25 ноября.
Канон святителю Иоанну, патриарху Александрийскому, Милостивому.
![Святителю Иоанну, патриарху Александрийскому, Милостивому Святителю Иоанну, патриарху Александрийскому, Милостивому](img_i/070.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
В терпе́нии твое́м стяжа́л еси́ мзду́ твою́, о́тче преподо́бне, в моли́твах непреста́нно терпе́вый, ни́щия возлюби́вый и сия́ удовли́вый, но моли́ся Христу́ Бо́гу, Иоа́нне ми́лостиве, блаже́нне, спасти́ся душа́м на́шим.
Кано́н иера́рха. Гла́с 8.
Пе́снь 1.
Ирмос: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.
Припев: Святителю отче Иоанне, моли́ Бо́га о нас.
Сострада́нием ума́ просвеща́емь и любо́вию Христо́вою, о́тче, озаря́емь, ми́лостыней блиста́я сия́ньми, Еди́наго ми́лостиваго Бо́га прия́телище чисте́йшее, Иоа́нне, бы́л еси́: те́м тя́ ублажа́ем.
Припев: Святителю отче Иоанне, моли́ Бо́га о нас.
Во ве́к при́сно пребыва́ющая смотря́я, му́дрым смы́слом, о́тче свяще́ннейше, измени́л еси́ тле́нная све́тло нетле́нными и ны́не на небесе́х жи́тельствуеши, вопия́ со безпло́тными ли́ки: Го́споду воспои́м, сла́вно бо просла́вися.
Сла́ва Отцу́ и Сы́ну и Свято́му Ду́ху:
Ми́лости Да́тель, одари́в ми́лостивное, преподо́бне, твое́ помышле́ние, поми́лова мно́гая боже́ственным твои́м хода́тайством, бы́л еси́ во утеше́ние ду́ш, ни́щих же промышле́ние, Иоа́нне всему́дре, богоблаже́нне свяще́ннейший.
И ны́не и при́сно и во ве́ки веко́в. Ами́нь.
Богородичен: Благослове́нная, Чи́стая и Всепе́тая, еди́на ро́ждшая воплоще́ннаго Бо́га, приснотеку́щий исто́чник, на́м, наде́ющимся на Тя́, исцеле́ния излива́юща, ве́рным: моли́, Его́же родила́ еси́, дарова́ти ми́ру ве́лию ми́лость.
Пе́снь 3.
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Припев: Святителю отче Иоанне, моли́ Бо́га о нас.
Боголе́пна, я́коже отрокови́ца, от ма́слин вене́ц нося́щи, яви́ся тебе́, досточу́дне, Ми́лостиваго благосострада́тельная благода́ть, привлача́щи тя́ к Боже́ственней ми́лости.
Припев: Святителю отче Иоанне, моли́ Бо́га о нас.
На престо́ле свяще́ннем судо́м Бо́жиим, сла́вне о́тче Иоа́нне, се́л еси́, я́коже Ангел, ты́ пожи́л еси́, ми́рныя вознося́ свяще́нныя же́ртвы Всеще́дрому.
Сла́ва Отцу́ и Сы́ну и Свято́му Ду́ху:
Мно́гое милосе́рдие милосе́рдаго Го́спода, о́тче, подража́я, за милосе́рдие Обнища́вшаго пло́тию ни́щия удово́лил еси́, стра́нныя и безпокро́вныя собира́я, испо́лнитель повеле́ний Боже́ственных бы́в.
И ны́не и при́сно и во ве́ки веко́в. Ами́нь.
Богородичен: Всели́вся в Де́ву теле́сне, Го́споди, яви́лся еси́ челове́ком, я́коже подоба́ше ви́дети Тя́: Юже и показа́л еси́, я́ко и́стинную Богоро́дицу, ве́рным по́мощь, еди́не Человеколю́бче.
Седа́лен, гла́с 8.
