27 ноября.

Канон святому и всехвальному апостолу Филиппу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столе святы́й Фили́ппе, моли́ ми́лостиваго Бо́га, да прегреше́ний оставле́ние пода́ст душа́м на́шим.

Или́ се́й, гла́с то́йже:

Благоукраша́ется вселе́нная, Ефио́пия ликовству́ет, я́ко венце́м красу́ема, тобо́ю просвети́вшися, све́тло торжеству́ет па́мять твою́, богоглаго́ливе Фили́ппе, вся́ бо ве́ровати Христу́ научи́л еси́ и тече́ние соверши́л досто́йно Ева́нгелия. Те́м дерзнове́нно вари́т Ефио́пская рука́ к Бо́гу, Его́же моли́ дарова́ти на́м ве́лию ми́лость.

Велича́ние:

Велича́ем тя́, апо́столе святы́й Фили́ппе, и чте́м боле́зни и труды́ твоя́, и́миже труди́лся еси́ во благове́стии Христо́ве.

Стихи́ра, гла́с 6.:

Прему́дрый ло́вче, святы́й учениче́, де́лателю Спа́сов и сказа́телю Того́ страсте́й, и́же тва́рь ве́рою обте́к и прельще́нныя язы́ки собра́в и Бо́гу приве́д, я́ко кади́ло до́брое, на небеса́ возведе́ся. Те́мже, предстоя́ Судии́, моли́ изба́витися на́м от беззако́ний на́ших и в де́нь су́дный изба́витися муче́ния.

Кано́н апо́стола. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святый апостоле Филиппе, моли́ Бо́га о нас.

Пресве́тлыми луча́ми Христо́вы Боже́ственныя све́тлости наслажда́яся я́сно, богопропове́дниче Фили́ппе, твои́ми по прича́стию заря́ми на́с просвети́.

Припев: Святый апостоле Филиппе, моли́ Бо́га о нас.

Отчую тебе́ сла́ву Собо́ю показа́вый, Фили́ппе, ли́ку ученико́в тя́ Христо́с вчини́, твою́ прове́дый доброде́тель, богоблаже́нне.

Сла́ва Отцу́ и Сы́ну и Свято́му Ду́ху:

Ны́не не в гада́ниих зри́ши, ниже́ се́нех, ниже́ зерца́лех, всему́дре, Исто́чника благи́х, жела́ний коне́чное, Христа́, но лице́м зри́ши я́вственно к Лицу́.

И ны́не и при́сно и во ве́ки веко́в. Ами́нь.

Богородичен: Оскуде́вшим нача́льником от коле́на Иу́дова, Пречи́стая, Сы́н Тво́й и Бо́г прише́д, во́ждь земли́ конце́м и́стинно ны́не воцари́ся.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святый апостоле Филиппе, моли́ Бо́га о нас.

Ты, испо́лнен све́та де́ятельнаго виде́ния, Све́ту вели́кому, бы́вшу с на́ми, сподо́бился еси́ Христу́ служи́ти, Фили́ппе богоглаго́ливе.

Припев: Святый апостоле Филиппе, моли́ Бо́га о нас.

Степе́нь догма́тов благочести́вых твое́ тайново́дствие благочести́во яви́ся, те́м бо Сы́на позна́хом соесте́ственна и соедине́нна су́ща Роди́телю.

Сла́ва Отцу́ и Сы́ну и Свято́му Ду́ху:

Све́щник бы́л еси́ зла́т, сия́я челове́ком присносу́щный све́т и просвеща́ющь и́м вселе́нную я́ве позна́нием, Фили́ппе всеизя́щнейше.

И ны́не и при́сно и во ве́ки веко́в. Ами́нь.

Богородичен: На Тя́, Пресвята́я Чи́стая, наде́явся, да не отпаду́ Твоего́ ча́яния, но, я́ко Ма́ти ми́лостивная человеколюби́ваго Бо́га, сете́й мя́ врага́ изба́ви.

Седа́лен, гла́с 8.

