24 ноября.

Канон преподобному Мартирию, Зеленецкому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

От ю́ности, богоблаже́нне, Христа́ возлюби́в, оте́чество оста́вил еси́ и, все́х мирски́х мяте́жей уклони́вся, в ти́хое приста́нище пречестны́я оби́тели Богома́терни дости́гл еси́; отоню́дуже уве́дев непрохо́дную пусты́ню, крестови́дною заре́ю пока́занную, жела́тельне ю́ обре́л еси́, и, в не́й всели́вся, и́ночествующих собра́л еси́, и си́х уче́ньми свои́ми, я́ко ле́ствицею восхо́дною на не́бо, трудолю́бно тща́лся еси́ возводи́ти к Бо́гу, Ему́же моли́ся, богому́дре Марти́рие, дарова́ти душа́м на́шим ве́лию ми́лость.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́мже на небесе́х обре́л еси́ мзду́ трудо́в твои́х, де́монския разори́л еси́ по́лчища и Ангельския дости́гл еси́ чи́ны, и́хже житию́ непоро́чно поревнова́л еси́; дерзнове́ние име́яй ко Христу́ Бо́гу, ми́р испроси́ душа́м на́шим.

Кано́н преподо́бнаго, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Мартирие, моли́ Бо́га о нас.

Благи́ми нра́вы украси́вся, Христу́ прилепи́лся еси́ от ю́ности, плотски́я стра́сти умертви́в воздержа́нием, и к животу́, преподо́бне, преста́вился еси́.

Припев: Преподобне отче Мартирие, моли́ Бо́га о нас.

Глаго́лов и зако́нов Бо́жиих исполни́тель бы́в, испо́лнился еси́, о́тче прему́дре, Боже́ственных даро́в и чуде́с все́м лучи́ бога́тно испусти́л еси́.

Припев: Преподобне отче Мартирие, моли́ Бо́га о нас.

Кре́постию Христа́ возмо́г, держа́ву же и си́лу вра́жию низложи́л еси́ и похвалу́ побе́дныя по́чести, преподо́бне, чуде́сными сия́нии улучи́л еси́.

Сла́ва Отцу́ и Сы́ну и Свято́му Ду́ху:

Со́весть име́л еси́ бла́гу, о́ко серде́чное, взира́ющее к Бо́гу, те́мже вня́т моли́тве твое́й, прему́дре, с преподо́бными сочета́ тя́, богоблаже́нне.

И ны́не и при́сно и во ве́ки веко́в. Ами́нь.

Богородичен: Стра́сти пло́ти моея́ и ума́ моего́ двиза́ния неподо́бная утоли́, молю́ Тя́, Пречи́стая Де́во, и испра́ви мя́, заблу́ждшаго умо́м.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподобне отче Мартирие, моли́ Бо́га о нас.

Ве́сь прилежа́ Вседержи́телю, преподо́бне о́тче прему́дре, всея́ бесо́вския зло́бы избе́гл еси́ досточу́дным водворе́нием в непроходи́мая.

Припев: Преподобне отче Мартирие, моли́ Бо́га о нас.

Высото́ю смире́ния украша́ем, све́ргл еси́ на зе́млю велехва́льнаго гордели́вца пло́ти своея́ Боже́ственными веле́ньми и до́брыми де́лы твои́ми.

Припев: Преподобне отче Мартирие, моли́ Бо́га о нас.

Пло́тию обложе́н, о́тче прему́дре, смири́л еси́ надме́нную вы́ю нечести́ваго благи́ми к Бо́гу воздыха́ньми, непоро́чне.

Сла́ва Отцу́ и Сы́ну и Свято́му Ду́ху:

Име́я поспешеству́ющую тебе́ Бо́жию си́лу, прему́дре, я́ко чу́ден во пло́ти сы́й бы́в, чудеса́ источи́л еси́ воскресе́нием ме́ртваго, и ны́не отго́ниши неду́ги.

И ны́не и при́сно и во ве́ки веко́в. Ами́нь.

Богородичен: В ложесна́ Твоя́ воплоща́ем, Всенепоро́чная, всели́ся Зижди́тель на благодея́ние ве́рно пою́щим Тя́.

