24 ноября.

Канон святому блаженному Максиму, Христа ради юродивому, Московскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Нагото́ю теле́сного и терпе́нием обнажи́л еси́ вра́жия кова́рствия, облича́я неподо́бное его́ дея́ние, зе́льне стражда́ со́лнечный ва́р и ну́ждныя вели́кия сту́дени, мра́за и огня́ не чу́л еси́, Бо́жиею по́мощию покрыва́емь, Макси́ме прему́дре, о ве́рою творя́щих па́мять твою́ че́стно и усе́рдно притека́ющих к ра́це моще́й твои́х моли́ изба́витися от бе́д и паде́ния избежа́ти.

Величание.

Ублажа́ем тя́, святы́й пра́ведный Макси́ме, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 8:

Челове́че Бо́жий, Макси́ме чу́дный, ты́ у́бо, возше́д на ле́ствицу доброде́телей, по не́йже возше́л еси́ к го́рнему Иерусали́му и та́мо узре́л еси́ жела́емаго Христа́. Его́же ра́ди пло́ть твою́ изнури́л еси́ и те́ло ме́ртвенное на безсме́ртную жи́знь измени́л еси́. И о на́с непреста́нно моли́ся дарова́ти душа́м на́шим ми́р и ве́лию ми́лость.

Ин кано́н, гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Блаженне отче Максиме, моли́ Бо́га о нас.

Пода́ждь ми́, Христе́, Ду́ха Твоего́ благода́ть, да по достоя́нию воспою́ пе́снь но́ву от усте́н мои́х в па́мять Твоего́ уго́дника Макси́ма преблаже́ннаго.

Припев: Блаженне отче Максиме, моли́ Бо́га о нас.

Иже кре́ст на ра́мо взе́м, блаже́нне, и жела́емаго ти́ оте́чества дости́г, го́рняго Иерусали́ма, и в не́м со Ангелы лику́еши, юро́де прему́дрый, моли́ся о на́с, чту́щих па́мять твою́ всечестну́ю.

Сла́ва Отцу́ и Сы́ну и Свято́му Ду́ху:

Бу́йством премени́в мирско́е мудрова́ние, о́тче, непокрове́нно те́ло име́я, блаже́нне, покры́й на́ша стра́сти, богому́дре, да твои́ми моли́твами от бе́д избавля́емся.

И ны́не и при́сно и во ве́ки веко́в. Ами́нь.

Богородичен: Успи́ души́ моея́ свире́пую во́лну, я́ко мно́жество прегреше́ний, искуше́ний и печа́ли, Влады́чице, воста́ша на мя́, но Сама́ мя́ спаси́.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Блаженне отче Максиме, моли́ Бо́га о нас.

Умо́м ве́сь к преми́рным взе́мся, блаже́нне, юро́д прозва́лся еси́, о́тче, и на́с, умовре́дных, сохрани́, да неврежде́ни пребу́дем козньми́ чужда́го, и тебе́ ублажа́ем, Макси́ме преблаже́нне.

Припев: Блаженне отче Максиме, моли́ Бо́га о нас.

Ва́ром со́лнечным опаля́емь, о́тче, и на́с, пали́мых грехо́вными страстьми́, ороси́ твои́ми моли́твами, да непреста́нно воспева́ем па́мять твою́, Макси́ме прехва́льне.

Сла́ва Отцу́ и Сы́ну и Свято́му Ду́ху:

Зимо́ю томи́мь, свя́те, небре́гл еси́ о те́ле пе́рстнем и ны́не наслажда́ешися ра́йския добро́ты. И на́м проси́ оставле́ния, озло́бленным прило́ги чужда́го, да тебе́ ублажа́ем, о́тче богому́дре.

И ны́не и при́сно и во ве́ки веко́в. Ами́нь.

Богородичен: Яже еди́на в напа́стех и ско́рбех защища́ющи, под кро́в Тво́й, Пречи́стая, прибе́гша те́пле, приими́, я́ко Преблага́я, е́же от се́рдца моего́ моле́ние.

