24 ноября.

Канон святому великомученику царю Стефану Сербскому, Даченскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Ца́рство, е́же на земли́ до́бре окормля́я, страда́льче, и, багряни́цу нося́, смире́нно стяжа́л еси́ мудрова́ние, ни́щих посеща́я и си́м хле́б раздробля́я, те́мже Пребоже́ственная Тро́ица Ца́рствия ку́пно и му́ченичества венце́м увязе́ тя́.

Стихи́ра, гла́с 6:

Дне́сь Це́рковь озаря́ется страстоте́рпца луча́ми и, я́ко цве́ты, украша́ема, в весе́лии хва́лится, я́сным гла́сом веща́ющи: такова́, моя́ рожде́ния, такови́ моего́ чре́ва сы́нове. Ихже породи́х креще́нием, воспита́х же млеко́м благоче́стия и му́ченики соде́лах и́стинны: да мо́лятся о вселе́нней ко Го́споду.

Кано́н свята́го. Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святый великомучениче Стефане, моли́ Бо́га о нас.

Новоявле́нна, я́ко со́лнце, изнесе́ тя за́падная страна́ заря́ми светолу́чными, Стефа́не, концы́ осиява́юща и та́йно просвеща́юща Го́сподеви побе́дную пе́снь пою́щих.

Припев: Святый великомучениче Стефане, моли́ Бо́га о нас.

Очи стяжа́в у́мныя лише́нием чу́вственных, и ны́не зри́ши я́сно, я́же о́ко не ви́де, по апо́столу, и на се́рдце челове́ку не взыдо́ша, я́же тебе́ даде́ Христо́с, Того́ возлю́бльшему.

Припев: Святый великомучениче Стефане, моли́ Бо́га о нас.

Вои́стинну, — рече́ Соломо́н, — па́мять пра́веднаго с похвала́ми; се́ бо ны́не собра́шася разли́чных язы́к ро́дове, хвала́ми венчава́юще Стефа́нов ве́рх нетле́нный.

Сла́ва Отцу́ и Сы́ну и Свято́му Ду́ху:

Очи́стив у́м и се́рдце и ду́шу свобо́дну соде́лав, сла́вне, бы́л еси́ сосу́д избра́нный, досто́ин Бо́жия посеще́ния. Те́мже и, прише́д, Христо́с с Отце́м и Ду́хом оби́тель в тебе́ сотвори́.

И ны́не и при́сно и во ве́ки веко́в. Ами́нь.

Богородичен: Гора́ высока́, ю́же ви́де Дании́л, от нея́же ка́мень отсече́ся, му́жеских ру́к кроме́, Тебе́ прообразова́, Богоро́дице. Без му́жа бо на́м пло́тию породила́ еси́ Емману́ила.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святый великомучениче Стефане, моли́ Бо́га о нас.

Млеко́ сса́в прему́дрости, от ю́ностнаго, блаже́нне, во́зраста и в стра́се Бо́жии поуча́яся при́сно, преплы́л еси́ жития́ пучи́ну, Христа́ име́я Ко́рмчия, Иже и наста́ви тя́ в небе́сная блага́я приста́нища.

Припев: Святый великомучениче Стефане, моли́ Бо́га о нас.

Уче́нию внима́я ева́нгельскому, пребога́те, блажа́щему ми́лостивыя, ми́лостив бы́л еси́ и кро́ток, те́мже и поми́лован бы́в, зе́млю насле́довал еси́, кро́тким угото́ванную.

Припев: Святый великомучениче Стефане, моли́ Бо́га о нас.

Моли́твами приле́жными привле́кл еси́ Уте́шителя, Иже и, всели́вся в чи́стую твою́ ду́шу, светови́дна всего́ тя́ соде́ла, стра́шна же и чу́дна все́м и́же о́крест царе́м, в на́шу похвалу́ и торжество́.

Сла́ва Отцу́ и Сы́ну и Свято́му Ду́ху:

Устыде́ся твои́х слове́с боговеща́нных и прему́дрых самоде́ржец Гре́ческий и собо́р святи́тельский: не терпя́ше бо зре́ти злосла́вныя, я́ко во́лки, посреде́ ста́да благочести́вых.

И ны́не и при́сно и во ве́ки веко́в. Ами́нь.

Богородичен: Рече́ боже́ственный Иезекии́ль: и бу́дет две́рь затворе́на. — Сие́ на Тебе́ испо́лнися, Влады́чице: вни́де бо несказа́нно в Тя́ Отчее Сло́во и ми́рови яви́ся из Тебе́ пло́тию, Де́ву Тя́ сохрани́в во обои́х.

Седа́лен, гла́с 8.

