Шрифт

27 ноября.

Канон Святителю Григорию Паламе, архиепископу Солунскому, чудотворцу.

Святителю Григорию Паламе, архиепископу Солунскому

Тропа́рь, гла́с 8:

Правосла́вию наста́вниче, святи́телем украше́ние, богосло́вцем побо́рниче непобеди́мый, Григо́рие чудотво́рче, Солу́ню вели́кая похвала́, пропове́дниче благода́ти, моли́ Христа́ Бо́га спасти́ся душа́м на́шим.

Стихи́ра, гла́с 6:

Благоче́стия и́стиннаго пропове́дника и Це́ркви пресве́тлую звезду́ пе́сньми похва́льными почти́м, Солу́ню све́тлаго свети́льника, Све́ту ученика́ и дру́га Христо́ва, се́яй сло́во благоче́стия боже́ственно в сердца́ все́х ве́рных, все́м ко спасе́нию да́рует и мо́лится приле́жно Го́сподеви поми́ловатися душа́м на́шим.

Кано́н свята́го. Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Ты́ дарова́ний исто́чнику и прему́дрости духо́вней, пресла́вне, уста́ и мы́сль приложи́в, благода́ти яви́лся еси́ пучи́на, от нея́ же ка́плю, о́тче, и мне́ пода́ждь, пою́щему тя́.

Уста́в и пра́вило па́че естества́ и́ноческому жи́тельству ты́ бы́л еси́, уста́ богосло́вец же, и святи́тель, и учи́тель боже́ственная, отню́дуже, соше́дшеся вку́пе, тебе́ пе́ние плету́т.

Ин яви́лся еси́ от чре́ва Иереми́я ве́дом, Сотво́ршему ве́сь возложе́н, освяще́н, богоно́се, ве́сь же, отню́дуже твоя́ уста́ Бо́жия сло́ва восприя́ша.

Престо́лу предстоя́ Боже́ственному со Ангелы, богови́дче Григо́рие, лучу́ восприе́мля ны́не явле́нне непристу́пную, моли́ся тмы́ грехо́вныя на́м разреши́тися, мо́лимся.

Богородичен: Све́т, возсия́вший, Богороди́тельнице, от Твоея́ утро́бы, ви́дети жела́я, Григо́рий, Тебе́ моли́твеницу к Соде́телю представля́ет и жела́емыя от Тебе́ получи́ благода́ти.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Юро́дство, прему́дре, мирску́ю му́дрость вмени́л еси́, кре́стное юро́дство возлюби́л еси́ и сего́, на ра́мо прии́м, показа́л еси́, я́коже Па́вел рече́, е́же юро́дством мирски́я му́дрости превше́д.

Возлюби́л еси́, о́тче, от души́ нищету́, и смире́ние, и ху́дость, и нестяжа́тельство, челове́к бе́гая, отню́дуже гони́мь еси́ в пусты́ню, всегда́, в воню́ мѵ́р твои́х, Христо́ви зовя́ше: теку́ всле́д Тебе́.

Умертви́л еси́, прему́дре, ве́тхаго тле́ющаго челове́ка воздержа́нием вся́ким и пла́чем, исто́чники сле́зными дово́льне омыва́яся, житие́м восприя́л еси́ дре́внюю свою́ добро́ту о Христе́ и в но́ваго оде́явся.

Восхва́лим, мно́жества и́нок с ме́стных же состоя́ния, со свяще́нники все́ми и пита́тельницы, гла́сы кра́сными и словесы́ боже́ственными дне́сь о́бщаго учи́теля, и́же на́с украси́вшаго де́лы же и словесы́, Григо́рия.

Богородичен: Ви́дев, ю́же жела́ше, зарю́ духо́вную, Григо́рие, предста́тельством Богома́тере, ясне́йши же ны́не Тою́ освеща́емь, Тоя́ моли́, тмы́ страсте́й на́с премени́ти Све́том благода́тным.

Седа́лен, гла́с 8.