Седа́лен, гла́с 8:

Све́том Боже́ственным озаря́емь, в пу́ть, веду́щий к Боже́ственным сия́нием, ходи́л еси́ ве́рно, о́тче преподо́бне, и вра́жиих отбе́гл еси́ прило́г, и сы́н све́та и дне́ яви́лся еси́, Макси́ме богоблаже́нне.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Блаженне отче Максиме, моли́ Бо́га о нас.

Любве́ сро́дников отре́клся, блаже́нне, любо́вию Христо́вою уязвля́емь, и пло́ть, я́коже рабы́ню, ду́хови покори́в, над страстьми́ ца́рь показа́лся еси́, о́тче. И на́с, плене́нных грехо́вными страстьми́, свободи́, богому́дре.

Припев: Блаженне отче Максиме, моли́ Бо́га о нас.

Стезе́ю приско́рбнаго пути́ ше́ствовав, блаже́нне, и простра́ннаго жили́ща доше́д, с безпло́тными ликовствова́ти сподо́бился еси́, о́тче богоно́се.

Сла́ва Отцу́ и Сы́ну и Свято́му Ду́ху:

Вла́сть прии́м на дусе́х нечи́стых, о́тче Макси́ме, си́х от челове́к прогоня́еши, вся́кими неду́ги боля́щия исцелева́еши, с ве́рою приходя́щия к ра́це моще́й твои́х.

И ны́не и при́сно и во ве́ки веко́в. Ами́нь.

Богородичен: Ми́лости Твое́й сподо́би мя́, благоми́лостивное Сло́во ро́ждши, и ны́не, Влады́чице, прибега́юща мя́ к Тебе́ спаси́.

Пе́снь 5

Ирмос: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Припев: Блаженне отче Максиме, моли́ Бо́га о нас.

Юро́д яви́лся еси́ изволе́нием, о́тче, и о́ному ди́вному Андре́ю после́довал еси́. И я́коже то́й ви́де духо́вныма очи́ма Богоро́дицу на возду́се, за ми́р моля́щуюся, ты́ же ны́не зри́ши Святу́ю Тро́ицу, моля́ся непреста́нно о душа́х на́ших.

Припев: Блаженне отче Максиме, моли́ Бо́га о нас.

Ревни́тель бы́в ди́вному Симео́ну, пусты́ню и све́рстника оста́вльшему, и юро́дство на ся́ возложи́вшему, и го́рния митропо́лии дости́гшу, с ни́мже ны́не и ты́ наслажда́ешися, и на́с помина́й, пра́зднующих па́мять твою́ всечестну́ю.

Сла́ва Отцу́ и Сы́ну и Свято́му Ду́ху:

Вторы́й Твердисло́в в Росси́и показа́лся еси́, о́тче Макси́ме, непокрове́но те́ло име́я, покры́й на́с покро́вом моли́тв твои́х, да не уязви́т на́с уязви́вый пра́отца преступле́нием.

И ны́не и при́сно и во ве́ки веко́в. Ами́нь.

Богородичен: От ко́рене исто́чник и вину́ нетле́ния, Тя́, Де́во, вси́ ве́рнии хвала́ми почита́ем: Ты́ бо Ипоста́сное на́м Безсме́ртие родила́ еси́.

Пе́снь 6.

Ирмос: Очище́ние на́м, Христе́, и спасе́ние, Влады́ко, возсия́л еси́ от Де́вы, да я́ко проро́ка от зве́ря морска́го пе́рсей Ио́ну, от тли́ исхити́ши всего́ Ада́ма всеро́дна па́дшаго.

Припев: Блаженне отче Максиме, моли́ Бо́га о нас.

На безстра́стия го́ру возше́д доброде́тельми, на враги́ храбо́рник чу́ден показа́лся еси́: и ны́не моли́ся Христу́ Бо́гу, я́ко да твои́ми моли́твами проти́внии побежда́ются.