Прему́дрости рачи́тель бы́в и сокро́вище доброде́телей, отону́дуже и поче́рпл еси́ боже́ственная разуме́ния и, о тле́ющих нераде́в, нетле́нным внима́л еси́. Те́мже и, я́же возлюби́в сия́, по кончи́не насле́довал еси́, прие́мля досто́йныя мзды́ де́ланием от правосудя́щаго вся́ про́мысла. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти покланя́ющимся ве́рою святы́м моще́м твои́м.

Сла́ва, и ны́не, Богородичен:

Помышля́ю су́д и бою́ся истяза́ния, трепе́щу стра́шныя и ужа́сныя му́ки, огня́ боле́зни, тмы́ же и та́ртара. Увы́! что́ сотворю́, сту́д ка́ко претерплю́? егда́ кни́ги отве́рзутся и дея́ния облича́тся. Сего́ ра́ди припа́даю Ти́, Богоро́дице Пречи́стая: тогда́ предста́ни ми́, ну́жды о́ныя изыма́ющи, Тебе́ бо и́мамы прибе́жище, Влады́чице.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святый великомучениче Стефане, моли́ Бо́га о нас.

Челове́к у́бо Стефа́н по естеству́, но па́че челове́ка ре́вностию, я́коже други́й Илия́, казня́ нечести́выя и снабдева́я правосла́вныя, еретико́в же ча́да, я́ко душегу́бныя во́лки, от свои́х преде́л отгоня́ет.

Припев: Святый великомучениче Стефане, моли́ Бо́га о нас.

Еже у́бо по о́бразу до́бре соблюде́ Стефа́н вои́стину, но и е́же по подо́бию в такове́м пла́вании жития́ на́шего мо́ри: у́м бо влады́ку страсте́м устро́и, зовы́й с весе́лием души́: сла́ва си́ле Твое́й, Го́споди.

Припев: Святый великомучениче Стефане, моли́ Бо́га о нас.

Ниже́ ско́рбь, ни теснота́, ниже́ заточе́ние многоле́тное, ни избоде́ние оче́с твое́ возмого́ша поколеба́ти от Влады́ки жела́ние, но пребы́л еси́ неизме́нен, зовы́й с весе́лием: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Име́я ко Влады́це Твоему́, великому́чениче, дерзнове́ние, вселе́нней ми́р испроси́, твоего́ оте́чества хору́гвы укрепи́ на ва́рвары безбо́жныя и тишину́ да́руй твои́м лю́дем, и́бо и с на́ми егда́ бы́л еси́, ми́рно устрое́ние на́ше име́яше жи́тельство.

И ны́не и при́сно и во ве́ки веко́в. Ами́нь.

Богородичен: Изобразова́ше иногда́ дре́вняго Изра́иля в Чермне́м проше́ствие Твое́ непостижи́мое Рождество́: я́коже бо о́н немо́кренными стопа́ми про́йде бе́здну морску́ю, та́ко и Христо́с, Де́во, без се́мене от пречи́стых Твои́х крове́й произы́де.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святый великомучениче Стефане, моли́ Бо́га о нас.

К ца́рствия о́бласти и учи́тельства да́р приложи́ся тебе́: веща́я бо поле́зная, все́х сердца́ привле́кл еси́ к ве́ре и́стинней и плодоно́сных показа́в. И, я́ко сотвори́в и научи́в, вели́к обре́лся еси́ во Ца́рствии небе́снем.

Припев: Святый великомучениче Стефане, моли́ Бо́га о нас.

Ужас объе́млет мя́ слы́шаща непра́ведныя ти́ сме́рти о́бразы, но ра́дость прие́млет мя́, честны́я твоя́ мо́щи зря́ща. Вои́стинну бо, по вели́кому апо́столу, недосто́йна страда́ния ны́нешняго вре́мене ко откры́вшейся сла́ве на тебе́.

Припев: Святый великомучениче Стефане, моли́ Бо́га о нас.

Не бы́л еси́ ме́ньший ве́рою и жела́нием боже́ственным Симео́на и Са́ввы, свяще́нных и богоно́сных твои́х оте́ц, но си́ми у́бо и и́неми доброде́тельми подо́бен и́м бы́л еси́, превозше́л же еси́ те́х и́менем и венце́м му́ченическим.

Сла́ва Отцу́ и Сы́ну и Свято́му Ду́ху:

Очи все́х ни́щих на тя́ упова́ху, — я́коже к Бо́гу рече́ Дави́д, — и ты́ дая́л еси́ пи́щу и́м я́ко Бо́жий служи́тель пред очи́ма Госпо́днима. Те́мже и насле́довал еси́, блаже́нне, угото́ванное ми́лостивым Ца́рствие.

И ны́не и при́сно и во ве́ки веко́в. Ами́нь.

