26 ноября.

Канон святителю Иоанну, архиепископу Константинопольскому, Златоустому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святи́теля, глас 8:

Уст твои́х, я́коже све́тлость огня́ возсия́вши, благода́ть вселе́нную просвети́: не сребролю́бия ми́рови сокро́вища сниска́, высоту́ на́м смиренному́дрия показа́, но, твои́ми словесы́ наказу́я, о́тче Иоа́нне Златоу́сте, моли́ Сло́ва Христа́ Бо́га спасти́ся душа́м на́шим.

Стихи́ра свята́го, гла́с 6:

Излия́ся благода́ть во устна́х твои́х, преподо́бне о́тче, и бы́л еси́ па́стырь Христо́вы Це́ркве, уча́ слове́сныя о́вцы ве́ровати в Тро́ицу Единосу́щную во еди́ном Божестве́.

Кано́н свята́го, Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святителю отче Иоанне моли́ Бо́га о нас.

Покая́ния бы́в тепле́йший пропове́дник, Златоу́сте, пока́ятися мне́, о́тче, Бо́гу моли́ся от всего́ се́рдца моего́ и дре́вних прегреше́ний исцели́ти я́звы твои́м страда́тельством умоли́.

Припев: Святителю отче Иоанне моли́ Бо́га о нас.

Всю́ зарю́ Свята́го Ду́ха, о́тче, прии́м, всесве́тел яви́лся еси́ сто́лп, предводи́телен Це́ркве, преподо́бне, све́тел же о́блак, всеблаже́нне, осеня́ющь правосла́вных собо́ры.

Сла́ва Отцу́ и Сы́ну и Свято́му Ду́ху:

От Христа́ рукоположе́н учи́тель, Боже́ственная уче́ния златови́дным язы́ком, мы́слию же богому́дрою бога́тно ты́ источи́л еси́: Бо́жия бо река́, во́д испо́лнен Ду́ха, яви́лся еси́, богоявле́нне Златоу́сте.

И ны́не и при́сно и во ве́ки веко́в. Ами́нь.

Богородичен: Преукра́шена разли́чием благода́ти, Богора́дованная, Отчее Сло́во, пло́ть бы́вшее за благоутро́бие мно́гое па́че ума́ и словесе́, Благослове́нная, родила́ еси́, пребы́вши Де́ва нескве́рная.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Святителю отче Иоанне моли́ Бо́га о нас.

Умо́м ты́ Христо́вым обога́щся, твои́м чи́стым житие́м челове́ком спасе́ния бы́л еси́ споспе́шник и повествова́тель, де́йствитель, Златоу́сте, учи́тельства точа́ спаси́тельная, богодохнове́нне.

Припев: Святителю отче Иоанне моли́ Бо́га о нас.

От невеще́ственных сокро́вищ Ду́ха ты́ обогати́вся, от исто́чников спасе́ния поче́рпл еси́ приснотеку́щий исто́чник уче́ний и напои́л еси́ все́ Це́ркве, преподо́бне о́тче, лице́.

Сла́ва Отцу́ и Сы́ну и Свято́му Ду́ху:

Олядене́вшия душе́вныя, Златоу́сте, ни́вы, прему́дрым земледе́ланием слове́с изчи́стил еси́, му́дре, и плодоно́сны показа́л еси́, небе́сными ту́чами сия́ напая́я, богоприя́тне.

И ны́не и при́сно и во ве́ки веко́в. Ами́нь.

Богородичен: Поро́ка в Тебе́ и скве́рны не́сть отню́д, Де́во, оби́тель же па́че яви́лася еси́ небе́сных бла́гостей, в Тебе́ бо всели́ся доброде́телей вся́ святы́ня, Всенепоро́чная.

Седа́лен, гла́с 8.