Припев: Блаженне отче Максиме, моли́ Бо́га о нас.

Чуде́с исто́чник ра́ка твоя́ яви́ся, Макси́ме блаже́нне, от нея́же оби́льно вси́ притека́ющии прие́млют телесе́м здра́вие и душа́м спасе́ние твои́ми моли́твами.

Сла́ва Отцу́ и Сы́ну и Свято́му Ду́ху:

Прему́дростию ра́зума объя́т, о́тче, су́етную му́дрость бу́йством премину́л еси́ и утае́ная от му́дрых и разу́мных Тро́ическим благоволе́нием позна́л еси́.

И ны́не и при́сно и во ве́ки веко́в. Ами́нь.

Богородичен: Моисе́й в купине́ Тя́ ви́де, в горе́ прие́млющу нестерпи́мый Божества́ о́гнь неопа́льно, те́м Тя́ вси́ пе́сньми велича́ем.

Конда́к, гла́с 2:

Вы́шния красоты́ жела́я, ни́жния сла́дости и теле́сная одея́ния в ничто́же вмени́л еси́ и нестяжа́ние па́че су́етнаго ми́ра возлюби́л еси́. Ангельское житие́ проходя́, сконча́лся еси́, блаже́нне Макси́ме: с ни́миже Христа́ моли́ непреста́нно о все́х на́с.

Икос:

Ангел на земли́ житие́м показа́вся, Ангельския полки́ удиви́л еси́, и де́моны устраши́л еси́, и челове́ки просвети́л еси́ чуде́с твои́х заря́ми, богоно́се и преблаже́нне о́тче на́ш Макси́ме. И ны́не на́с вразуми́ воспева́ти пе́снь к твоему́ хвале́нию, ра́достным гла́сом си́це глаго́лющих: ра́дуйся, оста́вивый тле́нное мудрова́ние и прие́мый нетле́нный вене́ц; ра́дуйся, терпели́вый душе́ю; ра́дуйся, целому́дренный ра́зумом и к Бо́гу воззре́нием; ра́дуйся, предо́блий юро́де, и́же злоко́зненнаго врага́ под нога́ми сотры́й; ра́дуйся, я́ко ни́жнее мудрова́ние оста́вль и вы́шняго Ца́рствия дости́гий; ра́дуйся, цели́телю боле́зней и отгони́телю страсте́й; ра́дуйся, Макси́ме блаже́нне, моля́ непреста́нно о все́х на́с.

Пе́снь 7.

Ирмос: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Блаженне отче Максиме, моли́ Бо́га о нас.

Прича́стием Свята́го Ду́ха просвеще́н, блаже́нне, измени́вся добро́ты теле́сныя и позо́р бы́в челове́ком, непокрове́но те́ло тле́нными оде́ждами име́я, Христу́ вопия́л еси́: благослове́н Бо́г оте́ц на́ших.

Припев: Блаженне отче Максиме, моли́ Бо́га о нас.

Нищету́ и юро́дство изво́лив, преподо́бне, на́с ра́ди Обнища́вшаго и Сего́ ле́гкий яре́м на ра́мена взе́м, Тому́ после́довал еси́, Христу́, вопия́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Злому́драго врага́ ко́зни премудри́в, юро́де прехва́льне, и сего́, я́ко ры́бу безгла́сну, сотвори́л еси́, богому́дре, Христу́ вопия́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Якоже ло́жницу Бо́жию и кади́льницу разу́мнаго и светоно́снаго Угля, Приснора́дованную воспое́м, зову́ще: ра́дуйся, вина́ спаси́тельнаго воззва́ния, Благослове́нная во ве́ки.

Пе́снь 8.

Ирмос: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Блаженне отче Максиме, моли́ Бо́га о нас.

Присво́ився Соде́телю все́х, о́тче, и грехо́вныя я́зи удали́вся, прия́л еси́ небе́сное насле́дие и, со Ангелы лику́я, вопия́л еси́: благослови́те, вся́ дела́ Госпо́дня, Го́спода.