Седа́лен, гла́с 4:

Стра́стное порабо́тил еси́ пло́ти своея́ мудрова́ние и ни́зшее свое́ покори́л еси́ вы́сшему, о́тче пресла́вне, сокруши́л бо вы́и бесо́в смире́нием и посто́м, во всечестны́х дея́ниих су́щи, возсия́л еси́ в ми́ре; те́мже я́ко луча́ светоли́тнаго сия́ния Христо́ва возсия́ на́м, дне́сь воспева́ющим тя́, Марти́рие преподо́бне.

Сла́ва, и ны́не, Богородичен:

Пое́м Тя́, Богоневе́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́ви ны́ ле́сти и кова́рствия вра́жия и от вся́ких бе́д, Влады́чице Богоро́дице, и ве́рно Тебе́ вопие́м: поми́луй ста́до Твое́, еди́на Пречи́стая.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Мартирие, моли́ Бо́га о нас.

Соде́яв, пресла́вне, ду́шу твою́ хра́м Свято́му Ду́ху, бы́л еси́ насле́дник го́рняго Ца́рствия, с вы́шними чина́ми водворя́яся, всече́стне о́тче.

Припев: Преподобне отче Мартирие, моли́ Бо́га о нас.

Многоболе́зненныя стра́сти всегда́ врачу́еши приступа́ющих к тебе́ те́пле: благода́ть бо, преподо́бне, и́маши от Го́спода содева́ти зна́мения и чудеса́, пребога́те.

Сла́ва Отцу́ и Сы́ну и Свято́му Ду́ху:

Красне́йшим прозябе́нием, о́тче, в дому́ Бо́жии прозя́бл еси́, доброде́тельми укра́шен и плоды́ чуде́сными облагоуха́ем.

И ны́не и при́сно и во ве́ки веко́в. Ами́нь.

Богородичен: Нива духо́вная, я́коже из бразды́ кла́с изнесла́ еси́, всю́ тва́рь пита́ющаго вся́ческих Бо́га, Присноде́во.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не зна́ем.

Припев: Преподобне отче Мартирие, моли́ Бо́га о нас.

Умо́м очи́щенным пресла́вне зри́ши, преподо́бне, добро́ту неизрече́нную — Христа́, вся́ческих Бо́га на́шего.

Припев: Преподобне отче Мартирие, моли́ Бо́га о нас.

Якоже Илия́ на колесни́це, о́тче, доброде́тельми твои́ми возше́л еси́ на не́бо и та́мо чи́сте зри́ши Святу́ю Тро́ицу, к Не́й же ду́хом горя́ и возлета́я.

Сла́ва Отцу́ и Сы́ну и Свято́му Ду́ху:

Стягну́в те́ло твое́, чистото́ю опелена́я и воздержа́нием покоря́ его́ ду́ху, стро́потная вся́ оста́вил еси́ любве́ ра́ди Христа́ своего́ и небе́снаго приобре́тения.

И ны́не и при́сно и во ве́ки веко́в. Ами́нь.

Богородичен: Исцели́, Милосе́рдная Ма́ти, неду́гующаго ума́ моего́ душевре́дное омраче́ние и озари́ све́том ра́зума Христа́ Твоего́, Всенепоро́чная.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Мартирие, моли́ Бо́га о нас.

Лука́вый умертви́ся зми́й свяще́нными по́двиги твои́ми, преподо́бне Марти́рие, те́мже и моля́щимся тебе́ вспомоществу́еши разреши́тися от его́ зло́бы, блаже́нне.

Припев: Преподобне отче Мартирие, моли́ Бо́га о нас.

Отсе́кл еси́ приле́жно серпо́м, его́же ви́де Заха́рий серпови́дный, стра́сти от души́ твоея́, те́мже, приобре́т прему́дрости семена́, пожа́л еси́ мно́гих исцеле́ний бога́тныя кла́сы.

Сла́ва Отцу́ и Сы́ну и Свято́му Ду́ху:

Кре́постию ду́ха, о́тче, и тве́рдостию постоя́ннаго ума́ твоего́ возмо́гл держа́ву вра́жию и си́лу его́ низложи́ти от себе́ и те́м похвалу́ побе́дныя по́чести прия́л еси́, преподо́бне, ве́рных осиява́я умы́.

И ны́не и при́сно и во ве́ки веко́в. Ами́нь.

Богородичен: Пресвята́я Чи́стая, Творе́ц устро́и Тя́ в жили́ще Себе́, Христо́с Бо́г на́ш, те́мже хода́тайствы Твои́ми изба́ви на́с от о́бласти льсти́ваго, я́ко да по до́лгу Тя́ чти́м и ублажа́ем.

