29 ноября.

Канон святому священномученику Филумену Святогробцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Всевышняго друга искреннейшаго,/ при студенцé Иáковле ныне умерщвлéннаго/ окровавлéнными супостáт рукáми,/ Филумена, вернии, да восхвáлим,/ светло вопиюще:/ Христу не престай, священномучениче, моляся,// наших страстей отгнáти омрачéние.

Ин, глас 1-й:

Орýнды чадо,/ отóка Ки́прскаго óтрасль/ и священномученика нóваго/ Иáковля божéственнаго студенцá,/ Филумéна да почтим, вéрнии,/ яко защи́тителя веры нáшея/ и непобеди́маго орýжника Христовы и́стины,/ любовию вопиюще:/ слава прослáвльшему тя Христу,/ слава к безсмертию Упрáвльшему тя,// слава нам настáвника к Небéсным тя Показавшему.

Стихи́ра, гла́с 6:

Яко кадило благовóнное,/ и дар Христу святый/ принесóшася честных твоих кровéй тóки,/ священномýчениче нóвый, Филумéне,/ нестарéющаго убо наслéдия причáстник быв,/ то стяжáв, приéмлеши обожéние// и Господу мóлишися о душах наших.

Кано́н. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святый священномучениче Филуме́не, моли́ Бо́га о нас.

Яко свящéннейшее заколéние,/ у студенцá Иáковля/ пожéршагося, вéрнии,/ божéственными пéсньми/ Филумéна мýченика воспои́м,/ и́же нóвая яви́ся// веры слава и похвала.

Припев: Святый священномучениче Филуме́не, моли́ Бо́га о нас.

Направил еси́ стопы твоя,/ священномýчениче Филумéне,/ ко обители Ставровуни́йстей Честнáго Крестá/ вкупе с братом твоим,/ от благочáдныя веси,/ Орýнда именýемей,// и уединéннаго жи́тельства образ соделался еси.

Сла́ва Отцу́ и Сы́ну и Свято́му Ду́ху:

Чистéйшее светило/ и ярчáйшее, Филумéне,/ семéйства многочáднаго питóмче,/ от юности ты верою утверждéн бе// и возсиял еси́ всем благочестием своим.

И ны́не и при́сно и во ве́ки веко́в. Ами́нь.

Богородичен: Настáви, Владычице,/ к пáжитем радостным благодáти,/ всех, воспевáющих светло Твоя чудеса/ и божéственнаго Филумéна// заколéние величáющих слáвное.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святый священномучениче Филуме́не, моли́ Бо́га о нас.

От юных лет/ впери́в Христóви сердце твое,/ тем и послéдовал еси,/ Филумéне преподóбнейше,// рáдостне Украси́вшему тя нетлéния венцéм.

Припев: Святый священномучениче Филуме́не, моли́ Бо́га о нас.

Мýчеников ликóм/ причтéн быв, Филумéне,/ и мýченическаго доброслáвия сподóбився,/ весéлие и рáдование наслéдовал еси,// и́хже и нас сподоби.

Сла́ва Отцу́ и Сы́ну и Свято́му Ду́ху:

Всечестное прозябение Кипрское,/ рачéнием ко Господу/ от младéнства напитáнный,/ отéческий кров остáви, Филумéне,/ и скóро во свящéннейшую/ обитель Ставровуни́йскую// всели́лся еси.

И ны́не и при́сно и во ве́ки веко́в. Ами́нь.

Богородичен: Ума моего темни́цы озари́/ и очесá душéвная/ рабá Твоего просвети́,/ очернéнная страстьми́,/ Мати Божия,/ Яже Светодáвца Гóспода,// Еди́наго Богочеловека рóждши.

Седа́лен, гла́с 3.

Яко всесвящéнный áгнец/ пожéрлся еси в Самарии, у Иáковля студенцá,/ егоже воды Богочеловек испи́/ от рук почéрпшей Самаряныни,/ священномучение Филумéне всечестне,/ и обагри́л еси одежду священную// кровей своих Божественными тóки.

Сла́ва и ны́не, Богородичен:

Якоже Чи́стая, Дево Мати,/ и Нескверная Богородительница,/ нечистых мя страстей свободи,/ Сына Твоего на всякий день прославляюща Пренепорóчнаго/ и величающа Тя, Нескверная, мира Владычице,// молитвами Твоими очисти́тельными ко Всецарю.

Пе́снь 4.

Ирмос: Седяй в славе на престоле Божествá,/ во облаце легце,/ прииде Иисус Пребожественный,/ нетленною дланию и спасé зовущия:// слава, Христе, силе Твоей.

Припев: Святый священномучениче Филуме́не, моли́ Бо́га о нас.

Весь божéствен/ и богоприятен яви́ся, святе,/ ныне в Сиóне/ Мéстом Святым послужи́вый/ и длáньми убийц/ святейшую кровь твою// в Самари́и изли́в, Филумéне.

