23 ноября

Канон святому мученику Оресту Севастийскому, врачу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4

Удо́м усекнове́ние терпе́л еси́/ и о́гненную лю́тую му́ку, му́чениче,/ подви́гся, всесла́вне,/ венце́м я́ве увязе́ся нетле́нным, преблаже́нне,/ Престо́лу же предстои́ши Святы́я Тро́ицы,/ Ю́же помоли́, да спасе́т ны,/ му́чениче Оре́сте,/ ве́рою пою́щим тя.

Канон, глас 2.

Песнь 1.

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты Еги́петския,/ я́ко просла́вися.

Припев: Святый мучениче Оресте, моли́ Бо́га о нас.

Боже́ственными блиста́ем всегда́ светлостьми́, прехва́льне,/ светоно́сное твое́ пра́зднество чту́щая озари́/ и из тьмы лю́тыя изведи́.

Припев: Святый мучениче Оресте, моли́ Бо́га о нас.

Христо́ва Боже́ственная любы́ разжже́ и си́льна тя сотвори́,/ всю пожже́ную опаля́юща та́йну и́дольскаго гне́ва,/ му́чениче вседо́блий.

Сла́ва Отцу́ и Сы́ну и Свято́му Ду́ху:

Тща́нием и терпе́нием обличи́ беззако́нствующая,/ чести́ ну́дяща тя, страстоте́рпче Оре́сте,/ дела́ рук челове́ческ – безду́шныя куми́ры.

И ны́не и при́сно и во ве́ки веко́в. Ами́нь.

Богородичен: Тя, Бо́жий пречи́стый храм, молю́, Пречи́стая,/ оскве́рншееся мое се́рдце сластьми́ нечи́стыми очи́сти хода́тайством Свои́м.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Припев: Святый мучениче Оресте, моли́ Бо́га о нас.

Укрепля́ем си́лою Паракли́товою,/ предстоя́ше судя́щему беззако́нно,/ и сего́ слове́с свои́х си́лою, преблаже́нне, посрами́/ и, поя́, глаго́лаше:/ несть свя́та, я́коже Бо́га на́шего, и несть пра́ведна, па́че Тебе́, Го́споди.

Припев: Святый мучениче Оресте, моли́ Бо́га о нас.

Сло́во твое́, житие́м просвеще́но,/ житие́ твое́, Сло́вом разжже́но,/ мно́гия на свет благоче́стия приведе́, му́чениче многостра́стне,/ и с ни́ми пое́ши:/ несть свя́та, я́коже Бог наш, и несть пра́ведна, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Возвы́сима беззако́нна безу́мием низве́рже му́жеством и терпе́нием,/ вознесе́ же ся к Бо́гу венцено́сец, Оре́сте сла́вне, поя́ше:/ несть свя́та, я́коже Бог наш, и несть пра́ведна, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: Зачала́ еси́ во утро́бе Свое́й, Богома́ти, Зижди́теля и Бо́га всех/ и Сего́ родила́ еси́, па́че сло́ва плоть бы́вша,/ сего́ ра́ди Ти взыва́ем:/ несть свя́та, я́коже Бог наш, и несть пра́ведна, па́че Тебе́, Го́споди.

Песнь 4.

Ирмос: Прише́л еси́ от Де́вы, не хода́тяй, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка./ Тем зову́ Ти: сла́ва си́ле Твое́й, Го́споди.

Припев: Святый мучениче Оресте, моли́ Бо́га о нас.

Не поколеба́ша столпа́ души́ твоея́, сте́кшеся, пото́ци му́ченичестии,/ му́чениче Оре́сте блаже́нне,/ на ка́мене бо утверже́н бысть Госпо́дня любве́, достосла́вне.

Припев: Святый мучениче Оресте, моли́ Бо́га о нас.

Глаго́л твои́х воззре́ти све́та томи́тель не возмо́же,/ в нощи́ ше́ствуя неразу́мия,/ тем, ра́нствуя, тя сы́на све́та дне сотвори́л есть.