Тучено́сен о́блак духо́вный и́стинно показа́лся еси́ су́щим на земли́, напая́я, я́ко ни́ву, та́инственно сердца́ на́ша; проте́к сло́вом, напая́еши концы́ и до́ждь пролива́еши мѵ́ра от ра́ки. Те́м, дохну́в неве́рным сердца́м воню́ Ду́ха, в ни́хже сокро́вищствовал еси́, апо́столе Фили́ппе, моли́ся Христу́ Бо́гу грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, подо́бен то́йже:

Идольскую ле́сть низложи́л еси́, Спа́совы стра́сти возжеле́в, Фили́ппе, сла́вне, яви́лся еси́ ми́ру, небе́сная все́м источа́я чудеса́ и язы́ков бы́в, всеблаже́нне, апо́стол. Те́м твою́ па́мять досто́йно чти́м, песносло́вяще: Госпо́день апо́столе, моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

И ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и, я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святый апостоле Филиппе, моли́ Бо́га о нас.

Со́лнца селе́ние, Христа́, су́щаго Све́та, и хра́м показа́лся еси́ вмести́телен Того́ све́тлости, и не́бо, сла́ву Бо́жию челове́ком пове́дая.

Припев: Святый апостоле Филиппе, моли́ Бо́га о нас.

Во истле́вшее страстьми́ челове́чество ты́ вложе́н, Бо́жия со́ль, от Христа́, того́ изсуши́ гни́лость лю́тую, Боговеща́телю достосла́вне.

Сла́ва Отцу́ и Сы́ну и Свято́му Ду́ху:

Си́лою, Фили́ппе, Христо́вою укрепля́емь, де́монскаго полка́ и злове́рных яви́лся еси́ си́льнший, су́щим на земли́ вопия́ жи́зни боже́ственныя благове́стие.

И ны́не и при́сно и во ве́ки веко́в. Ами́нь.

Богородичен: Приста́нище благоти́хое Христо́с яви́ ве́рою и любо́вию Тя́, и́стинную Влады́чицу Всенепоро́чную, от со́вести чи́стыя Богоро́дицу пропове́дающим.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святый апостоле Филиппе, моли́ Бо́га о нас.

Яда душегуби́тельнаго вра́жия враче́бными твои́ми дла́ньми, богоглаго́ливе, изсуши́в, смертоно́сною глубино́ю держи́мыя, лю́тыя боле́зни избавля́я.

Припев: Святый апостоле Филиппе, моли́ Бо́га о нас.

Огнедохнове́нен ве́сь яви́лся еси́ Паракли́товым наше́ствием и благода́тию, Фили́ппе, иззя́бшия безбо́жия зимо́ю, теплото́ю ве́ры оживотвори́л еси́.

Сла́ва Отцу́ и Сы́ну и Свято́му Ду́ху:

Бли́з бы́л еси́ Христа́, дае́мыя ти́ зари́ несре́дственно прие́мля, просвеща́я к тебе́ притека́ющия и приводя́ ты́я Соде́телю Твоему́.

И ны́не и при́сно и во ве́ки веко́в. Ами́нь.

Богородичен: Сло́вом вся́ соде́тельствуя и му́дрым про́мыслом окормля́я еди́н, я́ко хо́щет Госпо́дь, за благоутро́бие зи́ждется из Тебе́ и пло́ть несказа́нно, Пречи́стая, быва́ет.

Пе́снь 6.

Ирмос: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго, и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Святый апостоле Филиппе, моли́ Бо́га о нас.

Одержа́щу и губя́щую зря́ пре́лесть вра́жию челове́ческий ро́д, Твоя́ стре́лы, изощре́нныя апо́столы, напря́г, испусти́л еси́ и разве́рзл еси́ бре́нная уста́ зми́ева, все́х от того́ вре́да и тли́, Спа́се, исцеля́я.

Припев: Святый апостоле Филиппе, моли́ Бо́га о нас.

