25 ноября.

Канон преподобному Нилу Постнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Ни́ле, о́тче на́ш, моли́ Христа́ Бо́га спасти́ся душа́м на́шим.

Кано́н преподо́бнаго. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Ниле, моли́ Бо́га о нас.

Напое́ньми твои́ми, блаже́нне, та́инственными, напая́я бога́тно прозя́бший мо́й по́мысл, я́ко кла́с, пе́ния тебе́ принести́ твои́ми моли́твами сподо́би.

Припев: Преподобне отче Ниле, моли́ Бо́га о нас.

Глаго́л тече́ния твои́х, я́ко из Еде́ма, всебога́те Ни́ле, происходя́щая я́вственно, лице́ все́ приснотеку́щее церко́вное напая́ют.

Сла́ва Отцу́ и Сы́ну и Свято́му Ду́ху:

Догма́тов и слове́с река́ твои́х, богоглаго́ливе, сердца́ благочести́вых, наводня́ющи, напая́ет, злочести́вых же потопля́ет собра́ния.

И ны́не и при́сно и во ве́ки веко́в. Ами́нь.

Богородичен: Изблева́ в слу́хи Евы я́д душетле́нный губи́тель и вра́г; Христа́ же ро́ждши, Богома́ти, того́ вре́да исцели́ла еси́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Преподобне отче Ниле, моли́ Бо́га о нас.

Дарова́ния, о́тче, Ду́ха но́сит твое́ помышле́ние, лука́вая помышле́ния отгоня́.

Припев: Преподобне отче Ниле, моли́ Бо́га о нас.

Миро благово́ннейшее твоя́ моли́твы на́м вдохну́в, священноде́лателю, виде́нием де́тельным пожи́в.

Сла́ва Отцу́ и Сы́ну и Свято́му Ду́ху:

Источи́л еси́ уче́ния ты́ небе́сная, всему́дре, я́ко от исто́чника, и церко́вныя пито́мцы обогати́л еси́.

И ны́не и при́сно и во ве́ки веко́в. Ами́нь.

Богородичен: Умертви́ мудрова́ние пло́ти на́шея, Пречи́стая, Исто́чник безсме́ртия челове́ком источи́вшая.

Седа́лен, гла́с 8.

Украси́в тво́й у́м виде́нии, богосло́вия ре́ки отры́гнул еси́, напая́я сердца́, Ни́ле богоно́се, ве́рою почерпа́ющих твои́х уче́ний пи́во, проза́рное же и чи́стое, и чту́щих па́мять твою́ светоза́рную же и честну́ю, преподо́бных удобре́ние и отце́в хвало́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Ниле, моли́ Бо́га о нас.

Возведи́, всему́дре, от страсте́й мя́ плене́ния, я́ко избавле́ние и це́ну Бо́гу принося́ моли́твы твоя́.

Припев: Преподобне отче Ниле, моли́ Бо́га о нас.

Свяще́нно вчини́ти е́же о Христе́ му́дрости догма́ты, искуси́в поще́нием, себе́, всеблаже́нне, предочи́стил еси́.

Сла́ва Отцу́ и Сы́ну и Свято́му Ду́ху:

Помышле́ний вся́кое возвыше́ние, о́тче, взима́ющееся смири́л еси́, мно́жеством му́дрости твоея́ погуби́в си́х па́мять.

И ны́не и при́сно и во ве́ки веко́в. Ами́нь.

Богородичен: Отцу́ Соприсносу́щный и я́ко Бо́г, Сло́во, пре́жде безпло́тное, в после́дняя воплоти́ся от чи́стых крове́й Твои́х, Всепе́тая.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Преподобне отче Ниле, моли́ Бо́га о нас.

Целому́дренно жела́я, всему́дре, боже́ственныя чистоты́, оста́вил еси́ все́ жития́ пристра́стие.

Припев: Преподобне отче Ниле, моли́ Бо́га о нас.

