2 ноября.

Канон первый преподобному Гавриилу Самтаврийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Влады́це Христу́, Бо́гу на́шему,/ И́же сла́ву Свою́ ра́биим зра́ком скры,/ в смире́нии и кро́тости подража́я,/ юро́дства вре́тищем благода́ть, ти да́нную, покры́л еси́/ и духо́вный наста́вник мно́гим яви́лся еси́,/ о́тче преподо́бне Гаврии́ле./ Те́мже и нас во благоче́стии укрепи́// и моли́ спасти́ся душа́м на́шим.

Канон свята́го. Гла́с 7.

Пе́снь 1.

Ирмос: Ма́нием Твои́м на земны́й о́браз преложи́ся/ пре́жде удоборазлива́емое водно́е естество́, Го́споди./ Те́мже, немо́кренно пешеше́ствовав, Изра́иль// пое́т Тебе́ песнь побе́дную.

Припев: Преподо́бне о́тче Гаврии́ле, моли́ Бо́га о нас.

И́верския земли́ виногра́де, преподо́бне Гаврии́ле, напо́й боже́ственным весе́лием ве́рных, на похвалу́ тебе́ соше́дшихся, от пия́нства уны́ния истрезвля́я, печа́лей изыма́я и ра́дости о Бо́зе исполня́я нас.

Припев: Преподо́бне о́тче Гаврии́ле, моли́ Бо́га о нас.

Во́инство фарао́ново в воде́ дре́вле Моисе́й потопи́, ты же, о́тче Гаврии́ле, моли́твою к Законода́вцу ду́хи зло́бы поднебе́сныя низри́нул еси́, сего́ ра́ди лю́дем путево́ждь ко спасе́нию показа́лся еси́.

Сла́ва Отцу́ и Сы́ну и Свято́му Ду́ху:

Егда́ про́йде Изра́иль мо́ре Чермно́е, песнь побе́дную Бо́гу воспе́, и ты, о́тче, науча́еши ны не челове́ком, но Еди́ному Бо́гу сла́ву воздава́ти, сла́вно бо просла́вися.

И ны́не и при́сно и во ве́ки веко́в. Ами́нь.

Богородичен: Рожде́ннаго от Тебе́ пое́м, Де́во, и Го́спода нарица́ем, но греси́ на́ши на ны вопию́т. Моли́, Ма́ти Бо́жия, да не услы́шим глас о́ный: отыди́те от Мене́, не вем вас.

Пе́снь 3.

Ирмос: В нача́ле Небеса́ всеси́льным сло́вом Твои́м/ утвержде́й, Го́споди Спа́се,/ и Вседе́тельным и Бо́жиим Ду́хом всю си́лу их,// на недви́жимем мя ка́мени испове́дания Твоего́ утверди́.

Припев: Преподо́бне о́тче Гаврии́ле, моли́ Бо́га о нас.

Самтавро́ возвели́чися во обре́тении моще́й твои́х, от ни́хже, я́ко от неистощи́маго исто́чника, мно́гая исцеле́ния и чудеса́ проистека́ют, Гаврии́ле сла́вне.

Припев: Преподо́бне о́тче Гаврии́ле, моли́ Бо́га о нас.

Кто не подиви́тся да́ру исцеле́ний, и́же в тебе́ я́ви Бог, наипа́че же смире́нию, и́мже, я́ко со́лию, вся гни́лость горды́ни в приходя́щих к тебе́ отъе́млется.

Сла́ва Отцу́ и Сы́ну и Свято́му Ду́ху:

Испо́лнитися моли́, преподо́бне, во благи́х проше́нием на́шим, я́ко Госпо́дь слы́шит вся́кое проше́ние твое́, наипач́е же моли́, да утвердя́тся во Го́споде сердца́ на́ша.

И ны́не и при́сно и во ве́ки веко́в. Ами́нь.