Неизрече́нныя му́дрости богови́дно поче́рпл еси́ бога́тство ра́зума, все́м сокро́вищствовал еси́ правосла́вия во́ды, ве́рных у́бо сердца́ боже́ственне веселя́щия, неве́рных же мне́ния досто́йно погружа́ющия: те́м отобою́ду благоче́стия по́тами показа́лся еси́ непобе́дный Тро́ицы побо́рник, Иоа́нне Златоу́сте. Моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Сла́ва:

Су́щую свы́ше му́дрость позна́в и благода́ть слове́с от Бо́га все́м просия́л еси́, я́ко зла́то в горни́ле, и Святу́ю Тро́ицу, Еди́ницу, пропове́дал еси́, сребролю́бную ле́сть устрели́в словесы́ твои́ми. Те́мже и ре́вностию цари́цу обличи́в, Ариево посрами́л еси́ иноплеме́нное киче́ние, Иоа́нне Златоу́сте, моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

И ны́не, Богородичен:

Пла́мень гее́нский и сгоре́ние, пла́чь, и́же в не́м и рыда́ние, зело́ окая́ннейшее разлуче́ние и горча́йшее, святы́х насле́дия и собра́ния ра́достнаго, помышля́ющи, содрогни́ся, душе́ моя́, и возстени́, и писа́ния тми́нных долго́в твои́х истреби́ти потщи́ся умиле́ния слеза́ми, Споспе́шницу непосты́дную иму́щи, Чи́стую Богома́терь: Тоя́ бо ра́ди прегреше́ний дае́тся оставле́ние, Сию́ Богоро́дицу правосла́вно сла́вящим.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святителю отче Иоанне моли́ Бо́га о нас.

Ина́го на́м апо́столов единонра́внаго, и́же промышле́нием все́х промышля́я, я́ко Бла́г, даде́ Христо́с тя́, небе́снаго тайново́дства пропове́дника и боже́ственнаго сказа́теля та́ин го́рних, Иоа́нне всеблаже́нне, Златоу́сте.

Припев: Святителю отче Иоанне моли́ Бо́га о нас.

Златоза́рнаго и златослове́снаго, почти́м Златоу́стаго Иоа́нна, вся́ позлати́вшаго златови́дными сия́нии уче́ния и ми́р язы́ком просвети́вша, зла́та светле́йшим и све́та по́лнейшим, источа́ющим благода́ть Боже́ственную.

Припев: Святителю отче Иоанне моли́ Бо́га о нас.

Ве́сь бы́л еси́ Бо́жие жили́ще, ве́сь яви́лся еси́ орга́н Ду́ха, возглаша́ющь вся́кия доброде́тели богодохнове́нную пе́снь, и спасе́ния вину́, и добро́ту явля́я небе́снаго Ца́рствия, Иоа́нне всеблаже́нне Златоу́сте.

Сла́ва Отцу́ и Сы́ну и Свято́му Ду́ху:

Ты́ Бо́жие благоутро́бие пропове́дал еси́, покая́ния о́бразы излага́я, и злы́х отбежа́ния изя́щнейше поуча́я, преблаже́нне и всесоверше́ннейше, и о де́лех изря́дных поуче́ния источа́я, всече́стне о́тче Златоу́сте.

И ны́не и при́сно и во ве́ки веко́в. Ами́нь.

Богородичен: По Бо́зе предста́тельницу Тя́ стяжа́хом, Ты́ бо Бо́жия Ма́ти была́ еси́ Творца́ и Соде́теля, и на́ш зра́к прие́мшаго, Всенепоро́чная, и се́й спа́сшаго от тли́ и сме́рти и сла́вою боже́ственною просла́вившаго.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святителю отче Иоанне моли́ Бо́га о нас.

Церко́внаго свети́льника вси́ тя́ ве́мы светови́днейшаго и душа́м спаси́тельнаго, восхища́ющаго сия́ из горта́ни смертоно́сныя и к жи́зни путеводя́ща ве́чней, о́тче приснопева́емый.

Припев: Святителю отче Иоанне моли́ Бо́га о нас.

Разруша́еши ополче́ния ерети́чествующих, треблаже́нне, огради́вся благоче́стия ору́жии и му́жеством души́, свяще́ннейше, собира́еши же, ра́дуяся пресве́тло, правосла́вных ли́ки сою́зом Ду́ха.

Сла́ва Отцу́ и Сы́ну и Свято́му Ду́ху:

Испо́лнены, я́коже фиа́лы, боже́ственных арома́т лани́ты твоя́ и вселе́нную у́мными благово́нии веселя́т мирова́рным тайново́дством разуме́ний и добро́тою слове́с твои́х, всему́дре.

И ны́не и при́сно и во ве́ки веко́в. Ами́нь.