Разу́мная ты́ вы́ше зна́ния, богоявле́нне, мы́сленно пости́гл еси́, едине́нием Боже́ственным науча́емь.

Сла́ва Отцу́ и Сы́ну и Свято́му Ду́ху:

Облак тя́, ту́чами зна́ния, богоно́сне, все́ потопля́ющий неразу́мие, ве́мы.

И ны́не и при́сно и во ве́ки веко́в. Ами́нь.

Богородичен: Яко кри́н, сия́ющий посреде́ те́рния, обре́т, Жени́х Тя́, Де́во Ма́ти, возлюби́.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Ниле, моли́ Бо́га о нас.

Му́дрости да́ром украша́емь и жития́ све́тлостию удобря́емь, священноде́латель боже́ственный бы́л еси́, Зижди́телю хода́тайствуя, и зда́нию, и бы́л еси́ пресве́тел и обзо́рный, о́тче, учи́тель.

Припев: Преподобне отче Ниле, моли́ Бо́га о нас.

К горе́ доброде́телей прибли́жився и Боже́ственным покры́вся, о́тче, мра́ком, от Бо́га догма́тов скрижа́ли богопи́санныя прия́л еси́, всебога́те, и вторы́й на́м Моисе́й законополо́жник показа́лся еси́ благода́ти.

Сла́ва Отцу́ и Сы́ну и Свято́му Ду́ху:

Освяти́в себе́ во́лею та́инственно, я́ко вольноже́ртвенную же́ртву предстоя́нием Зижди́телю, Ни́ле, и виде́нии и дея́нии украша́емь, помина́й о на́с, ве́рно соверша́ющих па́мять твою́.

И ны́не и при́сно и во ве́ки веко́в. Ами́нь.

Богородичен: Ви́девше обра́зными явле́нии стра́шных Твои́х та́ин глубину́, я́ко Бо́гу во чре́во Твое́ всели́тися, богоглаго́ливии проро́цы провозвести́ша, Всенепоро́чная, и ны́не мы́, сбы́тие ви́дяще, сла́вим.

Конда́к преподо́бнаго, гла́с 8.

Хвра́стная страсте́й, я́же от телесе́, воста́ния сечи́тельно, Ни́ле блаже́нне, во бде́нной твое́й ссе́кл еси́ моли́тве, но, я́ко име́я дерзнове́ние ко Го́споду, от вся́ких мя́ бе́д свободи́, да зову́ ти: ра́дуйся, о́тче всеми́рный.

Икос:

Кто́ земноро́дных изрещи́ возмо́жет, Ни́ле, жи́тельства твоего́ страда́ния, и жития́ твоего́ безме́рныя труды́, и мно́гая тща́ния твоя́, я́же на земли́, я́ко безпло́тный, соверши́л еси́? Но оба́че зову́: ра́дуйся, реко́ Боже́ственных благода́тей; ра́дуйся, цевни́це Христо́вых уче́ний; ра́дуйся, ча́ше му́дрости и зна́ния; ра́дуйся, возде́лание безсме́ртных насажде́ний; ра́дуйся, догма́те де́тельнейший богодухнове́нных слове́с; ра́дуйся, зако́на богода́ннаго иску́снейший толко́вниче; радуйся, садоде́лателю рая́ мы́сленнаго; ра́дуйся, де́вства храни́лище ве́лие; ра́дуйся, кра́сная гу́сль Ду́ха; ра́дуйся, страсте́й кореносе́чный мечу́; ра́дуйся, пра́ведных муже́й высото́; ра́дуйся, ве́рных земноро́дных предста́телю. Ра́дуйся, о́тче всеми́рный.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобне отче Ниле, моли́ Бо́га о нас.

Напая́емь, о́тче, ту́чами небе́сными, яви́лся еси́ многопло́ден, плоды́ красне́йшия принося́ Влады́це, ве́рою зову́щия: оте́ц на́ших Бо́же, благослове́н еси́.