Воздержа́нием, и пла́чем, и моли́твою, и де́йством, и нището́ю, и о́бщим умове́нием, Григо́рие, сле́зным очи́стил еси́ свое́ се́рдце, ве́сь восхище́н бы́в, и Христо́ви совокупи́ся ду́хом, отню́дуже, я́ко Па́вел, неизрече́нных услы́шав и сосу́д бы́в избра́нен, ты́ поне́сл еси́ Христо́во и́мя, Несозда́но пропове́дал еси́ высо́це и про́сто Еди́но Божество́, е́же моля́ непреста́й спасти́ся ста́ду твоему́.

Сла́ва, и ны́не, Богородичен:

Иже пре́жде от не су́щих приве́д су́щих естества́, Сло́ве Бо́жий, поче́т о́бразом же и руко́ю челове́ка, истле́вша того́ пре́лестию змии́ною, назда́в па́ки Кресто́м честны́м Ти́, вся́кое же естество́ освяти́л еси́, Ще́дре, Святы́м Твои́м Ду́хом и теле́сным восприя́тием, Ма́тере Твоея́ мольба́ми, Влады́ко Христе́ Бо́же, согреше́ний оставле́ние да́руй покланя́ющимся ве́рою держа́ве твое́й.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Но́щь безлу́нную и тму́, Григо́рие, страсте́й моли́твенною па́лицею ра́нив, я́коже Моисе́й Еги́пта, восте́кл еси́ па́че естества́ к виде́нию Боже́ственному и законода́вец на́м бы́л еси́.

На высоту́ возше́д Боже́ственную, о́тче Григо́рие, доброде́телей, я́коже на Фаво́ре Христо́вы дру́зи и ученицы́, Оного узре́л еси́, есте́ственную и Боже́ственную сла́ву явля́юща, и, обожи́вся, друго́е показа́ся со́лнце.

Таи́нник Божества́, богови́дче Григо́рие, и неизрече́нных прича́стник ты́ бы́в, богосло́вити Того́ та́йну, Еди́но Тоя́ возвести́в и Несозда́но си́лою и Естество́м Тре́ми Соста́вы.

Богородичен: Сло́во Ро́ждшую, Бо́жие Неизрече́нное, словесы́ воспе́л еси́ свяще́нными и та́йну све́тло Боже́ственнаго воплоще́ния возвести́л еси́, Юже ны́не моли́ Це́рковь соблюда́ти необурева́ему.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Ум Вели́кий, Прему́дрости глубина́ неизрече́нная, обре́те тво́й, богоно́се, у́м вселе́ние, Себе́ содруже́н, Уму́ и Прему́дрости орга́н тя́ Це́ркви дарова́л е́сть.

Яко лучу́ све́тлую, пре́жде Афо́н, Григо́рие, возсия́, све́тлому тя́ гра́ду да́рует, Све́том духо́вным Того́ богодви́жимь, освяща́я и оте́чески преднаставля́я.

Да́р Боже́ственный от Бо́га тя́ и бога́тство неистощи́мое обре́т, Фитта́льская держа́вная митропо́лия созыва́ет сосе́ды к прича́стию твои́х слове́с и чуде́с, блаже́нне.

Жела́ющии по́двига и слове́с благода́тей Григо́риевых, пе́снь тому́ ны́не принося́ще, того́ помо́лим его́же моли́твами Зижди́теля и Влады́ку ми́лостива все́м соде́лати.

Богородичен: Просвети́вый земли́ широту́, со́лнца све́тлостию, Све́т су́щим яви́ся во тме́, Де́во, Невече́рний, Его́же моли́ тмы́ лю́тыя и грехо́вныя на́с изба́вити, Влады́чице.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ нетле́ния, Ро́ждшую сохрани́ неврежде́нну.

Пра́вило доброде́тели, обоже́ное житие́ твое́ ви́дено бы́сть ве́рными вои́стину, Григо́рие, благоче́стия же прави́тель сло́во твое́, и веле́ние, и́ми же свое́ ро́дное и пусторо́дное разсужда́ется, Еди́наго Бо́га пропове́дающе всеси́льна, Еди́наго и Несозда́на.