Богородичен: Яви́ся чре́во Твое́, Всенепоро́чная, стог честна́го гумна́, ми́ру нося́ Пшени́цу живота́, пита́ющу вся́ческая. Те́мже Тя я́ко вино́вну всех до́брых, ве́рнии по достоя́нию ублажа́ем.

Седа́лен, гла́с 5.

Преподо́бне о́тче Гаврии́ле! Ты, плотски́я стра́сти умертви́в и де́вство возлюби́в, чистото́ю А́нгелом уподо́бился еси́, смире́нием же ра́зум Христу́ подчини́в, духо́вную му́дрость стяжа́л еси́ и, любо́вию нелицеме́рною всех приходя́щих к тебе́ услади́в, на пра́вый путь наста́вил еси́. Те́мже вопие́м ти: ра́дуйся, Гаврии́ле, Небе́сный челове́че и земны́й а́нгеле!

Сла́ва, и ны́не, Богородичен:

Напои́тися бога́тно слеза́ми да́ждь, бразда́м стра́стныя моея́ души́, и плод принести́ ми стори́чный, Влады́чице, сподо́би, и се́рдце мое́ вся́каго весе́лия испо́лни, да сла́влю Тя.

Пе́снь 4.

Ирмос: О́тча не́дра не оста́вль/ и соше́д на зе́млю, Христе́ Бо́же,/ та́йну услы́шах смотре́ния Твоего́// и просла́вих Тя, Еди́не Человеколю́бче.

Припев: Преподо́бне о́тче Гаврии́ле, моли́ Бо́га о нас.

Зли́и и безбо́жнии лю́дие тя безу́мным нареко́ша, не ве́дуще псало́мскаго словесе́, я́ко безу́мен есть то́й, и́же в се́рдце глаго́лет, я́ко несть Бо́га. Ты же, о́тче, сие́ безу́мие обличи́в, в земли́ И́верстей ра́зум Бо́жий утвержда́л еси́.

Припев: Преподо́бне о́тче Гаврии́ле, моли́ Бо́га о нас.

Егда́ Ева́нгелие, я́ко би́сер безце́нный, обре́л еси́, преподо́бне, тогда́ вся кра́сная ми́ра сего́ отда́л еси́, да его́ приобря́щеши. Те́мже моли́ Го́спода, да сокро́вищ Ца́рства Небе́снаго нас сподо́бит.

Сла́ва Отцу́ и Сы́ну и Свято́му Ду́ху:

Многосве́тлый лик Христо́в, на дске напи́санный, благогове́йно почита́л еси́, преподо́бне, та́же и в ко́емждо приходя́щем к тебе́ о́браз Бо́жий помраче́нный греха́ми зрел еси́ и моли́твою твое́ю просвеща́л еси́.

И ны́не и при́сно и во ве́ки веко́в. Ами́нь.

Богородичен: Любве́ испо́лнен быв ко Пречи́стей Богома́тери и Сы́ну Ея́, о́бразы Их рукотво́рныя во хра́ме твое́м от богобо́рцев укрыва́л еси́. Те́мже и ны́не зри́ши их вы́ну во Ца́рствии Небе́снем.

Пе́снь 5

Ирмос: Нощь не светла́ неве́рным, Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́тренюю,// и воспева́ю Твое́ Божество́.

Припев: Преподо́бне о́тче Гаврии́ле, моли́ Бо́га о нас.

Илии́ Фесви́тянину подо́бник быв, ревну́я поревнова́л еси́ о Бо́зе Вседержи́тели и ве́рен Ему́ во искуше́ниих и напа́стех пребы́л еси́.

Припев: Преподо́бне о́тче Гаврии́ле, моли́ Бо́га о нас.

Возсия́ нам от земли́ сокро́вище, преподо́бне, мо́щи твоя́, я́же ра́достию облобыза́юще, мо́лим: осия́й ны, о́тче, любо́вию твое́ю и моли́, во е́же озари́тися сердца́м на́шим любо́вию к бли́жним.