Ми́лостивен нра́в прии́м, благосе́рд яви́лся еси́ и пода́телен ни́щим и тре́бующим, Иоа́нне богодухнове́нне. Сего́ ра́ди зва́нием дея́нию подо́бно, па́че все́х святы́х, блаже́нне, обогати́ тя зело́ Пода́тель благи́х — Христо́с. Ему́же, богому́дре иера́рше пребога́те, моли́ся грехо́в оставле́ние пода́ти пра́зднующим любо́вию святу́ю па́мять твою́.
Сла́ва, И ны́не, Богородичен:
Яже непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами ма́терними Твои́ми: я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Святителю отче Иоанне, моли́ Бо́га о нас.
Чи́стая оби́тель яви́лся еси́ Святы́я Тро́ицы, преподо́бне, и хра́ма Боже́ственнаго сокро́вище, и иера́рхов нача́ток.
Припев: Святителю отче Иоанне, моли́ Бо́га о нас.
Мно́гое милосе́рдие твое́ Госпо́дь внима́я Благосе́рдый, ду́шу твою́ освяти́, Иоа́нне, о́тче свяще́ннейше.
Сла́ва Отцу́ и Сы́ну и Свято́му Ду́ху:
За́поведей непосты́ден бы́л еси́ де́латель Всеще́драго и испо́лнился еси́ благи́х Его́, в се́лех святы́х водворя́яся.
И ны́не и при́сно и во ве́ки веко́в. Ами́нь.
Богородичен: Очище́ние на́ших да́руй неве́дении я́ко Безгре́шен и умири́ ми́р Тво́й, Бо́же, моли́твами Ро́ждшия Тя́.
Пе́снь 5
Ирмос: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.
Припев: Святителю отче Иоанне, моли́ Бо́га о нас.
Умертви́вшемуся за ми́лость ме́ртвостию во́льною, о́тче му́дре, подо́бяся, распя́лся еси́ ми́ру и страсте́м, и жи́зни преми́рныя сподо́бился еси́, достосла́вне.
Припев: Святителю отче Иоанне, моли́ Бо́га о нас.
Блаже́нства удосто́ился еси́, кро́ток, сострада́тельнейший, и мири́телен бы́в, и а́лчущих хле́б неижди́вный и ни́щим пода́тель, одея́ние же наготству́ющим.
Сла́ва Отцу́ и Сы́ну и Свято́му Ду́ху:
Боже́ственными причаще́ньми, о́тче, удобря́емь, я́коже Ангел, Бо́гу непоро́чно свяще́нствовал еси́, ве́рныя просвеща́я свяще́нными уче́нии твои́ми.
И ны́не и при́сно и во ве́ки веко́в. Ами́нь.
Богородичен: Все́х Бо́га без се́мене в Свои́х ложесна́х поне́сшую, Плотоно́сца же на́м ро́ждшую, Пречи́стую Богоро́дицу воспева́ем, я́ко спасе́ние ду́ш на́ших.
Пе́снь 6.
Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.
Припев: Святителю отче Иоанне, моли́ Бо́га о нас.
Моли́твами и посто́м упражня́яся и бде́нно Бо́га моля́, открове́ний и зре́ний Боже́ственных сподо́бился еси́, богому́дре всебога́те, науча́емь су́щим па́че ума́ и по́мысла, му́дре, чистото́ю.
Припев: Святителю отче Иоанне, моли́ Бо́га о нас.
Яко Ангел с пло́тию, на земли́, о́тче, пожи́л еси́, же́ртвы ми́рныя, безкро́вныя ве́рою, и сокруше́нным се́рдцем, и ду́хом, блаже́нне, Творцу́ принося́, Иоа́нне, ра́достно.
Сла́ва Отцу́ и Сы́ну и Свято́му Ду́ху:
Житие́ твое́, па́че со́лнца возсия́вшее, милосе́рдия испусти́ лучи́ тре́бующим, отгоня́щия те́мный о́блак нищеты́, всебога́те, гре́ющия же мра́зом лю́тых держи́мыя, богодухнове́нне.
И ны́не и при́сно и во ве́ки веко́в. Ами́нь.