Богородичен: Яко Бо́га заче́нши, Соде́теля же, и Зижди́теля, и Го́спода, ро́ди Тя́ вси́ челове́честии, Чи́стая, ублажа́ют, и безтеле́сных разу́мная чинонача́лия я́ко Ма́терь Бо́жию Тя́ сла́вят.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святителю отче Иоанне моли́ Бо́га о нас.

Му́дростию духо́вною ми́р ве́сь обогати́л еси́, словесе́ раздава́тель бы́в бога́тый: бога́та бо свы́ше, иера́рше, благода́ть излия́ся твои́м устна́м.

Припев: Святителю отче Иоанне моли́ Бо́га о нас.

Во всю́, я́ко мо́лния, зе́млю изы́де веща́ние твое́, и си́ла же твои́х глаго́л, Златоу́сте, я́ко труба́ велегла́сная, вселе́нныя вся́ огласи́ концы́.

Сла́ва Отцу́ и Сы́ну и Свято́му Ду́ху:

Свы́ше во истка́нную ри́зу оде́явся, всеблаже́нне, доброде́телей и слове́с красото́ю обложи́вся, и́стины яви́лся еси́ сла́вное утвержде́ние.

И ны́не и при́сно и во ве́ки веко́в. Ами́нь.

Богородичен: Вседержи́тельною си́лою нося́й вся́ческая, в немощну́ю пло́ть из Тебе́ оде́явся, Де́во Пренепоро́чная, на благодея́ние челове́ков Человеколю́бец.

Конда́к, гла́с 6.

От небе́с прия́л еси́ Боже́ственную благода́ть и твои́ми устна́ми вся́ учи́ши покланя́тися в Тро́ице еди́ному Бо́гу, Иоа́нне Златоу́сте, всеблаже́нне преподо́бне, досто́йно хва́лим тя́: еси́ бо наста́вник, я́ко боже́ственная явля́я.

Икос:

Все́х Творцу́ преклоня́ю коле́на, преве́чному Сло́ву ру́ки простира́ю, сло́ва ища́ дарова́ние, да воспою́ преподо́бнаго, его́же Са́м возвели́чи; глаго́лет бо проро́ком Живы́й во ве́ки: просла́влю ве́рою сла́вящия Мя́. Иже у́бо в дре́вних Самуи́ла возвы́сивый, просла́ви ны́не иера́рха: тала́нт бо, ему́же вве́рися, до́бре ку́пльствовав, Царю́ принесе́, те́м и превозвы́шши его́ Пресу́щественный. Сего́ благода́ти прошу́ недосто́йный а́з сло́во прия́ти ми́, да возмогу́ благоче́стно воспе́ти того́: конце́й бо то́й е́сть наста́вник, я́ко боже́ственная явля́я.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святителю отче Иоанне моли́ Бо́га о нас.

Бла́гости бе́здну и благоутро́бия навы́к Бо́жия, пору́чник яви́лся еси́ спасе́ния ка́ющимся те́пле и вседу́шно Го́споду зову́щим: благослове́н Бо́г оте́ц на́ших.

Припев: Святителю отче Иоанне моли́ Бо́га о нас.

Управля́еши, Златоу́сте, уче́нии твои́ми вся́кую мы́сль, и душе́вныя врачу́еши не́мощи, я́ко сострада́тельнейший, и благотеку́щим спое́ши, веселя́ся: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Возвы́сился еси́, бы́в избра́н, преподо́бен, незло́бив, свяще́нник Высоча́йшаго, пра́вдою оде́ян све́тло и весе́лием, зовы́й, всебога́те: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Зачала́ еси́, Пречи́стая, Су́щаго над все́ми Бо́га и Го́спода, благоволи́вшаго спасти́ челове́ческий ро́д от тле́ния и сме́рти, Его́же, досто́йно пою́ще, зове́м: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святителю отче Иоанне моли́ Бо́га о нас.

Иже разу́мно словесе́м твои́м бесе́дующе, Златоу́сте, богосло́вия честно́му учи́мся, и всепло́дствуем благи́х поле́зное, и зло́бы отбега́ем вре́да: о́бщий бо строи́тель спасе́ния бы́л еси́, вопия́: превозноси́те Христа́ во ве́ки.