Сла́ва Отцу́ и Сы́ну и Свято́му Ду́ху:

И́щущим Све́та, я́ко звезда́ среди́ но́щи неве́дения яви́лся еси́, о́тче Гаврии́ле, руково́дствуя к Све́ту Невече́рнему и подвиза́я еле́ем ми́лостыни освеща́ти сердца́.

И ны́не и при́сно и во ве́ки веко́в. Ами́нь.

Богородичен: Ны́не вре́мя благоприя́тно, ны́не день спасе́ния: возжзи́ в нас, Пречи́стая, огнь реши́мости, е́же твори́ти за́поведи Сы́на Твоего́.

Пе́снь 6.

Ирмос: Пла́вающаго в молве́ жите́йских попече́ний,/ с корабле́м потопля́ема грехи́/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.

Припев: Преподо́бне о́тче Гаврии́ле, моли́ Бо́га о нас.

О́вцы заблу́ждшия Христу́ приводя́, сам я́ко а́гнец кро́ток среди́ волко́в безбо́жия показа́лся еси́, оба́че Па́стырь До́брый от злогуби́тельства тех сохрани́ тя.

Припев: Преподо́бне о́тче Гаврии́ле, моли́ Бо́га о нас.

Гаврии́лу И́верскому Святого́рцу подо́бяся, ступи́л еси́ с ве́рою на во́ды многоопа́сныя и́ноческаго жития́ и, за о́бразом Пресвяты́я Де́вы устреми́вся, си́лою Бо́жиею о́браз Ея́ смире́ния в се́рдце твое́м обре́л еси́.

Сла́ва Отцу́ и Сы́ну и Свято́му Ду́ху:

Рука́ма твои́ма храм Бо́гу воздви́гл еси́, о́тче, его́же безбо́жнии разори́ти не возмого́ша; и сам показа́лся еси́ я́ко сто́лп несокруши́мый Це́ркве Христо́вы, я́же а́довыми враты́ вове́к неодоли́ма пребыва́ет.

И ны́не и при́сно и во ве́ки веко́в. Ами́нь.

Богородичен: Афо́нскаго жре́бия не оставля́еши, Богома́ти, па́ки же Иве́рия и́мать Тя Помо́щницу, но и на́шу нищету́ посети́, ино́й уде́л Твой, лю́ди чту́щия Тя те́пле.

Конда́к, гла́с 4.

Непостижи́ма есть ми́лость Го́спода,/ Его́же благода́тию естество́ на́ше обоже́но бысть,/ ты же, блаже́нне о́тче, во смире́нии глубо́це жи́тельствуя,/ пра́вду Бо́жию пропове́дал еси́/ и, ли́рою му́дрости звяца́я,/ любо́вию к бли́жним пламене́л еси́/ и та́ко, о́браз Творца́ в себе́ нося́,/ доброде́тельми подо́бие Бо́жие в себе́ уясни́л еси́./ Мы же, прославля́юще тя похвала́ми досто́йными,/ я́ко хода́таю Бо́жия благода́ти, си́це вопие́м:// ра́дуйся, преподо́бне Гаврии́ле, Иве́рии похвало́ и ра́дование.

Икос:

Ки́я пе́сни принесе́м ти от недосто́йных усте́н, преподо́бне Гаврии́ле? Ка́ко воспое́м жесто́кое твое́ житие́, и́мже, я́ко зла́то в горни́ле, просия́л еси́ и мно́гим лю́дем путево́ждь ко спасе́нию яви́лся еси́? Сего́ ра́ди, прославля́юще по́двиги твоя́, си́це тебе́ вопие́м: ра́дуйся, душ немощны́х цели́телю; ра́дуйся, моли́твы непреста́нныя учи́телю. Ра́дуйся, му́чеником за Христа́ подо́бниче; ра́дуйся, юро́дивым Христа́ ра́ди слико́вниче. Ра́дуйся, преподо́бне Гаврии́ле, Иве́рии похвало́ и ра́дование.