Сла́ва Отцу́ и Сы́ну и Свято́му Ду́ху:

Укрепи́ тя Иису́с Бог благода́тию,/ му́ками оскорбля́ема, и ра́нами разруша́ема,/ и пропина́ема неми́лостивно, страстоте́рпче преслову́щий.

И ны́не и при́сно и во ве́ки веко́в. Ами́нь.

Богородичен: Тя, Пречи́стая, Авваку́м го́ру нарече́ осене́ну,/ из нея́же про́йде Еди́но Сло́во, вопло́щся,/ Челове́к быв премно́гим милосе́рдием и Человеколю́бец.

Пе́снь 5

Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Припев: Святый мучениче Оресте, моли́ Бо́га о нас.

Жезло́м сокруша́емо блаже́нное все те́ло твое́,/ я́ко си́лен, терпе́л еси́, показу́я, Оре́сте, ве́ру,/ явля́яся, взыва́ше, Оре́сте, сла́вне:/ па́че Тебе́, ино́го бо́га не зна́ем.

Припев: Святый мучениче Оресте, моли́ Бо́га о нас.

Поги́бели бо́ги е́ллинския преда́л еси́/ святы́ми твои́ми моли́твами к Творцу́, Оре́сте,/ ра́ны претерпе́л еси́, зело́ разсека́ем,/ пло́ти твоея́ ко́же отдира́еме.

Сла́ва Отцу́ и Сы́ну и Свято́му Ду́ху:

Еди́ну Зарю́ Триипоста́сну су́щу,/ Еди́но Существо́ и Еди́но Госпо́дство возвеща́я Пребоже́ственныя и Несозда́нныя Тро́ицы,/ лжеиме́нныя бо́ги сокруши́,/ и́дольская тре́бища низложи́л еси́.

И ны́не и при́сно и во ве́ки веко́в. Ами́нь.

Богородичен: Восто́к Со́лнечныя сла́вы я́вльшися, Отрокови́це,/ на за́пад челове́ческаго отринове́на существа́ бы́вша,/ Сего́ ражда́еши, вся просвеща́ющаго,/ вся от но́щи злы изъе́млющаго.

Песнь 6.

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Припев: Святый мучениче Оресте, моли́ Бо́га о нас.

Кропле́нием честны́я твоея́ кро́ве вода́ скве́рная преста́,/ бесо́м умовре́дно приноси́ма,/ страстоте́рпче Христо́в до́блий.

Припев: Святый мучениче Оресте, моли́ Бо́га о нас.

Душа́м и те́лом врача́ тя, му́чениче, обре́тше,/ от страсте́й избавля́емся, и от искуше́ния, и ско́рби/ благоприя́тными Боже́ственными моли́твами.

Сла́ва Отцу́ и Сы́ну и Свято́му Ду́ху:

Свы́ше истка́ную благода́ть с оде́нием телесе́ оде́жду восприи́м,/ обнажи́л еси́ злочести́вых полки́, пребога́те.

И ны́не и при́сно и во ве́ки веко́в. Ами́нь.

Богородичен: Ми́лости Твоея́ мя сподо́би, неми́лостиваго,/ и зло́бием одержи́ма, и страсте́м прилежа́ща,/ Пречи́стая Де́во Богоневе́стная.

Песнь 7.

Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Припев: Святый мучениче Оресте, моли́ Бо́га о нас.

Кро́вными ка́плями безбо́жный огнь угаси́л еси́,/ ту́чами ди́вными, достосла́вне, изсо́хшая страстьми́ всегда́ прохлажда́еши,/ вопию́щая ве́рно, взыва́юща:/ благослове́н еси́, Бо́же оте́ц на́ших.

Припев: Святый мучениче Оресте, моли́ Бо́га о нас.

Чу́дом глубина́, цельба́м река́,/ крин, излива́я всем здра́вие, всем оставле́ние от скве́рных,/ явля́ется, му́чениче страстоте́рпче Оре́сте, ра́ка твои́х моще́й,/ е́йже покланя́ющеся благочести́вно, тя блажи́м.