Еди́но благоче́стно пропове́дав Божество́, вели́кий на́м яви́ся, Григо́рие, Соста́вми Треми́ Еди́но Естество́ и си́лу, вся́чески Ту́ю Про́сту и Несозда́ну, все́х посрами́л еси́ держа́вне, буесло́вящих созда́но Божество́.

Безу́мнаго мудрова́ние облича́еши Акинди́на, я́ко и пре́жде Варла́ма го́рдаго, е́ллинским бо приобщи́вшимся сла́вам, сведо́ша Божество́ в тва́рь, обесче́стивше, я́коже жи́дове пе́рвие, Сы́на Бо́жия досто́инство.

Уста́вы приводя́ веле́ний, Григо́рие, и словеса́ све́тла, и́миже отве́рзл еси́ мы́сль честны́х богосло́вец Ду́хом, моли́твами ти́ неподви́жиму соблюди́ Христо́ву, избавля́ющи, Це́рковь от вся́кия е́реси.

Богородичен: Престо́л херуви́мских и все́х небе́сных си́л, Влады́чице, и вся́каго вку́пе го́рняго чи́на вы́шши Ты́ показа́ся, я́ко престо́л неизрече́нен бы́вши Бо́жия Соста́ва, Его́же, я́ко Сы́на Своего́, ми́лостива ми́, ве́рно Тя́ пою́щу, соде́лай.

Конда́к, гла́с 8.

Прему́дрости свяще́нный и боже́ственный орга́н, богосло́вия све́тлую согла́сно трубу́, воспева́ем тя́, Григо́рие богоглаго́ливе, но, я́ко у́мне, Пе́рвому Уму́ ны́не предстоя́, к Тому́ у́м на́ш, о́тче, наста́ви, да зове́м ти́: ра́дуйся, пропове́дниче благода́ти.

Икос:

Ангел яви́лся еси́ на земли́, неизрече́нная Боже́ственная тле́нным возвеща́я, безпло́тных бо гла́сы, от челове́ческих сы́й и те́лом живы́й, удиви́л еси́ и сотвори́л еси́ зва́ти ти́, богоглаго́ливе, сия́: ра́дуйся, его́же ра́ди Све́т пропове́дася; ра́дуйся, его́же ра́ди тма́ отгна́ся; ра́дуйся, Несозда́ннаго Божества́ возвести́телю; ра́дуйся, созда́ннаго естества́ и бу́яго вои́стину обличи́телю; ра́дуйся, высоту́ невосходи́мую, Бо́жие естество́ реки́й; ра́дуйся, глубину́ неудо́бь зри́тельную, де́йство реки́й; ра́дуйся, я́ко сла́ву Бо́жию до́бре ре́кл еси́; ра́дуйся, я́ко мудрова́ния зло́бных отре́к; ра́дуйся, свети́ло, показа́вый Со́лнце; ра́дуйся, сосу́де, боже́ственнаго пития́ пода́тельный; ра́дуйся, и́мже и́стина сия́ет; ра́дуйся, и́мже помрачи́ся тма́; ра́дуйся, пропове́дниче благода́ти.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Якоже гро́ма гла́с твои́х веле́ний и слове́с боже́ственных молниеужа́сных зре́ти я́вствене, о́тче, не возмога́ют пре́лестию плене́ннии и осяза́ют, я́коже пи́шет, я́ко слепы́й, ны́не сте́ны сме́шне безу́мнии.

Но́щь не светла́ непокори́вым бы́сть, и ны́не Све́т Есте́ственный — Ца́рство Сла́вы Бо́жия, и́же яви́ таи́нником Человеколю́бец на Фаво́рстей, Григо́рие, е́юже, причасти́вся дово́льне, приобща́ешися угоди́вшим.

Иже нечести́ве в благода́ть, пресла́вне, поху́лившим Бо́жие безмо́лвие и моли́тву, обоже́нию же неизрече́нному скве́рне насмея́вшихся, те́х посрами́в, отгна́л еси́ Боже́ственнаго двора́, его́же соблюда́еши всегда́ твои́ми мольба́ми.