Припев: Святый священномучениче Филуме́не, моли́ Бо́га о нас.

Закон Божественный/ возвещáя невéрным,/ святе Филумéне,/ и посредé волкóв/ богоприятно, отче, подвизáяйся,/ не возмогл еси́ избежáти челюстéй их,// жáждущих растерзати тя.

Сла́ва Отцу́ и Сы́ну и Свято́му Ду́ху:

Во иерéех/ украси́тель слáвен еси,/ Филумене святе,/ студенцá Божественнаго,/ у негóже Фоти́ну Самаряныню/ срéте иногдá Мессия Христос,// дáрующий нам воду жизноподáтельную.

И ны́не и при́сно и во ве́ки веко́в. Ами́нь.

Богородичен: От утрóбы Твоея, Богородице,/ пáче слова и пáче ума/ Христос произыде,/ мирови дáруяй бытиé/ и спасáяй от бед и печалей/ выну Твоя чудеса// величáющия.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Святый священномучениче Филуме́не, моли́ Бо́га о нас.

Кáплями честных кровéй твоих/ ныне запечатлéл еси́/ клáдезь свящéнный Самаряныни,/ у него же беззакóнных руками/ бе убиéн,/ яко непорóчно овчá, Филумéне,// новых подви́жников вéры хвалó.

Припев: Святый священномучениче Филуме́не, моли́ Бо́га о нас.

Избáвителя и́скреннейший люби́мче,/ Тогó паче всех любяй/ и Того рáди любвé/во огрáде студенцá Иáковля/ жéстоко умерщвлéнный,/ моли́, Филумéне, Господа// о поющих тя.

Сла́ва Отцу́ и Сы́ну и Свято́му Ду́ху:

Мýчеников зарé новосиянных,/ веры свидéтелей,/ Филумéне слáвне,/ тяжкоýмия мрак/ на тя враждýющих разсéявый,/ светом Небеснаго Царствия блистáющим// в Вышних наслади́ся Крóвех.

И ны́не и при́сно и во ве́ки веко́в. Ами́нь.

Богородичен: Просим себе, Владычице,/ молитв непрестáнных/ к Жизнодателю Твоему Сыну,/ и́же в смéртней/ темнотлéнней сéни спящии,/ яко да радости неумолкáемыя// причáстницы в Небéсных будем.

Пе́снь 6.

Ирмос: Божéственное сие и всечестнóе/ совершающе празднество,/ богомудрии, Богоматере,/ прииди́те руками восплéщим,// от Нея рождшагося Бога славим.

Припев: Святый священномучениче Филуме́не, моли́ Бо́га о нас.

Укрепляемь, Филумене,/ си́лою Господа,/ вéрным подающаго/ токи живóтныя,/ врагов вéры, грозящих ти,/ крепкодушне отче,// не устраши́лся еси.

Припев: Святый священномучениче Филуме́не, моли́ Бо́га о нас.

Тело твое многострадáльное/ и по успéнии/ мягко и удобоподви́жно/ Господь соблюдé,/яко да во одеяния служебная/ облачат отцы его,// о Филумéне.

Сла́ва Отцу́ и Сы́ну и Свято́му Ду́ху:

Тебе поем, священномýчениче Филумéне,/ в горé Афóнстей/ брáту своему яви́вшемуся/ и мучéние свящéнное своé// тому áбие повéдавшему.

И ны́не и при́сно и во ве́ки веко́в. Ами́нь.

Богородичен: Сквернáвую, Богороди́тельнице,/ и нечистоты исполненную/ рабов Твоих волю/ омый иссопом дерзновения// к Сыну Единородному Твоему и Господу.

Конда́к, гла́с 8.

Священномýчеников новосиянную звездý,/ у студенца возшéдшую Самаряныни/ и облистáвшую Цéрковь Христову/ целомýдрием и страдáнием,/ ныне воспоим,/ яко áгнца, за веру заклáннаго,/ любóвию вопиюще:// рáдуйся, блажéнне Филумéне.

Икос:

Ангел, хрáбрствовав в страдальческих болéзнех, Филумене всеблаженне, показался еси, сего ради ныне ангельския радости и веселия Небеснаго, святе, сподóбився, моли́ся Христу о вопиющих ти: радуйся, Кипра благоуханный цвете; радуйся, Господень истинный люби́мче; радуйся, óтрасле Орýнды богодухновéнная; радуйся, плоде Сиона сладчайший; радуйся, человече Небесный, Ангелом óбщниче; радуйся, Ангеле, единонрáвный мучеником иерею; радуйся, у кладезя Иáковля пострадáвый; радуйся, ароматный нектар добродетелей сбирáяй; радуйся, Христово прослáвивый имя; радуйся, врáжие попрáвый величáние; радуйся, светило новозáрное страстонóсцев; радуйся, звездó свящéнников ныне пострáдавших. Радуйся, блажéнне Филумене.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святый священномучениче Филуме́не, моли́ Бо́га о нас.