Припев: Преподобне отче Ниле, моли́ Бо́га о нас.

Тво́й, всеблаже́нне, язы́к, хля́би догма́тов разве́рз, ерети́ческую ле́сть кре́пко потопля́ет, ве́рныя же науча́ет пе́ти: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Жи́тельство Ангельское в телеси́, о́тче, на земли́ пожи́л еси́, и Боже́ственных виде́ний го́рних позо́рищ наслажда́яся, и пое́ши: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: От утро́бы де́вственныя вопло́щся, яви́лся еси́ в на́ше спасе́ние. Те́м Тя́, Ма́терь, ве́дуще Богоро́дицу, благода́рственно зове́м: оте́ц на́ших Бо́же, благослове́н еси́.

Пе́снь 8.

Ирмос: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три́ о́троцы не повину́вшеся, Го́спода воспева́ху и славосло́вяху во вся́ ве́ки.

Припев: Преподобне отче Ниле, моли́ Бо́га о нас.

Доброде́тель восприи́м соверше́нну, благи́х пе́рвое возлюби́в, и Того́ ны́не блиста́ньми просвеща́емь, зове́ши: Го́спода по́йте и превозноси́те Его́ во ве́ки.

Припев: Преподобне отче Ниле, моли́ Бо́га о нас.

Ве́детельным обогати́вся иску́сством, де́тельное пости́гл еси́ благосла́вие, благода́ти зари́ посыла́я вопию́щим: Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Мирски́х мо́лв отбежа́в, молча́ния приста́нище дости́гл еси́ и страсте́й прило́ги умертви́л еси́, зовы́й: Го́спода по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Изве́стно ве́дяще, Де́во, ро́ждшагося из Тебе́ Бо́га Сло́ва, пое́м Тя́ всеблагоче́стно, ве́рою песнопою́ще: Го́спода по́йте и превозноси́те Его́ во ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Ниле, моли́ Бо́га о нас.

Расто́ргша пристра́стия мирска́го у́зы и Бо́гу приближа́ющася тя́ зря́, о́тче, губи́тель ва́рварская треволне́ния тебе́ воздви́же, разсла́бити твою́ мне́в кре́пость. Боже́ственным же про́мыслом того́ отрази́л еси́ козноде́йства, всеблаже́нне.

Припев: Преподобне отче Ниле, моли́ Бо́га о нас.

Бога́тными сия́я заря́ми уче́ний многообра́зными, освети́л еси́ благоче́стия ве́рою приходя́щих тебе́ ду́ши, и́бо ча́ши, всему́дре Ни́ле, му́дрости чи́стей устне́ прикосну́в, поче́рпл еси́ оби́льно и лю́бящим препода́л еси́.

Сла́ва Отцу́ и Сы́ну и Свято́му Ду́ху:

Освяти́л еси́ усе́рдно себе́, о́тче, та́инственно, я́ко непоро́чное заколе́ние Зижди́телю, Того́ возлюби́в и́скренно: Его́же ны́не престо́лу, всеблаже́нне Ни́ле, предстоя́, приле́жно моли́ся ве́рою соверша́ющим твою́ па́мять получи́ти твоея́ све́тлости.

И ны́не и при́сно и во ве́ки веко́в. Ами́нь.

Богородичен: Испра́вила еси́, Де́во, же́нское поползнове́ние, Сло́ва ро́ждши, исправля́юща низве́рженныя, я́ко бла́га и держа́вна си́лою, за благоутро́бие превозмо́г, из Тебе́ вопло́щшася, и спа́сша ми́р страстоуби́йственными Свои́ми Страстьми́.

Свети́лен.

Ангельское житие́ жела́я, удали́л еси́ себе́ в пусты́ню и, стра́сти покори́в плотски́я, равноа́нгелен яви́лся еси́, о́тче на́ш богоно́се.

Молитва

О свяще́нная главо́, преподо́бне о́тче, преблаже́нне а́вво Ниле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.