Богородичен: Прииди́ ны́не в на́шу по́мощь, спасе́ние о́бщее, Григо́риевы моли́твы прие́млющи, Влады́чице, стра́сти у́бо усыпа́ющи душе́вныя и теле́сныя и о́бщий мяте́ж и тле́ние вско́ре разреша́ющи.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Яви́лся еси́, о́тче, ве́сь све́тел, сла́достен, пра́в, кро́ток, ве́рою приходя́щим ти́ источа́я сла́дкое слове́с, Григо́рие, боже́ственное пи́во, все́х веселя́ благочести́вых сердца́, хапля́ неду́гующих душе́вными чу́вствы.

Ум и язы́к, вои́стину благоро́ден, наказа́ние же и словеса́ се́рдце очище́но обре́т, Бо́жия в тя́ всели́ся Прему́дрость, е́йже дру́г дру́гу сосвяза́вшися, о́тче, чу́до все́м стра́нно показа́ тя ми́рови.

В пещи́ де́ти неврежде́ны евре́йския показа́ держа́ва благоче́стия, и́мже подо́бяся, прему́дре, пла́мень удержа́л еси́ злоче́стия посреди́ пе́щи искуше́ний, и до́блествене поя́ Влады́ку, и опаля́я гоня́щия.

Умнаго погрузи́л еси́ фарао́на тече́ньми твои́х сле́з и все́ еги́петское потопи́л еси́ во́инство, возше́л еси́ на го́ру безстра́стия, побива́я отту́ду Ду́ха си́лою полки́ бори́тель, я́коже Моисе́й вели́кий.

Богородичен: Све́тлый благода́ти, Чи́стая, пропове́дник и богосло́вец Ду́ха, Богоро́дице, да́ннаго Тобо́ю ми́рови, ны́не словесы́ торжеству́я пе́ние, пе́сни же и ли́ки вся́ Ти́ собира́ет, я́ко ве́рный ра́б, па́мять Твою́ сла́вя.

Пе́снь 9.

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Престо́лу предстоя́, Григо́рие, Трисо́лнечнаго и Безнача́льнаго Божества́ и де́йством дово́льне насы́тився благода́тию, ю́же воспе́л еси́, соде́йственик и друго́в, ны́не воспомяну́вших тя́, помина́й.

Обре́л еси́ возда́ние боле́зней твои́х, Ца́рство, о́тче, Бо́жие безнача́льное, е́же благоче́стне на земли́ воспропове́дал еси́, венцы́ триплете́ны восприя́л еси́ испове́дания боже́ственнаго, свяще́нства же и безмо́лвия.

Яви́лся еси́ и́ночествующим похвала́, богосло́вец боже́ствен, свяще́нства же пра́вило изве́стное, сего́ ра́ди зде́ да́стся ти́ чуде́с Боже́ственная благода́ть, словеса́ твоя́ утвержда́я.

Зако́н похва́льных, пресла́вне, и слове́сных по́двиг вои́стину исше́д, и на земли́ живы́й, и исше́д от те́ла, но приими́ ма́лое пе́ние изря́днейши и проше́ния подава́й, тебе́ жела́ющих моли́твами твои́ми.

Богородичен: Уста́ стра́шнаго Рождества́ Твоего́ и богослове́сный язы́к, Влады́чице, бы́сть, е́же па́че естества́ от Тебе́ я́вльшагося обоже́ния честны́й Тво́й ра́б Григо́рий, его́же ны́не мольбы́ прие́млющи, спаси́ все́х.

Свети́лен.

Ра́дуйся, отце́м похвала́, богосло́вец уста́, безмо́лвия жили́ще, до́м прему́дрости, учи́телей держа́ва, бе́здна сло́ва; ра́дуйся, дея́ния орга́н, виде́ния ве́рх, цели́телю страсте́й и боле́зней челове́ческим; ра́дуйся, Ду́ха Свята́го селе́ние, и у́мер, и жи́в, о́тче.