Припев: Святителю отче Иоанне моли́ Бо́га о нас.

За ны́ моли́ Влады́ку, Златоу́сте, сострада́тельнейшее дерзнове́ние име́я и ми́лостивною и человеколю́бною твое́ю, о́тче, любо́вию: тя́ бо ко Спа́су предлага́ем, ве́рнии, хода́тая же, и предста́теля, и тепле́йша моли́твенника, богому́дре иера́рше, всеблаже́нне Иоа́нне.

Сла́ва Отцу́ и Сы́ну и Свято́му Ду́ху:

Юношское противле́ние, и непрекло́нное мудрова́ние, и ца́рствующих непра́вду обличи́л еси́, те́пле предста́тельствуя оби́димыя, преподо́бне; и сиро́т, и вдо́в, и ни́щих оте́ц бы́л еси́ любо́вным предложе́нием: превозноси́те, — вопия́, — Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Теле́сными образова́нии, и разли́чными гада́нии, и символи́ческими, и знамена́тельными предъявле́ньми, Твое́ провозвести́ша богоглаго́ливии рождество́, преесте́ственное и чу́дное, Де́во; те́м Тя́, веселя́щеся, благоче́стно воспева́ем, Христа́ превознося́ще во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святителю отче Иоанне моли́ Бо́га о нас.

Истинно наслажда́яся, о́тче, жи́зни, о не́йже подвиза́лся еси́, ели́ко мо́щно, на земли́ житие́м преизя́ществовав Ангельским и Христо́в стяжа́в язы́к и уста́ ти́хая: спасти́ся, богоглаго́ливе, моли́ тя́ ве́рою изя́щне блажа́щим.

Припев: Святителю отче Иоанне моли́ Бо́га о нас.

Словеса́ твоя́, треблаже́нне, словеса́ жи́зни, жи́знь хода́тайствующая неконе́чную: тя́ бо исто́чника теку́ща показа́ Христо́с и реку́, пролива́ющу боже́ственных пото́ки уче́ний, сла́дости и́стинно пото́к, оставле́ния же струю́ и покая́ния све́тла пропове́дника.

Сла́ва Отцу́ и Сы́ну и Свято́му Ду́ху:

Хода́тай яви́лся еси́, священнонача́льниче, Бо́га и челове́ков пресве́тлый: ты́ бо свети́льник яви́лся еси́ благоче́стия богосве́тлый и боже́ственнаго зна́ния и ми́лостыни наказа́тель, те́м тя́, златосло́ве, серде́чною любо́вию ны́не досто́йно велича́ем.

И ны́не и при́сно и во ве́ки веко́в. Ами́нь.

Богородичен: Чи́стая препросла́вленная Ма́ти Бо́жия, пою́щия Тя́ любо́вию спаса́й, искуше́ний молву́ разреша́ющи ми́лостивно. Яко бо Бо́га ро́ждши, вся́, ели́ка хо́щеши, соверша́еши, успева́еши невозбра́нно и мо́жеши, Де́во. Те́м Тя́ вси́ велича́ем.

Свети́лен.

Златоза́рными словесы́ твои́ми Христо́ва Це́рковь светле́ется я́сно, о Златоу́сте о́тче! Ду́ши же веселя́тся ве́рных, почита́ющия всесвяту́ю твою́ па́мять, ты́ бо все́м показа́лся еси́ покая́ния наста́вник и во́ждь спасе́ния.

Сла́ва, ины́й.

Великогла́снейшаго покая́ния пропове́дника, сокро́вище убо́гих, уста́ Це́ркве злата́я и благоглаго́ливая, писа́ний явле́ние, Иоа́нна всему́драго да восхва́лим вси́, я́ко от того́ утверди́вшеся.

И ны́не, Богородичен:

Де́во Всенепоро́чная, Госпоже́ моя́ и Влады́чице, Твоего́ Сы́на умоли́ с сла́вным Златоу́стом напа́стей изба́витися вся́ческих пою́щим Тя́ и ве́чных получи́ти бла́г, Всесвята́я: можеши бо, ели́ка хо́щеши.