Богородичен: Го́ра Сина́йская дре́вле о́браз показа́ непостижи́маго Твоего́ Рождества́ законода́вцу в купине́, и́бо о́гнь та́мо не опали́ купину́, ниже́ зде́, Богороди́тельнице, Огнь Божества́ Твою́ Боговмести́мую утро́бу.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святый великомучениче Стефане, моли́ Бо́га о нас.

Во бра́нех до́блествен бы́л еси́, сопроти́вных побежда́я не щито́м, ни копие́м, не на лу́к бо тво́й упова́л еси́ когда́, но честны́х ру́к воздея́нием, я́коже Моисе́й Амали́ка в пусты́ни, и моли́твою го́рдых низлага́л еси́.

Припев: Святый великомучениче Стефане, моли́ Бо́га о нас.

Ублажи́ша тя́ ца́рие, благослови́ша святи́телие, слы́шаще пресла́вная твоя́ исправле́ния: о́браз бо и надписа́ние к доброде́тели стяжа́ша тя́. И ны́не, ве́рою приходя́ще, честны́м стопа́м покланя́ются.

Припев: Святый великомучениче Стефане, моли́ Бо́га о нас.

Прине́слся еси́, же́ртва непоро́чная, на́с ра́ди Поже́ршемуся серде́чною чистото́ю и незло́бием: и всесожже́ние и́стинно, свя́то и одушевле́нно му́ченическим исхо́дом, заколе́ние соверше́нно Бо́гови.

Сла́ва Отцу́ и Сы́ну и Свято́му Ду́ху:

Разжже́ние стрелы́ неви́димаго стрельца́, тебе́ прирази́вшееся, Стефа́не, погаси́л еси́ благода́рственным терпе́нием и неде́йственна показа́л еси́, де́лы на́с науча́я, терпе́нием того́ ко́зни побежда́ти.

И ны́не и при́сно и во ве́ки веко́в. Ами́нь.

Богородичен: Образи подоба́ше пе́рвее пречи́стому Твоему́ написа́тися Рождеству́, е́же и предвозвести́ и́же при Но́и ковче́г: я́коже бо о́н, Богороди́тельнице, от пото́па сохрани́ оста́нок ро́да, си́це и сие́ от пото́па грехо́внаго спасе́ челове́чество.

Конда́к, гла́с 4.

Друга́го Константи́на стяжа́ тя́ Це́рковь благоче́стием, блаже́нне, и кро́тостию, пра́вдою и ми́лостынями, но и великому́ченика и страда́льца и́стинна. Те́мже и, тобо́ю крася́щися, вопие́т: Стефа́н мне́ похвала́ и утвержде́ние.

Икос:

До́брый Влады́ка, Бо́г и Созда́тель, я́коже в при́тчи ева́нгельской рече́ о де́лателех виногра́да того́ за́поведей спаси́тельных, коего́ждо во свое́ вре́мя де́лавша и мзду́ прие́мша, изнесе́ ны́не во единонадеся́тый ча́с к концу́ ле́том и в са́мое соверше́ние ты́сящам вели́каго сего́ му́ченика и царя́, своему́ оте́честву непоколеби́мое забра́ло, и свое́й оби́тели, неруши́мую сте́ну и гри́вну всезлату́ю Це́ркви, ю́же и нося́щи, с на́ми зове́т единогла́сно: Стефа́н мне́ похвала́ и утвержде́ние.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святый великомучениче Стефане, моли́ Бо́га о нас.

Иису́с Нави́н иногда́ Ангела ви́де, повелева́юща ему́ изу́ти сапо́г но́гу своею́, ме́сту бо, — глаго́лаше, — свя́ту бы́ти; ты́ же, всеблаже́нне, Никола́я ви́дел еси́ вели́каго, пло́ти совлещи́ся повелева́юща и в земли́ святе́й присели́тися.

Припев: Святый великомучениче Стефане, моли́ Бо́га о нас.

Нощна́я твоя́ хожде́ния и я́же о ка́мень ча́стая претыка́ния, я́же подъя́л еси́, ни́щия посеща́я, ле́ствицы тебе́ устро́ишася и степе́нь к небе́сным и́миже к Само́му Бо́гу дости́гл еси́, Того́ десни́цею венчава́емь.

Припев: Святый великомучениче Стефане, моли́ Бо́га о нас.

Обои́ у́бо на тебе́ венцы́, блаже́нне, стеко́шася, ца́рствия ку́пно и му́ченичества: обои́х бо чи́н соблю́л еси́. Те́мже царе́й еси́ похвала́ и му́чеников красота́, свое́й же оби́тели звезда́ многосве́тлая.

Сла́ва Отцу́ и Сы́ну и Свято́му Ду́ху:

Широта́ земли́ и долгота́ со мно́гих язы́к ро́довы тебе́ вве́рися от Бо́га, от заточе́ния призва́вшаго тя́, ю́же и соблю́л еси́ до́бре во благоче́стии и в зако́нех пра́ведных. Те́мже и мзду́ прия́л еси́ досто́йную.

