24 ноября.

Канон святым мученикам Мине, Виктору и Викентию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н му́чеников. Гла́с 4.

Пе́снь 1.

Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Припев: Святии мученицы, моли́те Бо́га о нас.

Лю́дие свяще́ннии с Моисе́ем сла́вным и с Мариа́м, жено́ю му́дрою и проро́чицею, не глубину́ Чермну́ю, но ны́не Ми́ны страда́льца проходя́ще мо́ре по́двиг сла́вно, пое́м Бо́гу на́шему, я́ко просла́вися.

Припев: Святии мученицы, моли́те Бо́га о нас.

Яростию преще́ния и ре́вностию гне́ва дыша́ свирепогуби́тель и беззако́нный мучи́тель, я́ко Христо́в во́ин, предста́ти изво́лил еси́, Ми́но, благоче́стия побо́рниче. Ему́же и свети́льник яви́лся еси́, взыва́я: пое́м Бо́гу на́шему, я́ко просла́вися.

Сла́ва Отцу́ и Сы́ну и Свято́му Ду́ху:

Егда́ возвы́шуся, привлеку́ земны́я, Ты́, Христе́, проре́кл еси́, де́лом же соверши́л еси́, му́ченическия чи́ны и лю́ди от коне́ц призва́в, в ра́дости пою́щия: пое́м Бо́гу на́шему, я́ко просла́вися.

И ны́не и при́сно и во ве́ки веко́в. Ами́нь.

Богородичен: Же́зл Ааро́нов прозя́бший, и́же от Иессе́я прообразова́ше возра́стший ко́рень Тя́, Де́во, нетле́нный цве́т ми́ру возсия́вшую, Бо́га воплоще́нна. Его́же о на́с, Богоро́дице, моли́, при́сно прибега́ющих к Тебе́.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Святии мученицы, моли́те Бо́га о нас.

Гони́мь прему́дрыми твои́ми словесы́, мучи́тель тя́ ураня́ет неща́дно суро́выми жи́лами говя́жиими, мне́в си́ми преклони́ти тя́, му́чениче непобеди́ме.

Припев: Святии мученицы, моли́те Бо́га о нас.

Взира́я очесы́ у́мными ко Го́споду, плотски́я неудобосте́рпныя му́к тя́жести претерпе́л еси́ нра́вом до́блественнейшим, достосла́вне.

Сла́ва Отцу́ и Сы́ну и Свято́му Ду́ху:

Не убоя́вся муче́ний зело́ боле́зненных, дыша́ ре́вностию боже́ственною, к подвиго́м отлучи́лся еси́, зовы́й: неи́щемь, приидо́х самозва́н.

И ны́не и при́сно и во ве́ки веко́в. Ами́нь.

Богородичен: От а́довых мя́ вра́т из Тебе́ Воплоще́йся возведе́, дре́ва вку́сом лука́вым умерщвле́наго, Всенепоро́чная, сме́рть во́льную прие́мый.

Седа́лен му́ченика, гла́с 8.

Иже пре́жде неве́дения тмо́ю лю́тою, богому́дре му́чениче Ми́но, одержи́мый Еги́пет возсия́ тя́, свети́льника всеми́рна, безбо́жия но́щь кре́пко отгоня́ща заря́ми, блаже́нне, боже́ственных по́двиг твои́х. Те́м, светоно́сный и честны́й тво́й де́нь све́тло пра́зднующе, приле́жно зове́м ти́: страда́льцев удобре́ние, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святии мученицы, моли́те Бо́га о нас.

Кропле́нием твои́х крове́й погасо́ша у́глие многобо́жия, по́лк же де́монский погрузи́ся, Христо́ва же напои́ся Це́рковь, страстоте́рпче всеблаже́нне Ми́но, хва́лящи тя́.

Припев: Святии мученицы, моли́те Бо́га о нас.

Иже на дре́ве пове́шением образу́еши стра́сть, Кресто́м зми́я, му́чениче, го́рькаго умертви́вша, строга́ния терпи́ши, хода́тайствующия тебе́ наслажде́ние, и́же на небесе́х до́блественнейше.