Молитва святителю Иоанну Златоусту

О, святи́телю вели́кий Иоа́нне Златоу́сте! Мно́гая и разли́чная дарова́ния от Го́спода прия́л еси́ и, я́ко раб благи́й и ве́рный, вся да́нныя тебе́ тала́нты до́бре умно́жил еси́: сего́ ра́ди вои́стину вселе́нский учи́тель был еси́, я́ко всяк во́зраст и вся́ко зва́ние от тебе́ поуча́ется. Ты еси́ отроко́м — послуша́ния о́браз, ю́ным — целому́дрия свети́ло, муже́м — трудолю́бия наста́вник, ста́рым — незло́бия учи́тель, и́ноком — воздержа́ния пра́вило, моля́щимся — вождь от Бо́га вдохнове́нный, му́дрости и́щущим — ума́ просвети́тель, вити́ям доброглаго́ливым — сло́ва жива́го исто́чник неисчерпа́емый, благотворя́щим — милосе́рдия звезда́, нача́льствующим — правле́ния му́драго о́браз, пра́вды ревни́телем — дерзнове́ния вдохнови́тель, пра́вды ра́ди гони́мым — терпе́ния наста́вник: всем вся был еси́, да вся́ко не́кия спасе́ши. Над все́ми же си́ми стяжа́л еси́ любо́вь, я́же есть соу́з соверше́нства, и то́ю, я́ко си́лою Боже́ственною, вся дарова́ния во еди́нем лице́ твое́м во еди́но совокупи́л еси́, и ту́южде любо́вь, разделе́нная примиря́ющую, в толкова́нии слове́с апо́стольских всем ве́рным пропове́дал еси́. Мы же гре́шнии, по еди́ному ки́йждо свое́ дарова́ние иму́ще, едине́ния ду́ха в сою́зе ми́ра не и́мамы, быва́ем тщесла́вни, друг дру́га раздража́юще, друг дру́гу зави́дяще: сего́ ра́ди дарова́ния на́ша разделе́нная не в мир и спасе́ние, но во вражду́ и осужде́ние нам явля́ются. Те́мже к тебе́, святи́телю Бо́жий, припа́даем, раздо́ром обурева́еми, и в сокруше́нии се́рдца про́сим: моли́твами твои́ми, отжени́ от серде́ц на́ших вся́ку го́рдость и за́висть, нас разделя́ющия, да во мно́зех у́дех еди́но те́ло церко́вное бу́дет, да по словеси́ твоему́ моли́твенному возлю́бим друг дру́га и единомы́слием испове́мы Отца́ и Сы́на и Свята́го Ду́ха, Тро́ицу Единосу́щную и Неразде́льную, ны́не и при́сно и во ве́ки веко́в. Ами́нь.

Молитва вторая святителю Иоанну Златоусту

О, святи́телю вели́кий Иоа́нне Златоу́сте! Мно́гая и разли́чная дарова́ния от Го́спода прия́л еси́ и, я́ко раб благи́й и ве́рный, вся да́нныя тебе́ тала́нты до́бре умно́жил еси́, сего́ ра́ди вои́стину вселе́нский учи́тель был еси́, я́ко всяк во́зраст и вся́ко зва́ние от тебе́ поуча́ется. Мы же, гре́шнии (имена), по еди́ному ки́йждо свое́ дарова́ние иму́ще, едине́ния ду́ха в сою́зе ми́ра не и́мамы, но быва́ем тщесла́вии, друг дру́га раздража́юще, друг дру́гу зави́дяще; сего́ ра́ди дарова́ния на́ша разделе́нная не в мир и спасе́ние, но во вражду́ и осужде́ние нам явля́ются. Те́мже к тебе́, святи́телю Бо́жий, припа́даем, раздо́ром обурева́еми, и в сокруше́нии се́рдца про́сим: моли́твами твои́ми отжени́ от серде́ц на́ших вся́ку зло́бу, недоброжела́тельство, го́рдость и за́висть, нас разделя́ющия, да во мно́зех у́дех еди́но те́ло церко́вное невозбра́нно пребу́дем, да по словеси́ твоему́ моли́твенному возлю́бим друг дру́га и единомы́слием испове́мы Отца́ и Сы́на и Свята́го Ду́ха, Тро́ицу Единосу́щную и Неразде́льную, ны́не и при́сно, и во ве́ки веко́в. Ами́нь.