24 ноября.

Канон преподобному исповеднику Феодору Студиту.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, мона́шествующих богодухнове́нное удобре́ние, Фео́доре прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Кано́н преподо́бнаго. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Феодоре, моли́ Бо́га о нас.

Светолу́чными блиста́нии Ду́ха Свята́го освеща́емь, всесве́тлый сто́лп, о́тче, бы́л еси́, путеводя́, богоглаго́ливе, к земли́ обеща́ния богому́дренно тща́щияся, таи́нниче неизрече́нных Фео́доре.

Припев: Преподобне отче Феодоре, моли́ Бо́га о нас.

Всера́достно неосла́бными манове́нии к Бо́гу исходя́, пре́жде конца́ яви́лся еси́, ме́ртвостию жизноно́сною оде́ян, преподо́бне, и жи́знь нестаре́ющуюся ны́не прия́л еси́ досто́йно, о́тче богоно́се Фео́доре.

Припев: Преподобне отче Феодоре, моли́ Бо́га о нас.

Победи́в страсте́й игра́ния и мучи́телей стремле́ния ю́ношески, блаже́нне, вся́ укори́л еси́, му́жество показа́в, Христо́в о́браз чти́ти науча́я, богоприя́тне, и святы́х воображе́ния.

Сла́ва Отцу́ и Сы́ну и Свято́му Ду́ху:

Очище́нною мы́слию, всему́дре, богодухнове́нным писа́нием поуча́яся, бога́тство доброде́телей собра́л еси́ и благоче́стия догма́ты, виде́нием обогати́лся еси́ и жития́ све́тлостию, возсия́в обою́ду, преподо́бне.

И ны́не и при́сно и во ве́ки веко́в. Ами́нь.

Богородичен: Сло́ва Бо́жия воплоще́нна родила́ еси́, Иже пре́жде безпло́тнаго, богому́жно в ми́ре пожи́вшаго преесте́ственно, Всенепоро́чная Богоро́дице Де́во. Те́м Тя́ вси́ почита́ем, по Бо́зе Предста́тельницу на́шу.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Феодоре, моли́ Бо́га о нас.

Вжиля́емь Христо́вым, всеблаже́нне, всеору́жием, я́зв боле́зни претерпе́л еси́, ураня́емь лю́те и в темни́це заключа́емь, я́ко о́бщник страсте́й и Ца́рствия бы́л еси́.

Припев: Преподобне отче Феодоре, моли́ Бо́га о нас.

Богопокрыва́емь я́ве и Того́ ре́вностию разжига́емь, скве́рная уче́ния беззако́нных разруши́л еси́ твои́ми уче́нии, всему́дре, благода́тию бо от Бо́га, о́тче, обогати́вся досто́йно.

Сла́ва Отцу́ и Сы́ну и Свято́му Ду́ху:

В виде́нии де́лателен, в дея́нии богосло́в бы́л еси́ на́м, богоглаго́ливе, по́стник учи́телен, священному́ченик сла́вен, Правосла́вия сто́лп, Це́ркве утвержде́ние.

И ны́не и при́сно и во ве́ки веко́в. Ами́нь.

Богородичен: Соприсносу́щное Отцу́ и Ду́ху Бо́г Сло́во обнови́ти восхоте́в родонача́льника, по Ипоста́си того́ из Тебе́, Чи́стая, прия́т, святе́йшу все́х Тя́, Богома́ти, обре́т.

Седа́лен преподо́бнаго, гла́с 3.

Боже́ственными догма́ты обогати́вся, ве́ру соблю́л еси́ правосла́вия, предбе́дствовав за ню́, Фео́доре, в заточе́ниих пострада́в и бие́ниих, в темни́цах претерпе́в озлобле́ния, о́тче преподо́бне, Христа́ Бо́га моли́ дарова́ти на́м ве́лию ми́лость.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Феодоре, моли́ Бо́га о нас.

Да́р Бо́жий да́лся еси́ ми́ру тезоимени́т, бога́тыми дарми́ сия́ющ, я́ко исто́чник име́яй и́стинно озаре́ний су́щих, блаже́нне Фео́доре. Те́м учи́телем, по́стником и свиде́телем сликовствова́ти мно́жеству сподо́бился еси́.

Припев: Преподобне отче Феодоре, моли́ Бо́га о нас.

О, тве́рдаго и кре́пкаго твоего́ противле́ния! Имже мучи́телей свире́пство попра́л еси́, его́же ра́ди я́вственно ты́ па́че ума́ благонача́льства коне́чное блаже́нство пости́гл еси́, богому́дре, со безтеле́сными поя́: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Глаго́л Бо́жий в тебе́ я́вственнейше все́лься, догма́тов, прему́дре Фео́доре, ре́ки то́чит оби́льно: те́ми же ны́не наслажда́ющеся, ученицы́ твои́, богодухнове́нне, благода́рно вопие́м гла́сы немо́лчными: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Всего́ в Тебе́ обновля́ет челове́ка, ве́сь всему́, Всечи́стая, соединя́емь, Иже, Оте́ческих не́др не отсту́пль, и в Твое́ чре́во всели́тися изво́ли, бога́тством благоутро́бия во́льно обнища́в и обогати́в ми́р Божество́м.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Феодоре, моли́ Бо́га о нас.