Припев: Блаженне отче Максиме, моли́ Бо́га о нас.

Юношеских и плотски́х страсте́й удержа́л еси́ взыгра́ния, очи́стив вся́кия скве́рны ду́шу же и те́ло, Макси́ме преблаже́нне, хра́м показа́лся еси́ нескве́рнен Бо́гу, Ему́же непреста́нно вопие́ши: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Незаходи́мый возсия́ тебе́ све́т, о́тче богому́дре, присносу́щнаго весе́лия, в не́мже ны́не наслажда́ешися, предстоя́ Святе́й Тро́ице и воспева́я Христа́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем, Тя́ основа́ние и наде́жду на́шего спасе́ния, Богоневе́сто, и́мамы и Тя́ воспева́ем во веки.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Блаженне отче Максиме, моли́ Бо́га о нас.

Якоже тве́рдый адама́нт душе́ю показа́лся еси́, непоколеби́мь вра́жиими прило́ги, о́тче, и на́м тве́рдое забра́ло бу́ди, блаже́нне, моли́твами твои́ми от нахожде́ний проти́вных.

Припев: Блаженне отче Максиме, моли́ Бо́га о нас.

Освяти́ся возду́х, Макси́ме блаже́нне, па́мятию твое́ю, и на́с торжествова́ти подвиза́ет ра́достно освяще́нное твое́ пра́зднество.

Сла́ва Отцу́ и Сы́ну и Свято́му Ду́ху:

Жезло́м доброде́телей страсте́й мо́ре пресе́к и го́рдаго врага́, я́коже ина́го фарао́на, моли́твами твои́ми погрузи́в, избра́нное ста́до но́ваго Изра́иля невре́дно соблю́л еси́, Максиме блаже́нне, моли́твами твои́ми.

И ны́не и при́сно и во ве́ки веко́в. Ами́нь.

Богородичен: Ски́ния свиде́тельства Тя́ прообрази́, Хле́б Истинный жи́зни прие́мшую, Чи́стая, Сло́во Отца́ Соприсносу́щное.

Свети́лен.

Ангельскаго жития́ жела́я, преподо́бне, покори́л еси́ стра́сти плотски́я му́жески и равноа́нгелен бы́л еси́, богоно́се о́тче Макси́ме.