Конда́к, гла́с 8:

Оте́чества, преподо́бне, и всего́ мирска́го мяте́жа уклони́тися возжеле́л еси́, и, в пусты́ню всели́вся, та́мо во блаже́ннем безмо́лвии жесто́кое житие́ показа́л еси́, и ча́да послуша́ния и смире́ния в не́м возрасти́л еси́. Сего́ ра́ди, дерзнове́ние стяжа́в ко Святе́й Тро́ице, е́же моли́тися, богоблаже́нне, о на́с, ча́дех свои́х, и́хже собра́л еси́, и о все́х правове́рных, да зове́м ти́: ра́дуйся, о́тче Марти́рие, безмо́лвия пусты́ннаго люби́телю.

Икос:

Возлюби́в, преподо́бне, Христо́вы боже́ственныя за́поведи и возненави́дев пло́ть и я́же по не́й земна́я мудрова́ния, прише́л еси́ усе́рднейше в непроходи́мую пусты́ню бла́тную, и, та́мо всели́вся любве́ ра́ди Христо́вы и душе́внаго обогаще́ния, я́ко свети́льник, просия́л еси́ чуде́с дарова́нии: ца́рскаго бо сы́на я́ко от сна́ возста́вил еси́ и те́м царя́ Симео́на удиви́л еси́. Сия́ облобыза́я, ве́рнии, припа́дая, мо́лимся: просвети́ о́чи на́ша душе́вныя воспева́ти досто́йно по́двиги твоя́: поще́ния, бде́ния, сле́зы и боле́зни, изможде́ние те́ла блаже́нныя ра́ди бу́дущия жи́зни, ея́ же наслажда́яся, моли́ непреста́нно о все́х на́с.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобне отче Мартирие, моли́ Бо́га о нас.

Проше́д по́двиги по́стныя, о́тче, умо́м кре́пким го́рдую вы́ю смири́л еси́, боже́ственным вдохнове́нием и спаси́тельным богообра́зным подви́жничеством ду́шу твою́ укра́сил еси́, поя́: благослове́н Бо́г оте́ц на́ших.

Припев: Преподобне отче Мартирие, моли́ Бо́га о нас.

Красне́йшее прозябе́ние, о́тче, в дому́ Бо́жии произра́сл еси́ ве́рою, сугу́бейший пло́д прине́сл еси́ доброде́тельми, те́ми укра́шен, чудесы́ облагоуха́л еси́.

Сла́ва Отцу́ и Сы́ну и Свято́му Ду́ху:

Просвети́в твое́ се́рдце умиле́нием, нача́льник бы́л еси́ свяще́ннейшаго собо́ра, о́тче, наказу́я, и уча́, и вся́ к Бо́жией во́ли приводя́, пою́ще: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Но́во Отроча́ ро́ждшая, Пребезнача́льнаго Сло́ва, обетша́вшия ны́ зело́ грехо́м, ве́рныя обнови́ла еси́, Де́во, и воспева́ти научи́ла еси́: оте́ц на́ших Бо́же, благослове́н еси́.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Преподобне отче Мартирие, моли́ Бо́га о нас.

Насле́дниче боже́ственных селе́ний, Ангельски, о́тче, пожи́л еси́; те́м, со Ангелы водворя́яся, лику́ет в черто́гах небе́сных со святы́ми ду́х тво́й.

Припев: Преподобне отче Мартирие, моли́ Бо́га о нас.

Невозвра́тным умо́м и невозвра́тными стопа́ми, богому́дре о́тче, ше́ствовал еси́, досточу́дне, к небе́сным селе́ниям, ева́нгельскою стезе́ю направля́емь, от стро́потных путе́й до конца́ уклони́лся еси́.

Сла́ва Отцу́ и Сы́ну и Свято́му Ду́ху:

Все́льшеюся в тя́ благода́тию Свята́го Ду́ха, о́тче Марти́рие, благоустроя́еши ду́ши притека́ющих к тебе́: лука́вно бо страстьми́ в челове́цех де́йствующии нечи́стии ду́си отгоня́еми быва́ют.

И ны́не и при́сно и во ве́ки веко́в. Ами́нь.

Богородичен: Вода́ еси́ неисчерпа́емая, Деви́це, Дще́рь Царя́ Небе́снаго, от Нея́же вси́ ве́рнии, пию́ще, благода́ти исполня́емся, душе́ю и те́лом освяща́еми.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподобне отче Мартирие, моли́ Бо́га о нас.