И ны́не и при́сно и во ве́ки веко́в. Ами́нь.

Богородичен: Роди́выйся Соприсносу́щен Бо́гу и Отцу́, Бо́г Сло́во, Богоро́дице, и с на́ми Бо́г Челове́к Тобо́ю сни́де к на́шему смире́нию, свобожда́я от кля́твы пра́дедния: Тебе́ бо ви́де Иа́ков ле́ствицу, до небе́с дося́жущу.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святый великомучениче Стефане, моли́ Бо́га о нас.

Устне́ у́бо дви́жа и ру́це в моли́твах воздева́я, о́чи же Госпо́дни призира́ху, и Того́ у́ши моли́тву послу́шаху, и хоте́ния твоя́ блага́я пресла́вно соверша́хуся.

Припев: Святый великомучениче Стефане, моли́ Бо́га о нас.

Да́р че́стен вои́стину принесе́ тя Го́сподеви благоро́дное твое́ оте́чество па́че даро́в Авелевых и же́ртв Но́евых: на вся́к бо де́нь сокруше́нием ду́ха же́ртва бы́л еси́ Созда́телю.

Припев: Святый великомучениче Стефане, моли́ Бо́га о нас.

Ага́рянская ча́да, блаже́нне, под но́ги господа́м на́шим подложи́: се́ бо ча́сть достоя́ния твоего́ без ве́сти тща́тся сотвори́ти, но, предвари́в, досто́йною накажи́ ка́знию.

Сла́ва Отцу́ и Сы́ну и Свято́му Ду́ху:

Разшири́ша уста́ своя́, я́ко зве́рие, спеша́ще твое́ поглоти́ти оте́чество, измаили́те безбо́жнии: си́лою у́бо твое́ю си́х низложи́.

И ны́не и при́сно и во ве́ки веко́в. Ами́нь.

Богородичен: Иса́ия ви́де Тя́ клещу́ у́гля Боже́ственнаго проро́ческима, Отрокови́це, очи́ма, того́ устна́м каса́ющася и грехи́ оставля́юща, и́бо из Тебе́ Бо́г вочелове́чися, ми́ра грехо́в оставле́ние.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святый великомучениче Стефане, моли́ Бо́га о нас.

Аще и от на́с преста́влен бы́л еси́ я́коже Илия́, но на́м оста́вил еси́ святы́я твоя́ мо́щи, я́коже ми́лоть честне́йшую: и́миже на́с, страда́льче, покрыва́й от вся́каго вре́да душетле́ннаго.

Припев: Святый великомучениче Стефане, моли́ Бо́га о нас.

Па́че зла́та и топа́зия ра́ка моще́й твои́х на́м яви́ся; па́мять же твоя́ сла́вная па́че со́та медо́внаго горта́нем на́шим услади́ся, в не́йже на́с осиява́ют Ангели, с тобо́ю сходя́ще.

Припев: Святый великомучениче Стефане, моли́ Бо́га о нас.

Юже жела́хом па́мять светоно́сную твою́ и сладча́йшую прия́хом и облобыза́хом и мо́лимся, блаже́нне: твои́м ко Христу́ дерзнове́нием сохраня́й и спаса́й ста́до твое́.

Припев: Святый великомучениче Стефане, моли́ Бо́га о нас.

Сию́ ю́же стяжа́л еси́ оби́тель, ю́же возлюби́л еси́ и ю́же многоусе́рдне украси́л еси́, Стефа́не, и ны́не мощми́ твои́ми просла́вил еси́ и ста́до, е́же в не́й, моли́твами твои́ми окормля́еши.

Сла́ва Отцу́ и Сы́ну и Свято́му Ду́ху:

Не и́мамы ина́го к Бо́гу хода́тая, и́же твоея́ оби́тели и́ноцы, то́кмо тебе́, Стефа́не, на́с собра́вшаго, и мо́лим тя́ приле́жно: и та́мо на́с не разлучи́ от дарова́нныя ти́ сла́вы от Бо́га.

И ны́не и при́сно и во ве́ки веко́в. Ами́нь.

Богородичен: Его́же вси́ проро́цы рече́ниями ку́пно и гада́ньми провозвести́ша, Всецари́це, хотя́ща роди́тися и спасти́ челове́чество, Сего́ Ты́, заче́нши несказа́нно, неизрече́нно породила́ еси́, Богоро́дице, проро́ков бы́вши сбытие́.

Свети́лен.

Позлаще́нныма крыло́ма доброде́телей к Бо́гу возлете́в, Стефа́н на́с назира́ет, и́же па́мять его́ творя́щих, и Све́та исполня́ет Невеще́ственнаго.

Молитва

О святы́й уго́дниче Бо́жий, му́чениче Стефа́не! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.