Сла́ва Отцу́ и Сы́ну и Свято́му Ду́ху:

Разреши́вся от страсте́й теле́сных, прему́дре,/ му́ки ра́ди к скоти́не привя́зан бысть, и ведо́м, и суро́во влеко́м./ Те́м от те́ла разреши́ся/ и Бо́гови чи́стее и коне́чное себе́, му́чениче, приказа́л еси.

И ны́не и при́сно и во ве́ки веко́в. Ами́нь.

Богородичен: Естество́м Бог и естество́ прия́т из Тебе́, Чи́стая, челове́ческо/ и плоть яви́ся па́че ума́ мно́гою благосты́нею,/ спасти́ восхоте́в челове́ки./ Его́ же пою́ще, взыва́ем:/ благослове́н еси́, Бо́же оте́ц на́ших.

Песнь 8.

Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте дела́ я́ко Го́спода/ и превозноси́те во вся ве́ки.

Припев: Святый мучениче Оресте, моли́ Бо́га о нас.

Па́че вре́менныя жи́зни ве́чную, прему́дре, возлюби́в,/ умира́ющая, Оре́сте, истле́ющая пло́ти ника́коже не пощаде́, блаже́нне,/ тем му́ки претерпе́л еси́ до́бле.

Припев: Святый мучениче Оресте, моли́ Бо́га о нас.

Тя, а́гнца Христо́ва, я́ко волк злый, растерза́я ра́нами, гони́тель/ же́ртву прия́тну святу́ю, Боже́ственное сотвори́ заколе́ние,/ досто́йно Вы́шний Влады́чни трапе́зе.

Сла́ва Отцу́ и Сы́ну и Свято́му Ду́ху:

Колесни́ца Сло́ву бысть седя́щему, преблаже́нне./ Тем привя́зан ко́нем веде́нием лю́тым,/ тече́нием же ну́ждным издше́/ и к нестаре́ющемуся пути́ вари́ся107 с ра́достию.

И ны́не и при́сно и во ве́ки веко́в. Ами́нь.

Богородичен: Святы́ми Тя гла́сы провозвести́ша Бо́жию честни́и проро́ци су́щу Ма́терь/ странноле́потным рождество́м всех тва́рей Владу́щему./ Тем же Тя пое́м, Пречи́стая Девома́ти.

Песнь 9.

Ирмос: От Бо́га Бо́га Сло́ва/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми величае́м.

Припев: Святый мучениче Оресте, моли́ Бо́га о нас.

Победи́в томи́теля, по мно́гах му́ках прии́де к Бо́гу,/ с ра́достию побе́дный вене́ц прии́м,/ я́ко ору́жник до́блий, яко́ вели́кий хра́бор,/ избра́нный Христо́в во́иник, Оре́сте блаже́нне.

Припев: Святый мучениче Оресте, моли́ Бо́га о нас.

На Небесе́х лику́еши со А́нгелы, блаже́нне,/ и глаша́еши с ни́ми ра́достно:/ Свят, Свят, Свят Оте́ц Вседержи́тель,/ Сын, Единосу́щный Отцу́, и Святы́й Дух –/ Тро́ице Всеси́льна.

Сла́ва Отцу́ и Сы́ну и Свято́му Ду́ху:

Сра́дуешися с ли́ками А́нгельскими, му́чениче,/ преподо́бных, проро́к и святи́тель, му́чениче,/ с ни́ми моли́ся чту́щим тя любе́зно дарова́ти очище́ние грехо́в/ и вся́ких бед, Оре́сте, изба́ви.

И ны́не и при́сно и во ве́ки веко́в. Ами́нь.

Богородичен: Я́ко Бо́гу Тя Ма́терь, Херуви́м вы́шшу, Пречи́стая Де́во,/ молю́, окая́нное се́рдце мое́ боле́зненыя стра́сти изцели́,/ изба́ви мя от огня́ в День Су́дный, осужде́ния досто́йнаго.

Молитва

О святы́й уго́дниче Бо́жий, му́чениче Оресте! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.