Молитва блаженному Максиму Московскому, Христа ради юродивому

Уго́дниче Бо́жий, моли́твенниче наш те́плый и ско́рый помо́щниче, блаже́нне Макси́ме! Припа́дающе к ра́це моще́й твои́х прославля́ем многотру́дныя по́двиги юро́дства твоего́ Христа́ ра́ди, возлюби́в бо Еди́наго Бо́га от всея́ души́ твоея́, ты мирски́ми красо́тами не восхоте́л еси́ наслажда́тися; родна́го жили́ща, любве́ сро́дник, бога́тства и сла́вы вре́менныя отре́клся еси́ и безприю́тное житие́ возлюби́л еси́. Прилежа́в о спасе́нии души́, плоть твою́ нагото́ю теле́сною, мра́зом и зно́ем, посто́м и бде́нием, долговре́менным на земли́ лежа́нием изнури́л еси́ и вся стра́сти ея́ ду́хови покори́л еси́, на земли́ пожи́в небе́сно, во пло́ти духо́вно, умо́м весь к преми́рным взе́мся, плотску́ю му́дрость отри́нул еси́ и, быв мудр о Христе́, юро́д ми́рови показа́лся еси́, от неразу́мных мно́гия оби́ды и бие́нии благоду́шно притерпева́я и мно́гих нечести́вых на путь спасе́ния наставля́я. Те́мже, по сконча́нии твои́х подвиго́в, всепра́ведный Судия́ нетле́нием честны́х твои́х моще́й и мно́гими чудесы́ тя просла́ви, ду́шу же твою́ святу́ю в Небе́сныя оби́тели всели́, иде́же, предстоя́ Престо́лу Непристу́пнаго Боже́ственнаго Све́та, в Нем, я́ко в зерца́ле, ви́диши на́ша ну́жды, слы́шиши на́ша к тебе́ проше́ния и я́ко друг Христо́в и́маше ве́лие к Нему́ дерзнове́ние моли́тися о нас. Сего́ ра́ди усе́рдно про́сим тя: помоли́ся Го́споду Бо́гу о нас, к земли́ приве́рженных, да и мы, в подража́ние твоему́ ангелоподо́бному на земли́ житию́, не погря́знем в су́етных жите́йских попече́ниих и в земны́х наслажде́ниих, не прельща́емся и не прилепля́емся все́ю душе́ю к тле́нным ми́ра сего́ бла́гом, но да обрати́т Госпо́дь Свое́ю благода́тию на́ша мы́сли и жела́ния к Небе́сным и укрепи́т жела́ти восприя́тия бу́дущих нетле́нных сокро́вищ, да пода́ст нам, сла́бым, си́лу к побежде́нию страсте́й, мы́слей и жела́ний грехо́вных, да плени́т наш кичли́вый ум в послуша́ние ве́ры, изба́вит от высокоу́мия, суему́дрия, ло́жных па́губных уче́ний и да́рует нам му́дрость духо́вную, да раствори́т окамене́нная сердца́ на́ша слеза́ми умиле́ния и сокруше́ния о на́ших согреше́ниих, согре́ет их любо́вию к Нему́, на́шему Созда́телю, и к бли́жним на́шим. Испроси́ всем, во вся́кой нужде су́щим и к твоему́ заступле́нию прибега́ющим, вся́кий дар, коему́ждо благопотре́бен: больны́м — исцеле́ние, печа́льным — утеше́ние, бе́дствующим — по́мощь, оби́женным — защи́ту. Принеси́ ко Го́споду святу́ю моли́тву о всех нас, многогре́шных, я́ко да не по грехо́м на́шим возда́ст нам, ниже́ по беззако́ниим на́шим нака́жет нас, но отврати́т вся́кий гнев, пра́ведно дви́жимый на ны, и проба́вит ми́лость Свою́, вся́ких нужд, бед, напа́стей, скорбей и боле́зней нас избавля́я, и́миже весть судьба́ми да наста́вит нас на путь спасе́ния, пода́ст про́чее вре́мя живота́ на́шего в покая́нии и благоче́стии прейти́ и христиа́нскую кончи́ну, неболе́зненну, непосты́дну, ми́рну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

Молитва вторая блаженному Максиму Московскому, Христа ради юродивому

О, уго́дниче Бо́жий, блаже́нне Макси́ме! Помоли́ся Го́споду Бо́гу о нас, рабе́х Бо́жиих (имена), к земли́ приве́рженных, да обрати́т Госпо́дь на́ша мы́сли и жела́ния к Небе́сным и да укрепи́т бу́дущих нетле́нных сокро́вищ жела́ти, да пода́ст нам си́лу к побежде́нию страсте́й, мы́слей и жела́ний грехо́вных, да плени́т наш ум в послуша́ние ве́ры, да изба́вит от высокоу́мия, суему́дрия и му́дрость духо́вную нам да́рует: та́же окамене́нная сердца́ на́ша слеза́ми умиле́ния о гресе́х сокруше́ния да раствори́т и да согре́ет я́ к на́шему Созда́телю любо́вию и братолю́бием ко бли́жним на́шим. Блаже́нне Макси́ме, принеси́ ко Го́споду моли́тву о нас, я́ко да не по грехо́м на́шим возда́ст нам, ниже́ по беззако́нием на́шим нака́жет нас, но да проба́вит ми́лость Свою́ на нас, от вся́ких нужд, бед, напа́стей, скорбе́й и боле́зней избавля́я, и и́миже весть судьба́ми да наста́вит нас на путь спасе́ния, и да сподо́бит нас христиа́нскую кончи́ну неболе́знену, непосты́дну и ми́рну прия́ти и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.