Вы́шним сия́нием блиста́я, яви́лся еси́, я́коже мо́лния, вселе́нней светя́, и я́ко гора́, сла́дость иска́пающая, я́ко роса́ боже́ственная, с небесе́ па́дающая, я́ко апо́стол избра́н, дванадесяточи́сленный по́лк исполня́я ученико́в Христо́вых, всеблаже́нне.

Сла́ва Отцу́ и Сы́ну и Свято́му Ду́ху:

Научи́вся Твоея́ та́йны глубине́, Боже́ственный учени́к, я́ко реку́ ми́ра, наводня́ющу сла́дости пото́к, я́ко потопля́ющую волну́, сла́ву язы́ков, Тя́ пропове́да велегла́сно и Твое́ сла́вное истоща́ние, Бла́же, е́же о на́с благовести́.

И ны́не и при́сно и во ве́ки веко́в. Ами́нь.

Богородичен: Умерщвля́емыя и ги́бнущия вся́ сме́ртию челове́ки Ты́, Христа́ ро́ждши — Нетле́нное безсме́ртие, призвала́ еси́ к жи́зни ве́чней, и просвети́ла еси́ омраче́нныя, и свободи́ла еси́, разреши́вши у́зы отведе́ния на́шего, Всепе́тая.

Конда́к, гла́с 8.

Учени́к, и дру́г Тво́й, и подража́тель стра́сти Твоея́ вселе́нней Бо́га Тя́ пропове́да богоглаго́ливый Фили́пп; того́ моли́твами от враго́в пребеззако́нных Це́рковь Твою́ и вся́к гра́д Тво́й Богоро́дицею соблюди́, Многоми́лостиве.

Икос:

Струю́ сло́ва пода́ждь ми́, Го́споди, водно́е естество́ соде́явый, се́рдце мое́ укрепи́, Благоутро́бне, Иже зе́млю утверди́вый сло́вом Твои́м, и просвети́ мое́ помышле́ние, све́том, я́ко ри́зою, одева́яйся, да глаго́лю и пою́ подоба́ющая и досто́йно восхвалю́ Твоего́ уго́дника, Многоми́лостиве.

Пе́снь 7.

Ирмос: Отроцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Припев: Святый апостоле Филиппе, моли́ Бо́га о нас.

Яко све́т, посла́лся еси́ стрелы́ подо́бием, апо́столе, светоза́рными блиста́нии просвеща́я ве́рою зову́щия: благослове́н еси́, Го́споди, Бо́же оте́ц на́ших.

Припев: Святый апостоле Филиппе, моли́ Бо́га о нас.

Бога́тыми светоли́тии Боже́ственнаго, блаже́нне, пропове́дания сия́я све́тло, во тме́ су́щия песнопе́ти просвети́л еси́: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Вити́йская буесло́вия и слове́сную всю́ лю́тость кре́пким сло́вом ве́ры победи́в, пе́л еси́: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: В естества́х пресу́щественно, Де́во, дву́х родила́ еси́ соедине́нных, Чи́стая, неслия́нно Христа́, Ему́же зове́м: благослове́н еси́, Го́споди, Бо́же оте́ц на́ших.

Пе́снь 8.

Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное, и совоку́плени, и́мже, не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Святый апостоле Филиппе, моли́ Бо́га о нас.

Све́та тя́ ми́ра соверши́ Оте́чь Све́т, Сло́во Ипоста́сное, избра́вый апо́стола от ми́ра, треблаже́нне, и, вооружи́в Боже́ственною си́лою Свое́ю, посла́, я́ко ору́жника непобеди́ма, вопию́ща: Го́спода по́йте дела́ и превозноси́те во вся́ ве́ки.

Припев: Святый апостоле Филиппе, моли́ Бо́га о нас.

