́че сло́ва, Зижди́теля Твоего́, Того́ моли́ с преподо́бным Гаврии́лом поми́ловати ду́ши на́ша.

Пе́снь 8.

Ирмос: Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́:/ вся бо твориши, Христе́, то́кмо е́же хоте́ти.// Тя превозно́сим во вся ве́ки.

Припев: Преподо́бне о́тче Гаврии́ле, моли́ Бо́га о нас.

В непреста́нней па́мяти Су́днаго дне и кончи́ны вре́меннаго живота́ вы́ну пребыва́я, слеза́ми омыва́лся еси́, преподо́бне, и, дре́вним отце́м подо́бяся, еще́ в жи́зни сей себе́ сама́го опла́кал еси́.

Припев: Преподо́бне о́тче Гаврии́ле, моли́ Бо́га о нас.

Венце́м хвале́ния увязе́м ста́рца Гаврии́ла, вре́тищем юро́дства себе́ обле́кшаго и сим свет благода́ти сокры́вшаго, хода́тая всех и побо́рника, и скорбя́щим ско́рое утеше́ние.

Сла́ва Отцу́ и Сы́ну и Свято́му Ду́ху:

Я́ко со́лнце, ту́чи грехо́вныя разсеява́ющее, бысть сло́во твое́, о́тче Гаврии́ле, к лю́дем страны́ твоея́ обраще́нное. Те́мже ны́не и от нас мглу страсте́й отжени́, преподо́бне, моли́твами твои́ми.

И ны́не и при́сно и во ве́ки веко́в. Ами́нь.

Богородичен: Спасе́ния Хода́таица нам яви́лася еси́, Богоро́дице, ро́ждшая Спа́са и Влады́ку всех. Те́мже мо́лим Тя: спаси́ всех нас.

Песнь 9

Ирмос: Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и, Тя ублажа́ем.

Припев: Преподо́бне о́тче Гаврии́ле, моли́ Бо́га о нас.

Неду́гом тя́жким объя́т, нестерпи́мую му́ку претерпе́л еси́, преподо́бне, прозре́в же в Ду́се час кончи́ны твоея́, о ми́ре наро́да и Оте́чества твоего́ моли́тву возне́сл еси́ и неболе́зненно мир сей оста́вил еси́.

Припев: Преподо́бне о́тче Гаврии́ле, моли́ Бо́га о нас.

Восхва́лим днесь, ве́рнии, столпа́ доброде́тели и Христа́ ра́ди юро́диваго, преподо́бнаго Гаврии́ла, его́же в пещи́ скорбе́й невреди́ма от ко́зней вра́жиих Христо́с сохрани́, име́яй ве́лию ми́лость.

Сла́ва Отцу́ и Сы́ну и Свято́му Ду́ху:

Прииди́те, лю́дие, воспра́зднуим па́мять преподо́бнаго Гаврии́ла, моли́твенника дерзнове́ннаго, засту́пника оби́димым и помо́щника в беда́х су́щим, его́же моли́твами, Бо́же, поми́луй нас.

И ны́не и при́сно и во ве́ки веко́в. Ами́нь.

Богородичен: Еди́наго от Святы́я Тро́ицы, Сло́ва и Сы́на родила́ еси́, Де́во Пречи́стая, Его́же с преподо́бными и пра́ведными моли́ о рабе́х Твои́х, ве́рою прося́щих грехо́в проще́ния.

Свети́лен.

Просла́вим, ве́рнии, но́ваго свети́льника Це́ркве Грузи́нския, Гаврии́ла преподо́бнаго, от огня́ любве́ Христо́вы нам возжже́ннаго, да, во тьме ми́ра сего́ ходя́ще, не по́ткнемся, но просла́вим Отца́ све́тов Безнача́льнаго.

Богородичен:

Вели́кому Гаврии́лу Арха́нгелу подража́я, приноси́л еси́, о́тче Гаврии́ле, ангелокра́сную пе́снь Богома́тери: ра́дуйся, Обра́дованная! И мы ны́не, сликовству́юще, пое́м: ра́дуйся, Благослове́нная, Госпо́дь с Тобо́ю!

Моли́тва

О блаже́нне о́тче Гаврии́ле, дре́вним отце́м преподо́бным подо́бниче и тве́рдый ве́ры испове́дниче! Ты, от ю́ности ева́нгельскому уче́нию навы́к, всем се́рдцем Христа́ возлюби́л еси́, Его́же ра́ди и ми́ра отре́клся еси́ и по́двиг юро́дства восприя́л еси́, да ми́ру безу́мен яви́шися. Мы же, а́ще и лени́ви су́ще, но ве́дуще тя да́ры Ду́ха Свята́го испо́лнена, на по́мощь твою́ наде́ющеся, со смире́нием мо́лим: укрепи́ нас в ве́ре и благоче́стии, испроси́ от Го́спода дух братолю́бия и любве́, и́миже в житии́ твое́м просия́л еси́, исцели́ на́ша неду́ги душе́вныя и теле́сныя, мона́шествующим по́двигом до́брым подвиза́тися помози́, па́стырей в ре́вности благове́стия Христо́ва утверди́, Це́рковь от разделе́ния сохрани́, Оте́чество на́ше в ми́ре соблюди́ и сподо́би нас спасе́ние душ улучи́ти и Ца́рствие Небе́сное насле́довати, иде́же вку́пе с тобо́ю и все́ми святы́ми возмо́жем прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную, во ве́ки веко́в. Ами́нь.