Сла́ва Отцу́ и Сы́ну и Свято́му Ду́ху:

Па́че естества́ боле́зни, страда́льче, искуше́ние прия́л еси́, и боже́ственное раче́ние, твое́ удержа́вши естество́, забве́ние прия́ти творя́ше, поуща́я тя́ простира́тися к ра́нам, веселя́щася.

И ны́не и при́сно и во ве́ки веко́в. Ами́нь.

Богородичен: Воплоще́нна неизрече́нно, Бо́га родила́ еси́, от Твои́х крове́й до́м Себе́ созда́вшаго, во дву́х существа́х и хоте́ниих зна́емаго боголе́пно, Неискусобра́чная.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Припев: Святии мученицы, моли́те Бо́га о нас.

Свиде́тельства облиста́в све́тлыми луча́ми, омрачи́в те́мное безбо́жие, всему́дре, просвети́л еси́ ве́рных исполне́ния, воспева́ющих тя́, всехва́льне.

Припев: Святии мученицы, моли́те Бо́га о нас.

Исчезе́ вся́кое примышле́ние враго́в кре́пким твои́м терпе́нием, ни гла́д бо, ни ра́ны, ни опале́ние, ни трезу́бец озлобле́ние твоего́ усе́рдия помрачи́ша.

Сла́ва Отцу́ и Сы́ну и Свято́му Ду́ху:

Ве́рою огра́ждся, я́ко со́лнце луча́ми, в пусты́ню всели́лся еси́ и гра́ды вся́ просвети́л еси́, пропове́дая Христа́, Сы́на Бо́жия, в пло́ти прише́дшаго, сла́вне.

И ны́не и при́сно и во ве́ки веко́в. Ами́нь.

Богородичен: Новотвори́т истле́вша мя́, ражда́емый из Тебе́ па́че естества́ Изба́витель, дре́вния мя́ кля́твы свобожда́я, Богома́ти Чи́стая, Его́же моли́ спасти́ мя.

Пе́снь 6.

Ирмос: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Припев: Святии мученицы, моли́те Бо́га о нас.

Безболе́знен пребыва́еши, огне́м изнуря́емь и власяны́ми претира́емь я́звы ру́бищи: Боже́ственная бо благода́ть, спрису́тствующи, Ми́но, укрепля́ше.

Припев: Святии мученицы, моли́те Бо́га о нас.

Предстои́ши пред суди́щи мучи́телей, суди́мь, и, ле́сть облича́я, Ми́но всеприснопа́мятне, тебе́ сама́го сто́лп благоче́стия ве́рным подая́.

Сла́ва Отцу́ и Сы́ну и Свято́му Ду́ху:

По́ты твои́х боре́ний ле́сть изсуши́л еси́ и́дольскую, тебе́ сама́го хра́м созда́л еси́ Честны́я Тро́ицы, страстоте́рпче Ми́но досточу́дне.

И ны́не и при́сно и во ве́ки веко́в. Ами́нь.

Богородичен: Уврачи́ неисце́льныя стра́сти, Всенепоро́чная, души́ моея́, бы́лием Твоея́ бла́гости, блага́го Спа́са Христа́ су́щим в ми́ре ро́ждшая.

Конда́к, гла́с 4.

Во́инства исхити́ привре́меннаго и нетле́ннаго показа́ тя небе́снаго о́бщника, страстоте́рпче Ми́но, Христо́с, Бо́г на́ш, Иже му́чеников нетле́нный вене́ц.

Икос:

Вели́каго хода́тай на́м е́сть весе́лия па́мять му́чеников, на стра́сти му́жество и побе́ду на враги́ показу́ющи в све́тлем и ра́достнем испове́дании благода́ти. Прииди́те у́бо в не́й, празднолю́бцы вси́, и возвесели́мся, вре́мя на́шего весе́лия лу́чшее и пребыва́ющее, Ми́ны страда́льца па́мять соверша́юще и прие́млюще страсте́й разреше́ния да́р: сего́ же да́тель Христо́с Бо́г е́сть, му́чеников нетле́нный вене́ц.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святии мученицы, моли́те Бо́га о нас.

Совле́кл еси́ ра́нами ты́ ко́жныя ри́зы греха́ и во одея́ние оде́ялся еси́, не ктому́ обветша́ние прие́млющее, блаже́нне, е́же истка́ благода́ть я́вльшися.