Пе́снь 7.

Ирмос: Пещь о́троцы огнепа́льну/ дре́вле росоточа́щу показа́ша,/ Еди́наго Бо́га воспева́юще и глаго́люще:// превозноси́мый отце́в Бог и препросла́влен.

Припев: Преподо́бне о́тче Гаврии́ле, моли́ Бо́га о нас.

Душе́ю сокруше́нною и ду́хом смире́нным пред Го́сподем ходи́в, благода́ть бога́тно обре́л еси́, о́тче Гаврии́ле, и ны́не моли́ся Влады́це Христу́, да посра́мятся вси хотя́щии рабо́м Его́ зла́я.

Припев: Преподо́бне о́тче Гаврии́ле, моли́ Бо́га о нас.

Еди́ное на потре́бу от ю́ности взыску́я, я́ко пчела́ люботру́дная, слове́сныя цветники́ оби́телей И́верских прете́кл еси́, преподо́бне, и, сла́дкий мед доброде́тели собра́в, в серде́чныя со́ты вложи́л еси́.

Сла́ва Отцу́ и Сы́ну и Свято́му Ду́ху:

На сто́гнах гра́да, иде́же живя́ше, Христа́ благовествова́л еси́, преподо́бне, и о́крест живу́щим лю́дем пропове́довал еси́, вопия́: возврати́теся ко Отцу́ Небе́сному и возопи́йте: благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: А́нгел сохрани́ три о́троки в пещи́ халде́йстей, Ты же, Богома́ти, певцы́ Твоя́ сохрани́ неврежде́ны в горни́ле искуше́ний, да пое́м: благослове́н Бог оте́ц на́ших.

Пе́снь 8.

Ирмос: Неопа́льная огню́ в Сина́и/ прича́щшаяся купина́ Бо́га яви́/ медленноязы́чному и гугни́вому Моисе́ови,/ и о́троки ре́вность Бо́жия три непребори́мыя во огни́ певцы́ показа́:/ вся дела́ Госпо́дня, Го́спода по́йте// и превозноси́те во вся ве́ки.

Припев: Преподо́бне о́тче Гаврии́ле, моли́ Бо́га о нас.

Пла́мень сласте́й слеза́ми покая́ния угаси́л еси́ и в пещь скорбе́й небоя́зненно возше́л еси́, сего́ ра́ди в се́рдце твое́м, преподо́бне Гаврии́ле, огнь боже́ственныя любве́ неугаса́емо возгоре́ся.

Припев: Преподо́бне о́тче Гаврии́ле, моли́ Бо́га о нас.

Орли́не криле́ бы́ша ти пост и моли́тва, преподо́бне, и́миже над про́пастию страсте́й воспари́л еси́ и на высоте́ богомы́слия гнездо́ ума́ твоего́ свил еси́. И нас ны́не наста́ви го́рняя му́дрствовати, а не земна́я.

Сла́ва Отцу́ и Сы́ну и Свято́му Ду́ху:

Исто́чник ми́лости подае́ши, Спа́се, чрез уго́дника Твоего́, преподо́бнаго Гаврии́ла, и мы благода́рно Тебе́ вопие́м: благослове́н еси́, Бо́же, Уте́шителю Благи́й.

И ны́не и при́сно и во ве́ки веко́в. Ами́нь.

Богородичен: Вои́стину ангелоподо́бен яви́лся еси́, о́тче преподо́бне, утеше́ние и по́мощь в ну́ждах су́щим оби́льно подава́я, да вси согла́сно вопию́т: благослове́н еси́, Бо́же, Богоро́дицею поми́луй нас.

Песнь 9

Ирмос: Не тле́ния искуше́нием ро́ждшая,/ и всехитрецу́ Сло́ву плоть взаимода́вшая,/ Ма́ти Неискусому́жная Де́во Богоро́дице,/ прия́телище Нестерпи́маго,/ село́ Невмести́маго Зижди́теля Твоего́,// Тя велича́ем.