От всякаго мя злоумышлéния врáжия,/ Филумéне, избáви,/ якоже спасé/ преемника в месте делания твоего,/ скоро тому предвозвестив/ еже на него убийц нашествие// безстýдное и слабодýшное.

Припев: Святый священномучениче Филуме́не, моли́ Бо́га о нас.

Ныне тело твое,/ егóже Господь сохрани́ нетлéнно,/ слáвне Филумéне,/ в Сихéме яко источник ся являет исцелéний/ с верою сему приникáющим/ и ко Христу// твоих предстáтельств требующим.

Сла́ва Отцу́ и Сы́ну и Свято́му Ду́ху:

Благосострадáтельне Филумене,/ вся отсéченная многострадальнаго телесé твоего/ во Австрáлии, святе,/ лютый недуг карки́на[5] отгнá,/ всем благодать показуяй,/ юже обрел еси́// на пáжити веры.

И ны́не и при́сно и во ве́ки веко́в. Ами́нь.

Богородичен: Пречи́стый Владыка/ мир от падения дрéвле избáвивый,/ от пречи́стых кровéй Твоих,/ Мати Божия, воплоти́ся./ Сего ради, Владычице,/ яко Начáток спасéния нашего// Тя воспевáем.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святый священномучениче Филуме́не, моли́ Бо́га о нас.

Новый Христов священномýчениче,/ сéчивом урáнен сый,/ добродетельне Филумене,/ обагрил еси́ рýбище ни́щенское твое/ кровéй твоих тóки,/ вскрай обитая селений веры Господни честных,// в Земли, юже стопами Своими обыде Бог.

Припев: Святый священномучениче Филуме́не, моли́ Бо́га о нас.

Мученик и ратобóрец победонóсен яви́ся/ Христа Вседержителя,/ о Филумене ди́вне,/ яко превозшедый доблесть всяческую/ в последняя лета;/ нетленное тело твое/ священие и источник/ Той показа, отче,// присноточáщ чудесы

Сла́ва Отцу́ и Сы́ну и Свято́му Ду́ху:

Сéчиво тя урéза/ непорóчно, Филумéне крепкодýшне,/ убиéние жéстоко совершáя,/ и главу твою сокруши́ всечестнýю,/ священнострадáльче благорóдный:/ сего ради,/ чтýще память твою святую,/ благообрáзно взыскýем// éже пред Господем заступлéний твоих.

И ны́не и при́сно и во ве́ки веко́в. Ами́нь.

Богородичен: Избáви напáстей, Богорóдице,/ бед, обстояний/ и скорбей гóрестных/ просящих выну, Владычице,/ яже от Тебе помощи/ и сподóби дости́гнути нам/ славы неумолкаемыя/ и на Небесех// нескончáемыя радости.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святый священномучениче Филуме́не, моли́ Бо́га о нас.

Благослáвне Филумéне,/ священномýчениче честный,/ вéры же и Сиона/ новозáрный свéщниче,/ в ли́це вси/ твоея кончи́ны память прáзднующе, вопием:/ с Небесé покрый/ и спаси́ от всякия нýжды// к тебе притекáющия.

Припев: Святый священномучениче Филуме́не, моли́ Бо́га о нас.

Яко áгнец Божий пожрéн быв,/ Филумене богообрáзне,/ и к Небесному стаду вознесéн/ и к присносýщней радости и веселию,/ да Началопастырю сликовствуеши/ и Ангельским чинóм// во веки светло свесели́шися.

Сла́ва Отцу́ и Сы́ну и Свято́му Ду́ху:

Радуйся, дóблественниче Господень, Филумéне,/ терпели́вне и всечéстне,/ вопиюще, молимся:/ от сéтей миродéржца ум наш свободи́,/ и песнь сию приими́,/ юже сплетаéм ти,// хвáляще мученическое твое светлое свидéтельство.

И ны́не и при́сно и во ве́ки веко́в. Ами́нь.

Богородичен: Мáти Божия,/ ум наш возвыси ко мнóжайшей любви́/ от суеты дóльних страстей и скорбей,/ Яже Вышняго Рождеством/ древле падшее Адáмово естествó/ любвé ради неизречéнныя и вéлией милости// возвысившая.

Свети́лен.

Священномýчениче слáвне, и́же в послéдняя временá у студенцá Иáковля пострадáвый и славы причащáяйся ныне Зижди́телевы, треблажéнне Филумéне, о нас моли, совершáющих верою присночестнýю память твою.

Молитва

О святы́й уго́дниче Бо́жий, священному́чениче Филумéне! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.