Богородичен: Не преста́й о на́с моля́щися, Пресвята́я Богоро́дице Де́во, я́ко ве́рных утвержде́ние Ты́ еси́, и наде́ждею Твое́ю крепи́мся и любо́вию Тя́ и из Тебе́ Вопло́щшагося непреста́нно сла́вим.
Конда́к, гла́с 2.
Бога́тство твое́ расточи́л еси́ убо́гим и небе́сное бога́тство ны́не восприя́л еси́, Иоа́нне всему́дре, сего́ ра́ди вси́ тя почита́ем, соверша́юще па́мять твою́, ми́лостыни о тезоимени́те!
Икос:
На ми́лость упова́в Бо́жию, Иоа́нне, щедро́тами от Того́ и дарми́ обогати́вся, отону́дуже яви́лся еси́ и ми́лостив, я́ко Он, вся́ ущедря́я. Те́мже, мою́ нищету́ уще́дрив, пода́ждь мне́ бога́тство твоея́ моли́твы и а́лчущее се́рдце мое́ испо́лни глаго́л Боже́ственных, богому́дре, я́коже пре́жде а́лчущия пита́л еси́, ми́лостыни о тезоимени́те!
Пе́снь 7.
Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
Припев: Святителю отче Иоанне, моли́ Бо́га о нас.
Де́лы словеса́ Спа́сова извести́л еси́ и ублажа́емых сочта́лся еси́ ли́ку, ми́лостив бы́в и чи́ст ду́хом, Иоа́нне богоно́се.
Припев: Святителю отче Иоанне, моли́ Бо́га о нас.
Ме́да вку́с сладча́йший преложи́ся во искуше́но зла́то тебе́: бога́тному бо твоему́ внима́я произволе́нию, Творе́ц бога́тная тебе́ даде́ воздая́ния.
Сла́ва Отцу́ и Сы́ну и Свято́му Ду́ху:
Све́том Тро́ицы невече́рним просвеща́емь, уго́дниче Тро́ицы, чту́щия тя́ ны́не просвеща́еши и пою́щия: благослове́н еси́, Го́споди Бо́же, во ве́ки.
И ны́не и при́сно и во ве́ки веко́в. Ами́нь.
Богородичен: Тя́, ра́дость апо́столов, страстоте́рпцев же сла́ву, Богоро́дице, мо́лим ве́рно: ра́дости ве́чныя сподо́би ны́, пою́щия Тя́ непреста́нно.
Пе́снь 8.
Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.
Припев: Святителю отче Иоанне, моли́ Бо́га о нас.
Светоза́рную звезду́ Христо́с на высоте́ тя́ церко́вней яви́в, о́тче, чрез тебе́ пою́щия ве́рою просвеща́ет: благослови́те вся́ дела́ Го́спода и превозноси́те Его́ во ве́ки.
Припев: Святителю отче Иоанне, моли́ Бо́га о нас.
Ми́лостив яви́лся еси́, кро́ток, благосострада́тельнейш, незло́бив, о́тче, бога́тство ни́щих, у́тварь и одея́ние наги́х, поя́ ве́рно: благослови́те вся́ дела́ Го́спода и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху:
Ма́рков престо́л свяще́нно украси́л еси́ де́лы боже́ственными изря́дно, о́тче, ми́лостынею же и милосе́рдием па́че все́х наре́клся еси́ ми́лостив, милосе́рдием возсия́вших святы́х.
И ны́не и при́сно и во ве́ки веко́в. Ами́нь.
Богородичен: Ада́ма, Де́во, па́дшаго у́бо, яви́лася еси́ Дщи́, Бо́га же Ма́ти, обно́вльшаго мое́ существо́. Его́же пои́м вся́ дела́ Го́спода и превозно́сим во вся́ ве́ки.
Песнь 9
Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Припев: Святителю отче Иоанне, моли́ Бо́га о нас.
Се́ тя́ по сконча́нии сре́дняго прие́млет дво́ица святы́х отце́в, в гро́бе свяще́ннейшую че́сть тебе́, о́тче, даю́щи.
Припев: Святителю отче Иоанне, моли́ Бо́га о нас.