Припев: Преподо́бне о́тче Гаврии́ле, моли́ Бо́га о нас.

Еди́ный хито́н нешве́ный Це́ркве Христо́вы, свы́ше из мно́гих язы́к истка́нный, раздра́ти во́лцы хи́щницы тща́тся, но ты, о́тче, хода́тайством твои́м тще́тны труды́ их соде́лай, во единомы́слии всех сохраня́я.

Припев: Преподо́бне о́тче Гаврии́ле, моли́ Бо́га о нас.

Росси́йстей земли́ хода́тай бу́ди, о́тче Гаврии́ле, моли́ Всеблага́го Бо́га сохрани́тися ей от враг ненаве́тованней и дре́во ве́ры укрепи́ти, да под се́нию его́ вси ве́рнии укрыва́ются.

Припев: Преподо́бне о́тче Гаврии́ле, моли́ Бо́га о нас.

Нам, чту́щим тя и любо́вию хва́лящим, помога́й, преподо́бне, да и в жи́зни сей, благодаря́ще Бо́га, пребу́дем, и жизнь о́ную безпеча́льную обря́щем.

Сла́ва Отцу́ и Сы́ну и Свято́му Ду́ху:

Изыди́те, ве́рнии, от домо́в и ке́лий ва́ших, да собра́нием церко́вным почти́м во уедине́нии среди́ люди́й подвиза́вшагося, и́стиннаго и́нока и всем нам те́плаго моли́твенника, Гаврии́ла досточу́днаго.

И ны́не и при́сно и во ве́ки веко́в. Ами́нь.

Богородичен: Христе́ Всецарю́, предста́тельством Твоея́ Ма́тере и преподо́бнаго Гаврии́ла, ми́лостив бу́ди нам, песнь сию́ чрез них Тебе́ прине́сших.

Свети́лен.

Просла́вим, ве́рнии, но́ваго свети́льника Це́ркве Грузи́нския, Гаврии́ла преподо́бнаго, от огня́ любве́ Христо́вы нам возжже́ннаго, да, во тьме ми́ра сего́ ходя́ще, не по́ткнемся, но просла́вим Отца́ све́тов Безнача́льнаго.

Богородичен:

Вели́кому Гаврии́лу Арха́нгелу подража́я, приноси́л еси́, о́тче Гаврии́ле, ангелокра́сную пе́снь Богома́тери: ра́дуйся, Обра́дованная! И мы ны́не, сликовству́юще, пое́м: ра́дуйся, Благослове́нная, Госпо́дь с Тобо́ю!

Моли́тва

О блаже́нне о́тче Гаврии́ле, дре́вним отце́м преподо́бным подо́бниче и тве́рдый ве́ры испове́дниче! Ты, от ю́ности ева́нгельскому уче́нию навы́к, всем се́рдцем Христа́ возлюби́л еси́, Его́же ра́ди и ми́ра отре́клся еси́ и по́двиг юро́дства восприя́л еси́, да ми́ру безу́мен яви́шися. Мы же, а́ще и лени́ви су́ще, но ве́дуще тя да́ры Ду́ха Свята́го испо́лнена, на по́мощь твою́ наде́ющеся, со смире́нием мо́лим: укрепи́ нас в ве́ре и благоче́стии, испроси́ от Го́спода дух братолю́бия и любве́, и́миже в житии́ твое́м просия́л еси́, исцели́ на́ша неду́ги душе́вныя и теле́сныя, мона́шествующим по́двигом до́брым подвиза́тися помози́, па́стырей в ре́вности благове́стия Христо́ва утверди́, Це́рковь от разделе́ния сохрани́, Оте́чество на́ше в ми́ре соблюди́ и сподо́би нас спасе́ние душ улучи́ти и Ца́рствие Небе́сное насле́довати, иде́же вку́пе с тобо́ю и все́ми святы́ми возмо́жем прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную, во ве́ки веко́в. Ами́нь.