Исцеле́ние источа́ет бога́тно честна́я твоя́ ра́ка Бо́жиим Ду́хом, и стра́сти многовре́менныя исцеля́ет, о́тче, приходя́щих к тебе́, и прогоня́ет лука́выя ду́хи лю́тыя, и воздвиза́ет ве́рныя восхваля́ти твоя́ све́тлыя по́двиги.

Припев: Преподобне отче Мартирие, моли́ Бо́га о нас.

Яко вели́кое со́лнце, на́м вели́чием по́двиг твои́х возсия́л еси́ в преде́лех страны́ сея́: уме́рый бо, преше́л еси́ от све́та к Све́ту, от гро́ба возсия́вшему. Те́м вопие́м ти́: просвети́ и на́ша помышле́ния, о́тче преподо́бне Марти́рие.

Припев: Преподобне отче Мартирие, моли́ Бо́га о нас.

Те́ло твое́, блаже́нне, терпели́вое, вяза́вшееся вери́гами, стра́сти неисце́льныя прикоснове́нием исцеля́ет, Бо́гу и Спа́су, тя́ вельми́ просла́вльшу, о́тче прему́дре и досточу́дне Марти́рие, я́ко де́лы твои́ми до́брыми просла́вльшуся, преподо́бне.

Сла́ва Отцу́ и Сы́ну и Свято́му Ду́ху:

Процве́л еси́ в по́стнических удо́лиях, прехва́льне о́тче на́ш, яко ши́пок многоцве́тен, и, я́ко кри́н, облагоуха́л еси́ со́вести ве́рных доброде́тельми и чудесы́. Те́мже, преподо́бне, отжени́ от на́с стра́сти смердя́щия.

И ны́не и при́сно и во ве́ки веко́в. Ами́нь.

Богородичен: Просвети́, Чи́стая Де́во, се́тующее се́рдце мое́ при́сно преступле́ньми и жите́йскими молва́ми, не оста́ви мене́ враго́м бы́ти в ра́дость, я́ко да сла́влю Тя́ и любо́вию пою́, Препе́тая.

Свети́лен:

Мирска́го пристра́стия, я́ко от скве́рны уклони́лся еси́, и хвра́стие страсте́й веле́нием Бо́жиим я́ко огне́м попали́л еси́, и а́лчбою пло́ть свою́ увяди́л еси́, о́тче, и небе́сною сла́вою со Ангелы обогати́лся еси́: те́мже непреста́нно моли́ о на́с Христа́ Бо́га, преподо́бне Марти́рие.

Молитва

О, па́стырю до́брый, наста́вниче наш, преподо́бне о́тче Марти́рие! Услы́ши е́же к тебе́ ны́не приноси́мое моле́ние на́ше. Ве́мы бо, я́ко ду́хом с на́ми пребыва́еши. Ты у́бо, преподо́бне, я́ко име́я дерзнове́ние ко Влады́це, Иису́су Христу́, Бо́гу на́шему, и ко Пречестне́й Богома́тери, бу́ди хода́тай и моли́твенник те́плый о оби́тели сей, ю́же возгради́л еси́, и о нас, недосто́йных рабе́х, живу́щих в ней, ея́же ты просвети́тель сый и нача́льник, богосо́бранному твоему́ бра́тству помо́щник и засту́пник, я́ко да твои́м предста́тельством и моли́твами невреди́мы на ме́сте сем пребу́дем; от бесо́в же и злых челове́к ненаве́тованны и от всех бед и напа́стей свобо́дни сохрани́мся. Всем же отвсю́ду приходя́щим во святу́ю оби́тель твою́ и моля́щимся тебе́ с ве́рою и покланя́ющимся ра́це моще́й твои́х, о е́же изба́витися от вся́кия ско́рби, боле́зни и напа́сти, ми́лостивне поспеши́, дарова́ти же правосла́вным мир, тишину́, благоде́нствие и изоби́лие плодо́в земны́х; и о всех нас те́плый предста́тель ко Го́споду и помо́щник душа́м на́шим бу́ди, е́же отпусти́тися согреше́ниям на́шим и моли́твами твои́ми, свя́те, изба́витися нам ве́чнаго муче́ния и сподо́битися ца́рствия со все́ми святы́ми, да сла́ву, благодаре́ние и поклоне́ние возсыла́ем еди́ному Бо́гу, в Тро́ице сла́вимому, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.