Припев: Святии мученицы, моли́те Бо́га о нас.

Разжже́нием честны́х, му́чениче, и кре́пких твои́х по́двиг терно́вное и лука́вое безбо́жие пепели́тся, крове́й же тече́ньми погаша́ется неве́дения возвы́шенный пла́мень, всеблаже́нне.

Сла́ва Отцу́ и Сы́ну и Свято́му Ду́ху:

Име́яй оби́льныя да́ры, и чудоде́йствия источа́еши честны́й тво́й пра́здник соверша́ющим, Ми́но досточу́дне, и соде́йствуеши пою́щим: Бо́же оте́ц, благослове́н еси́.

И ны́не и при́сно и во ве́ки веко́в. Ами́нь.

Богородичен: Благослове́н Пло́д благослове́ннаго Твоего́ чре́ва, Его́же благословя́т небе́сныя си́лы и земны́х собра́ния, Иже на́с изба́вивый кля́твы дре́вния, Благослове́нная.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святии мученицы, моли́те Бо́га о нас.

Вене́чник, Ми́но, яви́лся еси́, враги́ Креста́ Го́спода твоего́, низложи́в у́бо, посрами́л еси́ и вопия́л еси́, всеблаже́нне: вся́ дела́ Го́спода по́йте и превозноси́те Его́ во ве́ки.

Припев: Святии мученицы, моли́те Бо́га о нас.

Ди́вна творя́ Бо́г в па́мяти твое́й, источа́я на́м мощми́ твои́ми душе́вная исцеле́ния и теле́сная, вопию́щим: вся́ дела́ Го́спода по́йте и превозноси́те Его́ во ве́ки.

Припев: Святии мученицы, моли́те Бо́га о нас.

Прине́сл еси́ Бо́гу служе́ние твое́ и на земли́, преклони́в главу́ твою́, мече́м прия́л еси́ отсече́ние, му́чениче, зовы́й: вся́ дела́ Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Яко багряни́цею и ви́ссом, кро́вию ва́шею Це́рковь украша́ется дне́сь, Ми́но, и Ви́кторе, и Вике́нтие, вопию́щи: вся́ дела́ Го́спода по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Де́вствует чре́во и ро́ждши Сы́на, Его́же без се́мене от Свята́го Ду́ха зача́т, Бо́га неопи́санна, в пло́ть обле́кшася, Отцу́ собезнача́льна Сло́ва. Его́же вся́ дела́, я́ко Го́спода, пою́т и превозно́сят во ве́ки.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы, моли́те Бо́га о нас.

Возлюби́л еси́ па́че не ме́ньше, не́жели возлю́блен бы́л еси́, страстоте́рпче, возлю́бленную твою́ ду́шу предложи́в рачи́телю твоему́, Христу́, с Собо́ю просла́вльшему свиде́тельство твое́, приснопа́мятне.

Припев: Святии мученицы, моли́те Бо́га о нас.

Све́щник, све́том трисо́лнечным вжига́емь, му́чеников яви́ся тричи́сленная еди́ница, Ми́на, и Ви́ктор же, и Вике́нтий, ве́рных просвеща́ющий и мра́к де́монский отгоня́ющий.

Сла́ва Отцу́ и Сы́ну и Свято́му Ду́ху:

Приими́ хвалу́, я́ко до́лг, от усе́рдия исходя́щу, превосходя́ща тя́, Ми́но, на́ших слове́с у́бо все́м, и возда́ждь безчи́сленно от сокро́вищ твои́х дарова́ния.

И ны́не и при́сно и во ве́ки веко́в. Ами́нь.

Богородичен: Досто́йно Тя́ вси́, Ма́терь Царя́ и Влады́ки, дре́вле у́бо проро́цы хваля́ху, ны́не же апо́столи и му́ченицы, с на́ми сла́вяще, Тя́, Богоро́дицу, велича́ют.

Свети́лен.

Небеса́ зве́зды украша́ют, Иису́се, Це́рковь же Ми́на, и Ви́ктор, и Вике́нтий украша́ют и Стефани́да, и́хже ра́ди побе́ды на проти́вныяИмпера́тору да́руй.

Молитва

Святи́и му́ченицы Ми́но, Ви́кторе и Вике́нтие! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.