Сла́ва, и ны́не, Богородичен:

Ра́дуйся, ра́дости хода́таице; ра́дуйся, кля́тве разреше́ние; ра́дуйся, Ада́мово воскресе́ние; ра́дуйся, паде́ние бесово́м; ра́дуйся, же́нскаго студа́ потребле́ние; ра́дуйся, а́дово испражне́ние, тля́ сме́рти, освяще́ние челове́ческаго естества́; ра́дуйся, Де́во, ра́дуйся, все́х Влады́чице; ра́дуйся, Бо́жия Ма́ти.

Молитва святителю Григорию Паламе, архиепископу Солунскому

О, треблаже́нная и честна́я вои́стину и превожделе́нная главо́, безмо́лвия держа́во, мона́шествующих сла́во, о́бщее богосло́вов и отце́в и учи́телей украше́ние, апо́столов сподви́жниче, испове́дников и му́чеников безкро́вный ревни́телю и венча́телю словесы́ и дея́ньми и благоче́стия побо́рниче и воево́до взбра́нный, боже́ственных догма́тов высо́кий изъясни́телю и учи́телю, пре́лести многоразли́чных ересе́й потреби́телю, всея́ Це́ркве Христо́вы предста́телю, и стра́же, и изба́вителю! Ты́ и преста́влься ко Христу́ назира́еши у́бо и ны́не ста́до твое́ и всю́ Це́рковь свы́ше, боле́зни разли́чныя исцеля́я и словесы́ твои́ми вся́ управля́я, и е́реси изгоня́я, и многообра́зных страсте́й избавля́я. Приими́ же и на́ше сие́ моле́ние и изба́ви на́с от страсте́й и искуше́ний, и треволне́ний, и бе́д, и осла́бу и ми́р и благоде́нствие на́м пода́ждь, о Христе́ Иису́се Го́споде на́шем, Ему́же сла́ва и держа́ва подоба́ет со безнача́льным Его́ Отце́м и Животворя́щим Ду́хом, ны́не и при́сно и во ве́ки веко́в. Ами́нь.

Молитва вторая святителю Григорию Паламе, архиепископу Солунскому

О, всехва́льный святи́телю Христо́в и чудотво́рче Григо́рие! Приими́ сие́ ма́лое моле́ние от на́с гре́шных к тебе́ прибега́ющих и те́плым твои́м предста́тельством умоли́ Го́спода Бо́га на́шего Иису́са Христа́, я́ко да, призре́в на ны́ ми́лостивно, да́рует на́м согреше́ний на́ших во́льных и нево́льных проще́ние, и по вели́цей Свое́й ми́лости изба́вит на́с от бе́д, печа́лей, ско́рби и боле́зней душе́вных и теле́сных, обдержа́щих на́с; да пода́ст земли́ плодоно́сие, и вся́, я́же на по́льзу настоя́щаго жития́ на́шего потре́бная; да да́рует на́м сконча́ти житие́ сие́ привре́менное в покая́нии, и да сподо́бит на́с гре́шных и недосто́йных Небе́снаго Ца́рствия Своего́, со все́ми святы́ми сла́вити Его́ безконе́чное милосе́рдие, со Безнача́льным Его́ Отце́м и Святы́м и Животворя́щим Его́ Ду́хом, во ве́ки веко́в. Ами́нь.

Молитва третья святителю Григорию Паламе, архиепископу Солунскому

Все́х правосла́вных наста́вниче и Це́ркви сия́ние, о́тче Григо́рие, вся́каго обстоя́ния на́с изба́ви, боже́ственной ико́не твое́й припа́дающе ве́рою, свобожда́я от навожде́ния на на́с вра́жия, ты́ бо помо́щник на́ш явля́ешися и исполня́ешися и исполня́еши при́сно проше́ния све́тло ублажа́ющих тя́, на вся́ко вре́мя моля́ся Трисия́нной Тро́ице, Е́йже подоба́ет ве́лия сла́ва, че́сть и поклоне́ние Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святителю Григорию Паламе, архиепископу Солунскому