Ум, и ду́шу, и те́ло сло́вом очи́стив, хра́м всече́стен Бо́га все́х бы́л еси́, жи́в же и одушевле́н, благово́ния же́ртву, всего́ себе́ Христу́ принося́, о́тче, иере́й и же́ртва бы́в.

Припев: Преподобне отче Феодоре, моли́ Бо́га о нас.

Осия́емь, блаже́нне, заре́ю Ду́ха, все́м возблиста́л еси́ богосло́вным язы́ком Тро́ичный Све́т пречи́стый, воплоще́ния же е́же па́че ума́ Бо́жия Сло́ва неизрече́нное, о́тче, та́инство.

Сла́ва Отцу́ и Сы́ну и Свято́му Ду́ху:

Разу́мно со Ангелы ны́не водворя́яся, Христа́ моли́ страсте́й и бе́д изба́вити блажа́щия и чту́щия всечестну́ю и боже́ственную па́мять страда́ний твои́х, богоно́се Фео́доре.

И ны́не и при́сно и во ве́ки веко́в. Ами́нь.

Богородичен: Неизглаго́ланным, Де́во, о́бразом Сы́н Бо́жий, в Тя́ всели́вся, Челове́к быва́ет, пре́жде ве́к из Отца́ возсия́вый, челове́ка от тли́ избавля́ет и к жи́зни и нетле́нию возведе́, я́ко еди́н Благоутро́бен.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Феодоре, моли́ Бо́га о нас.

Целому́дренно твою́ жи́знь, священноглаго́льниче, соверши́л еси́, пра́вдою же украси́вся, му́жеством и му́дростию, красне́йшую колесни́цу доброде́телей сочета́л еси́ себе́, всеблаже́нне преподо́бне.

Припев: Преподобне отче Феодоре, моли́ Бо́га о нас.

Благоуха́ют благоле́пно догма́тов боже́ственная словеса́ твоя́ и из глубины́ злы́х ересе́й вся́ возво́дят, всему́дре, правосла́вия к превы́шней кра́йности.

Сла́ва Отцу́ и Сы́ну и Свято́му Ду́ху:

Возсия́ тебе́ све́т, и сего́, о́тче, сопру́г весе́лие ны́не све́тлое я́ве: я́ко фи́никс, бо процве́л еси́, всеблаже́нне Фео́доре, и, я́ко ке́др, умно́жился еси́, досточу́дне.

И ны́не и при́сно и во ве́ки веко́в. Ами́нь.

Богородичен: Да изба́вимся от лю́тых прегреше́ний мольба́ми Твои́ми, Богороди́тельнице Чи́стая, и да улучи́м, Пресвята́я, Боже́ственнаго осия́ния из Тебе́ неизрече́нно воплоще́ннаго Сы́на Бо́жия.

Конда́к преподо́бнаго, гла́с 2.

По́стническое и равноа́нгельное житие́ твое́ страда́льческими уясни́л еси́ по́двиги и Ангелом совсе́льник, богоблаже́нне, яви́лся еси́, Фео́доре. С ни́ми Христу́ Бо́гу моля́ся не преста́й о все́х на́с.

Икос:

По́стников све́тлую добро́ту, Це́ркве Христо́вы утвержде́ние, ны́не Фео́дора восхва́лим: но́вый бо сто́лп о́гнен яви́ся, попаля́я главы́ ерети́чествующих, ве́рных же просвеща́я ду́ши к ве́ре пра́вей, в Боже́ственный гра́д, вы́шний Иерусали́м, я́коже друга́го Изра́иля, вводя́. К нему́же согла́сно возопие́м: всеблаже́нне о́тче, не забу́ди, Христу́ моля́ся непреста́нно о все́х на́с.

Пе́снь 7.

Ирмос: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Феодоре, моли́ Бо́га о нас.

Ви́дев Прови́дец твоего́ ра́зума чистоту́, слове́сных тя́ ове́ц па́стыря, о́тче, предлага́ет, Ему́же ны́не, всеблаже́нне, зове́ши, Фео́доре, веселя́ся: благослове́н Бо́г оте́ц на́ших.

Припев: Преподобне отче Феодоре, моли́ Бо́га о нас.

Боже́ственному подо́бию о́браза, треблаже́нне, вочелове́чения Христо́ва, покланя́яся, пребыва́еши, богобо́рцем противля́яся да́же до кро́ве и поя́, Фео́доре: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Сло́во твое́ со́лию услажде́но яви́ся, всебога́те, и житие́ твое́, о́тче, просвеще́но заре́ю Ду́ха, Имже ны́не блиста́яся, вопие́ши, ра́дуяся: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Се́ ны́не испо́лнися Дави́да боже́ственнаго боже́ственное прорече́ние: мо́лятся и́стинно Твоему́ лицу́, Богороди́тельнице Чи́стая, иму́щии бога́тство благода́ти ны́не, благословя́ще Бо́га оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Феодоре, моли́ Бо́га о нас.