Си́лою Боже́ственною укрепля́емь, апо́столе, проти́вныя полки́ победи́л еси́, свире́пое ополче́ние те́х разруши́в, ми́р бо неотъя́тный жре́бий взе́м, ми́рное устрое́ние насади́л еси́ ми́ру, — Го́спода воспева́йте дела́, — вопия́, — и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Все́ю любо́вию прилепи́лся еси́ воплоще́нному Сло́ву Бо́жию, апо́столе, учени́к Того́ бы́в, и Бо́жий слуга́, и тайноглаго́льник, отону́дуже от Него́ по́слан во язы́ки, пропове́дал еси́ Его́ прише́ствие, — Го́спода по́йте, — вопия́, — и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ве́сь соедини́ся па́че ра́зума неизме́нно всему́ челове́честву Пребоже́ственный во утро́бе Твое́й, Всесвята́я Де́во. Те́мже во дву́ естеству́ зна́ется Христо́с, еди́н сы́й обое́. Ему́же, пою́ще, вопие́м: Го́спода по́йте дела́ и превозноси́те во вся́ ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святый апостоле Филиппе, моли́ Бо́га о нас.

Ны́не неизрече́нныя сла́вы и све́та невече́рняго сподо́бився, иде́же неизглаго́ланное е́сть весе́лие, иде́же ра́дость непреста́нная в Це́ркви перворожде́нных, иде́же пра́ведных селе́ния, за вся́ христиа́ны моли́ся, Фили́ппе, всему́дре.

Припев: Святый апостоле Филиппе, моли́ Бо́га о нас.

Укра́шен добро́тою у́мнаго благоле́пия и Ца́рствия венце́м обложе́н, богому́дре, и бога́тыми светодая́нии, Фили́ппе, просвеща́емь пресу́щественнаго Све́та сия́ньми, ра́дуяся, Влады́ки твоего́ престо́лу, блаже́нне, предстои́ши.

Сла́ва Отцу́ и Сы́ну и Свято́му Ду́ху:

Со апо́столы все́ми честны́ми, и проро́ки, и страстоте́рпцы, Фили́ппе, преподо́бными, иера́рхи и пра́ведными, с Богоро́дицею моли́ разреше́ние грехо́в мно́гих и прегреше́ний да́ти очище́ние ве́рою светоно́сную и боже́ственную па́мять соверша́ющим твою́.

И ны́не и при́сно и во ве́ки веко́в. Ами́нь.

Богородичен: Воплоще́нно Сло́во, пре́жде безпло́тно су́що, Де́во Ма́ти, родила́ еси́. Сего́ ра́ди Тя́, госпо́дственно Богоро́дицу, вси́ благоче́стно сла́вим, и́стиннейшее Тебе́ нарица́ние принося́ще, Чи́стая, Ты́ бо ве́рных спасе́ния ко́рень пребыва́еши.

Свети́лен.

Тече́ние кра́сных твои́х но́г, Фили́ппе, возврати́в, к ше́ствию небе́сному возше́л еси́, ра́дуяся, и, Тро́ице предста́в, во Отце́ ви́диши Сы́на и Ду́ха Боже́ственнаго. Сего́ ра́ди ве́рою всесвяще́нную твою́ и боже́ственную пра́зднуем па́мять.

Сла́ва, и ны́не, Богородичен:

Стра́шнаго испыта́ния воспомина́ю ча́с, мно́жество бо де́л мои́х ужаса́ет и устраша́ет мя́. Но уще́дри, Пречи́стая, те́плою Твое́ю моли́твою и да́ждь ми́ спасе́ние: ели́ко бо хо́щеши, и твори́ши, я́ко Бо́га ро́ждши, благослове́нная Мари́е.

Молитва святому апостолу Филиппу, от 12-ти

О, святы́й апо́столе Христо́в Филли́пе! Мо́лим тя: сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных и испроси́ нам, раба́м Бо́жиим (имена), свы́ше по́мощь во вре́мя уны́ния, да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских. Ей, апо́столе Спа́сов! Не посрами́ нас, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да просла́вим великоле́пое и́мя Отца́ и Сы́на и Свята́го Ду́ха во ве́ки веко́в. Ами́нь.