Яко у́тро, я́ко де́нь, о́тче Иоа́нне, светоза́рное твое́ возсия́ успе́ние, просвеща́ющее ве́рою тя́ блажа́щия.
Припев: Святителю отче Иоанне, моли́ Бо́га о нас.
Совокупи́лся еси́ лико́м архиере́ев, проро́ков, апо́столов и му́чеников: с ни́миже помина́й, о́тче, восхваля́ющия тя́.
Сла́ва Отцу́ и Сы́ну и Свято́му Ду́ху:
Ра́ка, иде́же лежа́т, о́тче Иоа́нне, свяще́нныя твоя́ и святы́я мо́щи, исто́чник чуде́с су́ть к тебе́ приходя́щим.
И ны́не и при́сно и во ве́ки веко́в. Ами́нь.
Богородичен: Благоле́пная Де́во, озло́бленную ду́шу мою́ грехо́м ублагости́, блага́го ро́ждшая Бо́га и Го́спода.
Свети́лен.
Ми́лость подража́я Бо́га любоще́драго, тре́бующим бога́тство расточи́л еси́, Иоа́нне, те́м и бога́тство прия́л еси́ на небесе́х неистощи́мое. Того́ ра́ди ны́не мо́лимся: моли́ся непреста́нно о хва́лящих тя́.
Молитва святителю Иоанну Милостивому
Святи́телю Бо́жий Иоа́нне, ми́лостиве защи́тниче си́рых и су́щих в напа́стех! К тебе́ прибега́ем и тебе́ мо́лимся, я́ко ско́рому покрови́телю все́х и́щущих от Бо́га утеше́ния в беда́х и ско́рбех. Не преста́й моля́ся ко Го́споду о все́х с ве́рою притека́ющих к тебе́! Ты́, преиспо́лнен сы́й Христо́вы любви́ и бла́гости, яви́лся еси́ я́ко чу́дный черто́г доброде́тели милосе́рдия и стяжа́л еси́ себе́ и́мя «Ми́лостивый». Ты́ бы́л еси́ я́ко река́, непреста́нно теку́щая ще́дрыми ми́лостьми и все́х жа́ждущих оби́льно напая́ющая. Ве́руем, я́ко, по преселе́нии от земли́ на не́бо, усугу́бися в тебе́ да́р благода́ти сея́ и я́ко соде́лался еси́ неисчерпа́емый сосу́д вся́кия благосты́ни. Сотвори́ у́бо твои́м хода́тайством и заступле́нием пред Бо́гом «вся́кия уте́хи», да вси́, прибега́ющии к тебе́, обрета́ют ми́р и безмяте́жие: да́руй и́м утеше́ние в печа́лех вре́менных и посо́бие в ну́ждах жите́йских, всели́в в ни́х наде́жду ве́чнаго упокое́ния во Ца́рствии Небе́снем. В житии́ твое́м на земли́ ты́ бы́л еси́ приста́нище все́м су́щим во вся́кой беде́ и ну́жде, оби́димым и неду́гующим; ни еди́н от притека́вших к тебе́ и проси́вших у тебе́ ми́лости лише́н бы́сть твоея́ благосты́ни. То́жде и ны́не, ца́рствуя со Христо́м Бо́гом на небеси́, яви́ все́м покланя́ющимся пред честно́ю твое́ю ико́ною и моля́щимся о по́мощи и заступле́нии. Не то́чию са́м ты́ твори́л еси́ ми́лость безпомо́щным, но и се́рдца други́х воздвига́л еси́ ко утеше́нию немощны́х и к призре́нию убо́гих. Подви́гни у́бо и ны́не се́рдца ве́рных к заступле́нию си́рых, утеше́нию скорбя́щих и успокое́нию неиму́щих. Да не оскудева́ют в ни́х да́ры ми́лости, па́че же да всели́тся в ни́х ми́р и ра́дость о Ду́се Свя́те,– во сла́ву Го́спода и Спа́са на́шего Иису́са Христа́, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителю Иоанну, патриарху Александрийскому, Милостивому Святителю Иоанну, патриарху Александрийскому, Милостивому](img_b/070.jpg)