Прогна́ны показа́л еси́, богоно́се Фео́доре, обрета́тели злочести́вых ересе́й, уча́ пречи́стый чти́ти о́браз Христо́в, покланя́тися же и че́стно почита́ти богому́дренно и пе́ти Влады́це: свяще́нницы, благослови́те, лю́дие, превозноси́те Его́ во ве́ки.

Припев: Преподобне отче Феодоре, моли́ Бо́га о нас.

Во все́м житии́ твое́м, богоглаго́ливе Фео́доре, правосла́вия путево́ждь бы́л еси́, свети́льник светле́йший, богови́дный учи́тель, о́браз мона́хов и изве́стен законопи́сец, науча́я воспева́ти: свяще́нницы, благослови́те Влады́ку Христа́ и превозноси́те Его́ во ве́ки.

Припев: Преподобне отче Феодоре, моли́ Бо́га о нас.

На земли́ подвиза́лся еси́ благоче́стия защи́тник и непра́вды нелжи́вый обличи́тель, всеблаже́нне, бы́в, я́ко да́р Бо́жий, и на небесе́х пра́вды венча́лся еси́ венцы́, тече́ние соверши́л еси́ и ве́ру соблю́л еси́, превознося́ Христа́ во ве́ки.

Сла́ва Отцу́ и Сы́ну и Свято́му Ду́ху:

Смы́слом у́м украси́л еси́, целому́дрием жела́ние, я́ростное же му́жеством препоя́сал еси́, Фео́доре всему́дре, пра́вдою испра́вив священноле́пно душе́вныя твоя́ си́лы, согла́сно воспева́я: де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Благослове́нная Пречи́стая, души́ моея́ стру́ны и греха́ я́звы очи́сти: Бо́га бо ро́ждшая, су́щаго над все́ми, Отрокови́це Чи́стая, из де́вственныя неискусобра́чныя утро́бы. Его́же благослови́т вся́ тва́рь и превозно́сит во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Феодоре, моли́ Бо́га о нас.

Тече́ньми твои́х сле́з, я́ко по́стник, и исто́чники крове́й, я́ко свиде́тель Христо́в, просвети́вся, сия́еши обою́ду све́тло, пра́вдою, преподо́бне, оде́ян, я́ко свяще́нник, в боже́ственных жи́тельствуеши ли́цех, ны́не просвеща́емь в нехо́дных, треблаже́нне.

Припев: Преподобне отче Феодоре, моли́ Бо́га о нас.

Чи́сте твое́ житие́ преше́д, во святы́х свята́я селе́ниих ны́не живе́ши, вене́ц благоле́пия прие́м и ца́рства одея́ние великоле́пное же и свяще́нное, в ни́хже ны́не, озаря́емь, предстои́ши неве́стнику, наслажда́яся обоже́ния.

Припев: Преподобне отче Феодоре, моли́ Бо́га о нас.

Ви́дети сподо́бился еси́ благи́х исто́чник, богоно́се Фео́доре, я́ко проше́д житие́ боже́ственнейшее и́стинно, от мирска́го сво́йства житие́м чи́стым у́м свободи́в, я́ко свиде́тель и страстоно́сец бы́л еси́, свяще́нне.

Сла́ва Отцу́ и Сы́ну и Свято́му Ду́ху:

Глаго́л твои́х веща́ние, дарова́ние Бо́жие, на́м всеслы́шан бы́сть, всехва́льне, я́ко гро́м, вселе́нныя в конце́х, и, я́коже ре́ки, истека́ют твои́х уче́ний списа́ния. Те́м тя́ богосло́ва и богоглаго́льника досто́йно имену́ем.

И ны́не и при́сно и во ве́ки веко́в. Ами́нь.

Богородичен: Яви́лася еси́, о Де́во Ма́ти Бо́жия, па́че естества́ ро́ждши в телеси́ благо́е Сло́во, Его́же Оте́ц от се́рдца Своего́ отры́гну пре́жде все́х ве́к я́ко Бла́г, Его́же ны́не и теле́с превы́шша разумева́ем, а́ще и в те́ло облече́ся.

Свети́лен преподо́бнаго:

Яко сто́лп одушевле́н, яви́лся еси́ догма́тов правосла́вия благоче́стно, обличи́в иконобо́рцов пре́лесть, те́м и, страда́нием соверши́в испове́дание, Фео́доре, просла́вился еси́.

Молитва преподобному Феодору Студиту

О, свяще́нная главо́, преподо́бне о́тче, преблаже́нне а́вво Фео́доре! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу! Помяни́ ста́до твое́, е́же сам упасл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас недосто́йных у Престо́ла Вседержи́теля, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со А́нгельскими во́инствами, со Безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в, возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Бо́гу на́шему Иису́су Христу́; Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.